Month: October 2025

އިސްލާމްދީނުގައި ވަރުގަދައަށް ހިފަހައްޓައި، ހަސަދަވެރިކަމަށް މަގުފަހިވާ ކަންކަމުން ދުރުވުމަށް މިއަދުގެ ހުކުރު ޚުތުބާގައި ގޮވާލައިފިއެވެ.

މިއަދު ޚުތުބާ ދީފައި ވަނީ، އިސްލާމީ ރިސާލަތަކީ ލޯތްބާއި ރަހުމަތުގެ ރިސާލަތުގެ މައްޗަށެވެ.

ޚުތުބާގައި ބުނީ، އިސްލާމީ ރިސާލަތަކީ މުޅި އިންސާނިއްޔަތަށް ހިދާޔަތު ދެއްވުމަށް މާތް ﷲ ފޮނުއްވި މަތިވެރި ރިސާލަތެއް ކަމަށެވެ.

މި ރިސާލަތުގެ މައިގަނޑު އަސާސްތައް ބިނާވެފައިވަނީ ލޯތްބާއި ރަޙުމާއި އޯގާތެރިކަމާއި، ހަމަޖެހުމާއި އަމާންކަމުގެ އަސާސުގެ މައްޗަށް ކަމަށާއި އިސްލާމީ ރިސާލަތަކީ އެއްކައުވަންތަ ކަލާންގެއަށް އީމާންވުމާއި އެކަލާންގެއަށް ކިޔަމަންތެރިވުމަށް ގޮވައިލާ ރިސާލަތެއް ކަމަށް ޚުތުބާގައިވެއެވެ.

.ޚުތުބާގައި ބުނީ، ބައެއް މީހުން އިސްލާމްދީނާ މެދު ދެކެނީ އެއްވެސް ރަޙުމެއްނެތް ހަރުކަށި ދީނެއްގެ ގޮތުގައި ކަމަށާއި އެ ދީނަށް ތަބަޢަވާ މީހުންނަކީ އެއްވެސް އޯގާތެރިކަމެއްނެތް ހަރުކަށި ބައެއްގެ ކަމަށެވެ. ނަމަވެސް، ޙަޤީޤަތުގައި އިސްލާމްދީނަކީ ރަޙުމަތުގެ ދީން ކަން ޚުތުބާގައި ވަނީ ފާހަގަކޮށްފައެވެ.

“ހަމަކަށަވަރުން، ކަލޭގެފާނު ވަނީ މާތްވެގެންވާ خلقފުޅެއްގެ މަތީގައިކަން ކަށަވަރެވެ. ކީރިތި މާތް ނަބިއްޔާ އެކަލޭގެފާނުގެ ޞަޙާބީންނާއި އުންމަތް، މި މަތިވެރި ސިފަ އަށަގެންނެވުމުގެ މައްޗަށް ތަރުބިޔަތުކުރެއްވިއެވެ. އެއީ ހުރިހާ ގުޅުންތަކެއް ބިނާކުރުމުގެ މައިގަނޑު އަސާސަކީ ރިވެތި އަޚުލާޤާއި، ރަޙުމަތާއި، އޯގާތެރިކަންކަމުގައިވާތީއެވެ” ޚުތުބާގައި ބުންޏެވެ.

އޭގެއިތުރުން، ރިވެތި އަޚުލާގުގެ ވެރިއަކަށް ވުމަށް ކީރިތި ރަސޫލާ އަހަރެމެނަށް އަންގަފާއިވާ ކަމަށާއި ގިޔާމަތް ދުވަހުގައި އެމީހެއްގެ ދަރަޖަ އުފުލޭނެކަން ހަނދާންކޮށްދީފައެވެ.

މި ފަދަ ކަންކަމުން އިސްލާމްދީނަކީ ލޯތްބާއި ހަމްދަރުދީއާއި އޯގާވެރިކަމާއި ހެޔޮފޯރުވުމުގެ ދީންކަން އަހަރެމެނަށް އެނގޭކަން ޚުތުބާގައި ފާހަގަކުރިއެވެ. ހަމައެހެންމެ، ފަރުދުންނާއި މުޖުތަމަޢުތަކުގެ މެދުގައި ޞުލްޙަވެރިކަމާއި ހަމަޖެހުން ޤާއިމުކުރުމަށް އިސްލާމްދީން މަސައްކަތްކުރާކަމަށް ޚުތުބާގައިވެއެވެ.

އިސްލާމީ އުންމަތުގެ އަފުރާދުންނަކީ އެއް ބަޔަކު އަނެއް ބަޔަކަށް ރަޙުމްކުރާ ބަޔަކަށްވުމަށް ދީނުގައި ބާރުއަޅާ ކަމަށް ޚުތުބާގައި ބުންޏެވެ. މި ސިފަތަކުގެ ސަބަބުން ދުނިޔަވީ އަމާންކަމާއި ހަމަޖެހުން ލިބި، އުޚުރަވީ ބާއްޖަވެރިކަން ލިބޭކަން ޚުތުބާގައި ހަނދާންކޮށްދިނެވެ.

އެހެންވެ، އެކުވެރިވެ، އެކަލާނގެ ދީނުގައި ވަރުގަދައަށް ހިފަހެއްޓުމަށާއި ދެކޮޅުވެރިކަމާއި، ޙަސަދަވެރިކަމާއި،މަގުފަހިވާ ކަންތައްތަކުން ދުރުހެލިވުމަށް ޚުތުބާގައި ވަސިއްޔަތްކުރިއެވެ.

ސާރައިގެ އޮނިގަނޑަށް ބަދަލު ގެނައުމުގެ މަސައްކަތް ކުރިއަށް ގެންދާތީ، ސިވިލް ސާވިސްގެ މަގާމުތަކަށް އާ މީހުން ނެގުން މެދުކަނޑާލުމަށް އަންގައިފި އެވެ.

ސިއްހީ ދާއިރާ އާއި ތައުލީމީ ދާއިރާގެ ވަޒީފަތަކުގެ މުސާރަ ނިމިގެން ދިޔަ އެމްޑީޕީގެ ވެރިކަމުގައި އޮތީ ބޮޑުކޮށްފަ އެވެ. އަދި ސިވިލް ސާވިސްގެ އެހެން ވަޒީފާތަކުގެ މުސާރަ ނޮވެމްބަރު 1، 2025 އިން ފެށިގެން ބޮޑުކުރަން ރައީސް މުހައްމަދު މުއިއްޒު ވަނީ ނިންމަވައިފަ އެވެ.

އެހެންވެ، ސީއެސްސީ ވިއުގަ އަދާހަމަކުރުމާއ،ި އުސޫލުތަކަށް ގެންނަންޖެހޭ ބަދަލުތައް ގެނައުމުގެ މަސައްކަތް ކުރިއަށްގެން ދާތ،ީ ސިވިލް ސާވިސްގެ ވަޒީފާތަކަށް މީހުން ހޯދުމާއި ވަޒީފާ ހަމަޖެއްސުމުގައި އަދި ކުރިއެރުން ދިނުމުގައި އަމަލު ކުރާނެ ގޮތްތަކެއް ސިވިލް ސާވިސް ކޮމިޝަނުން ކަނޑައަޅައި އިއްޔެ އިއުލާނުކޮށްފައިވެ އެވެ.

އެ މިންގަނޑުގައި ވާ ގޮތުން ދައުލަތުގެ ޕޭ ފްރޭމްވޯކަށް ބަދަލުވެފައިވާ ފަރާތްތައް (ޑޮކްޓަރުން، ނަރުހުން، ސިއްހީ ދާއިރާގެ ބައެއް މަގާމުތައް، އަދި ޓީޗަރުން) ފިޔަވައި ދާއިމީ އެހެން މަގާމުތަކަށް މީހުން ހޯދުމަށް ކޮށްފައިވާ އިއުލާންތަކުގެ ދަށުން ވަޒީފާއަށް ހޮވޭ ފަރާތްތަކުގެ ވަޒީފާ ނޮވެމްބަރު 1 އާ ހަމައަށް ހަމަޖައްސާފައި ނުވާނަމަ، އެ މަސައްކަތް މަޑުޖައްސާލަންޖެހެ އެވެ.

އެފަދަ ހާލަތަށް ދާ މީހުންގެ ވަޒީފާ ހަމަޖައްސަން ވާނީ ސީއެސްވިއުގަ އަދާހަމަކޮށް، އެކަން ކޮމިޝަނުން އެނގުމުން ކަމަށް ވެސް އުސޫލުގައިވެ އެވެ.

ސަރުކާރުން މި އަހަރުގެ ބަޖެޓު ސިވިލް ސާވިސްގެ މުސާރަ އެއްހަމަ ކުރުމަށް 500 މިލިޔަން ރުފިޔާ ހިމެނި އެކަން މިކުރަނީ ދިގު ދަންމަމުން އައިސް އަހަރު ނިމެން ދެ މަހަށް ވެފައި ވަނިކޮށެވެ. ސިވިލް ސާވިސްގެ މުސާރަ ބޮޑުނުކޮށްގެން މުއިއްޒަށް ޕެޓިޝަނެއް ވެސް ހުށަހަޅާފައިވެ އެވެ.

ސިވިލް ސާވިސް މުވައްޒަފުން މުސާރަ ބޮޑުކުރުން ފަސްކުރި ނަމަވެސް، މުއިއްޒު ވައުދުވި މިންވަރަށް ވުރެ ސިޔާސީ މުވައްޒަފުން އިތުރުކޮށް، އަދި ސަރުކާރުގެ ކުންފުނިތަކަށް ސިޔާސީ ބޭނުމުގައި ގިނަ ބަޔަކު ވައްދައި، ދައުލަތުގެ ބަޖެޓުން މުސާރަ އާއި އިނާޔަތްތަކަށް ކުރާ ހޭދަ ވަރަށް ބޮޑަށް އިތުރުކޮށްފައިވެ އެވެ.

މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަން ދެ ތަނެއްގެ ގޮތުގައި ހިންގުން ހަރަދު ބޮޑުވާ ކަމަށް ބުނެ ގާނޫނު ފާސްކޮށްގެން އުފެއްދި މީޑިއާ ކޮމިޝަންގެ ރައީސަށް 59,000ރ އަދި ކޮންމެ މެންބަރަކަށް 48,000 ރުފިޔާ ލިބޭނެ ކަމަށް ބުނެފި އެވެ.

ނޫސްވެރިންގެ ކަންބޮޑުވުންތަކަށް ބެލުމެއް ނެތި މީޑީއާ ކޮންޓްރޯލްކުރުމަށް ގާނޫނު ފާސްކުރި އިރު ކުރަން ޖެހޭ އެންމެ ބޮޑު ސަބަބެއްގެ ގޮތުގައި ސަރުކާރަށް ތާއީދު ކުރާ މެންބަރުން ނެގީ ދެ ކޮމިޝަން ވަކިން ހިންގުމުން ހަރަދު ބޮޑުވާތީ އެވެ.

މިނިވަން މުވައްސަސާއެއްގެ ގޮތުގައި ހިންގާ މީޑިއާ ކޮމިޝަންގެ މެންބަރުންނަށް މެމްބަރުންގެ އަސާސީ މުސާރައަކީ 33،000 ރުފިޔާ އެވެ. އެލަވަންސް ތަކާއެކު ޖުމްލަ 48,000ރުފިޔާ ލިބޭނެ އެވެ.

ކޮމިޝަންގެ ރައީސް މުހައްމަދު ފަރުޝަތަށް 58,000 ރުފިޔާ ޖުމްލަ ލިބޭނެ އިރު ނައިބު ރައީސް ޒަމްއަތު 55,000ރުފިޔާ ލިބޭނެ އެވެ.

މީގެ ކުރިން ހިންގި މީޑިއާ ކައުންސިލް މެންބަރުންގެ މުސާރައަކީ 7000ރުފިޔާ އެވެ. ބްރޯޑްކޮމް މެންބަރުންގެ މުސާރައަކީ 35000 ރުފިޔާ އެވެ.

ގައުމީ އެއާލައިން މޯލްޑިވިއަން ހިންގާ ކުންފުނި އައިލެންޑް އޭވިއޭޝަން އިން ހުޅުމާލޭގެ ބިމެއް 49 މިލިއަން ރުފިޔާއަށް ގަނެފި އެވެ.

އައިލެންޑް އޭވިއޭޝަނުން ގަތީ ސެންޓްރަލް ޕާކާ މާ ދުރު ނޫން ހިސާބަކުން ލޮޓު ނަންބަރު 11725 ބިމެވެ. އެ ބިމުގެ ޖުމްލަ އަގަކީ 49،428،482 ރުފިޔާ އެވެ. އެއީ 12،481 އަކަފޫޓުގެ ބިމެކެވެ. ބެލެވޭ ގޮތުގައި މިއީ އެ ކުންފުނިން ހުޅުމާލެއިން ގަތް ފުރަތަމަ ބިމެވެ.

ބިން ގަތުމުގެ މުއާމަލާތް ސިވިލް ކޯޓުން ވަނީ އިއްޔެ ނިންމައިފަ އެވެ.

އައިލެންޑް އޭވިއޭޝަނަކީ ގެއްލުމުގައި ހިންގާ ކުންފުންޏެވެ. މި އަހަރު އާންމު ކުރި އޮޑިޓު ރިޕޯޓަކުން ދައްކާ ގޮތުގައި މިދިޔަ އަހަރު 2.8 މިލިއަން ރުފިޔާގެ ގެއްލުމެއް އެ ކުންފުންޏަށްވި އެވެ. އަދި ކުންފުނީގެ ލަޔަބިލިޓީސް 1.6 ބިލިއަން ރުފިޔާއަށް އަރާ ކަމަށް އޮޑިޓުން ދެއްކި އެވެ.

އައިލެންޑް އޭވިއޭޝަނުގެ އެސެޓަށްވުރެ އެތައް ގުނައެއް ލަޔަބިލިޓީސް ބޮޑުކަމުން، ކުންފުނި ހިންގިދާނެ ކަމަށް ސުވާލު އުފެދޭ ކަމަށް އެ އޮޑިޓުގައި ބުނެފައިވެ އެވެ.

އޭގެ އިތުރުން، އިއުލާނެއް ކުރުމެއް ނެތި އައިލެންޑް އޭވިއޭޝަނުން މަތިންދާބޯޓެއް ވިއްކާލި މައްސަލައެއް ދާދިފަހުން ވަނީ ފެންމަތިވެފަ އެވެ. އިއުލާނު ނުކޮށް ވިއްކާލީ DHC-8 MSN 591 ނަންބަރު މަތިންދާބޯޓެވެ. އެ ބޯޓު ވިއްކާލީ 3.7 މިލިއަން ޑޮލަރަށެވެ.

އެ މައްސަލަ އެމްއެމްއޭގެ ފައިނޭންޝަލް އިންވެސްޓިގޭޝަން ޔުނިޓުން ވަނީ ބަލައިފަ އެވެ. އަދި އެންޓި ކޮރަޕްޝަން ކޮމިޝަނުން ވެސް މިހާރު އެ މައްސަލަ ދަނީ ބަލަމުންނެވެ.

އަންނަ އަހަރަށް ލަފާކުރާ ދައުލަތުގެ ބަޖެޓް، ރައްޔިތުންގެ މަޖިލިހުގެ މާދަމާގެ ޖަލްސާއަށް ތާވަލްކޮށްފިއެވެ.

މާދަމާ އެ ޖަލްސާ ބާއްވާނެ ކަން އިއުލާން ކުރެއްވީ، މިއަދުގެ ޖަލްސާ ނިންމަވާލައްވަމުން މަޖިލިހުގެ ރިޔާސަތުގައި އިންނެވި މަޖިލިހުގެ ރައީސް އަބްދުއްރަހީމް އަބްދުﷲ އެވެ.

އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް މާދަމާ ހުށަހެޅުމަށް ތާވަލުކޮށްފައިވާއިރު، މި ބަޖެޓުގައި ހިމަނާނެ ބައެއް މުހިންމު ކަންކަމާ ބެހޭ ގޮތުން ރައީސް ޑރ. މުހައްމަދު މުއިއްޒު ވަނީ މީގެ ކުރިން ބައެއް ޖަލްސާތަކުގައި ވާހަކަފުޅު ދައްކަވައިފައެވެ.

ރައީސް ށ. އަތޮޅަށް ކުރެއްވި ދަތުރުފުޅު ތަކުގައި ވިދާޅުވީ ބަޖެޓްގެ އެންމެ ބޮޑު އިސްކަމެއް ދެއްވާނީ ތައުލީމާއި ސިއްހީ ދާއިރާއަށް ކަމަށެވެ.

އެމަނިކުފާނު ވިދާޅުވި ގޮތުގައި، އަންނަ އަހަރު ތައުލީމީ ދާއިރާއިން، ހާއްސަ އެހީއަށް ބޭނުންވާ ކުދިންނަށް ތައުލީމު އުނގަންނައިދިނުމުގެ މަޝްރޫއެއް ފެށުމަށް ނިންމާފައިވެއެވެ. މި މަޝްރޫއުގައި އެ ކުދިންނަށް ތައުލީމް ހާސިލްކުރެވޭނެ ގޮތްތަކާއި ހާއްސަ ކްލާސްރޫމްތައް ހެދުން ވެސް ހިމެނޭނެއެވެ.

ސިއްހީ ދާއިރާ ކުރިއަރުވައި، ރާއްޖެއިން ނުހެދޭ ޓެސްޓުތައް ހެދުމަށާއި، އޮޕަރޭޝަންތަކާއި ޑޮކްޓަރަށް ދައްކަން ބޭރަށް ދިއުން ނިމުމަކަށް ގެނައުމަށް ރާއްޖޭގައި އާ އޮޕަރޭޝަންތަކާއި ޓެސްޓުތައް ހެދޭނެ އިންތިޒާމުތައް ހޮސްޕިޓަލުތަކުގައި ގާއިމްކުރުމުގެ މަސައްކަތް ވެސް ކުރައްވާނެ ކަމަށް ރައީސް ވަނީ ވިދާޅުވެފައެވެ. އަދި ހޮސްޕިޓަލްތަކާއި ސިއްހީ މަރުކަޒުތަކަށް ބޭނުންވާ ނަރުހުންނާއި ޑޮކްޓަރުން ފަދަ ސިއްހީ ހިދުމަތްތެރިން ހޯދާނެ ކަމަށް އެމަނިކުފާނު ވިދާޅުވިއެވެ.

“އަޅުގަނޑުމެން ގާތްގަނޑަކަށް ތިން ބިލިއަން، 3،000 މިލިއަން ރުފިޔާ އާ މަޝްރޫއުތަކަށް މި އަންނަ އަހަރު އެބަ ކަނޑައަޅަން. އޭގެ ތެރެއިން މަދުވެގެން 500 މިލިއަން ރުފިޔާ އަޅުގަނޑުމެން އަލަށް ފަށާ މިދެންނެވި ތައުލީމީ ދާއިރާގެ މަޝްރޫއުތަކަށާއި، މަދުވެގެން 500 މިލިއަން ރުފިޔާ އަލަށް ފަށާ ސިއްހީ ދާއިރާގެ މަޝްރޫއުތަކަށް ކަނޑައަޅާނަން،” ރައީސް ވިދާޅުވެފައިވެއެވެ.

މި އަހަރަށް ލަފާކޮށް މަޖިލިހުން ފާސްކޮށްފައިވަނީ 56.6 ބިލިއަން ރުފިޔާގެ ބަޖެޓެކެވެ. އެއީ ކުރީ އަހަރުގެ ބަޖެޓަށް ވުރެ 1.6 ބިލިއަން ރުފިޔާ އިތުރު އަދަދެކެވެ. އަދި، މި އަހަރު އާމްދަނީގެ ގޮތުގައި 39.8 ބިލިއަން ރުފިޔާ ލިބޭނެ ކަމަށް ލަފާކޮށްފައިވާއިރު، އޭގެ ތެރެއިން 2.6 ބިލިއަން ރުފިޔާއަކީ ހިލޭ އެހީގެ ގޮތުގައި ލިބޭނެ ކަމަށް ލަފާކުރާ އަދަދެކެވެ.

ބޮންޑެޑް ވެއާ ހައުސްއެއްގައި ހުރި ސިނގިރޭޓު ކާޓޫނުތަކެއް އެތަނުން ނެރުނު މައްސަލައިގައި ރައްޔިތުންގެ މަޖިލީހުން ރައީސް ޑރ. މުހައްމަދު މުއިއްޒުއަށް ދެއްވި މައުލޫމާތާއި ލަފަޔާ އެއްގޮތަށް މިއަދު ވަކިކުރީ ކަސްޓަމުގެ ދެ ޑެޕިއުޓީ ކޮމިޝަނަރުން ކަމަށްވާ އަބްދުﷲ ވަހީދު އާއި މަހްމޫދު ރިޔާޒްކަން އެނގިއްޖެ އެވެ.

ހަވާސާ އަށް އެނގިފައިވާ ގޮތުގައި ކަސްޓަމުގައި ވަޒީފާ އަދާކުރާތާ 35 އަހަރުވެފައިވާ އަބްދުﷲ ވަހީދު އާއި މަހްމޫދު ރިޔާޒް ވަކިކުރީ އެއްވެސް ތަހުގީގެއް ނުކޮށް، ޖަވާބުދާރީވާން ފުރުސަތު ވެސް ނުދީ އެވެ.

ރައީސް މުއިއްޒު މިއަދު ވިދާޅުވީ ބޮންޑެޑް ވެއާހައުސްއިން ސިނގިރޭޓު ބޭރުކުރި މައްސަލައާ ގުޅިގެން މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން ދިން ލަފަޔާއެކު ކަސްޓަމުގެ ދެ ޑެޕިއުޓީ ކޮމިޝަނަރުން ވަކި ކުރުމުގެ އިތުރުން ތިން މުވައްޒަފަކަށް ފިޔަވަޅު އެޅުމަށް އަންގަފައިވާ ކަމަށެވެ.

ނަމަވެސް ސަރުކާރުގެ އެއްވެސް އިދާރާއަކުން މިހާތަނަށް ވަކިކުރި ކަސްޓަމުގެ މުވައްޒަފުންނާއި ފިޔަވަޅު އެޅި ކަސްޓަމުގެ މުވައްޒަފުންގެ މައުލޫމާތު އަދި ފިޔަވަޅު އެޅި މުވައްޒަފުންނަށް އެޅީ ކޮން ފިޔަވަޅެއްކަން ހާމަކޮށްފައެއް ނުވެ އެވެ.

ކަސްޓަމުގެ ޑެޕިއުޓީ ކޮމިޝަނަރުން އައްޔަން ކުރަނީ ރައީސުލްޖުމްހޫރިއްޔާ އެވެ. އެގޮތުން އެ މަގާމަށް އައްޔަންކުރާ ބޭފުޅުން ވަކިކުރުމުގެ ބާރު ވެސް ރައީސުލްޖުމްހޫރިއްޔާއަށް ލިބެ އެވެ.

ނަމަވެސް ތުހުމަތު ކުރެވޭ މައްސަލަތަކުގައި ވަކިކުރި ދެ މުވައްޒަފުންނާ ތަހުގީގީ އިދާރާއަކުން ސުވާލުކޮށްފައި ނެތް ކަމަށް، އެކަމުގެ މައުލޫމާތު އެނގޭ މީހުން މި ނޫހަށް ބުންޏެވެ.

ސަރުކާރުން ވަނީ ދުންފަތާއި ސިނގިރޭޓުން ނަގާ ޓެކްސް މިދިޔަ އަހަރު ނޮވެމްބަރު 1، އިން ފެށިގެން ބޮޑުކޮށް، ކުރިން ނަގި 3ރ. ގެ ޓެކްސް އަށް ރުފިޔާއަށް ބަދަލުކޮށް، ދުންފަތުގެ އެހެން ބާވަތްތަކުން ނަގާ ޑިއުޓީ 50 ޕަސެންޓު ބޮޑުކޮށްފަ އެވެ.

ސަރުކާރުން ސިނގިރޭޓު ޑިއުޓީގެ އަގުބޮޑުކުރުމާ ގުޅިގެން ރާއްޖޭގައި ސިނގިރޭޓުގެ ވަގު ވިޔަފާރި ވަނީ ވަރަށް ބޮޑަށް ފުޅާވެފަ އެވެ. އެގޮތުން އެކި ބްރޭންޑްތަކުގެ ސިނގިރޭޓްތައް ފަހަކަށް އައިސް އަގުހެޔޮކޮށް ލިބޭކަން ފާހަގަކުރެވެ އެވެެ.