މިދިޔަ ސެޕްޓެމްބަރު މަހު ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 100 މައްސަލައެއް ރިޕޯޓްކޮށްފައިވާ ކަމަށް އިޖުތިމާއީ އަދި އާއިލީ ތަރައްގީއާ ބެހޭ ވުޒާރާ ވިދާޅުވެއްޖެއެވެ.
އެ ވުޒާރާ އިން ހާމަ ކުރި ތަފާސް ހިސާބުން ދައްކާ ގޮތުގައި ރިޕޯޓުކޮށްފައިވާ 100 މައްސަލައިގެ ތެރެއިން އެންމެ ގިނަ އަދަދެއް ހިމެނެނީ ކުޑަކުދިންނަށް އިހުމާލުވުމުގެ މައްސަލަތަކެވެ. މިގޮތުން 32 މައްސަލަ ރިޕޯޓުކޮށްފައިވާއިރު، އޭގެ ތެރޭގައި 21 ފިރިހެން ކުދިންނާއި 11 އަންހެން ކުދިންނަށް އިހުމާލުވުމުގެ މައްސަލަތައް ހިމެނެއެވެ.
ދެވަނައަށް އެންމެ ގިނައިން ރިޕޯޓުކޮށްފައިވާ މައްސަލައަކީ ކުޑަކުދިންނަށް ޖިންސީ ހާނިއްކަ ކުރުމުގެ މައްސަލައެވެ. ސެޕްޓެންބަރ މަހު 23 ޖިންސީ ހާނިއްކައިގެ މައްސަލަ ރިޕޯޓުކޮށްފައިވާއިރު، އޭގެ ތެރޭގައި ފިރިހެން ކުދިންނާއި ގުޅޭ 05 މައްސަލައަކާއި، އަންހެން ކުދިންނާއި ގުޅޭ 18 މައްސަލަ ހިމެނެއެވެ.
އަނިޔާގެ އެހެނިހެން ބާވަތްތަކުގެ ތެރޭގައި، ޖިސްމާނީ ހާނިއްކައިގެ 19 މައްސަލަ، ނަފްސާނީ ހާނިއްކައިގެ 11 މައްސަލަ، ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ 07 މައްސަލަ، އެހެން ކުދިންގެ ފަރާތުން ގަނާ ލިބުމުގެ 04 މައްސަލަ، ބިރުދެއްކުމުގެ ގޮތުން ކުރެވޭ ކަންކަން ނުވަތަ ބްލެކްމެއިލް ކުރުމުގެ 02 މައްސަލަ، ކުދިން ދޫކޮށްލާފައި ދިޔުމުގެ 01 މައްސަލަ އަދި ކުދިން ނަހަމަ ގޮތުގައި ބޭނުންކުރުމުގެ 01 މައްސަލަ ހިމެނެއެވެ. ޖުމްލަ 100 މައްސަލައިގެ ތެރެއިން އަންހެން ކުދިންނާއި ގުޅޭ 50 މައްސަލައާއި، ފިރިހެން ކުދިންނާއި ގުޅޭ 50 މައްސަލަ ރިޕޯޓުކޮށްފައިވެއެވެ.
ކުޑަކުދިންނަށް ކުރާ އަނިޔާގެ މައްސަލަތަކުގެ އިތުރުން، ސެޕްޓެންބަރު މަހު އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއަށް ކުޑަކުދިންގެ އަހްލާގީ މައްސަލަތަކާ ގުޅޭ 12 މައްސަލައެއް ވެސް ރިޕޯޓުކޮށްފައިވެއެވެ.
މި ބާވަތުގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ ސްކޫލަށް ދާން ބޭނުން ނުވުމުގެ މައްސަލަތަކެވެ. އެގޮތުން ސްކޫލަށް ދާން ބޭނުން ނުވުމުގެ 06 މައްސަލައެއް ރިޕޯޓުކޮށްފައިވެއެވެ. ހަމައެހެންމެ، ރުޅި އިސްކުރުމާއި ރުޅިގަދަވެގެން އުޅުމުގެ 02 މައްސަލައާއި، ގެއިން ނިކުމެގެން ދިއުމުގެ 01 މައްސަލަ ވެސް ސެޕްޓެންބަރު މަހު ރިޕޯޓުކޮށްފައިވެއެވެ. މީގެ އިތުރުން، އެހެނިހެން 03 މައްސަލަ ހިމެނެއެވެ.
ކުދިންގެ އަހްލާގީ މައްސަލަތަކާއި ގުޅިގެން ސެޕްޓެންބަރު މަހު އެ ވުޒާރާއަށް އެންމެ ގިނައިން ރިޕޯޓުކޮށްފައިވަނީ އަންހެން ކުދިންގެ މައްސަލައެވެ. އެގޮތުން، އަންހެން ކުދިންގެ 08 މައްސަލައަކާއި ފިރިހެން ކުދިންގެ 04 މައްސަލަ ހިމެނެއެވެ.
ކިޔުންތެރިންގެ ހިޔާލު