Author: މަރިޔަމް ނާޖިލާ އިމްރާން

7 ފެބުރުއަރީ 2012 ގައި އައްޑޫ ސިޓީގައި ހިނގާދިޔަ ހަމަނުޖެހުންތަކާއި ރޯކުރުމުގެ މޭސްތިރިއަކީ ސިޓީގެ ކުރީގެ މޭޔަރު އަބްދުﷲ ސޯދިގު (ސޯބެ) ކަމަށް ބުނެ ސަރުކާރުގެ ވަޒީރަކު ވާހަކަ ދެއްކެވި ނަމަވެސް އެއީ ހަގީގަތެއް ނޫންކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު އަސްލަމް ވިދާޅުވެއްޖެ އެވެ.

މާދަމާ ބޭއްވުމަށް ހަމަޖެހިފައިވާ ހިތަދޫ އުތުރު ދާއިރާގެ ބައި އިލެކްޝަންގައި، އެމްޑީޕީގެ ޓިކެޓުގައި އިންތިހާބުގައި ވާދަކުރައްވަނީ ސޯބެ އެވެ. ކުރީގެ ރައީސް މުހައްމަދު ނަޝީދުގެ ވެރިކަން 7 ފެބްރުއަރީގައި ބަދަލުވެ، އޭގެ ޖެހިގެން އައި ދުވަހު ރާއްޖޭގެ އެކި ހިސާބުތަކުގައި ބޮޑެތި ހަމަނުޖެހުންތައް ހިނގައިދިޔަ އެވެ. އެގޮތުން ރަށްރަށުގެ ޕޮލިސް ސްޓޭޝަންތަކާއި، ކޯޓުތައް އަދި ރަށު އޮފީސްތަކުގައި ވަނީ ރޯކޮށްފަ އެވެ.

އައްޑޫގައި ހިނގި އެ ހަމަނުޖެހުންތަކާއި ގުޅޭގޮތުން ޕީއެންސީ ބޭއްވި ކެމްޕެއިން ޖަލްސާގައި ފިޝަރީޒް މިނިސްޓަރ އަހުމަދު ޝިޔާމް ވިދާޅުވީ އެ ދުވަހުގެ ރޯކުރުންތަކުގައި އިސްކޮށް ހުންނެވީ ސޯބެ ކަމަށެވެ. އައްޑޫ ސިޓީގެ މޭޔަރަކަށް ސޯބެ އޭރު ހުންނަވައިގެން، އައްޑުއަށް ވަރަށް ބޮޑެތި ގެއްލުންތައް ދިންއިރު އެކަމުން އަރައިގަތުމަށް އެތައް އަހަރެއް ނެގިކަމަށް ޝިޔާމް ވިދާޅުވި އެވެ.

ޝިޔާމަށް ރައްދު ދެއްވައި އަސްލަމް ވިދާޅުވީ، ސޯބެއަށް ކުރީ އެއްވެސް އަސްލެއް ނެތް ތުހުމަތުތަކެއް ކަމަށެވެ. އަސްލަމް ވިދާޅުވީ އައްޑޫގައި ހިނގި ހަމަނުޖެހުމާއި، ރޯކޮށްލުމުގެ މައްސަލައިގައި ދައުވާ އުފުލި މީހުންގެ ތެރޭގައި ސޯބެގެ ނަމެއް ނޯންނާނެކަމަށެވެ. އަދި އެ މައްސަލައިގައި އޭރު ދައުވާ ކުރި މީހުންގެ ތެރޭގައި ހިމެނޭ އެއް ނަމަކީ ހިތަދޫ އުތުރު ދާއިރާއަށް ވާދަކުރައްވާ، ޕީއެންސީ ކެންޑިޑޭޓު އަހުމަދު ސައީދުކަމަށް އޭނާ ވިދާޅުވި އެވެ،

އަޅުގަނޑު ޝިޔާމަށް ދަންނަވާލަން ބޭނުންވަނީ، އޭރު ޝިޔާމް ކޮބައިތޯއޭ.. އަސްލު މިކަން ހިނގި ގޮތެއް ޝިޔާމަކަށް އިހުސާސެއް ނުކުރެވޭނެ. ސޯބެއަކީ އިސްލާހީ ހަރަކާތުގައި އެތައް އަނިޔާއެއް ތަހައްމަލުކުރި ބޭފުޅެއް

އަސްލަމް ވިދާޅުވީ، ފެހި ގާނޫނުއަސާސީން ރައްޔިތުންނަށް ލިބިދީފައިވާ އަސާސީ ހައްގުތައް މިއަދު ނިގުޅައިގަނެވެމުންދާ ކަމަށެވެ. ވަކިން ހާއްސަކޮށް، ނޫސްވެރިކަމަށް އޮތް ބިރުވެރިކަން ހާމަވަމުންދާކަމަށް ވިދާޅުވި އެވެ.

މިއީ އަނިޔާވެރިކަމުގެ ސިފައެއްކަމަށާއި، ރައްޔިތުންގެ ކަންބޮޑުވުން މިކަމުގައި އިންތިހާއަށް އެބައޮތްކަމަށް އަސްލަމް ވިދާޅުވި އެވެ.

މިހާރު ހިނގަމުންދާ ރައީސް ޑރ. މުޙައްމަދު މުޢިއްޒުގެ ސަރުކާރު ނިމުމުގެ ކުރިން، ރައްޔިތުންގެ މަޖިލީހުގެ މެޖޯރިޓީ އެމްޑީޕީން އަލުން ހޯދާނެ ކަމަށް އެ ޕާޓީގެ ކުރީގެ ޗެއާޕާސަން މޫސާ މަނިކު (ރީކޯ) ވިދާޅުވެއްޖެއެވެ.

ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި ވާދަކުރައްވާ އެމްޑީޕީގެ ކެނޑިޑޭޓް އަބްދުﷲ ޞާދިޤް (ސޯބެ)ގެ ކެމްޕޭން ޖަލްސާގައި ވާހަކަދައްކަވަމުން މޫސަ ވިދާޅުވީ، ޤާނޫނުއަސާސީގެ ތިންވަނަ ބާބުގައި ރައްޔިތުންގެ މަޖިލީހުގެ ވާހަކަ ވަރަށް ތަފްސީލުކޮށް އޮތް ނަމަވެސް، މިހާރު ފެންނަނީ މަޖިލީހުގެ ހުރިހާ ބާރުތަކެއް ރައީސުލްޖުމްހޫރިއްޔާގެ މުށުތެރެއަށް ލައްވާފައިވާ މަންޒަރު ކަމަށެވެ. އަދި މަޖިލިސް ސަލާމަތްކުރުމަށްޓަކައި އެމްޑީޕީގެ ކެންޑިޑޭޓް ސޯބެ މަޖިލީހަށް އިންތިޚާބު ކުރަންޖެހޭ ކަމަށް އޭނާ ވިދާޅުވިއެވެ.

“ރާއްޖޭގެ ގާނޫނުއަސާސީގެ ދެވަނަ ބާބުގަ ހުރި އަސާސީ ހައްގުތަކާ މިނިވަންކަމުގެ ހުރިހާ މާއްދާތަކެއް އެވަނީ ފުނޑުފުނޑު ކޮށްލާފަ. އެއްވެ އުޅުމުގެ މިނިވަންކަން، ހިޔާލު ފާޅުކުރުމުގެ މިނިވަންކަން، މިހެންގޮސް ވަކިވައްތަރެއްގެ ސޯފާއެއް ފިޔަވާ ބޭނުން ނުކުރެވޭ ވަރަށް ހުރިހާ ކަމެއް އެވަނީ ނައްތާލާފަ،” ސަރުކާރަށް ފާޑުވިދާޅުވަމުން މޫސަ ވިދާޅުވިއެވެ.

ރައީސް މުޢިއްޒުގެ ސިއްހީ ހާލަތާ ބެހޭގޮތުން ވާހަކަދައްކަވަމުން މޫސަ ވިދާޅުވީ، ޤާނޫނުއަސާސީގެ 115 ވަނަ މާއްދާގައި ރައީސުލްޖުމްހޫރިއްޔާއަކީ ބުއްދި ސަލާމަތުން ހުރި މީހަކަށް ވާންޖެހޭނެ ކަމަށް ބަޔާންކޮށްފައިވާ ކަމަށެވެ. ނަމަވެސް ރައީސްގެ ވާހަކަފުޅުތައް ހުރި ގޮތުން އެމަނިކުފާނު “ހަމަގުން ނެއްޓިފައިވާ” ކަމަށް މޫސަ ތުހުމަތު ކުރެއްވިއެވެ. މިސާލެއްގެ ގޮތުން އޭނާ ފާހަގަކުރެއްވީ ދުނިޔޭގެ ސިއްހަތު ޖަމިއްޔާއާ ހަވާލާދީ ސިނގިރޭޓުގެ އަގު ހެޔޮކުރުމާ ގުޅޭގޮތުން ރައީސް ދެއްކެވި ކަމަށް ބުނާ ވާހަކަފުޅެވެ.

އައްޑޫގެ ތަރައްޤީއަށް އަލިއަޅުވާލައްވަމުން މޫސަ ވިދާޅުވީ، އައްޑޫގެ ޗާޓު ބަދަލުކޮށް ތަރައްޤީގެ މަޝްރޫޢުތައް ހިންގީ އެމްޑީޕީގެ ސަރުކާރުތަކުން ކަމަށެވެ. އެގޮތުން ރައީސް ނަޝީދުގެ ވެރިކަމާއި، ރައީސް ޞާލިޙުގެ ވެރިކަމުގައި އައްޑޫއަށް ގެނައި ކުރިއެރުންތައް އޭނާ ފާހަގަކުރެއްވިއެވެ.

މީގެ އިތުރުން، ސަރުކާރުގެ ތެރޭގައި މިހާރު އޮތް ބައިބައިވުމަށް އިޝާރާތް ކުރައްވައި މޫސަ ވިދާޅުވީ، ލޯކަލް ކައުންސިލް އިންތިޚާބަށްފަހު ގިނަ އަދަދެއްގެ ވަޒީރުންނާއި އިސްވެރިން ވަކިކުރަމުންދާ ކަމަށެވެ. އަދި މަޖިލީހުގެ ސުޕަ މެޖޯރިޓީ އޮތުމަކީ ބޭނުންހާ ގޮތެއް ހެދޭނެ ސަބަބެއް ނޫންކަން މާޒީން އެނގެން އޮތް ކަމަށްވެސް އޭނާ ވިދާޅުވިއެވެ.

“އެމްޑީޕީ އިރާދަކުރެއްވިޔާ 2028 ގެ ވެރިކަމާ ދިމާއަށް މިތިބީ ހިފާފަ. މިހާރު އެއޮތް ގާނޫނު އަސާސީގެ ދަށުން އަދި ރައްޔިތުންގެ މަޖިލީހުގެ ބައިވަރު ގޮނޑި ހުސްވާނެ. މި ސަރުކާރު ނިމުމުގެ ކުރިން ރައްޔިތުންގެ މަޖިލީހުގެ މެޖޯރިޓީ އަޅުގަނޑުމެން ނަގާނަން،” މޫސަ ވަރަށް ސާބިތުކަމާއެކު ވިދާޅުވިއެވެ.

މޫސަ ވިދާޅުވި ގޮތުގައި ޕީއެންސީއަށް ވޯޓު ދޭންޖެހޭ އެއްވެސް ސަބަބެއް އައްޑޫ ރައްޔިތުންނަކަށް ނޯންނާނެއެވެ. އެހެންކަމުން މަޖިލިސް ހަމަމަގަށް އެޅުވުމަށް އެމްޑީޕީގެ ކެންޑިޑޭޓުންނަށް ވޯޓު ދިނުމަށް އޭނާ ބާރުއެޅުއްވިއެވެ.

2009 ވަނަ އަހަރުން ފެށިގެން މިއަދާ ހަމައަށް އައްޑުއަށް ގިނަ ކަންތައްތައް ކޮށްދީފައި ހުންނާނީ އޭނާގެ މަސައްކަތުން ކަމަށާއި ރައްޔިތުންގެ މަޖިލީހަށް ކުރިމަތިލައްވަނީ މި ސަރުކާރުން ހުއްޓާލާފައި ހުރި ކަންކަމާ ގުޅޭގޮތުން ސުވާލުކުރަން ކަމަށް ހިތަދޫ އުތުރު ދާއިރާގެ ބައިއިލެކްޝަންގައި އެމްޑީޕީގެ ފަރާތުން ވާދަކުރައްވާ ކެންޑިޑޭޓު މުހައްމަދު ސޯދިގު (ސޯބެ) ވިދާޅުވެއްޖެއެވެ.

އެމްޑީޕީގެ ލީޑާރޝިޕްގެ ބޭފުޅުންނާއެކު މިރޭ އައްޑޫ ސިޓީގައި ކުރިއަށްދާ ސޯބެގެ ކެމްޕެއިން ޖަލްސާގައި ވާހަކަފުޅު ދައްކަމުން ސޯބެ ވިދާޅުވީ، އޭނާ މޭޔަރުކަމުގައި ހުންނެވި 10 އަހަރު ކުރެއްވީ ކޮން ކަމެއްތޯ ވާދަވެރިން ސުވާލު އުފައްދާ ކަމަށެވެ. ސޯބެ ވިދާޅުވީ، އޭނާގެ މަސައްކަތް ހުރިހާ އެންމެނަށް ސާފުކޮށް ފެންނަން އެބަ ހުރި ކަމަށެވެ.

2009 ވަނަ އަހަރުން ފެށިގެން މިއަދާ ހަމައަށް އައްޑުއަށް ކޮށްފައި ހުރި ހުރިހާ މަސައްކަތަކީ އޭގެ ޕްލޭނިން މަރުހަލާއިން ފެށިގެން ތަންފީޒުކުރުމާއި ހަމައަށް، މޭޔަރުގެ ހައިސިއްޔަތުން އަދި ސްޓޭޓް މިނިސްޓަރުކަމުގެ ހައިސިއްޔަތުން ވެސް އޭނާ ކުރެއްވި މަސައްކަތް ކަމަށް ސޯބެ ވިދާޅުވިއެވެ.

މަސައްކަތްތައް ޕްލޭނިން މަރުހަލާގައި ހުއްޓާ އެ ކަންތައްތައް މިހާރު ހުއްޓުވާފައިވާ ކަމަށް ސޯބެ ވިދާުޅުވިއެވެ. އެހެންވެ، އޭނާ މަޖިލީހަށް ވަޑައިގަންނަވަނީ އެ ކަންކަމާ ގުޅޭގޮތުން ވަޒީރުންނާ ސުވާލުކުރައްވައި ޖަވާބުދާރީކުރުވައި ޒިންމާދާރުކުރުވަން ކަމަށް ވިދާޅުވިއެވެ. ހިތަދޫ އުތުރު ދާއިރާގެ ޕީއެންސީގެ މެމްބަރުން ވެސް އޭނާއަށް ވޯޓު ދެއްވާނީ އެހެންވެ ކަމަށް ސޯބެ ވިދާޅުވިއެވެ.

އެމިހާރު އަލަށް ޓާފް އަޅަމުންދާ ދަނޑުގައި އެންމެ ފުރަތަމަ ޓާފް އެޅީ އޭނާގެ ދައުރުގައި ކަމަށާއި އޭރު އެކަން ކުރީ ވަރަށް ފުރިހަމައަށް ކަމަށް ސޯބެ ވިދާޅުވިއެވެ. އަދި ކުރިން އޭނާ އިސްވެ ބެހެއްޓި ޖިމް ސެޓު ނަގައި އެއްލާލާފައި، އަލުން ޖިމް ސެޓެއް މިހާރު ބަހައްޓަމުންދާކަން ވެސް ފާހަގަކުރެއްވިއެވެ.

ބަލަ މި ޖިމް ސެޓު ވެސް މިހާރު އެ ބަހައްޓަނީ އަދި އައު ޓާފެއް ވެސް އެ އަޅަނީ އަޅުގަނޑު މި އިންތިހާބަށް ނުކުންނާތީއޭ. އެހެންވީމާ ހަމަ އެއީ ވެސް އަޅުގަނޑު ކުރުވާ ކަންތައް ނޫންތޯ؟

ސޯބެ ވިދާޅުވީ، އޭނާ ބޮޑުތަނުން އިންތިހާބު ކާމިޔާބުކުރައްވާނެ ކަމަށެވެ. ވާދަވެރި ކެންޑިޑޭޓުގެ މޫނަށް އަދި އަމަލަށް ބެލުމުން ވެސް އިންތިހާބު ކާމިޔާބުވެއްޖެކަން ކަށަވަރުކަމަށް އޭނާ ވިދާޅުވިއެވެ. ސޯބެ ވިދާޅުވި ގޮތުގައި އެ ދާއިރާގެ ޕީއެންސީގެ މެމްބަރުންގެ ގިނަ ބަޔަކު ވެސް ތިބީ އޭނާއަށް ވޯޓުދޭ ގޮތަށް ކަމަށެވެ.

އެވަރަށް މަސައްކަތް ވެސް ކުރެއްވިއްޖެ ކަމަށް ސޯބެ ވިދާޅުވިއެވެ. އޭނާ ވިދާޅުވީ، ހުރިހާ ގެއެެއްގައި ޓަކި ޖަހައި، ހުރިހާ ކެފޭއަކަށް ވެދެ އަދި ވާދަވެރިންގެ ކެމްޕެއިން އޮފީސް ކައިރިއަށް ގޮސް ސަލާންކޮށް ވާހަކަ ދެއްކި ކަމަށާއި އިންތިހާބުގެ ނަތީޖާ ކަށަވަރުވެއްޖެ ކަމަށެވެ.

ހިތަދޫ އުތުރު ދާއިރާގެ ބައިއިލެކްޝަންގައި ޕީއެންސީގެ ފަރާތުން ވާދަކުރައްވަނީ އަހުމަދު ސައީދު (ސޮޑާ) އެވެ. ޕާޓީގެ ޕްރައިމެރީ ދާއިރާގެ ކުރީގެ މެމްބަރު މުހައްމަދު ސިނާން ކާމިޔާބު ކުރެއްވި ނަމަވެސް، ރައްޔިތުންގެ ވިންދާއި އެއްގޮތަށް ކުރިޔަށް ދިއުމަށްކަމަށް ބުނެ ސިނާން ޓިކެޓު ދޫކޮށްލެއްވީ އެވެ.

ވެރިކަން ކުރާ ޕީއެންސީއަށް އައްޑޫ ސިޓިގެ ރައްޔިތުން ވޯޓު ދޭންޖެހޭ އެއްވެސް ސަބަބެއް ނެތްކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

އައްޑޫ ސިޓީ ހިތަދޫ އުތުރު ދާއިރާގެ ބައި-އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓް އަބްދުﷲ ސޯދިގު (ސޯބެ) ކެމެޕެއިނަށް ޕާޓީގެ ލީޑާޝިޕާއި އެކު ބޭއްވި ޖަލްސާގައި ޝާހިދު ވިދާޅުވީ، ޕީއެންސީގެ ކެންޑިޑޭޓަށް ވޯޓު ދޭންވީ ކީއްވެގެންތޯ ސުވާލުކޮށްލުމުން ފެންނަން އޮތީ މާޔޫސްކަން ކަމަށެވެ.

ޝާހިދު އެންމެ ބޮޑަށް ފާޑުވިދާޅުވީ ރައީސް އިބްރާހިމް މުހައްމަދު ސޯލިހުގެ ސަރުކާރުން އައްޑޫގައި ފެއްޓެވި ހަންކެޑެ ބްރިޖާއި، އިންޓަގްރޭޓެޑް ޓޫރިޒަމް މަޝްރޫއަށް މި ސަރުކާރުން ގެނައި ބަދަލުތަކަށެވެ. ޝާހިދު ވިދާޅުވީ އެމްޑީޕީގެ އެ ޕްރޮޖެކްޓުގެ ތެރެއަށް މި ސަރުކާރުން ވަދެ ހަވާ އަރުވައި އިފްތިތާހު ކުރުމަކީ ރައްޔިތުން ވޯޓު ދޭން ޖެހޭ ސަބަބެއް ނޫން ކަމަށެވެ. ޝާހިދު ވިދާޅުވީ، މި މަޝްރޫއުގެ އެގްރިމެންޓްތައް ނިމިފައި ވަނިކޮށް، މި ސަރުކާރުން އެކަންކަން ހުއްޓުވައި ރައްޔިތުންނަށް މަންފާ ނުލިބޭ ގޮތަށް ކަންކަން ބަދަލުކޮށްފައިވާ ކަމަށެވެ.

ޝާހިދު ވިދާޅުވީ ޕްރޮޖެކްޓު ހަލާލު ޓޫރިޒަމްގެ ގޮތުގައި ކުރިޔަށް ގެންދަންކަމަށް ބުނެ ބަދަލު ގެނެސްފައިވާކަމަށެވެ. ޝާހިދު ވިދާޅުވީ، މި ސަރުކާރުން މަޝްރޫއުތައް ހިންގަނީ ރައްޔިތުންނަށް އޮޅުވާލައިގެން ކަމަށެވެ. އެގޮތުން މާލޭގެ ހޮޓަލަކުން ތިން ފަތުރުވެރިއަކު ގެނެސް ތަނެއް ހުޅުވި ނަމަވެސް، މިއަދު އެތަނުގައި ޖިންނި ޝައިތާނުން ފިޔަވައި އެހެން ބަޔަކު ނެތް ކަމަށާއި، މިއީ ރައްޔިތުންނަށް ސާފުކޮށް ފެންނަން އޮތް ހަގީގަތެއްކަމަށް އޭނާ ވިދާޅުވި އެވެ.

ޝާހިދު ވިދާޅުވީ ތިން މަސް ތެރޭގައި ބަންކަރިން ފަށައި އަހަރަކު 400 މިލިއަން ރުފިޔާ ލިބޭނެކަމަށް ބުނެ ވެސް ސަރުކާރުން ރައްޔިތުންނަށް އޮޅުވާލީ ކަމަށެވެ. އެއަށް ފަހު އަމިއްލަ ކުންފުންޏަކުން ބައުޒަރެއް ގެނެސް ބޯޓަކަށް ތެޔޮ އެޅިކަމަށް ހަދައި، އެމްޕީއެލް މެދުވެރިކޮށް ބިލްތައް ހެދި ނަމަވެސް ސަރުކާރުން ބުނި 400 މިލިއަން ވީތަނެއް އެނގޭ މީހަކު ނެތްކަމަށް ވިދާޅުވި އެވެ.

މިއީތޯ ޕީއެންސީއަށް ވޯޓު ދޭންޖެހޭ ސަބަބަކީ؟ އައްޑޫ ސިޓީގެ ރައްޔިތުން މި ސަރުކާރަށް ވޯޓު ދޭންޖެހޭ އެއްވެސް ސަބަބެއް އެބައޮތްތޯ.. ސިފަ ނޭނގޭ ދޫންޏަކަށް، ބުޅަލަކަށް، ރުކަކަށް ނުވަތަ ދެން އެނޫންވެސް ހިތުހުރި އެއްޗަކަށް އޭގެ ޙަޤީޤީ ސިފަވެސް ނޭނގޭ އެއްޗަކަށް ވޯޓް ދޭނީތޯ. ނޫން، އޮޅުވައިނުލައްވާ..

ޤާނޫނުއަސާސީގެ ދަށުން ރައްޔިތުންގެ މަޖިލީހުގެ މެންބަރުންގެ އެންމެ ބޮޑު ޒިންމާއަކީ ސަރުކާރުން ކުރާ ކަންކަން ބަލައި، ޖަވާބުދާރީ ކުރުވުންކަން ފާހަގަކުރައްވަމުން ޝާހިދު ވިދާޅުވީ، 2008 ވަނަ އަހަރުން ފެށިގެން އެމްޑީޕީން ކުރި މަސައްކަތަކީ އެ ޒިންމާ އަދާކުރުން ކަމަށެވެ. ނަމަވެސް މިހާރު ޕީއެންސީގެ މެންބަރުންގެ މިނިވަންކަމެއްނެތް ކަމަށާއި، އެބޭފުޅުންގެ ”ރިމޯޓް“ އޮތީ ރައީސް ޑރ. މުހައްމަދު މުއިއްޒުގެ އަތުގައިކަމަށް ޝާހިދު ވިދާޅުވި އެވެ.

ޕީއެންސީގެ މެމްބަރުންކީ ރައްޔިތުންގެ ހައްގުގައި ބަހެއް ބުނުމުގެ އެއްވެސް ގާބިލުކަމެއް ނެތް ބައެއްގެ ގޮތުގައި ސިފަ ކުރައްވައި ޝާހިދު ވިދާޅުވީ ޕާލިމަންޓްރީ ގުރޫޕަށް އޮތީ ސަރުކާރުން ފޮނުވާހާ ބިލުތައް އިތުރު ސުވާލެއް ކުރުމެއް ނެތި ފާސްކުރުން ކަމަށެވެ.

ސަރުކާރުން ރައްޔިތުންގެ އިހުސާސްތަކަށް ބެލުމެއް ނެތި އަމަލުކުރަމުންދާ ކަމަށާއި، އައްޑޫގެ ތަރައްގީއަށް ކުރަން ހުރި ގިނަ ކަންތައްތަކެއް ހުއްޓިފައިވާކަމަށް ޝާހިދު ވިދާޅުވިއެވެ. އަދި އެކަން އައްޑޫ ސިޓީ ކައުންސިލަށް އެމްޑީޕީން ކޮށްދީފައިވާ މަސައްކަތްތަކާއި، ޕީއެންސީގެ ފަރާތުން ފެންނަ ތަފާތު ރައްޔިތުންނަށް ސާފުވާނެކަމަށް އޭނާ ވިދާޅުވިއެވެ.

ސަރުކާރަށް ފާޑުކިއުން އަމާޒު ކުރައްވައި ޝަހިދު ވިދާޅުވީ، ޕީއެންސީ ބުނާ ސިފަ ނޭނގޭ ދޫންޏަށް ވޯޓު ދޭން ޖެހޭ ސަބަބެއް ނެތްކަމަށެވެ. އަދި ހާއްސަކޮށް އައްޑޫ ރައްޔިތުންގެ ތާއީދެއް މި ސަރުކާރަށް އެއްވެސް މިންވަރަކަށް ނެތްކަން ލޯކަލް ކައުންސިލް އިންތިހާބުގެ ނަތީޖާއިން ވެސް އެނގިގެން ގޮސްފައިވާކަމަށް ޝާހިދު ވިދާޅުވި އެވެ.