Author: މަރިޔަމް ނާޖިލާ އިމްރާން

2009 ވަނަ އަހަރުން ފެށިގެން މިއަދާ ހަމައަށް އައްޑުއަށް ގިނަ ކަންތައްތައް ކޮށްދީފައި ހުންނާނީ އޭނާގެ މަސައްކަތުން ކަމަށާއި ރައްޔިތުންގެ މަޖިލީހަށް ކުރިމަތިލައްވަނީ މި ސަރުކާރުން ހުއްޓާލާފައި ހުރި ކަންކަމާ ގުޅޭގޮތުން ސުވާލުކުރަން ކަމަށް ހިތަދޫ އުތުރު ދާއިރާގެ ބައިއިލެކްޝަންގައި އެމްޑީޕީގެ ފަރާތުން ވާދަކުރައްވާ ކެންޑިޑޭޓު މުހައްމަދު ސޯދިގު (ސޯބެ) ވިދާޅުވެއްޖެއެވެ.

އެމްޑީޕީގެ ލީޑާރޝިޕްގެ ބޭފުޅުންނާއެކު މިރޭ އައްޑޫ ސިޓީގައި ކުރިއަށްދާ ސޯބެގެ ކެމްޕެއިން ޖަލްސާގައި ވާހަކަފުޅު ދައްކަމުން ސޯބެ ވިދާޅުވީ، އޭނާ މޭޔަރުކަމުގައި ހުންނެވި 10 އަހަރު ކުރެއްވީ ކޮން ކަމެއްތޯ ވާދަވެރިން ސުވާލު އުފައްދާ ކަމަށެވެ. ސޯބެ ވިދާޅުވީ، އޭނާގެ މަސައްކަތް ހުރިހާ އެންމެނަށް ސާފުކޮށް ފެންނަން އެބަ ހުރި ކަމަށެވެ.

2009 ވަނަ އަހަރުން ފެށިގެން މިއަދާ ހަމައަށް އައްޑުއަށް ކޮށްފައި ހުރި ހުރިހާ މަސައްކަތަކީ އޭގެ ޕްލޭނިން މަރުހަލާއިން ފެށިގެން ތަންފީޒުކުރުމާއި ހަމައަށް، މޭޔަރުގެ ހައިސިއްޔަތުން އަދި ސްޓޭޓް މިނިސްޓަރުކަމުގެ ހައިސިއްޔަތުން ވެސް އޭނާ ކުރެއްވި މަސައްކަތް ކަމަށް ސޯބެ ވިދާޅުވިއެވެ.

މަސައްކަތްތައް ޕްލޭނިން މަރުހަލާގައި ހުއްޓާ އެ ކަންތައްތައް މިހާރު ހުއްޓުވާފައިވާ ކަމަށް ސޯބެ ވިދާުޅުވިއެވެ. އެހެންވެ، އޭނާ މަޖިލީހަށް ވަޑައިގަންނަވަނީ އެ ކަންކަމާ ގުޅޭގޮތުން ވަޒީރުންނާ ސުވާލުކުރައްވައި ޖަވާބުދާރީކުރުވައި ޒިންމާދާރުކުރުވަން ކަމަށް ވިދާޅުވިއެވެ. ހިތަދޫ އުތުރު ދާއިރާގެ ޕީއެންސީގެ މެމްބަރުން ވެސް އޭނާއަށް ވޯޓު ދެއްވާނީ އެހެންވެ ކަމަށް ސޯބެ ވިދާޅުވިއެވެ.

އެމިހާރު އަލަށް ޓާފް އަޅަމުންދާ ދަނޑުގައި އެންމެ ފުރަތަމަ ޓާފް އެޅީ އޭނާގެ ދައުރުގައި ކަމަށާއި އޭރު އެކަން ކުރީ ވަރަށް ފުރިހަމައަށް ކަމަށް ސޯބެ ވިދާޅުވިއެވެ. އަދި ކުރިން އޭނާ އިސްވެ ބެހެއްޓި ޖިމް ސެޓު ނަގައި އެއްލާލާފައި، އަލުން ޖިމް ސެޓެއް މިހާރު ބަހައްޓަމުންދާކަން ވެސް ފާހަގަކުރެއްވިއެވެ.

ބަލަ މި ޖިމް ސެޓު ވެސް މިހާރު އެ ބަހައްޓަނީ އަދި އައު ޓާފެއް ވެސް އެ އަޅަނީ އަޅުގަނޑު މި އިންތިހާބަށް ނުކުންނާތީއޭ. އެހެންވީމާ ހަމަ އެއީ ވެސް އަޅުގަނޑު ކުރުވާ ކަންތައް ނޫންތޯ؟

ސޯބެ ވިދާޅުވީ، އޭނާ ބޮޑުތަނުން އިންތިހާބު ކާމިޔާބުކުރައްވާނެ ކަމަށެވެ. ވާދަވެރި ކެންޑިޑޭޓުގެ މޫނަށް އަދި އަމަލަށް ބެލުމުން ވެސް އިންތިހާބު ކާމިޔާބުވެއްޖެކަން ކަށަވަރުކަމަށް އޭނާ ވިދާޅުވިއެވެ. ސޯބެ ވިދާޅުވި ގޮތުގައި އެ ދާއިރާގެ ޕީއެންސީގެ މެމްބަރުންގެ ގިނަ ބަޔަކު ވެސް ތިބީ އޭނާއަށް ވޯޓުދޭ ގޮތަށް ކަމަށެވެ.

އެވަރަށް މަސައްކަތް ވެސް ކުރެއްވިއްޖެ ކަމަށް ސޯބެ ވިދާޅުވިއެވެ. އޭނާ ވިދާޅުވީ، ހުރިހާ ގެއެެއްގައި ޓަކި ޖަހައި، ހުރިހާ ކެފޭއަކަށް ވެދެ އަދި ވާދަވެރިންގެ ކެމްޕެއިން އޮފީސް ކައިރިއަށް ގޮސް ސަލާންކޮށް ވާހަކަ ދެއްކި ކަމަށާއި އިންތިހާބުގެ ނަތީޖާ ކަށަވަރުވެއްޖެ ކަމަށެވެ.

ހިތަދޫ އުތުރު ދާއިރާގެ ބައިއިލެކްޝަންގައި ޕީއެންސީގެ ފަރާތުން ވާދަކުރައްވަނީ އަހުމަދު ސައީދު (ސޮޑާ) އެވެ. ޕާޓީގެ ޕްރައިމެރީ ދާއިރާގެ ކުރީގެ މެމްބަރު މުހައްމަދު ސިނާން ކާމިޔާބު ކުރެއްވި ނަމަވެސް، ރައްޔިތުންގެ ވިންދާއި އެއްގޮތަށް ކުރިޔަށް ދިއުމަށްކަމަށް ބުނެ ސިނާން ޓިކެޓު ދޫކޮށްލެއްވީ އެވެ.

ވެރިކަން ކުރާ ޕީއެންސީއަށް އައްޑޫ ސިޓިގެ ރައްޔިތުން ވޯޓު ދޭންޖެހޭ އެއްވެސް ސަބަބެއް ނެތްކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

އައްޑޫ ސިޓީ ހިތަދޫ އުތުރު ދާއިރާގެ ބައި-އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓް އަބްދުﷲ ސޯދިގު (ސޯބެ) ކެމެޕެއިނަށް ޕާޓީގެ ލީޑާޝިޕާއި އެކު ބޭއްވި ޖަލްސާގައި ޝާހިދު ވިދާޅުވީ، ޕީއެންސީގެ ކެންޑިޑޭޓަށް ވޯޓު ދޭންވީ ކީއްވެގެންތޯ ސުވާލުކޮށްލުމުން ފެންނަން އޮތީ މާޔޫސްކަން ކަމަށެވެ.

ޝާހިދު އެންމެ ބޮޑަށް ފާޑުވިދާޅުވީ ރައީސް އިބްރާހިމް މުހައްމަދު ސޯލިހުގެ ސަރުކާރުން އައްޑޫގައި ފެއްޓެވި ހަންކެޑެ ބްރިޖާއި، އިންޓަގްރޭޓެޑް ޓޫރިޒަމް މަޝްރޫއަށް މި ސަރުކާރުން ގެނައި ބަދަލުތަކަށެވެ. ޝާހިދު ވިދާޅުވީ އެމްޑީޕީގެ އެ ޕްރޮޖެކްޓުގެ ތެރެއަށް މި ސަރުކާރުން ވަދެ ހަވާ އަރުވައި އިފްތިތާހު ކުރުމަކީ ރައްޔިތުން ވޯޓު ދޭން ޖެހޭ ސަބަބެއް ނޫން ކަމަށެވެ. ޝާހިދު ވިދާޅުވީ، މި މަޝްރޫއުގެ އެގްރިމެންޓްތައް ނިމިފައި ވަނިކޮށް، މި ސަރުކާރުން އެކަންކަން ހުއްޓުވައި ރައްޔިތުންނަށް މަންފާ ނުލިބޭ ގޮތަށް ކަންކަން ބަދަލުކޮށްފައިވާ ކަމަށެވެ.

ޝާހިދު ވިދާޅުވީ ޕްރޮޖެކްޓު ހަލާލު ޓޫރިޒަމްގެ ގޮތުގައި ކުރިޔަށް ގެންދަންކަމަށް ބުނެ ބަދަލު ގެނެސްފައިވާކަމަށެވެ. ޝާހިދު ވިދާޅުވީ، މި ސަރުކާރުން މަޝްރޫއުތައް ހިންގަނީ ރައްޔިތުންނަށް އޮޅުވާލައިގެން ކަމަށެވެ. އެގޮތުން މާލޭގެ ހޮޓަލަކުން ތިން ފަތުރުވެރިއަކު ގެނެސް ތަނެއް ހުޅުވި ނަމަވެސް، މިއަދު އެތަނުގައި ޖިންނި ޝައިތާނުން ފިޔަވައި އެހެން ބަޔަކު ނެތް ކަމަށާއި، މިއީ ރައްޔިތުންނަށް ސާފުކޮށް ފެންނަން އޮތް ހަގީގަތެއްކަމަށް އޭނާ ވިދާޅުވި އެވެ.

ޝާހިދު ވިދާޅުވީ ތިން މަސް ތެރޭގައި ބަންކަރިން ފަށައި އަހަރަކު 400 މިލިއަން ރުފިޔާ ލިބޭނެކަމަށް ބުނެ ވެސް ސަރުކާރުން ރައްޔިތުންނަށް އޮޅުވާލީ ކަމަށެވެ. އެއަށް ފަހު އަމިއްލަ ކުންފުންޏަކުން ބައުޒަރެއް ގެނެސް ބޯޓަކަށް ތެޔޮ އެޅިކަމަށް ހަދައި، އެމްޕީއެލް މެދުވެރިކޮށް ބިލްތައް ހެދި ނަމަވެސް ސަރުކާރުން ބުނި 400 މިލިއަން ވީތަނެއް އެނގޭ މީހަކު ނެތްކަމަށް ވިދާޅުވި އެވެ.

މިއީތޯ ޕީއެންސީއަށް ވޯޓު ދޭންޖެހޭ ސަބަބަކީ؟ އައްޑޫ ސިޓީގެ ރައްޔިތުން މި ސަރުކާރަށް ވޯޓު ދޭންޖެހޭ އެއްވެސް ސަބަބެއް އެބައޮތްތޯ.. ސިފަ ނޭނގޭ ދޫންޏަކަށް، ބުޅަލަކަށް، ރުކަކަށް ނުވަތަ ދެން އެނޫންވެސް ހިތުހުރި އެއްޗަކަށް އޭގެ ޙަޤީޤީ ސިފަވެސް ނޭނގޭ އެއްޗަކަށް ވޯޓް ދޭނީތޯ. ނޫން، އޮޅުވައިނުލައްވާ..

ޤާނޫނުއަސާސީގެ ދަށުން ރައްޔިތުންގެ މަޖިލީހުގެ މެންބަރުންގެ އެންމެ ބޮޑު ޒިންމާއަކީ ސަރުކާރުން ކުރާ ކަންކަން ބަލައި، ޖަވާބުދާރީ ކުރުވުންކަން ފާހަގަކުރައްވަމުން ޝާހިދު ވިދާޅުވީ، 2008 ވަނަ އަހަރުން ފެށިގެން އެމްޑީޕީން ކުރި މަސައްކަތަކީ އެ ޒިންމާ އަދާކުރުން ކަމަށެވެ. ނަމަވެސް މިހާރު ޕީއެންސީގެ މެންބަރުންގެ މިނިވަންކަމެއްނެތް ކަމަށާއި، އެބޭފުޅުންގެ ”ރިމޯޓް“ އޮތީ ރައީސް ޑރ. މުހައްމަދު މުއިއްޒުގެ އަތުގައިކަމަށް ޝާހިދު ވިދާޅުވި އެވެ.

ޕީއެންސީގެ މެމްބަރުންކީ ރައްޔިތުންގެ ހައްގުގައި ބަހެއް ބުނުމުގެ އެއްވެސް ގާބިލުކަމެއް ނެތް ބައެއްގެ ގޮތުގައި ސިފަ ކުރައްވައި ޝާހިދު ވިދާޅުވީ ޕާލިމަންޓްރީ ގުރޫޕަށް އޮތީ ސަރުކާރުން ފޮނުވާހާ ބިލުތައް އިތުރު ސުވާލެއް ކުރުމެއް ނެތި ފާސްކުރުން ކަމަށެވެ.

ސަރުކާރުން ރައްޔިތުންގެ އިހުސާސްތަކަށް ބެލުމެއް ނެތި އަމަލުކުރަމުންދާ ކަމަށާއި، އައްޑޫގެ ތަރައްގީއަށް ކުރަން ހުރި ގިނަ ކަންތައްތަކެއް ހުއްޓިފައިވާކަމަށް ޝާހިދު ވިދާޅުވިއެވެ. އަދި އެކަން އައްޑޫ ސިޓީ ކައުންސިލަށް އެމްޑީޕީން ކޮށްދީފައިވާ މަސައްކަތްތަކާއި، ޕީއެންސީގެ ފަރާތުން ފެންނަ ތަފާތު ރައްޔިތުންނަށް ސާފުވާނެކަމަށް އޭނާ ވިދާޅުވިއެވެ.

ސަރުކާރަށް ފާޑުކިއުން އަމާޒު ކުރައްވައި ޝަހިދު ވިދާޅުވީ، ޕީއެންސީ ބުނާ ސިފަ ނޭނގޭ ދޫންޏަށް ވޯޓު ދޭން ޖެހޭ ސަބަބެއް ނެތްކަމަށެވެ. އަދި ހާއްސަކޮށް އައްޑޫ ރައްޔިތުންގެ ތާއީދެއް މި ސަރުކާރަށް އެއްވެސް މިންވަރަކަށް ނެތްކަން ލޯކަލް ކައުންސިލް އިންތިހާބުގެ ނަތީޖާއިން ވެސް އެނގިގެން ގޮސްފައިވާކަމަށް ޝާހިދު ވިދާޅުވި އެވެ.

މޯލްޑިވްސް ލޭބަރު އެންޑް ސޯޝަލް ޑިމޮކްރަޓިކް ޕާޓީ (އެމްއެލްއެސްޑީޕީ) އަދި ދަ ޑިމޮކްރެޓްސް އުވާލައި އެ ޕާޓީތައް ސިޔާސީ ޕާޓީގެ ދަފްތަރުން އުނިކުރުމަށް އިލެކްޝަންސް ކޮމިޝަން (އީސީ)ން ނިންމައިފިއެވެ.

އީސީން ވިދާޅުވީ، އެ ދެ ޕާޓީ އުވާލާފައި ވަނީ ސިޔާސީ ޕާޓީއެއް ދެމިއޮތުމަށް ޤާނޫނު ލާޒިމުކުރާ 3،000 މެންބަރުން ހަމަކުރުމަށް ދިން މުއްދަތުގައި 3،000 މެންބަރުން ހަމަވެފައިނުވާތީ ކަމަށެވެ.

ޑިމޮކްރެޓްސްއަކީ ކުރީގެ ރައީސް މުޙައްމަދު ނަޝީދު އަށް ސަޕޯޓް ކުރާ ބޭފުޅުން އިސްކޮށް ތިބެ އުފެއްދި ޕާޓީއެކެވެ. މި ޕާޓީ އުފެދިފައިވަނީ އެމްޑީޕީގެ އެތެރޭގައި އުފެދުނު ޚިޔާލު ތަފާތުވުންތަކާ ގުޅިގެން، އެ ބޭފުޅުން ޕާޓީން ވަކިވުމަށް ފަހެވެ.

ޑިމޮކްރެޓްސްއަށް މިހާތަނަށް އިންތިޚާބުތަކުގައި މާ ބޮޑު ކާމިޔާބީއެއް ލިބިފައެއް ނުވެއެވެ.

އެންމެ ފަހުން ޕާޓީގެ އިސް މެންބަރުންތަކެއް އަލުން ވަނީ އެމްޑީޕީއާ ގުޅިވަޑައިގެންފައެވެ.

ކުރިޔަށް އޮތް ރިޔާސީ އިންތިހާބުގައި ވާދަނުކުރަށްވާނެ ކަމަށް ކުރީގެ ރައީސް އަދި އެމްޑީޕީގެ ޗެއާޕާސަންގެ މަގާމަށް ވާދަކުރަށްވާ ރައީސް މުހައްމަދު ނަޝީދު ވިދާޅުވެއްޖެއެވެ.

ށ. ފޭދޫގައި ބޭއްވި ކެމްޕެއިން ބައްދަލުވުމެއްގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، ދިވެހިރާއްޖޭގެ ރައީސްކަމާއި، ރައްޔިތުންގެ މަޖިލީހުގެ ރައީސްކަމުގެ އިތުރުން ބައިނަލްއަގުވާމީ ޖަމާއަތެއްގެ ސެކްރެޓަރީ ޖެނެރަލްކަމުގެ މަގާމުވެސް އަދާކުރައްވައިފި ކަމަށެވެ. އެހެންކަމުން، މިހާރުގެ ޒުވާން ޖީލަށް ފުރުސަތު ދެއްވައި، ޕާޓީގެ މުގުލުގައި ހުންނަވައިގެން އެ ބޭފުޅުންނަށް އެއްބާރުލުން ދެއްވަން ބޭނުންފުޅުވާ ކަމަށް އެމަނިކުފާނު ވިދާޅުވިއެވެ.

ރިޔާސީ އިންތިހާބަށް ޝައުގުވެރިކަން ފާޅުކޮށްފައިވާ ފައްޔާޒް އިސްމާއީލް ފަދަ ޒުވާން ލީޑަރުންނަށް ފުރުސަތު ދެއްވުމުގެ މުހިންމުކަން ފާހަގަކުރަށްވަމުން، ރައީސް ނަޝީދު ވަނީ ފައްޔާޒުގެ ކެންޑިޑަސީއަށް ތާއީދުކުރަށްވާކަން މީގެ ކުރިން ހާމަކުރަށްވާފައެވެ. ނަމަވެސް، ރައީސް ނަޝީދުގެ ސަޕޯޓަރުން އަދިވެސް ދަނީ އެމަނިކުފާނު ރިޔާސީ އިންތިހާބުގައި ވާދަކުރެއްވުމަށް ބާރުއަޅަމުންނެވެ.

މީގެއިތުރުން، ވެރިކަމުގެ ނިޒާމަށް ބަދަލު ގެނައުމަށް ރައީސް ނަޝީދާއި ފައްޔާޒު އިސްވެ ތިއްބަވައި ހުށަހެޅުއްވި “ބޮޑު ބަދަލު” ގެ ހުށަހެޅުމުގައި، ދައުލަތުގެ ވެރިޔާއާއި ސަރުކާރު ހިންގާ ފަރާތަކީ ވަކި ދެ މަގާމެއްގެ ގޮތުގައި ކަނޑައެޅުމަށް ވަނީ ހުށަހަޅާފައެވެ.

އެ ހުށަހެޅުމަށް ރައްޔިތުންގެ ތާއީދު ލިބިއްޖެނަމަ، ދައުލަތުގެ ވެރިޔާގެ މަގާމަށް ކުރިމަތިލެއްވުމުގެ ޝައުގުވެރިކަން ރައީސް ނަޝީދު ވަނީ ފާޅުކުރައްވާފައިވެއެވެ.

އަންނަ އަހަރުގެ ތެރޭގައި ބާއްވާނެ ކަމަށް ބެލެވޭ އެމްޑީޕީގެ ރިޔާސީ ޕްރައިމަރީގައި، ފައްޔާޒުގެ އިތުރުން ކުރީގެ ރައީސް އިބްރާހިމް މުހައްމަދު ޞާލިޙާއި ޕާޓީގެ ރައީސް އަބްދުالله ޝާހިދު ވާދަކުރަށްވާނެ ކަމަށް ބެލެވެއެވެ.

އެމްޑީޕީގެ ތާރީހަށް ބަލާއިރު، 2008 ވަނަ އަހަރުން ފެށިގެން މިހާތަނަށް އެކި އިންތިހާބުތަކުގައި ވާދަކުރެއްވި ރައީސް ނަޝީދު ވަނީ 2005 އިން 2008 އަށް ޗެއާޕާސަންކަމާއި، 2014 އިން 2023 އަށް ޕާޓީގެ ރައީސްކަންވެސް ކުރަށްވާފައެވެ.