Author: މަރިޔަމް ނާޖިލާ އިމްރާން

ށ. މިލަންދޫއަށް ނިސްބަތްވާ އުމުރުން 23 އަހަރުގެ ނަބްހާން ޑެންގޫ ހުން ޖެހިގެން ހާލު ސީރިއަސްވެ މިއަދު ނިޔާވެއްޖެއެވެ.

ނަބްހާން ހާލު ދެރަވެގެން މިދިޔަ ހަފުތާ ށ. މިލަންދޫއިން ހދ. ކުޅުދުއްފުށީ ހޮސްޕިޓަލަށް ގެންދިޔައެވެ. އެއަށް ފަހު އިތުރަށް ހާލު ދެރަވެގެން އިއްޔެ މާލޭގެ އައި.ޖީ.އެމް.އެޗް.އަށް ބަދަލުކުރިއެވެ. އޭނާ ނިޔާވީ ވެންޓިލޭޓަރުގައި ފަރުވާ ދެމުން ދަނިކޮށް ގުނަވަންތައް ފެއިލްވުމުން ކަމަށް ބެލެވެއެވެ.

މި މަހު މިހާތަނަށް އެ ރަށުން ފަސް މީހަކަށް ޑެންގޫ ޖެހިފައިވާއިރު، މިލަންދޫ ހެލްތު ސެންޓަރުން މައުލޫމާތު ދޭ ގޮތުގައި މިދިޔަ ނޮވެމްބަރު މަހުން ފެށިގެން ޖެނުއަރީ މަހުގެ ނިޔަލަށް އެ ރަށުން 30 މީހަކަށް ޑެންގޫ ޖެހިގެން ފަރުވާ ދީފައިވެއެވެ. އަދި މިދިޔަ ރޯދަ މަހު އެކަނި ވެސް އެ އަދަދު 15 އަށް އެރި ކަމަށް ކައުންސިލުން ބުނެއެވެ.

އެޗް.ޕީ.އޭ.އިން މައުލޫމާތު ދޭ ގޮތުގައި ޑެންގޫ ހުން ޖެހިގެން ރިޕޯޓުކުރާ މީހުންގެ އަދަދު ވަނީ ބޮޑުތަނުން އިތުރުވެފައެވެ. އެ އިދާރާގެ ތަފާސްހިސާބުތައް ދައްކާ ގޮތުން މިދިޔަ މާރިޗު މަހު 535 ކޭސް ރިޕޯޓުކޮށްފައިވާއިރު، މިދިޔަ އަހަރުގެ އެ މުއްދަތުގައި ރިޕޯޓުކޮށްފައިވަނީ 60 ކޭހެވެ. މިދިޔަ ފެބްރުއަރީ މަހު 428 ކޭސް ރިޕޯޓުކުރިއިރު، މިދިޔަ އަހަރުގެ ފެބްރުއަރީ މަހު އެ އަދަދު ހުރީ 76 ގައެވެ.

މެދުއިރުމަތީގައި ހިނގަމުންދާ ހަނގުރާމައާ ގުޅިގެން ޙައްޖުގެ އަޅުކަމަށް ސަޢޫދީ ޢަރަބިއްޔާއަށް ދިއުމުގައި އެއްވެސް ދަތިކަމެއް ނެތް ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ވަޒީރު މިކަން ހާމަކުރެއްވީ މެދުއިރުމަތީގެ ހަނގުރާމައާ ގުޅިގެން ރައީސުލްޖުމްހޫރިއްޔާ އެކުލަވާލެއްވި ކްރައިސިސް ކޮމިޓީން ބޭއްވި ނޫސްވެރިންގެ ބައްދަލުވުމުގައެވެ. ވަޒީރު ވިދާޅުވީ ދިވެހި ޙައްޖާޖީންގެ ދަތުރުގެ އެންމެހާ ކަންކަން ވަރަށް ފުރިހަމައަށް އިންތިޒާމްކުރެވިފައިވާ ކަމަށެވެ. އެގޮތުން ވިސާގެ ކަންކަން ހަމަޖެހި، އެކަމަޑޭޝަނާއި ފްލައިޓުތަކުގެ ތައްޔާރީތައް ވެސް ނިމިފައިވާ ކަމަށް ވިދާޅުވިއެވެ.

“ދިވެހިރާއްޖޭގެ ޙައްޖުވެރިންގެ އެންމެހާ ކަންތައްތަކެއްވެސް ވަނީ ވަރަށް ފުރިހަމައަށް ނިމިފައި. ވިސާވެސް ވަނީ މިހާރު އިޝޫ ކުރެވިފައި. އަދި އެކަމަޑޭޝަނާއި، އެހެނިހެންވެސް ތައްޔާރީތައް ފްލައިޓުގެ ދަތުރުތަކާ ހުރިހާކަމެއްވެސް ވަނީ އިންތިޒާމްކުރެވިފައި.” ވަޒީރު ވިދާޅުވިއެވެ.

މިއަހަރުގެ ޙައްޖަށް ދިވެހި ޙައްޖުވެރިން ފުރަން ފަށާނީ މެއި މަހުގެ 15 ވަނަ ދުވަހުއެވެ. ޙައްޖުވެރިން އުފުލުމަށް ހަމަޖެހިފައިވަނީ ސައުދީ އެއާލައިނާއި މޯލްޑިވިއަން ގުޅިގެންނެވެ. ކޮންމެ އެއާލައިނަކުން ވެސް ޙައްޖުވެރިންގެ 50 އިންސައްތަ އުފުލާނެއެވެ. ޖުމްލަ ހަތަރު ފްލައިޓެއްގައި 985 މީހުން އުފުލާ ގޮތަށް ވަނީ ރޭވިފައެވެ.

ޙައްޖުގެ ތައްޔާރީތައް އިސްލާމީ ކަންތައްތަކާ ބެހޭ ވުޒާރާއާއި ޙައްޖު މިޝަން އަދި ޙައްޖު ކޯޕަރޭޝަން ގުޅިގެން ވަރަށް ބާރަށް ކުރިއަށްގެންދާ ކަމަށް އެ ވުޒާރާއިން ބުނެއެވެ.

ސްރީލަންކާގެ ކޮލަމްބޯ ބަނދަރުގައި ތާށިވެފައި ހުރި ރާއްޖެއަށް ގެންނަންޖެހޭ ކޮންޓެއިނަރުތައް ކްލިއާކޮށް މުދާ ގެނައުމުގެ މަސައްކަތް ހަލުވިކަމާއެކު ކުރިއަށްދާ ކަމަށް އިޤުތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ރައީސް އޮފީހުގައި ކްރައިސިސް ކޮމިޓީން ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ، މި މަހުގެ 8 ވަނަ ދުވަހާ ހަމައަށް ލަންކާ ބަނދަރުގައި 4،241 ކޮންޓެއިނަރު ތާށިވެފައި ހުރި ނަމަވެސް، އެމްޕީއެލް، އެސްޓީއޯ އަދި އެމްއެސްއެސް ގުޅިގެން ކުރި މަސައްކަތުން އެ އަދަދު 1،741 އަށް ދަށްކުރެވިފައިވާ ކަމަށެވެ. މިހާރު މާލޭ ބަނދަރުގައި އޮތް އުޅަނދުގައި 1،200 ކޮންޓެއިނަރުގެ މުދާ ހުރިއިރު، ކުރިއަށް އޮތް ދުވަސްތަކުގައި އިތުރު 2،500 ކޮންޓެއިނަރު މާލެއަށް އައުމަށް ވަނީ ހަމަޖެހިފައެވެ.

މުދާ ގެނައުމުގެ ތާވަލަށް ބަލާއިރު، އެޕްރީލް 12 ގައި 500 ކޮންޓެއިނަރު، 13 ގައި 500 ކޮންޓެއިނަރު، އަދި 14 ގައި 1،000 ކޮންޓެއިނަރުގެ އިތުރުން 500 ޓީއީޔޫގެ މުދާ ރާއްޖެއަށް ގެނައުމަށް ވަނީ ރޭވިފައެވެ. ވަޒީރު ވިދާޅުވި ގޮތުގައި މި އަހަރުގެ ފުރަތަމަ ކުއާޓަރުގައި އިމްޕޯޓް 19 އިންސައްތަ އިތުރުވެފައިވާއިރު، އޭގެ މައިގަނޑު ސަބަބުތަކަކީ އިޤުތިޞާދަށް އަންނަ ހެޔޮ ބަދަލުތަކާއި ފަތުރުވެރިން އިތުރުވުމާއި ރަމަޟާން މަހާ ދިމާވުމެވެ.

“މިނިސްޓްރީ އޮފް ފޮރިން އެފެއާޒްއާ އެކު މިހާރު މަސައްކަތް ކުރަމުން މިދަނީ އަސާސީ ކާބޯތަކެތީގެ މި ހިމެނޭ މުދާތައް 7 މާކެޓަކުން ގެނެވޭނެ އިންތިޒާމުތައް ހަމަޖެއްސުމަށް. މިކަމުގައި ވެސް ކުރިއެރުންތަކެއް މިވަނީ ލިބިފަ. މީގެ ތެރޭގައި ޗައިނާ، އިންޑިއާ، ތައިލެންޑް، ވިއެޓްނާމް އަދި އިންޑޮނޭޝިއާ ފަދަ ގައުމުތައް ހިމެނޭ،” ވަޒީރު ވިދާޅުވިއެވެ.

ކަނޑުމަގުގެ އިތުރުން ވައިގެ މަގުން މުދާ އެތެރެކުރުން ވެސް އިތުރުވެފައިވާ ކަމަށް ވަޒީރު ވިދާޅުވިއެވެ. އެއާލައިންތަކުން ފްލައިޓް އިތުރުކުރުމާ ގުޅިގެން އެއާ ފްރައިޓްކޮށް ގެންނަ މުދާ އިތުރުވެފައިވާއިރު، ކޮލަމްބޯގައި ހުރި ފްރޯޒަން މުދަލާއި އެހެނިހެން މުދާ ގެނައުމުގެ މަސައްކަތް ވެސް ހަމަޖެހިފައިވާ އުސޫލުން ކުރިއަށްދާ ކަމަށް ވަޒީރު ވިދާޅުވިއެވެ. މީގެ އިތުރުން ތެލުގެ ޝިޕްމަންޓްތައް ވެސް އެއްވެސް ދަތިކަމެއް ނެތި ރާއްޖެއަށް ލިބެމުންދާ ކަމަށާއި، ޗައިނާއާއެކު އޮތް މިނިވަން ވިޔަފާރީގެ އެއްބަސްވުމަކީ މިފަދަ ދަނޑިވަޅުތަކުގައި މުދާ ގެނައުމަށް ލިބޭ ބޮޑު ފަސޭހައެއް ކަމަށް ވަޒީރު ސިފަކުރެއްވިއެވެ.

މާލޭ ވޯޓަރ އެންޑް ސުވަރޭޖް ކޮމްޕެނީ، އެމްޑަބްލިއުއެސްސީގެ މެނޭޖިންގ ޑިރެކްޓަރ ޢަބްދުލްމަތީން މުޙައްމަދު މަޤާމުން އިސްތިއުފާދެއްވައިފިއެވެ.

މަތީން އިސްތިއުފާ ދެއްވިކަން ހާމަކޮށްފައިވަނީ ސޯޝަލް މީޑިއާގައި ކުރެއްވި ޕޯސްޓެއްގައެވެ. އެ ޕޯސްޓުގައި މަތީން ވިދާޅުވީ، އެމްޑަބްލިޔުއެސްއީގެ އެމްޑީގެ މަޤާމުން ވަގުތުން އިސްތިއުފާ ދެއްވާފައިވާ ކަމަށެވެ.

މަތީނު އެމްޑަބްލިއުއެސްސީގެ މެނޭޖިންގ ޑިރެކްޓަރ ކަމުގެ މަޤާމާގައި ހަވާލުވީ 2023ވަނަ އަހަރު ނޮވެމްބަރ މަހު 28ވަނަ ދުވަހުއެވެ.

މި ސަރުކާރުގައި މިފްކޯއަށް އައްޔަނުކުރެވުނު ތިންވަނަ ސީއީއޯ ފަރުހަތު ޝަހީރު މިއަދު މަގާމުން އިސްތިއުފާ ދެއްވައިފިއެވެ.

ފަރުހަތު އިސްތިއުފާ ދެއްވާފައި މިވަނީ، ދާދިފަހުން މިފްކޯއިން ވިއްކާ ތެޔޮ މަސްދަޅުގެ އަގު ބޮޑުކުރި މައްސަލަ ހޫނުވެފައި ވަނިކޮށެވެ. އެ ކުންފުނިން އަގު ބޮޑުކުރީ ސަރުކާރަށް ނޭނގި ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެފައިވާ ދަނޑިވަޅެއްގައެވެ. މަސްދަޅުގެ އަގު ބޮޑުކުރި ދުވަހު މިފްކޯއިން ވަނީ އެ ނިންމުން ބަދަލުކޮށް ކުރީގެ އަގަށް އިއާދަކޮށްފައެވެ.

ފަރުހަތު މިފްކޯއާ ހަވާލުވެވަޑައިގަތީ މިދިޔަ އަހަރު މާރިޗު މަހުގެ ތެރޭގައެވެ. އޭނާއާ މަގާމު ހަވާލުކުރެވުނީ އޭގެ ކުރިން ސީއީއޯގެ މަގާމުގައި ހުންނެވި ޑރ. ވިޓަލީ ލިއުބިމޯވް މަގާމުން ވަކިކުރުމަށް ފަހުގައެވެ.

މިފަހުން ސަރުކާރު ކުންފުނިތަކުގެ އިސް މަގާމުތަކުގައި ތިއްބެވި ގިނަ ބޭފުޅުންތަކެއް ވަނީ މަގާމުން ވަކިކުރެވި ނުވަތަ އިސްތިއުފާ ދެއްވައިފައެވެ. އެގޮތުން ފެނަކައިގެ ޑެޕިއުޓީ މެނޭޖިންގ ޑިރެކްޓަރު މުހައްމަދު އާރިފާއި މެނޭޖިންގ ޑިރެކްޓަރު ނަޖާހު ހިމެނޭހެން ހަ މީހަކު މަގާމުން ވަކިކޮށްފައިވެއެވެ. އަދި އެމްޕީއެލްގެ ސީއީއޯ ރިޝްވާން ވެސް ވަނީ މަގާމުން އިސްތިއުފާ ދެއްވައިފައެވެ.