އިންޑިއާގެ މަޝްހޫރު އަދި ލެޖެންޑަރީ ލަވަކިޔުންތެރިޔާ އާޝާ ބޯސްލޭ ނިޔާވެއްޖެއެވެ.
އިންޑިއާގެ މިއުޒިކްގައި އެންމެ މޮޅު އެއް ލަވަކިޔުންތެރިޔާ އާޝާ ބޯސްލޭ މަރުވިއިރު، އުމުރަކީ 92 އަހަރެވެ.
އޭނާ މަރުވެފައި ވަނީ މުމްބާއީގެ ބްރީޗް ކެންޑީ ހޮސްޕިޓަލުގައި އެޑްމިޓްކޮށްގެން ފަރުވާ ހޯދަމުން ދަނިކޮށެވެ. މިގޮތުން ހިތުގެ މައްސަލަތަކާއި ނޭވާލާ ނިޒާމުގެ މައްސަލަތަކެއް ދިމަވެގެން އާޝާ ހޮސްޕިޓަލްގައި އެޑްމިޓް ކުރިއިރު، އޭނާގެ ހާލު ސީރިއަސް ކަމަށް ރިޕޯޓްތަައް ބުނެއެވެ. އަދި ރެއިން ފެށިގެން ފަރުވާދެމުން ގޮސްފައި ވަނީ އައިސީޔޫގައި ކަަމަށްވެސް ވެއެވެ.
އާޝާ މަރުވިކަން، އޭނާގެ ދަރިފުޅު އާނަންދު ވަނީ އިންޑިއާގެ މީޑިއާތަކަށް ކަށަވަރުކޮށްދީފައެވެ. އޭނާގެ ޖަނާޒާ ބޭއްވުމަށް ހަމަޖެހިފައިވަނީ މާދަމާއެވެ.
އިންޑިއާގެ އެންމެ މަޝްހޫރު އެއް ލަވަކިޔުންތެރިޔާގެ ގޮތުގައި ފާހަގަކޮށްލެވޭ އާޝާ ވަނީ އިންޑިއާގެ މިއުޒިކަށް ގިނަ ހިދުމަތްތަކެއް ކޮށްދީފައެވެ. މިގޮތުން ތަފާތު އެކި ބަސްބަހުން ލަވަ ކިޔައި އެތައް ހާސް ބައެއްގެ ބޮޑު ސަމާލުކަމެއް އޭނާއަށް ލިބިގެން ގޮސްފައި ވެއެވެ.
ހިންދީ ފިލްމް މިއުޒިކްގައި އާޝާ އާއި އޭނާގެ ދައްތަ ލަތާ ވެގެން ގޮސްފައި ވަނީ އެންމެ ފާހަގަކޮށްލެވޭ ފަންނާނުންނަށެވެ. 1933 ވަނަ އަހަރު މަންގޭޝްކަރު އާއިލާއަށް އުފަން އާޝާ ޕްރޮފެޝަނަލްކޮށް ލަވަ ކިޔަން ފެށީ އުމުރުން ނުވަ އަހަރުގައެވެ. 1943 ވަނަ އަހަރު އޭނާ ފިލްމަކަށް ފުރަތަމަ ފަހަރަށް ލަވަ ކިޔުނުއިރު، 1950 ގެ އަހަރުތަކާ ހަމައަށް އައިއިރު އޭނާ ވަނީ ބޮލީވުޑްގައި ބޮޑު މަޝްހޫރުކަމެއް ހޯދައިފައެވެ. އޭގެ ފަހުން 30 އަހަރު ވަންދެން އޭނާ ވެގެން ގޮސްފައި ވަނީ އެންމެ ޑިމާންޑް ބޮޑު ލަވަކިޔުންތެރިންގެ ތެރޭގައި ހިމެނޭ އެކަކަށެވެ.
އާޝާ ވަނީ އެތައް ހާސް ފިލްމަަކަށް ލަވަތަކެއް ހުށަހަޅައިދީ، އެތައް އެވޯޑްތަކެއް ހޯދައިފައި ވެއެވެ. އޭގެ ތެރޭގައި ފިލްމް “އުމްރާއޯ ޖާން” އާއި “އިޖާޒަތު” އިން އެންމެ މޮޅު އަންހެން ލަވަކިޔުންތެރިޔާގެ އެވޯޑާއި، ގައުމީ ފިލްމް އެވޯޑްތަކާއި ލައިފްޓައިމް އެޗީވްމަންޓް އެވޯޑްވެސް ހޯދާފައި ވެއެވެ.
އިންޑިއާގެ އެންމެ ޝަރަފުވެރި އެވޯޑްތަކުގެ ތެރޭގައި ހިމެނޭ އެވޯޑްތައްވެސް އާޝާއަށް ލިބިފައި ވެއެވެ. މިގޮތުން 1997 ވަނަ އަހަރު ޕަދްމާ ޝްރީ އަދި 2008 ވަނަ އަހަރު ޕަދްމާ ވިބޫޝަން އޭނާއަށް ލިބުނެވެ. މީގެ އިތުރުން 2000 ވަނަ އަހަރު އޭނާ އަށް ވަނީ ދާދާސާހެބް ފާލްކޭ އެވޯޑް ވެސް ލިބިފައެވެ.
ކިޔުންތެރިންގެ ހިޔާލު