Author: އަޙްމަދް އަޙްނަފް

އިދިކޮޅު މައި ޕާޓީ އެމްޑީޕީން ރޭ ކުރިއަށް ގެންދިޔަ “ލޫޓުވާލައިފި” އެއްވުމުގައި ފެނިގެންދިޔައީ ޕާޓީގެ ގްރާސްރޫޓް ފެންވަރުގައި ހަރަކާތްތެރިވާ އާންމު ރައްޔިތުންނެކޭ އެއްފަދައިން ޕާޓީގެ ލީޑަރޝިޕްގައި ތިއްބެވި އިސް ބޭފުޅުންވެސް ބައިވެރިވެ، ރައްޔިތުންނާއެކު އެއް ސަފެއްގައި ތިބެ، ރައްޔިތުންނަށް ދިމާވާ ކޮންމެ ކަމެއްގައި ނިކުންނަވަން ތައްޔާރަށް ތިއްބެވި މަންޒަރެވެ.

ރޭ އާޓިފިޝަލް ބީޗް ސަރަހައްދުގައި ކުރިއަށްގެންދިޔަ އެއްވުމުގައި ހަރަކާތްތެރިވި ހަވާސާ ނޫހުގެ ނޫސްވެރިންނަށް ފެނިގެން ދިޔައީ ފުލުހުން އެއްވުމަށް ހުރަސްއަޅަން މަސައްކަތްކުރުމުން، އާންމު ރައްޔިތުންނެކޭ އެއްފަދައިން ޕާޓީގެ ލީޑަރޝިޕްގައި ތިއްބެވި ބޭފުޅުންވެސް ފުލުހުންގެ ބެރިކޭޑްތައް ކައިރިއަށް، އިހުތިޖާޖުކުރުމަށް ކުރިއަށް ވަޑައިގެންނެވި މަންޒަރެވެ. އެއްވުމުގައި އެމްޑީޕީގެ ރައީސް އަބްދުﷲ ސާހިދާއި، ޕާޓީގެ ޗެއަރޕަރސަންފައްޔާޒް އިސްމާއިލާއި، ކުރީގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި، ކުރީގެ ރައީސުލްޖުމްހޫރިއްޔާގެ ނައިބު ފައިޞަލް ނަސީމާއި، މީގެ އިތުރުންވެސް ޕާޓީގެ ލީޑަރޝިޕްގައި ހިމެނިވަޑައިގަންނަވާ ގިނަ އަދަދެއްގެ ބޭފުޅުން ބައިވެރިވެވަޑައިގެންނެވިއެވެ.

ރޭގެ އެއްވުން ފެށުމާއެކު ފުލުހުން ވަނީ އެއްވުމަށް ހުރަސްއަޅާފައެވެ. ނަމަވެސް، އެމްޑީޕީގެ ލީޑަރޝިޕުން ވަނީ އެ ހުރަސްއެޅުންތަކާ ކުރިމަތިލައްވައި، ރައްޔިތުންނާއެކު އެއް ސަފެއްގައި ތިއްބަވައި، އިހުތިޖާޖުކުރުމުގެ ޙައްޤު ދިފާޢުކުރައްވާފައެވެ. ރޭގެ އެއްވުމުގައި ބައިވެރިވި އެއްހާހަށްވުރެ ގިނަ ރައްޔިތުން ވަނީ އެމްޑީޕީގެ ލީޑަރޝިޕް އެގޮތަށް ކުރިއަށް ވަޑައިގަތުމުން ބޮޑު ތަރުހީބެއް ދެއްވާފައެވެ. ގިނަ ބައިވެރިން ފާހަގަކުރި ގޮތުގައި، މިއީ ރައްޔިތުންގެ ޙައްޤުގައި ވަކާލާތުކުރުމަށް ޕާޓީގެ ލީޑަރޝިޕުން ދެއްވި ވަރަށް ވަރުގަދަ މެސެޖެކެވެ.

“ޕާޓީގެ އެންމެ މަތީ ފަންތީގެ ބޭފުޅުންވެސް އަޅުގަނޑުމެންނާއެކު މި ހަރަކާތުގައި ބައިވެރިވެވަޑައިގަތުމަކީ އަޅުގަނޑުމެންނަށް ލިބޭ ވަރަށް ބޮޑު ހިތްވަރެއް. މިއީ ހަމައެކަނި ޕޯޑިއަމްގައި ތިބެގެން ތަޤްރީރުކުރާ ބައެއް ނޫންކަން އެނގިއްޖެ،” އެއްވުމުގައި ބައިވެރިވި ޙަސަން ޢަލީ ހަވާސާ ނޫހަށް މަޢުލޫމާތު ދެމުން ބުންޔެވެއެވެ.

“ލޫޓުވާލައިފި” އެއްވުން އަމާޒުކުރެވިފައިވަނީ މިހާރުގެ ސަރުކާރުން ނިންމާފައިވާ ބައެއް ނިންމުންތަކާމެދު ކަންބޮޑުވުން ފާޅުކުރުމަށެވެ. ޚާއްޞަކޮށް ރައްޔިތުންގެ ފައިސާ ޒިންމާދާރުކަމާއެކު ބޭނުން ނުކުރެވޭކަމުގެ ޝަކުވާތައް ފާޅުކުރުމަށެވެ. އެމްޑީޕީގެ އިސްވެރިން ވިދާޅުވާ ގޮތުގައި ކުރިއަށް އޮތްތަނުގައި މިފަދަ ގިނަ ހަރަކާތްތައް ރޭވިފައިވެއެވެ.

ރޭގެ އެއްވުމުގައި ބައިވެރިވި ގިނަ ރައްޔިތުން ފާހަގަކުރި ގޮތުގައި، ޕާޓީގެ ލީޑަރޝިޕް މިފަދަ ގޮތަކަށް ރައްޔިތުންނާއެކު އެއް ސަފެއްގައި ތިބުމަކީ އެމްޑީޕީއަށް އޮތް ތާއީދު އިތުރުވާނެ ކަމެކެވެ.

މޯލްޑިވިއަން އެއާލައިންސް އިން އެމްޑީޕީ ގެ ބޭންކު އެކައުންޓުތައް ފްރީޒްކުރަން ސިވިލް ކޯޓުގައި އެދުމަކީ، އެއީ ސިޔާސީ ބޭނުމެއްގައި ކުރި ކަމެއް ކަމަށް، އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

ރިޔާސީ އިންތިހާބުގެ ކެމްޕެއިނަށް އެމްޑީޕީން މޯލްޑިވިއަންގައި ކުރި ދަތުރުތަކަށް ދައްކަންޖެހޭ ފައިސާ ނުދައްކާތީ، އެ ޕާޓީގެ އެކައުންޓްތައް ފްރީޒްކުރުމަށް މޯލްޑިވިއަން އިން ސިވިލް ކޯޓުގައި އެދުނީ މިދިޔަ ހަފްތާގައެވެ.

މިކަމާ ގުޅިގެން “ރާއްޖެޓީވީ”ގެ ޕްރޮގްރާމެއްގައި ވާހަކަދައްކަވަމުން ޝާހިދު ވިދާޅުވީ، އެމްޑީޕީން މިރޭ ބޭއްވުމަށް ހަމަޖެހިފައިވާ މުޒާހަރާއަށް ހުރަސް އެޅުމަށް ސަރުކާރުން ކުރެވެން ހުރި ހުރިހާ މަސައްކަތެއް ކުރަމުންދާ ކަމަށާއި، އެކައުންޓްތައް ފްރީޒްކުރަން ކޯޓުގައި އެދުނު ކަމަކީ ވެސް އެ މަސައްކަތުގެ ތެރެއިން ކުރި ކަމެއް ކަމަށެވެ.

ޝާހިދު ވިދާޅުވީ، މީގެ ބޭނުމަކީ އެމްޑީޕީގެ ހުރިހާ މަސައްކަތެއް ހުއްޓުވާލުން ކަމަށެވެ. ނަމަވެސް އެކައުންޓްތައް ފްރީޒް ކުރިޔަސް މިރޭގެ މުޒާހަރާ ކުރިއަށްދާނެ ކަމަށް ޝާހިދު ވަނީ ހާމަކުރައްވާފައެވެ. އަދި އެމްޑީޕީއަށް މޯލްޑިވިއަން އަށް ފައިސާ ނުދެއްކިގެން އުޅެނީ، ދައުލަތުން އެ ޕާޓީއަށް ދޭންޖެހޭ ފައިސާ ނުދޭތީ ކަމަށްވެސް ޝާހިދު ވިދާޅުވިއެވެ.

“ތެޅިފޮޅިގަނެގެން މި އުޅެނީ މިރޭގެ ހަރަކާތާއި ގުޅިގެން. އެކަމަކު ރާއްޖޭގެ ރައްޔިތުން ތިބީ މިކަހަލަ ކަންތައް ގަބޫލުކޮށްގެން ފަހަތަށް ޖެހޭ ގޮތަކަށް ނޫން. އަޅުގަނޑުމެން އަޑު އުފުލާނަން. ސުލްހަވެރި ސިޔާސީ ހަރަކާތް ކުރިއަށް ގެންދާނަން،” ޝާހިދު ވިދާޅުވި އެވެ.

އެމްޑީޕީން “ލޫޓުވައިފި” ނަމުގައި މިރޭ މާލޭގައި ބޭއްވުމަށް ހަމަޖެހިފައިވާ މުޒާހަރާއަށް ރާއްޖޭގެ އެކި ރަށްތަކުން ވެސް މީހުން މާލެ އައުމަށް ވަނީ ހަމަޖެހިފަ އެވެ. މި މުޒާހަރާގައި ކުށްކުރާ ގްރޫޕްތައް ނެރެގެން މާލެތެރެ ހަލަބޮލިކޮށް ތަންތަނަށް ގެއްލުންދޭން ރާވާފައިވާ ކަމުގެ މައުލޫމާތު ލިބިފައިވާ ކަމަށް ފުލުހުން ވަނީ ބުނެފަ އެވެ. ނަމަވެސް އެމްޑީޕީން ވަނީ ފުލުހުންގެ އެ ތުހުމަތުތައް ދޮގުކޮށްފައެވެ.

މިރޭ ރާއްޖެ ޓީވީގެ “ފަލަ ސުރުޚީ” ޕްރޮގްރާމުގައި ވާހަކަފުޅު ދައްކަވަމުން އެމްޑީޕީގެ ރައީސް އަބްދުﷲ ޝާހިދު ވިދާޅުވީ، މިއަދު ރައްޔިތުން ހަނުހުރެއްޖެނަމަ، ދެން މި ޤައުމެއް ރައްޔިތުންނަށް އަނބުރާ ނުލިބޭނެ ކަމަށެވެ.

މިހާރު ރާއްޖޭގައި ވެރިކަން ކުރަމުންދާ ޕީއެންސީގެ ސަރުކާރަކީ އަމިއްލަ ފަރާތްތަކުގެ ވިޔަފާރިތަކަށް އެއްވެސް ސަމާލުކަމެއް ނުދޭ ސަރުކާރެއް ކަމަށް ޝާހިދު ފާހަގަކުރެއްވިއެވެ. އޭގެ ބަދަލުގައި، އަމިއްލަ ފަރާތްތަކުން ހިންގަމުންދާ ވިޔަފާރިތަކުގެ ދާއިރާތަކަށް ސަރުކާރުން ވަދެ، އެ ވިޔަފާރިތަކާ ވާދަކުރަމުންދާ ކަމަށް އޭނާ ވިދާޅުވިއެވެ. މިކަމަށް މިސާލު ދެއްވަމުން ޝާހިދު ފާހަގަކުރެއްވީ، ސަރުކާރުން މިހާރު އައިނުގެ ވިޔަފާރިއަށް ވަދެ، އެ ދާއިރާގައި ހަރަކާތްތެރިވަމުންދާ ކަމާއި، އަދި ޓެކްސީ ޚިދުމަތް ދިނުމަށްވެސް ސަރުކާރުން ނިންމާފައިވާ ކަމަށެވެ.

“އާންމު ރައްޔިތުން ޢިއްޒަތްތެރިކަމާއެކު އާމްދަނީއެއް ހޯދުމަށް ކުރަމުންދާ ކޮންމެ ވިޔަފާރިއަކަށް ސަރުކާރުން ވަދެ، އެ ވިޔަފާރީގެ ދާއިރާ ހީނަރުކުރަމުން ގެންދަނީ،” ޝާހިދު ވިދާޅުވިއެވެ.

ޝާހިދު އިތުރަށް ވިދާޅުވެފައިވަނީ، ކުރީގެ ސަރުކާރުތަކުން ތަރައްޤީގެ މަޝްރޫޢުތައް ކުރިއަށް ގެންދިޔައިރު، އެ މަޝްރޫޢުތަކުގެ އިމާރާތްކުރުމުގެ މަސައްކަތްތައް ޙަވާލުކުރަމުން ދިޔައީ އަމިއްލަ ފަރާތްތަކާ ކަމަށެވެ. މިގޮތަށް ޢަމަލުކުރުމުގެ ބޭނުމަކީ، އިމާރާތްކުރުމުގެ ދާއިރާ ރާއްޖޭގައި ކުރިއަރައި، އެ ދާއިރާގައި ވަޒީފާގެ ފުރުޞަތުތައް އިތުރުވެގެންދިއުން ކަމަށް އޭނާ ފާހަގަކުރެއްވިއެވެ.

“އެހެންނަމަވެސް، މިހާރު ފެންނަމުންދަނީ ތަފާތު މަންޒަރެއް. އައުޓްޑޯ ޖިމް އެޅުމުގެ މަސައްކަތް މިހާރު ޙަވާލުކުރަނީ އެމްއޭސީއެލް (މޯލްޑިވްސް އެއަރޕޯޓްސް ކޮމްޕެނީ) އާ. ހޮސްޕިޓަލެއް އިމާރާތްކުރަން ޖެހިއްޖެނަމަ އާރްޑީސީ (ރޯޑް ޑިވެލޮޕްމަންޓް ކޯޕަރޭޝަން) އާ. ގެސްޓްހައުސްއެއް އަޅަން ޖެހިއްޖެނަމަ ޙައްޖު ކޯޕަރޭޝަނާ،” ކަމަށް ޝާހިދު ވިދާޅުވިއެވެ.

މިހާރުގެ ސަރުކާރުން އަމިއްލަ ޕްރައިވެޓް ސެކްޓަރ ގެ ބަދަލުގައި ސަރުކާރުގެ ކުންފުނިތަކާ ތަރައްޤީގެ މަޝްރޫޢުތައް ޙަވާލުކުރަމުންދާ ކަމަށް ޝާހިދު ފާހަގަކުރެއްވިއެވެ. މިކަމުގެ ސަބަބުން އަމިއްލަ ފަރާތްތަކުގެ ވިޔަފާރިތަކަށް ނޭދެވޭ އަސަރުކޮށް، އާންމު ރައްޔިތުންނަށް ލިބެމުންދާ ވަޒީފާގެ ފުރުޞަތުތައް މަދުވެގެންދާނެ ކަމަށް އޭނާ ވިދާޅުވިއެވެ.

މި ކަންކަމުގެ ސަބަބުން، ޤައުމުގެ އިޤްތިޞާދީ ދުވެލި ދަށްވެ، އަމިއްލަ ފަރާތްތަކުގެ ވިޔަފާރިތަކަށް ބޮޑެތި ގޮންޖެހުންތަކާ ކުރިމަތިލާން ޖެހިދާނެ ކަމަށް ޝާހިދު ވިދާޅުވިއެވެ. އަދި މިފަދަ ސިޔާސަތުތަކުގެ ސަބަބުން، ދިގު މުއްދަތުގައި ޤައުމުގެ އިޤްތިޞާދަށް ނޭދެވޭ އަސަރުތަކެއް ކުރާނެ ކަމަށް އޭނާ ވަރަށް ބޮޑަށް ކަންބޮޑުވެ ވަޑައިގަންނަވާ ކަމަށް ފާހަގަކުރެއްވިއެވެ.

ޝާހިދު އިތުރަށް ވިދާޅުވެފައިވަނީ، މިފަދަ ކަންކަމާ ދެކޮޅަށް ރައްޔިތުން އަޑުއުފުލައި، އެމީހުންގެ ޙައްޤުތައް ހޯދުމަށް މަސައްކަތްކުރުމަކީ މުހިންމު ކަމެއް ކަމަށެވެ. އަދި ރައްޔިތުން މިކަމުގައި ހަރުދަނާ މަސައްކަތްތަކެއް ނުކޮށްފިނަމަ، ޤައުމުގެ އިޤްތިޞާދީ މިނިވަންކަން ގެއްލި، ރައްޔިތުންގެ ދިރިއުޅުމުގެ ފެންވަރު ދަށްވެގެންދާނެ ކަމަށް އޭނާ ވިދާޅުވިއެވެ.

ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ އިސް ވަފުދެއް، ޔޫރަޕިއަން ޔޫނިއަން (އީޔޫ) އިން ދިވެހިރާއްޖެއަށް ކަނޑައަޅުއްވާފައިވާ ސަފީރުންނާއި މަންދޫބުންނާ މިއަދު ހެނދުނު ސްރީލަންކާގެ ކޮލޮމްބޯގައި ބައްދަލުކުރައްވައިފިއެވެ.

މި ވަފުދުގައި ހިމެނިވަޑައިގެންނެވީ އެމްޑީޕީގެ ރައީސް އަބްދުﷲ ޝާހިދު، ފާޓީގެ ޗެއަރޕާސަން ފައްޔާޒު އިސްމާއިލް، ރައްޔިތުންގެ މަޖިލީހުގެ މެންބަރު މީކާއިލް ނަސީމް އަދި ޚާރިޖީ ގުޅުންތަކާބެހޭ ކޮމިޓީގެ މެންބަރު ހުސައިން ޝަހީމް އެވެ.

މި ބައްދަލުވުމުގެ މައިގަނޑު މަގުސަދަކީ މިހާރު ރާއްޖޭގައި ވެރިކަންކުރަމުންދާ ޕީއެންސީގެ ސަރުކާރުން މިނިވަން މުސްތަގިއްލު މުއައްސަސާތަކުގެ ކަންކަމަށް ނުފޫޒު ފޯރުވުމާއި، ކޮރަޕްޝަންގެ ސީރިއަސް ތުހުމަތުތަކާއި، ބާރުތައް ނަހަމަ ގޮތުގައި ބޭނުންކުރުމުގެ މައްސަލަތަކާއި، މީޑިއާ ކޮންޓްރޯލް ބިލެއްގެ ޒަރީޢާއިން މީޑިއާ މިނިވަންކަމާއި ޚިޔާލުފާޅުކުރުމުގެ މިނިވަންކަން ހަނިކުރުމުގެ ކަންކަމާ ގުޅޭގޮތުން އީޔޫގެ އިސްވެރިންނަށް މައުލޫމާތު ދިނުމެވެ. އަދި ދުސްތޫރީ އަދި ޚާރިޖީ ސިޔާސަތުތަކަށް އަންނަމުންދާ އޮޅުންބޮޅުން ބޮޑު ބަދަލުތަކުގެ މައްޗަށްވެސް އަލިއަޅުވާލެވުނެވެ.

އެމްޑީޕީގެ ވަފުދުން ވަނީ ދިވެހިރާއްޖެއަށް ޑިމޮކްރަސީ އާއި އިސްލާހީ މަގު ފެނުނު ހާލަތާއި، ގާނޫނުތަކުގެ ޒަރީއާއިން މިނިވަން މުއައްސަސާތަކާއި ނޫސްވެރިކަމުގެ މިނިވަންކަން ކަށަވަރުކުރުމަށް ކުރެވުނު ދިގު މަސައްކަތްތައް އީޔޫގެ މަންދޫބުންނަށް ހަނދާންކޮށްދީފައެވެ. ޕާޓީގެ ރައީސް އަބްދުﷲ ޝާހިދު ވަނީ، މިފަދަ ޑިމޮކްރެޓިކް ހަމަތައް މިހާރު ހަލުވިކަމާއެކު ފަހަތަށް ޖެހި، ނެތިދާން ކައިރިވެފައިވާ ކަމަށް ފާހަގަކުރައްވާފައެވެ.

ޔޫރަޕިއަން ޔޫނިއަންގެ ގައުމުތަކުން ކޮންމެ އަހަރަކު ފަސް ލައްކައަށްވުރެ ގިނަ ޓޫރިސްޓުން ރާއްޖެއަށް އަންނަކަން ފާހަގަކުރަމުން، ދިވެހިރާއްޖެއާ އެކު އީޔޫގެ ވަރުގަދަ އިގްތިސާދީ އަދި ސަގާފީ ގުޅުމެއްވާކަން އެމްޑީޕީގެ ވަފުދުން ވަނީ ފާހަގަކުރައްވާފައެވެ.

ދިވެހިރާއްޖޭގައި ޑިމޮކްރެޓިކް ނިޒާމު ދެމެހެއްޓުމުގައި އީޔޫގެ ސަފީރުންނާއި މަންދޫބުންގެ ފަރާތުން ލިބޭ އެއްބާރުލުމަށް އެމްޑީޕީގެ ފަރާތުން ޝުކުރު އަދާކުރެއްވިއެވެ.

އިދިކޮޅު މައިޕާޓީ، ދިވެހިރައްޔިތުންގެ ޑިމޮކްރެޓިކް ޕާޓީ (އެމް.ޑީ.ޕީ) އިން އަންނަ އޮކްޓޯބަރު މަހުގެ 3 ވަނަ ދުވަހު ބޭއްވުމަށް ހަމަޖައްސާފައިވާ ސިޔާސީ ހަރަކާތުގެ ތައްޔާރީތަކާ ގުޅޭގޮތުން، ހުވަދޫ އަތޮޅުގެ ދާއިރާތަކުގެ ގައުމީ މަޖިލިސް މެންބަރުންނާއި ޓީމުތަކާ އެމް.ޑީ.ޕީގެ ލީޑަރޝިޕުން ބައްދަލުކުރައްވައި މަޝްވަރާކުރައްވައިފިއެވެ. މި ބައްދަލުވުމަކީ ކުރިއަށް އޮތް ހަރަކާތަށް ހަރުދަނާ ތައްޔާރީތަކެއް ވުމުގެ ގޮތުން ކުރެވުނު މުހިންމު މަޝްވަރާ ބައްދަލުވުކެވެ.

މި ބައްދަލުވުމުގައި އެމް.ޑީ.ޕީގެ ރައީސް އަދި ރައްޔިތުންގެ މަޖިލީހުގެ ކުރީގެ ރައީސް، އަބްދުﷲ ޝާހިދު ބައިވެރިވެވަޑައިގެންނެވިއެވެ.

އޮކްޓޯބަރު 3 ވަނަ ދުވަހުގެ ހަރަކާތަކީ މިހާރު ރާއްޖޭގައި އޮތް ޕީ.އެން.ސީ ގެ ވެރިކަމުން ހިނގަމުންދާ ކަންތައްތަކާއި ދެކޮޅަށް އެމް.ޑީ.ޕީއިން އިސްނަގައިގެން ބާއްވާ އިހްތިޖާޖެކެވެ.