އެމްޑީޕީގެ ޗެއާޕާސަން ކަމަށް ވާދަކުރާނެ ކަމަށް އިއުލާނުކުރި ލ. ފޮނަދޫ, ހުދުވިލާގެ އިބްރާހީމް މުޙައްމަދު (ވާޑު) އިންތިހާބުގައި ވާދަނުކުރަން ނިންމާ އޭނާގެ ތާއީދު އޮތީ މީކާއީލް އަހްމަދު ނަސީމަށް ކަން ހާމަކޮށްފި އެވެ.
ވާޑު ބުނީ އޭނާ އިންތިހާބުގައި ވާދަނުކުރަން ނިންމާ ފަހަތަށް ޖެހުނީ އެމްޑީޕީގެ ލީޑާޝިޕަކަށް މީކާއީލް ފަދަ ޒުވާނަކު ގެންނަން ފުރުސަތު ފަހިކުރަން ކަމަށެވެ. އެއީ ކޮންމެހެން ކުރަން ޖެހޭ މުހިންމު ކަމެއް ކަމަށް ބުންޏެވެ.
މީކާއީލް އިންތިހާބު ކުރަން ކުރަންޖެހޭ ހުރިހާ މަސައްކަތެއް ކުރާނެ ކަމަށްވެސް ބުންޏެވެ.
އެމްޑީޕީގެ ޗެއާޕާސަން އިންތިހާބުގެ ކެމްޕެއިން ދަނީ ފޯރީގައި ހިންގަމުންނެވެ. ރައީސް ނަޝީދާއި މީކާއީލް ދަނީ އަތޮޅުތަކަށް ދަތުރުކޮށް ތާއީދު ހޯދުމަށް ގިނަ މަސައްކަތްތަކެއް ކުރަމުންނެވެ. އިންތިހާބުގެ ފޯރިގަދަވީ ރައީސް ސޯލިހްގެ ތާއީދު މީކާއީލަށް އޮތްކަން ހާމަކުރުމުންނެވެ.
އެމްޑީޕީއަށް ޗެއާޕާސަނަކު ހޮވުން އޮތީ އަންނަ ހުކުރު ދުވަހު އެވެ.
ކިޔުންތެރިންގެ ހިޔާލު