Author: އަޙްމަދް އަޙްނަފް

ގަދަވަޔާއެކު މާލޭ އޯކިޑް މަގުގައި ހުރި ގަހެއް ވެއްޓި މަގު ބަންދުވެއްޖެއެވެ.

 

ވެއްޓިފައިވަނީ، އޯކިޑްމަގާއި އާބުރުޒު ހިނގުން ގުޅޭ ސަރަހައްދުގައި ހުރި ގަހެކެވެ. އެ ގަސް މަގުމައްޗަށް ވެއްޓި އެ ކަންމަތިން ފެށިގެން މަގު ވަނީ ބަންދު ވެފައެވެ.

 

ފުލުހުން ބުނީ، ފުލުހުންނާއި ކަމާ ގުޅުންހުރި އިދާރާތަކުން އެ ސަރަހައްދުގައި ހަރަކާތްތެރިވަމުންދާ ކަމަށެވެ.

 

ރާއްޖޭގެ ބޮޑު ސަރަހައްދަކަށް މޫސުން ގޯސްވެފައިވާއިރު، މާލެއަށްވެސް ވަރަށް ވައިގަދަވެ އަންނަނީ ބޯކޮށް ވާރޭވެހެމުންނެވެ.

 

އޭގެ ސަބަބުން މާލޭގެ މަގުތަކުގައި ފެންބޮޑުވެ، ފެން ހިންދުމުގެ މަސައްކަތް ކަމާބެހޭ އިދާރާތަކުން އަންނަނީ ކުރަމުންނެވެ.

 

މެޓް އޮފީހުންވެސް ވަނީ، މޫސުން ގޯސްވެ ބޯކޮށް ވާރޭވެހި ގުގުރާނެ ކަމަށް ލަފާކޮށް ހއ އިން ލ އަށް ހުދު ސަމާލު ނެރެފައެވެ. އެ ސަމާލުގައި ވަނީ 19 މޭލާއި 24 މޭލަށް ވައިޖެހި ވިލާގަނޑުގައި 45 މޭލަށް ގަދަވާނެ ކަމަށް ލަފާކޮށް މޫސުމަށް ސަމާލުވުމަށް އެދިފައެވެ.

ރާއްޖޭގެ އެކި ސަރަހައްދުތަކަށް ބޯކޮށް ވިއްސާރަ ކުރުމާއި، ގަދަ ވަޔާއެކު ކަނޑުތައް ގަދަވެފައިވާ ކަމަށް ރިޕޯޓްކުރެވިފައިވާއިރު، މި ހާލަތުގައި ކަނޑުގެ އެއްވެސް ކުޅިވަރެއްގައި ބައިވެރިނުވުމަށް މޯލްޑިވްސް ޕޮލިސް ސަރވިސްއިން އިރުޝާދު ދެއްވައިފިއެވެ.

 

ފުލުހުން ބުނެފައިވަނީ، މޫސުމީ މި ހާލަތުގެ ސަބަބުން ކަނޑުދަތުރުފަތުރު ކުރުމާއި، ކަނޑުގެ ކުޅިވަރުތަކުގައި ބައިވެރިވުމަކީ ނުރައްކާތެރި ކަމެއް ކަމަށެވެ. ރައްޔިތުންގެ ރައްކާތެރިކަމަކީ ފުލުހުން އެންމެ އިސްކަންދޭ ކަމެއް ކަމަށް ވިދާޅުވެ، މޫސުން ރަނގަޅުވަންދެން ކަނޑުގެ އެއްވެސް ހަރަކާތެއްގައި ނުވަތަ ކަނޑުދަތުރުފަތުރެއްގައި ބައިވެރިނުވުމަށް ވަނީ އިލްތިމާސްކުރައްވާފައެވެ.

 

ފުލުހުންގެ އިރުޝާދުގައި ބުނެފައިވަނީ، ރާއްޖޭގެ ހުރިހާ ސަރަހައްދެއްގައިވެސް މިވަގުތު މޫސުން ގޯސްވެ، ވިއްސާރަވެ، ކަނޑުތައް ގަދަވެފައިވާ ކަމަށެވެ. މިހާލަތުގައި ކަނޑުމައްޗަށް ނުކުތުމަކީ ބޮޑެތި ނުރައްކާތަކާ ކުރިމަތިވެދާނެ ކަމެއްކަމަށެވެ.

 

މޯލްޑިވްސް މެޓިއޮރޮލޮޖިކަލް ސަރވިސް (މެޓް އޮފީސް) އިން ދޫކުރާ މޫސުމާ ބެހޭ އެންމެ ފަހުގެ މައުލޫމާތުތަކަށް ސަމާލުވެ، ރައްކާތެރިކަމަށް އިސްކަންދިނުމަށް ފުލުހުން ވަނީ އިރުޝާދު ދެއްވާފައެވެ. މޫސުން ރަނގަޅުވެ، ކަނޑުތައް މަޑުވަންދެން ކަނޑުގެ ހަރަކާތްތައް މަޑުޖައްސާލުމަށް ފުލުހުން ވަނީ ހުރިހާ ފަރާތްތަކަށްވެސް ނަސޭހަތްތެރިވެފައެވެ.

ހޯކްސް ކުންފުނީގެ ތެޔޮ ބޯޓެއްގައި 8،400 ސިނގިރޭޓު ކާޓަން ނުވަތަ 84،000 ސިނގިރޭޓު ފޮށި ރާއްޖެ އަށް ވަގަށް އެތެރެކުރި މައްސަލާގައި ދައުވާ ކުރަން ނިންމީ ތިން މީހެއްގެ މައްޗަށް ކަމަށާއި އެ ކުންފުންޏާއި އިތުރު މީހެއްގެ މައްޗަށް ޖިނާއީ ދައުވާއެއް ކުރެވޭ ވަރަށް ހެއްކާއި ގަރީނާ ކަސްޓަމްސް އިން ތަހުގީގުކޮށް ފޮނުވި މައްސަލާގައި ނެތް ކަަމަށް ޕްރޮސިކިއުޓާ ޖެނެރަލްގެ އޮފީހުން ބުނެފިއެވެ.

 

މިދިޔަ އަހަރުގެ އޮކްޓޫބަރު މަހު ރާއްޖެ އަށް ވަގަށް ސިނގިރެޓް އެތެރެކުރަން އުޅުނު މައްސަލާގައި ޕީޖީ އޮފީހުން މިއަދު ބުނީ، ދައުވާ ކުރުމުގެ މުއްދަތު އަދި ހަމަނުވާތީ، ހޯކްސް ކުންފުނީގެ މައްޗަށް އިތުރު ހެކި ލިބިއްޖެ ނަމަ ދައުވާ ކުރުމުގެ ފުރުސަތު އޮންނާނެ ކަމަށެވެ.

 

އެ މައްސަލާގައި ދައުވާ ނުކުރަން ނިންމީ ހޯކްސްގެ އިތުރުން އިސްމާއިލް އާދަމް ކިޔާ މީހެއްގެ މައްޗަށެވެ. އެހެންވެ، އެ މައްސަލާގައި ހިމެނޭ އެ ދެ ފަރާތުގެ ބައި ކަސްޓަމްސް އަށް މިދިޔަ ޖޫން 10 ގައި އަނބުރާ ފޮނުވާލާފައިވާ ކަމަށް ޕީޖީ އޮފީހުން ބުންޏެވެ.

 

ޕީޖީ އޮފީހުން ބުނީ، މިހާރު ދައުވާ ކޮށްފައި ވަނީ ކަސްޓަމްސް އިން ތަހުގީގުކޮށް ހުށަހެޅި މައްސަލައެއްގައި ކަމަށާއި އެ މައްސަލައާ ގުޅުން ހުރި އިތުރު ޖިނާއީ ތަހުގީގެއް ފުލުހުން ކުރަމުން އަންނަކަމަށެވެ.

 

“އެ މައްސަލަ މި އޮފީހަށް ހުށަހެޅުމުން، މި މައްސަލާގައި ތުހުމަތު ކުރެވުނު ކުންފުނީގެ މައްޗަށް ދައުވާ ކުރުމާ މެދު ގޮތެއް ނިންމާނެ،” ޕީޖީ އޮފީހުގެ އޮފިޝަލް ވިދާޅުވިއެވެ.

 

ރާއްޖެ އަށް ގިނަ އަދަދެއްގެ ސިނގިރެޓް ވަގަށް އެތެރެކުރަން އުޅުނު މައްސަލައިގައި ފިޔަވަޅު ނޭޅި ދިގުލައިގެންދާތީ ސަލާމަތީ ހިދުމަތްތަކާ ބެހޭ ރައްޔިތުންގެ މަޖިލިހުގެ ކޮމިޓީން މި ހަފުތާގައި ކަންބޮޑުވުން ފާޅުކޮށްފައިވަނިކޮށް، ޕީޖީ އޮފީހުން ރޭ ބުނީ، ދައުވާ ކުރުމާ ގުޅޭ މަރުހަލާތައް މިދިޔަ އަހަރުގެ އޮކްޓޫބަރު މަހު ފެށި ކަމަށެވެ. އެގޮތުން އޮކްޓޫބަރ 30 ގައި ޑިއުޓީ ޕްރޮސިއުޝަނަށް މައްސަލަ ހުށަހަޅައި ތަހުގީގު ކުރިއަށް ގެންދާނެ ގޮތުގެ އިރުޝާދު ހަތަރު ފަހަރެއްގެ މަތިން ލިޔުމުން ދިން ކަމަށް ޕީޖީ އޮފީހުން ބުންޏެވެ.

 

ޕީޖީ އޮފީހުގެ ޓައިމްލައިނުން ދައްކާ ގޮތުން ނަމަ ވަގަށް ސިނގިރޭޓް އެތެރެކުރި މައްސަލައިގައި ކަސްޓަމްސް އިން ކުރި ތަހުގީގު ނިމި އެ އޮފީހަށް މައްސަލަ ބަލައިގަންނަން ނިންމީ މި އަހަރުގެ އޭޕްރީލް 22 ގަ އެވެ. ތަހުގީގުގައި ތުހުމަތުތައް ކޮށްފައި ވަނީ 17 މީހަކާއި ހޯކްސް ކުންފުނީގެ މައްޗަށެވެ.

 

“ތުހުމަތު ކުރެވޭ އިންޑިއާގެ 11 މީހުންނާއި ބަންގްލަދޭޝްގެ ދެ މީހުން ކުށަށް އިއުތިރާފުވެ، ނަސޭހަތުގެ އެއްބަސްވަށް އެދިފައިވާތީ، އެ މީހުންގެ މައްޗަށް ދައުވާ ކުރުމުގެ ބަދަލުގައި ނަސޭހަތުގެ އެއްބަސްވުމެއް ވުމަށް ނިންމުނު،” ޕީޖީ އޮފީހުގެ އޮފިޝަލް ވިދާޅުވިއެވެ.

 

އެ މީހުންނާ އެކު އެއްބަސްވުން ހެދީ އޭނާ ވިދާޅުވިގޮތުގައި މިދިޔަ މޭ ހަތަރުވަނަ ދުވަހުއެވެ.

 

މި މައްސަލަ އޭރު ފެންމަތިވުމުން ހޯކްސް އިން ވަނީ އެކަމުގައި އެ ކުންފުނީގެ ބައިވެރިވުމެއް ނެތް ކަމަށް ބުނެފަ އެވެ. އަދި އެކަމުގައި ބައިވެރިވި ކަމަށް ތުހުމަތުވާ މުވައްޒަފުން މަސައްކަތުން އެކަހެރި ކޮށްފައިވާ ކަމަށް ވެސް ހޯކްސް އިން ކުރިން ބުނެފައިވެއެވެ.

 

ސަލާމަތީ ހިދުމަތްތަކާ ބެހޭ ކޮމިޓީން މިދިޔަ އަންގާރަ ދުވަހު ބޭއްވި ބައްދަލުވުމުގައި އިއްވި އެ މައްސަލައިގެ ރިޕޯޓުގައިވާ ގޮތުން ކަސްޓަމްސް އިން ފުރަތަމަ ހިއްސާކުރީ ނުބައި މައުލޫމާތު ހިމެނޭ ޓައިމްލައިނެކެވެ. އެކަމަކު، އެކަން، ކޮމިޝަނާ ޖެނެރަލް އޮފް ކަސްޓަމްސްގެ ސަމާލު ކަމަށް ކޮމިޓީން ގެނައުމުން ފަހުން ތެދު މައުލޫމާތު ހިއްސާކުރި ކަމަށް 241 ކޮމިޓީގެ ރިޕޯޓުގައިވެއެވެ.

ގެއްލުނު މަސް ދޯނި ރައްކާތެރިކަމާއެކު ކޮޅުފުއްޓަށް ވަދެއްޖެ އެވެ.

 

އެމްއެންޑީއެފުން ބުނީ މަހަށް ނިކުމެ އުޅުނު ދޯންޏެއް ގެއްލިގެން ރިޕޯޓް ކޮށްފައިވަނީ އިއްޔެ ކަމަށެވެ. ދޯނީގައި ހަތް މީހުން ތިއްބެވެ.

 

އެ ރިޕޯޓާއި ގުޅިގެން ދޯނި ހޯދުމުގެ މަސައްކަތް ވަގުތުން ފެށި އެވެ.

 

އެމްއެންޑީއެފުން ބުނީ ގެއްލިގެން ހޯދި ތ.ވިލުފުށީ “ވިލުރޯދި” ރޭ ދަންވަރު 02:00 ހާއިރު، ސަލާމަތްތެރިކަމާ އެކު ދޯނި ކޮޅުފުއްޓަށަ ވަދެފައިވާކަމުގެ މަޢުލޫމާތު އެމްއެންޑީއެފް ކޯސްޓްގާޑަށް ލިބިފައިވާ ކަމަށެވެ.

 

އިއްޔެއާ ރޭ އަދި މިއަދުވެސް ރާއްޖޭގެ މޫސުން ގޯސްވެ ކަނޑުތައް ވަނީ ގަދަވެފަ އެވެ. ކަނޑު މަތީގެ ގިނަ ހާދިސާތަކެއް ހިނގާފައިވާ ކަމަށް ވެސް އެމްއެންޑީއެފުން ބުންޏެވެ.

 

މޫސުން ގޯސްވެ ބޮޑު ބަޔަކަށް މިހާރު ވެސް އޮތީ ވައިޓްއެލާޓް ނެރެފަ އެވެ.

ކުޑަކުދީންނަށް ޖިންސީ ގޯނާކުރާ މީހުންގެ ދަފުތަރު އާންމުކުރުމުގައި ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީއަށް ޕްރޮސިކިއުޓާ ޖެނެރަލް (ޕީޖީ) އޮފީހުން ފަންނީ އެހީތެރިކަން ދިނުމާ ބެހޭ އެއްބަސްވުމެއްގައި ސޮއިކޮށްފިއެވެ.

 

ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީގައި އިއްޔެ ބޭއްވި ބައްދަލުވުމެއްމުގައި އެކަމާ ބެހޭ އެއްބަސްވުމުގައި ޕީޖީ އޮފީހުގެ ފަރާތުން ސޮއިކުރެއްވީ ޑެޕިއުޓީ ޕްރޮސިކިއުޓާ ޖެނެރަލް އާއިޝަތު މުހައްމަދެވެ. މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު އިބްރާހީމް އިސްމާއީލް އަލީ އެވެ.

 

ކުޑަކުދީންނަށް ޖިންސީ ގޯނާކުރާ މީހުންނާ މެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ ދަށުން، ކުޑަކުދީންނަށް ޖިންސީ ގޯނާކުރާ މީހުންގެ ފުރިހަމަ މައުލޫމާތު އިންޓަނެޓުން ފަސޭހައިން ބެލޭނެގޮތަށް ބަހައްޓަން ޖެހެއެވެ. އެކަން ކުރުމަށް މަތިކޮށްފައިވަނީ ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީއާ އެވެ.

 

މިހާރު އެ މައުލޫމާތު ޝާއިއުކުރަމުން ގެންދަނީ، މިނިސްޓްރީއާ ގުޅިގެން ޕީޖީ އޮފީހުގެ “އާމަހި” ވެބްސައިޓުގައެވެ.

 

ޕީޖީ އޮފީހުން ބުނީ އިއްޔެ ސޮއިކުރި އެއްބަސްވުމުގެ ދަށުން މިނިސްޓްރީން އެ މައުލޫމާތު ހޯސްޓުކޮށް، އަޕްޑޭޓްކުރެވޭގޮތަށް ޕޯޓަލް ތަރައްގީކޮށްދިނުމަށް ހަމަޖެހިފައިވާ ކަމަށެވެ. އަދި އެ މަސައްކަތް ކުރިއަށްއޮތް މަހެއްހާ ދުވަހުގެ ތެރޭގައި ނިންމައި، ކުޑަކުދީންނަށް ޖިންސީ ގޯނާކުރާ މީހުންގެ ދަފްތަރު މިހާރަށްވުރެ ރަނގަޅު ފެންވަރަކަށް ތަރައްގީކޮށް ޝާއިއުކުރެވޭނެ ކަމަށް ޕީޖީ އޮފީހުން ބުންޏެވެ.

ހުޅުމާލޭގައި ހުންނަ އެންސިސް ގުދަނުގައި ބުރާސްފަތި ދުވަހު ރޯވި އަލިފާންގަނޑު، ރޭ ދަންވަރުގެ ވަގުތެއްގައި ކޮންޓްރޯލްކޮށްފިއެވެ.

 

ހުޅުމާލޭ ފުރަތަމަ ފިޔަވަހީގެ އިންޑަސްޓްރިއަލް ޒޯނުގައި ހުންނަ މި ގުދަނުގައި ރޯވެފައިވަނީ ބުރާސްފަތި ދުވަހުގެ އިރުއޮއްސުނުއިރުއެވެ. މި ހާދިސާގައި ރޯވެފައިވަނީ އެ ގުދަނުގެ ހަތަރުވަނަ ފަންގިފިލާގައެވެ.

 

އެމްއެންޑީއެފުން ބުނީ، މި ހާދިސާގެ މަޢުލޫމާތު އެ މުއައްސަސާއަށް ލިބިފައިވަނީ ބުރާސްފަތި ދުވަހު އިރުއޮއްސި 6.41ގައި ކަމަށެވެ.

 

މި އަލިފާންގަނޑު ކޮންޓްރޯލްކުރެވުނީ، ހުޅުމާލޭ ފަޔަރ ސްޓޭޝަނުގެ ފަޔަރފައިޓަރުންނާއި، އެމްއެންޑީއެފް ފަޔަރ އެންޑް ރެސްކިޔު ސަރވިސްގެ މާލޭ ފަޔަރ ސްޓޭޝަނުގެ ފަޔަރފައިޓަރުންނާއި އަދި މޯލްޑިވްސް އެއަރޕޯޓްސް ކޮމްޕެނީގެ ފަޔަރ އެންޑް ރެސްކިޔު ގުޅިގެންކަމަށް އެމްއެންޑީއެފުން މަޢުލޫމާތުދެއެވެ.

 

ކުރިއަށް އޮތް ދެތިން ދުވަހު އުތުރާއި މެދު ރާއްޖެ ތެރޭގެ އަތޮޅުތަކަށް މޫސުން ގޯސްވާނެކަމަށް މޫސުމާ ބެހޭ ޤައުމީ އިދާރާއިން ވިދާޅުވެއްޖެއެވެ.

 

މޫސުމާ ބެހޭ ޤައުމީ އިދާރާއިން ވިދާޅުވީ ރާއްޖޭގެ އެކި ހިސާބުތަކަށް މިހާރު ކުރަމުންދާ ވިއްސާރައަކީ ހުޅަނގު މޫސުމާއި ރާއްޖޭގެ ހުޅަނގުގައި އުފެދިފައިވާ ސަރކިއުލޭޝަނެއްގެ ސަބަބުން ކުރަމުންދާ ވިއްސާރައެއް ކަމަށެވެ.

 

އެ އިދާރާއިން ވިދާޅުވީ، ރާއްޖޭގެ އެކި ހިސާބަށް ވިއްސާރަކުރާނެކަމަށާއި ބައެއް ރަށްތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާ ކަމަށެވެ. އަދި ރާއްޖޭގެ ހުރިހާ ހިސާބަކަށްވެސް ވައި ބާރުވާނެ ކަމަށާއި ދެކުނުގެ އަތޮޅުތަކަށް 8 މޭލާއި 18 ދެމެދުގެ ބާރުމިނުގައި އަދި އެހެން ހިސާބުތަކަށް 13 މޭލާއި 23 މޭލާ ދެމެދުގެ ބާރު މިނުގައި ވައިޖެހޭނެކަމަށް މޫސުމާ ބެހޭ އިދާރާއިން ވިދާޅުވިއެވެ. މީގެ އިތުރުން ވިލާގަނޑުގައި 45 މޭލަށް ވައިގަދަވާނެކަމަށާއި ރާއްޖޭގެ ހުރިހާ ހިސާބަކަށްވެސް ކަނޑުތައް ގަދަވާނެކަމަށް މޫސުމާ ބެހޭ އިދާރާއިން ވިދާޅުވިއެވެ. އަދި ދިޔަވަރު ބޮޑުވާ ގަޑިތަކުގައި އުދައަރާނެކަމަށްވެސް އެ އިދާރާއިން ލަފާކުރައްވައެވެ.

 

އެ އިދާރާއިން ލަފާކުރައްވާ ގޮތުގައި މޫސުން ރަނގަޅުވާނީ ކުރިއަށް އޮތް ދެތިން ދުވަސް ފަހުންނެވެ. އެގޮތުން ކުރިއަށް އޮތް ދެތިން ދުވަހު އުތުރާއި މެދު ރާއްޖެ ތެރޭގެ އަތޮޅުތަކަށް ވިއްސާރަކުރާނެކަމަށް މޫސުމާބެހޭ އިދާރާއިން ވިދާޅުވެއެވެ.