ރަޖިސްޓްރީކޮށްގެން ހިންގާ އަމިއްލަ މީޑިއާތަކަށް ދައުލަތުގެ ބަޖެޓުން މާލީ އެހީ ދިނުމުގެ އުސޫލުގެ ދަށުން، ސަރުކާރުގެ އިސް ބޭފުޅުންގެ މަސްލަހަތު އޮންނަ މީޑިއާތައް ހިމެނޭހެން ފައިސާ ދޫކުރުމަށް ނިންމައިފިއެވެ.
ރަޖިސްޓްރީކޮށްގެން ހިންގާ އަމިއްލަ މީޑިއާތަކަށް ދައުލަތުގެ ބަޖެޓުން މާލީ އެހީ ދިނުމުގެ އުސޫލުގެ ދަށުން 18 މީޑިއާއަކަށް 27.9 މިލިއަން ރުފިޔާ ދޫކުރަން ކަނޑައަޅިއެވެ. އެއީ ދައުލަތުގެ އަހަރީ ބަޖެޓްގެ 0.01 ޕަސެންޓެވެ.
މީޑިއާތަކަށް ދޫކުރުމަށް ނިންމާފައިވާ ފައިސާ ދޫކުރުމަށް ނިންމާފައި ވަނީ ޔޫތު މިނިސްޓްރީގެ ދަށުންނެވެ. ޔޫތް މިނިސްޓްރީން ހުޅުވާލާފައިވާ ފުރުސަތުގައި އެކަމަށް އެދި ކުރިމަތިލި މީޑިއާތަކުގެ ތެރެއިން ޝަރުތު ހަމަވާ މީޑިއާތައް މިހާރު ވަނީ އާމުކޮށްފައެވެ. އަދި އެ މީޑިއާތަކަށް ލިބޭ ފައިސާގެ ތަފްސީލް ވެސް ވަނީ އާއްމުކޮށްފައެވެ.
އޭގެ ތެރެއިން އެންމެ ގިނަ ފައިސާ ލިބެނީ އެ ފައިސާ ދޫކުރާ ވުޒާރާ، ޔޫތު މިނިސްޓްރީގެ ވަޒީރު އިބްރާހިމް ވަހީދު (އަސްވާޑް) ގެ މަސްލަހަތު އޮންނަ ސަންގު ޓީވީއަށެވެ. އެ ޓީވީއަށް ޖުމްލަ 3.8 މިލިއަން ލިބެއެވެ. މީގެ އިތުރުން ސަންގު އޮންލައިން އަށް 1.3 މިލިއަން ރުފިޔާ ލިބެ އެވެެ. އެހެންކަމުން ޖުމްލަ 5.1 މިލިއަން ރުފިޔާ ސަންގައް ލިބޭނެއެވެ.
ދެވަނައަށް އެންމެ ގިނައިން ފައިސާ ލިބެނީ ސަން އަށެވެ. ސަންމީޑިއާ ގްރޫޕްގެ ދަށުން ހިންގާ އެސްއެސްޓީވީ އަށް 2.9 މިލިއަން ރުފިޔާ ލިބޭ އިރު ސަން އޮންލައިނަށް 1.3 މިލިއަން ރުފިޔާ ލިބެއެވެ. ސަން މީޑިއާ އަކީ އެމްޑީއޭގެ ލީޑަރ އަހުމަދު ސިޔާމް މުހައްމަދުގެ މަސްލަހަތު އޮންނަ މީޑިއާއެކެވެ.
މީގެ އިތުރުުން ޖުމްހޫރީ ޕާޓީގެ ލީޑަރ ޤާސިމް އިބްރާޙިމްގެ މަސްލަހަތު އޮންނަ ވީޓީވީއަށް ތިން މިލިއަން އަދި ވީނިއުސް އޮންލައިނަށް 1.1 މިލިއަން ލިބޭނެ މަގު ވަނީ ފަހިކޮށްދީފައެވެ. އެހެނިހެން މީޑިއާތަކަށް ފައިސާ ދޫކުރަން ނިންމާފައިވާ ގޮތަށް ބަލާ އިރު ވޮއިސް، ވަންއޮންލައިން، ދަޕްރެސް، ދައުރަށް 1.3 މިލިއަން ރުފިޔާ ދިނުމަށް ނިންމާފައިވެއެވެ. އަދި މިހާރު އަށް 1.2 މިލިއަން، މިހާރުގެ ދަށުން ހިންގަމުންދާ އެޑިޝަން އަށް 1.1 މިލިއަން ދިނުމަށް ވަނީ ނިންމާފައެވެ.
ހަމައެހެންމެ ތީރު، އަދަދު ނޫސް، ދިޔަރެސް އަށް 1.1 މިލިއަން ރުފިޔާ އަދި ގާފު އޮންލައިން އަށް 1 މިލިއަން ރުފިޔާ ދިނުމަށް ވަނީ ނިންމާފައެވެ. މީގެ އިތުރުން މާލްދީފް އޮންލައިން އަށް 899،197 ރުފިޔާ އަދި ތިލަދުން އަށް 1.2 މިލިއަން ރުފިޔާ ދިނުމަށް ވަނީ ނިންމާފައެވެ.
ފައިސާ ލިބޭ މީޑިއާ ގެ ތެރޭގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އަރަބި ބަހުން ނެރުއްވި މާލްދީފް އޮންލައިން ހިމެނޭ އިރު އެ ނޫހަކީ ޝަހީމްގެ ދަރިފުޅު މާހިލް ޝަހީމްގެ އިތުރުން ޝަހީމްގެ ގާތް ބޭފުޅެއް ކަމަށްވާ އިސްލާމިކް މިނިސްޓްރީގެ ނައިބު މިނިސްޓަރު އަލީ އަހުސަންގެ ކޮއްކޮ އިބްރާހިމް އަޝްވާގުގެ ހިއްސާ އޮތް ނޫހެކެވެ. އެ ނޫހަށް އިނގިރޭސި ހަބަރު ލިޔަން މި އަހަރު ފެށި ނަމަވެސް މި އަހަރު ތެރޭގައި މާ ގިނަ ހަބަރުތަކެއް އެ ނޫހުން ފެންނާކަށް ނެތެވެ.
މީގެ އިތުރުން ދިޔަރެސް ނޫހަކީ ޕީއެންސީގެ މަޖްލިސް މެމްބަރެއްގެ ގޮތުގައި ހުންނެވި ހިތަދޫ މެދު ދާއިރާގެ މެންބަރު އަހުމަދު އަޒާންގެ ނޫހެވެ. ފައިސާ ދޭ ބައެއް ނޫސްތަކަކީ ދުވާލަކު އެއް ފަހަރު ވެސް ޚަަބަރެއް ނުލިޔާ ނޫސްތަކެކެވެ. އެހެންކަމުން ފައިސާ ދިނުމުގައި ބަލާފައިވާ ކަންކަމާއި މެދު ބައެއް އާއްމުން ދަނީ ސުވާލު އުފައްދަމުންނެވެ.
ކިޔުންތެރިންގެ ހިޔާލު