އިސްރާއީލުގެ ޖަލުތަކުގައި ބަންދުކޮށްފައި ތިބި ފަލަސްތީނުގެ އަސީރުންނާ ބައްދަލުކުރުމުގެ ފުރުސަތު ބައިނަލްއަގުވާމީ ރެޑް ކްރޮސްގެ މަންދޫބުންނަށް ދިނުމަށް އިސްރާއީލުގެ ސުޕްރީމް ކޯޓުން ބުދަ ދުވަހު ހުކުމްކޮށްފިއެވެ.
އެ ހުކުމާއެކު، ރެޑް ކްރޮސްގެ މަންދޫބުން ޖަލުތަކަށް ވަނުން މަނާކޮށް އިސްރާއީލު ސަރުކާރުން ގެންގުޅެމުންދިޔަ ސިޔާސަތު ވަނީ ބާތިލުވެފައެވެ.
ކޯޓުގެ ނިންމުމުގައި ބަޔާންކޮށްފައިވަނީ، ރެޑް ކްރޮސްއަށް އަސީރުންނާ ބައްދަލުކުރުން މަނާކުރުމަކީ އިސްރާއީލުގެ ގާނޫނުތަކާއި ބައިނަލްއަގުވާމީ ގާނޫނުތަކާ ޚިލާފު ކަމެއް ކަމަށެވެ. އަދި 2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހުގެ ފަހުން، ޖަލުތަކަށް ޒިޔާރަތްކުރުން ހުއްޓުވުމަށް ސަރުކާރުން ނިންމި ނިންމުމަށް އެއްވެސް ގާނޫނީ ބިނާއެއް ދެއްކިފައި ނުވާކަމަށްވެސް ކޯޓުން ފާހަގަކުރިއެވެ.
އެއީ ފާއިތުވި 50 އަހަރުގެ ތެރޭގައި ރެޑް ކްރޮސްގެ ޒިޔާރަތްތައް އިސްރާއީލުން ހުއްޓުވި ފުރަތަމަ ފަހަރެވެ. އެ މައްސަލަ ކޯޓަށް ހުށަހެޅީ އެސޯސިއޭޝަން ފޯ ސިވިލް ރައިޓްސް އިން އިސްރާއީލް އާއި އިތުރު އިންސާނީ ހައްގުތަކަށް މަސައްކަތްކުރާ ޖަމިއްޔާތަކުންނެވެ. އޭސީއާރްއައި އިން ހާމަކުރި ގޮތުގައި، އެ ނިންމުމުގެ ސަބަބުން އިސްރާއީލުގެ ޖަލުތަކާއި އަސްކަރީ ބަންދު މަރުކަޒުތަކުގައި ތިބި 9،000 އަށްވުރެ ގިނަ ފަލަސްތީނު މީހުންނަށް ރެޑް ކްރޮސްގެ އެހީތެރިކަން ލިބުމުގެ މަގު ފަހިވެގެންދާނެއެވެ.
އިސްރާއީލުން ޣައްޒާގައި ހިންގަމުންދާ ލާއިންސާނީ އުދުވާނުގައި މިހާތަނަށް 72،950 އަށްވުރެ ގިނަ ފަލަސްތީނު މީހުން ޝަހީދުކޮށްލާފައިވާއިރު، ގިނަ އިލްމުވެރިންނާއި އދ. އިން ވަނީ މިއީ ނަސްލު ނައްތާލުމުގެ (ޖެނޮސައިޑް) އަމަލެއްގެ ގޮތުގައި ސިފަކޮށްފައެވެ.
ކޯޓުގެ އެ ނިންމުން އައިސްފައިވަނީ އިސްރާއީލުގެ ޖަލުތަކުގައި ފަލަސްތީނު މީހުންނަށް ބޮޑެތި އަނިޔާތަކެއް ކުރަމުންދާކަމުގެ ރިޕޯޓްތައް ފެންމަތިވެފައިވާ ދަނޑިވަޅެއްގައެވެ. އދ. އިން ދާދިފަހުން ނެރުނު ރިޕޯޓެއްގައިވާ ގޮތުން، ‘ސްޑޭ ޓޭމަން’ ފަދަ އަސްކަރީ މަރުކަޒުތަކުގައި ހައްޔަރުކޮށްފައި ތިބޭ މީހުންނަށް ޖިންސީ ގޯނާކުރުމާއި، ރޭޕްކުރުމާއި، އަދި އެ ނޫންވެސް ލާއިންސާނީ އަނިޔާތައް އިސްރާއީލުގެ ސިފައިން ދަނީ ހިންގަމުންނެވެ.
ރެޑް ކްރޮސް އިން ވަނީ ކޯޓުގެ ނިންމުމަށް މަރުހަބާ ކިޔާފައެވެ. އެ ޖަމިއްޔާއިން ނެރުނު ބަޔާނެއްގައި ބުނީ، ބައިނަލްއަގުވާމީ ގާނޫނުތަކުގެ ދަށުން އަސީރުންނާ އަމިއްލައަށް ބައްދަލުކުރުމުގެ ފުރުސަތު ލިބުމަކީ ލާޒިމު ކަމެއް ކަމަށާއި، ވީ އެންމެ އަވަހަކަށް ޒިޔާރަތްތައް އަލުން ފެށުމަށް އިސްރާއީލުގެ ކަމާބެހޭ ފަރާތްތަކާއެކު މަޝްވަރާ ކުރަމުންދާ ކަމަށެވެ.
ކިޔުންތެރިންގެ ހިޔާލު