ޕާޓީ ބަދަލުކުރުމުން ވ. ތިނަދޫ ކައުންސިލް ޝުޖާއު އަލީ މަގާމުގެ މަސްއޫލިއްޔަތުތަކުން ވަގުތީ ގޮތުން ދުރުކުރުމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ނިންމައިފިއެވެ.
ޝުޖާއު ތިނަދޫ ކައުސިލަށް އިންތިހާބުވެވަޑައިގަތީ ދަ ޑިމޮކްރެޓްސްގެ ޓިކެޓެއްގައެވެ. ނަމަވެސް ސިޔާސީ ޕާޓީއެއްގައި ތިބުން ލާޒިމު 3000 މެމްބަރުން ހަމަނުވާތީ އިލެކްޝަންސް ކޮމިޝަނުން ވަނީ އެ ޕާޓީ މިހާރު ވަނީ އުވާލާފައެވެ. އެއާއިއެކު ޝުޖާއު ވަނީ އެމްޑީޕީއާއި މިހާރު ގުޅިވަޑައިގެންފައެވެ.
މި މައްސަލައާއި ގުޅޭގޮތުން ޝުޖާއު “ހަވާސާއަށް” ވިދާޅުވީ މަގާމުގެ މަސްއޫލިއްޔަތުން ވަގުތީ ގޮތުން އެކަހެރިކޮށް އެލްޖީއޭއިން ކައުންސިލްގެ އިދާރާއަށް ސިޓީއެއް ފޮނުވާފައިވާ ކަމަށެވެ. އެ ސިޓީ ޝުޖާއު ވަނީ ހިއްސާކޮށްފައެވެ.
ތިނަދޫ ކައުންސިލްގެ ނައިބު ރައީސް ސާމިރު އަހްމަދަށް އެލްޖީއޭއިން ފޮނުވި އެ ސިޓީގައި ވިދާޅުވެފައިވަނީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 116 ވަނަ މާއްދާގެ (ޅ) ގައި ވަކި ސިޔާސީ ޕާޓީއެއްގެ ޓިކެޓްގައި ވާދަކޮށްގެން ކައުންސިލަށް އިންތިހާބުވުމަށްފަހުގައި އެ އިންތިހާބުވި ދައުރު ތެރޭގައި އިންތިހާބު ޕާޓީ ނޫން އެެހެން ޕާޓީއެއްގެ މެންބަރެއްގެ ގޮތުގައި އީސީގެ ދަފްތަރުވުމުން ކައުންސިލާއި ކައުންސިލްގެ މެންބަރުކަމުގެ މަގާމުން ވަކިވާނެކަމަށް ބަޔާންކޮށްފައިވާ ކަމަށެވެ.
“ތިޔަ ކައުންސިލް ރައީސް ޝުޖާއު އަލީ މި އަހަރު ލޯކަލް ކައުންސިލްތަކުގެ އިންތިހާބުގައި ވ. ތިނަދޫ ކައުންސިލްގެ ރައީސްކަމަށް ދަ ޑިމޮކްރެޓްސްގެ ހައިސިއްޔަތުން އިންތިހާބުވުމަށްފަހު ދައުރު ފެށުމަފަހު މެއި މަހުގެ 19 ވަނަ ދުވަހު ދިވެހި ރައްޔިތުންގެ ޑިމޮކްރެޓިކް ޕާޓީގެ މެންބަރެއްގެ ގޮތުގައި އީސީގައި ދަފްތަރުވެފައިވާކަމަށް އެ ކޮމިޝަނުން ވަނީ އަންގާފައި.” އެލްޖީއޭއިން ވިދާޅުވެފައިވެއެވެ.
އެހެންކަމުން އެ އޮތޯރިޓީގެ ބޯޑުން ގޮތެއް ނިންމައި ވަކިގޮތެއް އަންގަންދެން ޝުޖާއު މަގާމުގެ މަސްއޫލިއްޔަތުން ވަގުތީގޮތުން އެއްކިބާވުމަށާއި ކައުންސިލް އިދާރާއަށް ނުނިކުތުމަށް އެ ސިޓީގައި އަންގާފައިވެއެވެ.
އަދި އެ މުއްދަތުގައި ކައުންސިލް ރައީސްގެ މަގާމުގެ މަސްއޫލިއްޔަތުތައް ވަގުތީގޮތުން ކައުންސިލްގެ ނައިބު ރައީސް ހަވާލުވެ މަގާމުގެ ވާޖިބުތަކާއި މަސްއޫލިއްޔަތުތައް އަދާކުރުމަށް ވެސް އަންގާފައިވެއެވެ.
ޝުޖާއު ވިދާޅުވީ ލާމަރުކަޒީ ގާނޫނުގެ ދަށުން ޕާޓީއެއް އުވިއްޖެނަމަ ދެން އެ ދިމާވާ ހާލަތުގައި އަމަލުކުރާނެ ގޮތް ބަޔާންކޮށްފައިނުވާ ކަމަށެވެ. އެހެންކަމުން މި މައްސަލައިގައި އެލްޖީއޭއަށް ގޮތެއް ނުނިންމޭނެ ކަމަށެވެ. އަދި މި މައްސަލައިގައި ގޮތް ނިންމޭނީ ސްޕްރީމްކޯޓުގެ ނިންމުމަކުން ކަމަށް ވެސް ވިދާޅުވިއެވެ.
ކިޔުންތެރިންގެ ހިޔާލު