ގްރޭޑް 10 އާ ހަމައަށް ކިޔަވައިދޭ ސްކޫލަކާއި އޭލެވެލަށް ހާއްސަ ސްކޫލެއް ހުޅުމާލެ ފޭސް ދެއެއްގައި އިމާތާރް ކުރުމުގެ މަސައްކަތް މި އަހަރު ފައްޓަވާނެ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެ އެވެ.
“ހަވާސާ” އަށް މިދިޔަ ހަފުތާގައި ދެއްވި އިންޓަވިއުއެއްގައި މިނިސްޓަރު ވިދާޅުވީ ހުޅުމާލޭގެ ގިނަ ސްކޫލުތަކުގެ ޖާގަ ވަރަށް ބޮޑަށް ފުރިފައިވާ ކަމަށެވެ.
އިތުރު ސްކޫލެއް ހުޅުމާލެ އަށް ބޭނުންވާކަން ފާހަގަ ކުރައްވަމުން މިނިސްޓަރު ވިދާޅުވީ ގްރޭޑް 1-10 އަށް ކިޔަވައިދޭ އާ ސްކޫލެއް ރާއްޖޭގައި އެންމެ ބާރަށް އާބާދީ އިތުރުވަމުންދާ ހުޅުމާލެ 2 ގައި އިމާރާތް ކުރުމުގެ މަސައްކަތުގެ ކޮންސެޕްޓް ފައިނަލްކޮށް، މިހާރު އޮތީ ޑިޒައިން ހާރުހަލާގައި ކަމަށެވެ.
އެ ސްކޫލުގެ އަމަލީ މަސައްކަތް އެންމެ ލަސްވެގެން މި އަހަރުގެ ފުރަތަމަ ކުއާޓާގެ ތެރޭގައި ފެށޭނެ ކަމަށް މިނިސްޓަރު ލަފާކުރައްވަ އެވެ.
“ޝަހީދު އަލީ ސްކޫލަށް އަޅުގަނޑުމެން އަންދާޒާ ކުރީ 1،850 ވަރަކަށް ދަރިވަރުންނޭ އަންނާނީ. އެކަމަކު ފަހިދިރިއުޅުން ފްލެޓްތައް އެންމެ ފަހު ވަގުތު ދެވިގެން ދިއުމުން އެ އަދަދު ވަނީ 2،000 އިން މައްޗަށް ގޮސްފައި. އަންނަ އަހަރަށް އަޅުގަނޑުމެންނަށް އެންމެ ގިނަވެގެން އެ ސްކޫލުން ޖާގަ ދެވޭނީ 600 ވަރަކަށް ދަރިވަރުންނަށް. އެހެންވީމަ އަންނަ އަހަރަށް މައްސަލައެއް ނުޖެހޭނެ،” އިސްމާއިލް ވިދާޅުވި އެވެ.
“އެކަމަކު 2027 އަންނަން ވާއިރަށް އިތުރު ސްކޫލެއް ނެތް ނަމަ ފޭސް 2 އިން އަޅުގަނޑުމެންނަށް ޖާގައެއް ނުދެވޭނެ.”
ހުޅުމާލޭގައި އިތުރު ސްކޫލެއް މި އަހަރު އަޅަން ފަށަނީ އެ ސަބަބަށްޓަކައި ކަމަށް ވެސް މިނިސްޓަރު ވިދާޅުވި އެވެ.
ހުޅުމާލެ ސްކޫލުތަކާއި ދަރިވަރުންގެ އަދަދު
ހުޅުމާލެ 1
- ޣާޒީ ސްކޫލު: 1،628 ދަރިވަރުން
- ރެހެންދި ސްކޫލު: 2،416 ދަރިވަރުން
- ހުރަވީ ސްކޫލު: 2،202 ދަރިވަރުން
- ހުޅުމާލެ ސީއެޗްއެސްއީ: 1،056 ދަރިވަރުން
ހުޅުމާލެ 2
- ކާމިލްދީދީ ޕްރައިމަރީ ސްކޫލު: 1،049 ދަރިވަރުން
- ސަލާހުއްދީން ސްކޫލު: 2،560 ދަރިވަރުން
- ޝަހީދު އަލީ ސްކޫލު: 2،179 ދަރިވަރުން
ހުޅުމާލޭގެ ސްކޫލުތަކަށް ވަނުމަށް ޖާގަ އަށް މިހާރު އެދެމުން އަންނަ މިންވަރާއި ގްރޭޑް 1 އަށް ވަންނާނެ ދަރިވަރުންގެ އަދަދަށް ބަލައި މިނިސްޓަރު ވިދާޅުވީ ކުރިއަށް އޮތް ދުވަސްތަކުގައި މަތީ ސާނަވީ އަށް ކިޔަވައިދޭ ސްކޫލެއް ބޭނުންވާނެ ކަމަށެވެ.
“އޭލެވެލް އަށް ކިޔަވައިދޭ ވަކި ހާއްސަ ސްކޫލެއް ފޭސް 2 އަށް ބޭނުންވާނެ. ކުރިން އޮތް ގޮތަށް ފަސް މާއްދާ އިން ފާސްވާ ކުދިން އެކަނި އޭލެވެލް ކިޔެވޭ ގޮތަށް އޮތް ނަމަ އަދި ޖާގަ އޮންނާނެ،” އިސްމާއިލް ވިދާޅުވި އެވެ.
“އެކަމަކު އަޅުގަނޑުމެން ވީހާ ވެސް ގިނަ ކުދިންނަށް ޖާގަ ދޭން އެގޮތަށް ބަދަލުކުރުމުން މިހާރު އެ އަދަދު އިތުރު ވެފައި އޮތީ ވަރަށް ބޮޑަށް.”
އޭލެވެލަށް ކިޔަވައިދޭނެ ހާއްސަ ސްކޫލެއް ހުޅުމާލެ 2 ގައި މިހާރަކު ނެތެވެ.
މިނިސްޓަރު ވިދާޅުވީ ހުޅުމާލެ 2 ގައި މިހާރު ހުރި ދެ ސްކޫލާ ކައިރި ހިސާބެއްގައި އޭ ލެވެލަށް ހާއްސަ ސްކޫލެއް އިމާރާތް ކުރުމުން ދަރިވަރުންނަށް ވެސް ފަސޭހަ ވާނެ ކަމަށެވެ.
އޭލެވެލް ސްކޫލެއްގެ ކޮންސެޕްޓް އަދި ނުފެށުނު ކަމަށް ވިޔަސް ހުޅުމާލެ 2 ގައި އޭލެވެލް ސްކޫލެއް ވެސް އެޅުމަށް ނިންމާފައިވާ ކަމަށް މިނިސްޓަރު ވިދަޅުވި އެވެ.
