Author: މަރިޔަމް ނާޖިލާ އިމްރާން

ބޭންކް އޮފް މޯލްޑިވްސް (ބީއެމްއެލް) އަށް 2026 ވަނަ އަހަރުގެ ފުރަތަމަ ކުއާޓަރުގައި ޓެކުހަށް ކެނޑުމަށްފަހު ސާފު ފައިދާގެ ގޮތުގައި 631 މިލިއަން ރުފިޔާ ލިބިއްޖެއެވެ.

ބީއެމްއެލުން ނެރުނު ނޫސް ބަޔާނުގައިވާ ގޮތުން މިއީ ވޭތުވެދިޔަ އަހަރުގެ އެ މުއްދަތާ އަޅައިބަލާއިރު 27 އިންސައްތައިގެ ކުރިއެރުމެކެވެ. ހިންގުމުގެ ފައިދާގެ ގޮތުގައި 879 މިލިއަން ރުފިޔާ ލިބިފައިވާ އިރު، ބޭންކުގެ ޖުމްލަ އާމްދަނީ ވަނީ 1.24 ބިލިއަން ރުފިޔާއަށް އިތުރުވެފައެވެ. އެ ބޭންކުން ބުނީ އާމްދަނީ އިތުރުވީ ލޯނާއި ފައިނޭންސިންގެ ފައިދާއިން ލިބުނު 796 މިލިއަން ރުފިޔާއާއި، ފީ އާއި ކޮމިޝަނުން ލިބުނު 332 މިލިއަން ރުފިޔާއާ ގުޅިގެން ކަމަށެވެ. އާމްދަނީއާ އަޅައިބަލާއިރު ހަރަދު ހުރި މިންވަރު ދައްކައިދޭ ކޮސްޓް-ޓު-އިންކަމް ރޭޝިއޯ ވަނީ ކުރީ އަހަރުގެ 25 އިންސައްތައިން 24 އިންސައްތައަށް ރަނގަޅުކުރެވިފައެވެ.

ބީއެމްއެލުން ބުނެފައިވާ ގޮތުގައި ފުރަތަމަ ކުއާޓަރު ނިމުނުއިރު ބޭންކުގެ ޖުމުލަ އެސެޓް ވަނީ 60.6 ބިލިއަން ރުފިޔާއަށް އަރައިފައެވެ. މިއީ ބޭންކުގެ ތާރީހުގައި ޖުމުލަ އެސެޓް 60 ބިލިއަނަށްވުރެ މައްޗަށް އެރި ފުރަތަމަ ފަހަރެވެ. ކަސްޓަމަރުންގެ ޑިޕޮސިޓް 40.7 ބިލިއަން ރުފިޔާއަށް އިތުރުވެފައިވާ އިރު، ލޯނުގެ ޖުމުލަ އަދަދު ވަނީ 27.6 ބިލިއަން ރުފިޔާއަށް އިތުރުވެފައެވެ. އެ ބޭންކުން ބުނީ ފުރަތަމަ ކުއާޓަރުގައި މުޅިން އަލަށް 4.6 ބިލިއަން ރުފިޔާގެ ލޯނު ދޫކޮށްފައިވާ ކަމަށާއި، އޭޕްރީލް މަހުގެ ފުރަތަމަ 15 ދުވަހު ދޫކުރި 488 މިލިއަން ރުފިޔާއާއެކު މި އަހަރު ދޫކުރި އާ ލޯނުގެ އަދަދު ފަސް ބިލިއަން ރުފިޔާއަށްވުރެ މައްޗަށް އަރާފައިވާ ކަމަށެވެ.

ބޭރު ފައިސާގެ ދާއިރާއަށް ބަލާއިރު، ފުރަތަމަ ކުއާޓަރުގައި ވިޔަފާރިތަކަށާއި އާންމު ފަރުދުންނަށް 226 މިލިއަން ޑޮލަރަށްވުރެ ގިނައިން ވިއްކާފައިވާ ކަމަށް ބީއެމްއެލުން ބުންޏެވެ. ނަމަވެސް މެދުއިރުމަތީގެ ހަމަނުޖެހުންތަކާ ގުޅިގެން ފެބްރުއަރީ 28 އިން ފެށިގެން ފަތުރުވެރިންގެ ބުކިންތައް ކެންސަލްވެ، ކާޑުގެ މުއާމަލާތްތަކުން ބޭރުން އަންނަ ފައިސާ ގާތްގަނޑަކަށް ތިންބައިކުޅައެއްބައި ދަށްވެފައިވާ ކަމަށާއި، ރާއްޖެއިން ބޭރަށް ފޮނުވާ ފައިސާ ދެގުނަ އިތުރުވެފައިވާ ކަމަށް ވެސް އެ ބޭންކުން ފާހަގަކޮށްފައިވެއެވެ.

ބީއެމްއެލުން އިތުރަށް ބުނެފައިވާ ގޮތުގައި، އޭޕްރީލް މަހު ތ. ވިލުފުށި، އއ. ތޮއްޑޫ، ހދ. ހަނިމާދޫ، ލ. ހިތަދޫ، ސ. ހުޅުދޫ އަދި ކުޅުދުއްފުށީ ސިޓީގައި އައު ބްރާންޗުތައް ހުޅުވައި، ރާއްޖޭގެ 70 ރަށެއްގައި 90 އޭޓީއެމް ވަނީ ބަހައްޓައިފައެވެ. އެ ހިދުމަތްތައް އިފްތިތާހުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޝަރަފުވެރިކޮށްދެއްވި ރަސްމިއްޔާތެއްގައެވެ. އެ ބަދަލުތަކާއެކު ބޭންކުގެ ވިއުގައިގައި މިހާރު 253 ދިވެހި ރުފިޔާ އޭޓީއެމް އަދި 86 ޔޫއެސް ޑޮލަރު އޭޓީއެމް ހިމެނެއެވެ. އަދި ބޭންކުގެ މާކެޓް ކެޕިޓަލައިޒޭޝަން ވަނީ ބޯނަސް ހިއްސާ ދޫކުރުމާއި ހިއްސާ ބައިކުރުމާ ގުޅިގެން 3.6 ބިލިއަން ރުފިޔާއިން 28.2 ބިލިއަން ރުފިޔާއަށް އުފުލިފައެވެ.

ކުޑަކުދިންނަށް ޖިންސީ ގޯނާކުރާ މަންޒަރު ދައްކުވައިދޭ ފޮޓޯއާއި ވީޑިއޯ ކްރިޕްޓޯކަރަންސީ މެދުވެރިކޮށް ވިއްކާކަމުގެ ތުހުމަތުގައި ދިވެއްސަކު ހައްޔަރުކޮށްފިއެވެ.

ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ ޗީފް ޖުޑީޝަލް އެޑްމިނިސްޓްރޭޓަރުކަމުގެ މަގާމުގައި ހުންނެވި އަމްޖަދު މުސްތަފާ، އެ މަގާމުން އިސްތިއުފާ ދެއްވައިފިއެެވެ.

މި އަހަރުގެ ފުރަތަމަ ކުއާޓާ ނިމުނުއިރު ދައުލަތުގެ ރަސްމީ ރިޒާވްއަށް %68.2 ކުރިއެރުމެއް އައިސްފައިވާކަން މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީގެ ތަފާސްހިސާބުތަކުން ދައްކައިފިއެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކަށް ބަލާއިރު،ފުރަތަމަ ކުއާޓާ ނިމުނުއިރު ދައުލަތުގެ ރަސްމީ ރިޒާވްގައި 1.3 ބިލިއަން ޑޮލަރު ހުރިއިރު، ބޭނުންކުރެވޭ ރިޒާވްގެ ގޮތުގައި 400 މިލިއަނަަށްވުރެ ގިނަ ޑޮލަރު ހުއްޓެވެ.

އެމްއެމްއޭއިން ޢާންމުކޮށްފައިވާ ދައުލަތުގެ ރަސްމީ ރިޒާވްގެ ތަފާސްހިސާބުތަކަށް ބަލާއިރު މިދިޔަ މާރިޗު މަހުގެ ނިޔަލަށް ރަސްމީ ރިޒާވްގައި 1.3 ބިލިއަން ޑޮލަރު ހުރިއިރު، ފެބްރުއަރީ މަހު ރަސްމީ ރިޒާވްގައި ހުރީ 1.2 ބިލިއަންް ޑޮލަރެވެ. ހަމަ އެއާއެކު، މިދިޔަ އަހަރުގެ މާރިޗު މަހުގައި ރަސްމީ ރިޒާވްގައި ހުރީ 791 މިލިއަން ޑޮލަރެވެ.  އެހެންކަމުން، މިދިޔަ އަހަރުގެ ފުރަތަމަ ކުއާޓާގެ ނިޔަލަށް ރިޒާވްގައި ފައިސާ ހުރި މިންވަރަށްވުރެ މި އަހަރުގެ ފުރަތަމަ ކުއާޓާގައި ރިޒާވްގައި ފައިސާ ހުރި މިންވަރު %68.2 ވަނީ އިތުރުވެފައެވެ.

މީގެ އިތުރުން، ރަސްމީ ރިޒާވްގެ އިތުރަށް އެމްއެމްއޭއިން ބޭންކުތަކުގައި ބޭނުންކުރެވޭ ގޮތަށް ޑިޕޮސިޓުކޮށް ރައްކާކޮށްފައި ހުރި ބޭރު ފައިސާގެ ޢަދަދު މާރިޗު މަހުގެ ނިޔަލަށް 81 މިލިއަން ޑޮލަރަށް އަރާއިރު، ޖުމްލަ ރިޒާވް 1.4 ބިލއިަން ޑޮލަރަށް އަރާނެއެވެ.  އަދު މި މުއްދަތުގައި ކުރު މުއްދަތުގެ މާލީ އިލްތިޒާމުތަކުގެ ގޮތުގައި 1 ބިލިއަނެއްހައި ޑޮލަރު ހުރިއިރު، ރިޒާވް ފައިސާގެ ގޮތުގައި ބޭނުންކުރެވޭ ގޮތަށް ހުރި އަދަދު ހިސާބުކުރަނީ ރަސްމީ ރިޒާވްއާއި އެހެނިހެން ބޭރު ފައިސާގެ އެސެޓުތައް އެއްކޮށްލައިގެން ޖުމްލަ ރިޒާވްގެ ގޮތުގައި ހިސާބުކުރެވޭ އަދަދުން ކުރު މުއްދަތުގެ މާލީ އިލްތިޒާމުތައް އުނިކޮށްގެންކަމަށް އެމްއެމްއޭ އިން މަޢުލޫމާތުދެއެވެ.

ރައީސް ޑރ. މުޙައްމަދު މުޢިއްޒު 2023 ވަނަ އަހަރު ރާއްޖޭގެ ވެރިކަމާ ހަވާލުވެވަޑައިގެންނެވިއިރު ރިޒާވްގައި 509 މިލިއަން ޑޮލަރު ހުރިއިރު، ދެ އަހަރާއި ބައިގެ ތެރޭގައި ރަސްމީ ރިޒާވްގައި ފައިސާ ހުރި މިންވަރު %161 ވަނީ އިތުރުވެފައެވެ.

މިދިޔަ ހަފުތާގައި ސްކޭމްތަކަށް ފަސް ލައްކައެއްހާ ރުފިޔާ ގެއްލިފައިވާއިރު، އޭގެ ތެރެއިން ހޯދުނީ ދެ ލައްކަ ރުފިޔާ ކަމަށް ފުލުހުންގެ ތަފާސްހިސާބުން ދައްކައިފިއެވެ.

މިދިޔަ އަހަރުގެ ފުރަތަމަ ކުއާޓަރާ އަޅައިބަލާއިރު، މި އަހަރުގެ ފުރަތަމަ ކުއާޓަރުގައި ވިޔަފާރިތަކަށް ޑޮލަރު ވިއްކި އަދަދު 89.3 މިލިއަން ޑޮލަރު އިތުރު ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެއެވެ.

ސަރުކާރު ހިއްސާވާ ކުންފުނިތަކުގައި 42،000 މުވައްޒަފުން އެބަތިބި ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.

މެދުއިރުމަތީގެ ހަނގުރާމަ އާއި ގުޅިގެން ރައީސް އުފެއްދެވި ކްރައިސިސް ކޮމިޓީގެ ބައްދަލުވުމުގައި ވާހަކަ ދައްކަވަމުން ޒަމީރު ވިދާޅުވީ އެސްއޯއީތަކާ އެކު މަޝްވަރާ ކުރަމުން އަންނަ ކަމަށެވެ. އެގޮތުން އެސްއޯއީތަކުގައި އަބަދު ވެސް މުވައްޒަފުން ނެގުމާއި ވަކިކުރުން އޮންނާނެ ކަމަށާއި، ކުންފުނިތަކުގައި ގާތްގަނޑަކަށް 42،000 މުވައްޒަފުން ތިބޭނެ ކަމަށެވެ. އަދި ރައިޓްސައިޒް ކުރަން ބައެއް ކުންފުނިތަކުން 33 އިންސައްތަ މުވައްޒަފުން ނުކެނޑިދާނެ ކަމަށާއި، އައީއޭސް އިން އެހާވަރަށް މުވައްޒަފުން މަދުކުރަން ނުޖެހޭނެ ކަމަށާއި، 33 އިންސައްތަ މުވައްޒަފުން މަދުކޮށްފިނަމަ ކުންފުނި ނުހިންގޭނެ ކަމަށެވެ.

ޒަމީރު ވިދާޅުވީ 33 އިންސައްތަ މަދު ނު ކުރެވޭނެ ކުންފުނިތައް ވެސް ހިމެނޭ ކަމަށެވެ. އަދި މިހާރު ހުރި އޮޕަރޭޝަންސް އަށް ބަލާފައި ރައިޓްސައިޒް ކުރުން އެއީ ކުރާނެ ކަމެއް ކަމަށާއި، އެކަން ކުރަން ނިންމާފައި ވަނީ މާދަމާ ހެނދުނު އިރު އަރާއިރު އެވަރަށް މީހުން ކެނޑުމެއް ނޫން ކަމަށެވެ. އޭނާ ވިދާޅުވީ މުވައްޒަފުން މަދުކުރަން އަންގާފައި ވާނީ އެމްޕްލޯއިމަންޓް ގާނޫނާ އެއްގޮތަށް އެކަން ކުރުމަށް ކަމަށާއި، މިކަމުގެ ސަބަބުން މީހުންނަށް ވާނެ އުނދަގޫތަކަށް ބަލައިގެން އެކަން ކުރާނެ ކަމަށެވެ.

ސަރުކާރު ހިއްސާވާ ކުންފުނިތަކުގެ މުވައްޒަފުންގެ އަދަދު %33 މަދުކުރުމަށާއި ތައުލީމާއި ހުނަރާއި ގާބިލުކަމަށް ބަލައިގެން ވަޒީފާތަކަށް މީހުން ނެގުމަށް ފިނޭންސް މިނިސްޓްރީން، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އަށް  ބުރާސްފަތި ދުވަހު ވަނީ އަންގާފަ އެވެ.

މިނިސްޓްރީން ބުނި ގޮތުގައި، އެކަން އެގޮތަށް ކުރަން އަންގާފައިވަނީ، ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާކޮށް، ނަތީޖާ ނެރުން އިތުރުކުރުމަށެވެ.

ގުޅީފަޅުގެ ލޭންޑް ޔޫސް ޕްލޭނަށް ގެނައި ބަދަލުތަކާއެކު، އެ ރަށުން ގޯތި ލިބުނު ފަރާތްތަކަށް ބިން ހަވާލުކުރުމުގެ މަސައްކަތް ބިނާރާއި ގެދޮރުވެރިކަމާ ބެހޭ ވުޒާރާއިން ބާރުމިނުގައި ކުރިއަށް އެބަގެންދެއެވެ.

އެމިނިސްޓްރީން ބުނިގޮތުގައި މިހާތަނަށް 2,972 މީހުންނާއެކު އެއްބަސްވުމުގައި ސޮއިކޮށްފައިވާއިރު، އޭގެ ތެރެއިން 169 މީހުންނަށް ވަނީ އަމަލީގޮތުން ބިން ހަވާލުކޮށްފައެވެ. ގުޅީފަޅުން 1,250 އަކަފޫޓާއި 3,650 އަކަފޫޓާ ދެމެދުގެ ޖުމްލަ ހަތް ސައިޒެއްގެ ގޯތި ދޫކުރުމަށް ވަނީ ހަމަޖެހިފައެވެ.

އައު ޕްލޭންގެ ދަށުން ގުޅީފަޅަކީ ދިރިއުޅުމަށް ބޭނުންވާ އަސާސީ ޚިދުމަތްތައް ފުރިހަމައަށް ލިބޭނެ ތަނެއްގެ ގޮތުގައި ތަރައްޤީކުރުމަށް ވަނީ ނިންމާފައެވެ. މީ

ގެ ތެރޭގައި ތަޢުލީމީ އަދި ޞިއްޙީ ޚިދުމަތްތަކުގެ އިތުރުން، އިންޑަސްޓްރިއަލް ސަރަޙައްދުތަކާއި، ހިތްފަސޭހަ ޕާކުތަކާއި ކުޅިވަރު ކުޅޭނެ ތަންތަން ހިމެނެއެވެ.

މި ބަދަލުތައް ގެނެސްފައިވަނީ އެތަނުގައި އާބާދުވާ ރައްޔިތުންނަށް އެކަށީގެންވާ ފެންވަރުގެ ޚިދުމަތްތައް ކަށަވަރުކޮށްދިނުމުގެ ބޭނުމުގައެވެ.

ބިންތައް ހަވާލުކުރުމާ އެކުއެކީގައި، އެ ސަރަޙައްދު ތަރައްޤީކުރުމުގެ އަމަލީ މަސައްކަތްތައް ވެސް ސަރުކާރުން ވަނީ ފަށާފައެވެ.

އެގޮތުން ގުޅީފަޅުގެ މަގުތައް ހެދުމާއި ޔުޓިލިޓީ ޚިދުމަތްތައް ޤާއިމުކުރުމަށް ބޭނުންވާ މަސައްކަތްތައް އެމްޓީސީސީ އަދި އާރްޑީސީއާ މިހާރު ވަނީ ހަވާލުކޮށްފައެވެ.

މި މަޝްރޫޢު ނިމުމުން ގުޅީފަޅު ވެގެންދާނީ މާލެ ސަރަޙައްދުގެ ބޯހިޔާވަހިކަމަށް ލިބޭނެ ވަރަށް ބޮޑު ލުޔަކަށެވެ.