Month: September 2025

އޮގަސްޓު މަހުގެ ތެރޭގައި ކާބޯތަކެތީގެ ބައެއް ބާވަތްތަކުގެ އަގު 50 އިންސައްތައިން މައްޗަށް ގޮސްފައިވާކަމަށް ސްޓެޓިސްޓިކްސް ބިއުރޯއިން ބުނެފިއެވެ.

ޖުލައި މަހާ އަޅާބަލާއިރު އޮގަސްޓު މަހުގެ ތެެރޭގައި ރާއްޖޭގައި ކާބޯތަކެތީގެ އަގުތަކަށް އައި ބަދަލުތައް ފާހަގަކޮށް އާންމުކޮށްފައިވާ ރިޕޯޓުގައި ސްޓެޓިސްޓިކްސް ބިއުރޯއިން ބުނެފައިވާގޮތުން ޖުމުލަ ގުރޫޕުގެ އަގުތައްވަނީ 1.60 އިންސައްތައިން އިތުރުވެފައިކަމަށެވެ.

އެންމެ ބޮޑަށް އަގު އުފުލިގެންދިޔަ ބާޥަތްތަކުގެ ތެރޭގައި އޮރެންޖު ހިމެނޭއިރު އެއީ 59.14 އިންސައްތައިންކަން ފާހަގަކުރެވެއެވެ. އާފަލުގެ އަގު 23.35 އިންސައްތައިން އިތުރުވިކަމަށްވެސް ބުނެފައިވާއިރު ފަރުމަހުން 7.88 އިންސައްތައިގެ އިތުރުވުމެއް އައިސްފައިވާކަންވެސް ހާމަކޮށްފައިވެއެވެ. މި މުއްދަތުގެ ތެރޭގައި ލުނބޯގެ އަގު 25.80 އިންސައްތައިން އުފުލިގެން ދިޔަކަމަށް ބުނެފައިވެއެވެ.

ބޯހިޔާވަހިކަމާއި ފެން އަދި ކަރަންޓާއި ހަކަތައިގެ އެހެނިހެން ބާވަތްތައް ހިމެނޭ ކެޓަގަރީގެ މުދަލުގެ އަގު 0.33 އިންސައްތައިން ދަށަށް ދިޔައިރު މައިގަނޑު ސަބަބަކީ ކަރަންޓުގެ އުނިޓެއްގެ އަގު ދަށްވުމުންކަން ފާހަގަކޮށްފައިވެއެވެ. އެ ދާއިރާގެ އަގު 2.11 އިންސައްތައިން ދަށްވެފައިވާކަމަށް ބުނެފައިވެއެވެ.

ފިލިޕީންސްއަށް ބާރުގަދަ ބިންހެލުމެއް އައިސްފިއެވެ.

މޫސުމާއި ބެހޭ ގައުމީ އިދާރާއިން ދާދި ދެންމެ އަކު ބުނީ ފިލިޕީންސްގެ ލެއިޓޭ ކައިރިއަށް ރާއްޖެ ގަޑިން މިއަދު 18:59 ހާއިރު ބާރުގަދަ ބިންހެލުމެއް އައިސްފައިވާ ކަމަށާއި މި ބިންހެލުން އައިސްފައިވަނީ ރެކްޓަރ މިންގަނޑުން 6.8 މެގްނިޓިއުޑްގައި ކަމަށެވެ.

އެގޮތުން މި ބިންހެލުން އައިސްފައިވަނީ ރާއްޖޭގެ ވެރިރަށް މާލެ އާއި 5621 ދުރުން ކަމަށާއި މި ބިން ހެލުމުގެ ސީދާ އަސަރެއް ރާއްޖެއަށް ނުކުރާނެ ކަމަށްވެސް މެޓް އޮފީހުން ވަނީ ބުނެފައެވެ.

މީގެ އިތުރުން މި ބިންހެލުމާއި ގުޅިގެން އިންޑިއާ ކަނޑުގައި ސުނާމީއެއް ނުއުފެދޭ ކަމަށްވެސް ވަނީ ބުނެފައެވެ.

އިތުރު ތަފްސީލް އަންނަނީ ..

އަމާޒަކީ ހުޅުމާލޭގެ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަން (އެފްޑީސީ) އިން ތަރައްގީކޮށްފައިވާ 4000 ހައުސިން ޔުނިޓް އަންނަ ނޮވެމްބަރު މަަސް ނިމުމުގެ ކުރިން ހަވާލުކޮށް ނިންމާލުން ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އެމްޑީ ހަމްދާން ޝަކީލް ވިދާޅުވެއްޖެއެވެ.

ހަމްދާން “ވަގުތަށް” ވިދާޅުވީ މިހާރު އެފްޑީސީއިން ކުރިއަށް ގެންދަނީ ފްލެޓް ލިސްޓްގައިވާ ފަރާތްތަކަށް ތަޅުދަނޑި ހަވާލުކުރުމުގެ މަސައްކަތް ކަމަށެވެ. އެގޮތުން އިއްޔެ އަމާން އުދަރެސް ޓަވަރު 14 އިން 14 މީހަކަށް ތަޅުދަނޑި ހަވާލުކޮށްފައިވާ ކަމަށް ވިދާޅުވިއެވެ.

“އަޅުގަނޑުމެންގެ އަމާޒަކީ ނޮވެމްބަރު މަސް ނިމުމުގެ ކުރިން ހުރިހާ ފްލެޓެއްގެ ތަޅުދަނޑު ހަވާލުކޮށް ނިންމާލުން.” ހަމްދާން ވިދާޅުވިއެވެ.

ހަމްދާން ވިދާޅުވީ އެ ފްލެޓްތައް ތަރައްގީ ކުރުމަށް އެފްޑީސީގެ ސްކޯޕްގައިވާ ކަންކަން މިހާރު ފުރިހަމަކޮށްފައިވާ ކަމަށެވެ. އަދި މިހާރު ކުރިއަށް ދަނީ ސްޓެލްކޯއިން ކަރަންޓުލުމާއި އެމްޑަބްލިއުއެސްސީއިން ފެން ގުޅުމުގެ މަސައްކަތް ކަމަށެވެ. އެ މަސައްކަތް ވެސް ނޮވެމްބަރު މަސް ނިމުމުގެ ކުރިން ނިންމާލާނެ ކަމަށް ވިދާޅުވިއެވެ.

އެފްޑީސީއިން ފްލެޓް ހަވާލުކުރަމުންދަނީ އެއްބަސްވުމުގައި ސޮއިކޮށް، ސެކިއުރިޓީ ޑިޕޮސިޓް ދައްކާފައިވާ ފަރާތްތަކަށެވެ. 2 ކޮޓަރީގެ އެޕާޓްމަންޓަކަށް 15,000ރ، އަދި 3 ކޮޓަރީގެ އެޕާޓްމަންޓަކަށް 25,000ރ ގެ ޑިޕޮސިޓެއް ދައްކަން ޖެހެއެވެ.

ސަރުކާރުން ވަނީ ގަވާއިދުން މި ފްލެޓްތަކަށް ކުލި ދައްކާ ފަރާތްތަކަށް ބޮޑު ސަބްސިޑީއެއް ދިނުމަށް ނިންމާފައެވެ. އެގޮތުން، 2 ކޮޓަރީގެ އެޕާޓްމަންޓްގެ ކުލި 9,000ރ އިން 7,000ރ އަށް، އަދި 3 ކޮޓަރީގެ އެޕާޓްމަންޓްގެ ކުލި 13,000ރ އިން 9,000ރ އަށް ވަނީ ކުޑަކޮށްފައެވެ.

އެމެރިކާ ސަރުކާރުން އެމްއެންޑީއެފް އަށް، ހާއްސަ އޮޕަރޭޝަންތަކަށް ބޭނުންވާ ސީޓީ އިކުއިޕްމަންޓް ހަދިޔާކުރައްވައިފިއެވެ.

ބަންޑާރަކޮށީ އޮޑިޓޯރިއަމްގައި މިކަމަށްޓަކައި ބޭއްވި ރަސްމިއްޔާތުގައި އެމެރިކާގެ ފަރާތުން އެމްއެންޑީއެފްއާ މި އިކުއިޕްމަންޓް ހަވާލުކޮށްދެއްވީ އެގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު، ހިސް އެކްސެލެންސީ ހޫގޯ ޔޮންއެވެ. އެމްއެންޑީއެފްގެ ފަރާތުން އިކުއިޕްމަންޓާ ހަވާލުވެލެއްވީ ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ.

އެމެރިކާއިން ހަދިޔާކުރި ތަކެތީގެ ތެރޭގައި އެމްއެންޑީއެފް ސްޕެޝަލް ފޯސަސްއަށާއި އެމްއެންޑީއެފް ސްޕެޝަލް އޮޕަރޭޝަންސް ގްރޫޕަށް ބޭނުންވާ ކޮމްބެޓް ޑައިވިންގ އިކުއިޕްމަންޓާއި، ޕަރސަނަލް ގިޔަރ ހިމެނެއެވެ. އަދި އޮޕަރޭޝަނަލް އިކުއިޕްމަންޓް ހިމެނެއެވެ.

އެމެރިކާއިން ހަދިޔާކުރި އިކުއިޕްމަންޓުގެ ސަބަބުން، އެމްއެންޑީއެފްގެ ހާއްސަ އޮޕަރޭޝަންތައް ހިންގުމުގެ ގާބިލުކަން އިތުރަށް ހަރުދަނާވެ، ދިވެހިރާއްޖޭގެ ސަލާމަތާއި ރައްކާތެރިކަން ކަށަވަރުކުރުމަށް އިތުރު ބާރެއް ލިބިގެންދާނެއެވެ.

މި ރަސްމިއްޔާތުގައި އެމެރިކާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ހިސް އެކްސެލެންސީ ހޫގޯ ޔޮން ވަނީ ދެ ގައުމުގެ ދިފާއީ ހަރުދަނާ ގުޅުން އިތުރަށް ބަދަހިކުރުމުގެ މައްޗަށް އަލިއަޅުއްވާލައްވާފައެވެ. އަދި ރާއްޖޭގެ ސަލާމަތީ ކަންކަމަށް އެމެރިކާގެ ފަރާތުން ވެދެމުންދާ އެހީތެރިކަން ކުރިއަށް އޮތް ތަނުގައި ވެސް ދެމިގެންދާނެ ކަމުގައި ވިދާޅުވިއެވެ.

ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީ އެމެރިކާއިން ދެއްވި އެހީތެރިކަމަށް ޝުކުރު އަދާކުރެއްވިއެވެ. އަދި އެ އިކުއިޕްމަންޓުގެ ސަބަބުން އެމްއެންޑީއެފްގެ ހަރަކާތްތެރިކަމާއި ގާބިލުކަން އިތުރުވެގެންދާނެކަން ފާހަގަކުރެއްވިއެވެ.

މިފަދަ އެހީތެރިކަމަކީ ދިވެހިރާއްޖޭގެ ދިފާއީ ގާބިލުކަން އިތުރުކުރުމަށް ލިބުނު ބޮޑު ކުރިއެރުމެއް ކަމުގައި ވެސް ވިދާޅުވިއެވެ.

މިއީ ދިިވެހިރާއްޖެއާއި އެމެރިކާއާ ދެމެދު އޮތް ދިފާއީ ގުޅުންތައް އިތުރަށް ބަދަހިކޮށް، ސަރަހައްދީ ސަލާމަތަށް ދެ ގައުމުން ދެމުންދާ އެއްބާރުލުން އިތުރުކުރުމުގެ ގޮތުން ލިބިގެންދިޔަ މުހިންމު އެހީއެކެވެ.

މި ރަސްމިއްޔާތުގައި އެމްއެންޑީއެފްގެ ޖެނެރަލް އޮފިސަރުންނާއި، އެމެރިކާގެ، އޭޝިއާ ޕެސިފިކް ސެންޓަރ ފޮރ ސެކިޔުރިޓީ ސްޓަޑީޒް (އޭޕީސީއެސްއެސް) ވަފުދުގެ ބޭފުޅުން ބައިވެރިވެ ވަޑައިގެންނެވިއެ

ޤުރުއާން ކިޔެވުމުގެ ގައުމީ މުބާރާތުގެ އެކި ގޮފިތަކުން، މުޅި މުބާރާތުން އެއްވަނަ ހޯދާ ބައިވެރިންނަށް އެ މީހަކު ބޭނުން ދާއިރާއަކުން ޕީއެޗްޑީއާ ހަމައަށް ކިޔަވަން ސްކޮލަޝިޕް ދޭން ރައީސް ޑރ. މުޙައްމަދު މުއިއްޒު މިއަދު ނިންމަވައިފިއެވެ.

އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ޤުރުއާން ކިޔެވުމުގެ ޤައުމީ މުބާރާތަކީ، ރާއްޖޭގައި ބާއްވާ އެންމެ އަގުބޮޑު އަދި އެންމެ ގިނަ އިނާމު ދެވޭ މުބާރާތް ކަމުގައި ހަދާނެކަމަށް މިދިޔަ އަހަރު އެ މަނިކުފާނު އިއުލާނުކުރެެއްވި ކަމަށެވެ.

“އެއީ އަޅުގަނޑު ޤަބޫލު ކުރާ ގޮތުގައި އެންމެ ބޮޑު ހިތްވަރެއް ދޭންޖެހޭނީ، އެންމެ ބޮޑު އިނާމްތަކެއް ދެވެންވާނީ މާތް ﷲ ގެ މަތިވެރި ކަލާމްފުޅު އެންމެ ރީތިކޮށް ކިޔެވުމަށް،” ރައީސް ވިދާޅުވިއެވެ.

އެ މަނިކުފާނު ވިދާޅުވީ އެ ނިންމެވުމާ އެއްގޮތަށް މި އަހަރުން ފެށިގެން، ޤުރުއާން ކިޔެވުމުގެ ޤައުމީ މުބާރާތުގައި ނުބަލާ ކިޔެވުމުގެ ބައިން މުޅި މުބާރާތުން އެއްވަނަ، ބަލައިގެން ކިޔެވުމުގެ ބައިން މުޅި މުބާރާތުން އެއްވަނަ، އަދި ޙާފިޒުންގެ ބައިން މުޅި މުބާރާތުން އެއްވަނަ ހޯދާ ފަރާތްތަކަށް އެ ފަރާތަކުން ތަޢުލީމް ޙާސިލްކުރަން ބޭނުން ދާއިރާއަކުން ޕީއެޗްޑީއާ ހަމައަށް، ބޭނުން ޤައުމަކުން ތަޢުލީމް ހާސިލް ކުރުމަށް ރައީސްގެ ޚާއްސަ ސްކޮލަޝިޕް ދިނުމަށް ނިންމާފައިވާ ކަމަށެވެ.

އަދި އެ ތިން ބައިން އެއްވަނަ ހޯދާ ފަރާތްތަކަށާއި، މުއައްސަސާތަކުގެ ބައިން މުޅި މުބާރާތުން އެއްވަނަ ހޯދާ ތަނަކަށް، ރައީސުލްޖުމްހޫރިއްޔާގެ އިނާމުގެ ތެރޭގައި އެއްލައްކަ ރުފިޔާގެ ފައިސާގެ އިނާމަކާއި ޝަރަފުގެ ފިލައެއް ވެސް ހިމެނޭނެ ކަމަށް އެ މަނިކުފާނު ވިދާޅުވިއެވެ.

ރައީސް ވިދާޅުވީ، މުބާރާތުގެ ހުރިހާ ވަނަތަކަށް އިސްލާމިކް މިނިސްޓްރީން ދޭ އިނާމުތައް ވެސް ކުރިއަށްވުރެ ގިނަވެފައި އަގުބޮޑު ވާނެ ކަމަށެވެ. އަދި އަމިއްލަ ފަރާތްތަކުން އިނާމު ހުށަހަޅަން ދޭ ފުރުސަތު ވެސް އިތުރަށް ފަހިވާނެ ކަމަށް ވިދާޅުވިއެވެ.

މިނިސްޓްރީން ބުނި ގޮތުގައި މި އަހަރު ޖުމްލަ 1023 ބައިވެރިން ގުރުއާން ކިޔެވުމުގެ ގައުމީ މުބާރާތުގައި ބައިވެރިވިއެވެ. އެއީ ބަލައިގެން ކިޔެވުމުން 582 ބައިވެރިން، ނުބަލާ ކިޔެވުމުން 412 ބައިވެރިން، އަދި ހާފިޒުންގެ ބައިން 29 ބައިވެރިންނެވެ.