މެކްސިކޯގެ ސިޓީގައި ހުންނަ އެސްޓާޑިއޯ އަޒްޓެކާ ސްޓޭޑިއަމްގައި 11 ޖޫން ވާ ބުރާސްފަތި ދުވަހު ބާއްވާ މި ރަސްމިއްޔާތުގައި ޝަކީރާ ހުށަހަޅައިދޭނީ މި މުބާރާތުގެ ރަސްމީ ލަވަ ކަމަށްވާ “ޑާއި ޑާއި” އެވެ. އިޓަލީ ބަހުން “ހިނގާ ދާން” ނުވަތަ “އަވަސްކުރޭ” މި މާނަ ދޭހަވާ މި ލަވަ ޝަކީރާ އާއެކު ބާރްނާ ބޯއީ ވެސް ހުށަހަޅައިދޭނެއެވެ. މި ރަސްމިއްޔާތަށްފަހު މުބާރާތުގެ ފުރަތަމަ މެޗުގައި ބައްދަލުކުރާނީ މެކްސިކޯ އާއި ސައުތު އެފްރިކާއެވެ.

Advertisement

މެކްސިކޯގައި ބާއްވާ މި ޝޯގައި ކޮލަމްބިއާގެ ރެގޭޓަން ތަރި ޖޭ ބަލްވިން އާއި ސައުތު އެފްރިކާގެ ލަވަކިޔުންތެރިޔާ ޓީލާ ވެސް ބައިވެރިވާނެއެވެ. މި ފަހަރުގެ މުބާރާތަކީ ތިން ގައުމެއްގައި ބާއްވާ މުބާރާތަކަށް ވުމާއެކު، އެމެރިކާ، ކެނެޑާ އަދި މެކްސިކޯގައި ކުޅޭ ފުރަތަމަ މެޗުތަކުގެ ކުރިން ހުޅުވުމުގެ ރަސްމިއްޔާތުތައް ބޭއްވުމަށް ވަނީ ނިންމާފައެވެ.

އެގޮތުން 12 ޖޫން ވާ ހުކުރު ދުވަހު ކެނެޑާގެ ޓޮރޮންޓޯގައި ކެނެޑާ އާއި ބޮސްނިއާ އެންޑް ހެރްޒެގޮވިނާ ބައްދަލުކުރާ މެޗުގެ ކުރިން ބާއްވާ ރަސްމިއްޔާތުގައި މައިކަލް ބޫބްލޭ އާއި އެލަނިސް މޮރިސެޓް ޕާފޯމްކުރާނެއެވެ. ހަމަ އެ ދުވަހު އެމެރިކާގެ ލޮސް އެންޖެލިސްގައި އެމެރިކާ އާއި ޕެރަގުއޭ ބައްދަލުކުރާ މެޗުގެ ކުރިން ކޭޓީ ޕެރީ އާއި ފިއުޗާގެ ހުށަހެޅުންތައް ފެނިގެންދާނެއެވެ.

މީގެ އިތުރުން، 19 ޖުލައިގައި ބޭއްވުމަށް ހަމަޖެހިފައިވާ ވޯލްޑް ކަޕް ފައިނަލް މެޗުގެ ހާފް-ޓައިމް ޝޯގައި ޝަކީރާގެ އިތުރުން މަޝްހޫރު ލަވަކިޔުންތެރިޔާ މެޑޯނާ އާއި ކޭ-ޕޮޕް ބޭންޑް ބީޓީއެސް ވެސް ފެނިގެންދާނެ ކަމަށް ވަނީ އިޢުލާންކޮށްފައެވެ.