އީރާނުން މިސައިލް އަދި ޑްރޯން ލޯންޗަރުތައް އަލުން އުފެއްދުމުގެ މަސައްކަތް، ހަނގުރާމަ ފެށުމުގެ ކުރިން މި މަސައްކަތްކުރިއަށް ގެންދިޔަ މިންވަރަށް ވުރެ، ހަލުވި މިނެއްގައި ކުރިއަށް ގެންދާކަމަށް އީރާނުގެ އަސްކަރީ ކޮމާންޑަރަކު ވިދާޅުވެއްޖެއެވެ.
ނޯނިއުސްއަށް ދެއްވި އިންޓަވިއުއެއްގައި ރިވޮލިއުޝަނަރީ ގާޑްގެ އެއަރޮސްޕޭސް ފޯސްގެ ކޮމާންޑަރު މާޖިދު މޫސާވީ ވިދާޅުވީ އީރާނާ ހިލާފަށް ހަނގުރާމަ ހުއްޓާލުމުގެ ތެރޭގައި ދުޝްމަނުންނަށް ވަޒަން އަލުން ބިނާކުރެވޭ ގޮތް ނުވާ ކަަމަށެވެ.
މި ވާހަކަތައް އެޑިޓްކޮށްފައިވާ ވީޑިއޯއަކާ އެކު ހިއްސާކޮށްފައިވާއިރު، އެ ވީޑިއޯއިން ފެނިގެން ދަނީ ބިމުގެ އަޑީގައި ހުންނަ މިސައިލް ފެސިލިޓީއެއް އިންސްޕެކްޓް ކުރާ ތަނެވެ.
“ހަނގުރާމަ ހުއްޓާލުމުގެ ތެރޭގައި މިސައިލް އަދި ޑްރޯން ލޯންޗް ޕެޑްތައް އަދާހަމަތަކޮށް ފުރިހަމަ ކުރުމުގެ ދުވެލި ހަނގުރާމައިގެ ކުރިއަށް ވުރެ ވެސް ބާރު،”. އޭނާ ވިދާޅުވިއެވެ.
“ހަނގުރާމައިގެ މި މަރުހަލާ އެމީހުންނަށް ވަނީ ގެއްލުފައި. އެމީހުންނަށް ހޮރްމޫޒް ކަނޑުއޮޅި، ލުބުނާން، އަދި އެ ސަރަހައްދު ވަނީ ގެއްލިފައި” އޭނާ އިތުރަށް ވިދާޅުވިއެވެ.
މި ވީޑިއޯއިން ފެންނަ ބިމުގެ އަޑީގައި ހުންނަ ފެސިލިޓީތަކުގެ ތެރޭގައި ޑްރޯންތަކާއި މިސައިލް އަދި ލޯންޗުތަކުގެ އިތުރުން ގްރައުންޑް މިސައިލް ލޯންޗުތަކުގެ ފޫޓޭޖްތައްވެސް ހިމަނާފައި ވެއެވެ.
ފެބްރުއަރީ މަހުގެ 28 ވަނަ ދުވަހު އިސްރާއީލާއި އެމެރިކާއިން އީރާނަށް ހަމަލާތައް ދޭން ފެށިއިރު، އެމީހުންގެ އެއް އަމާޒަކީ އީރާނުގެ މިސައިލްގެ ބާރުގަދަކަން ނައްތާލުމެވެ.
މި ހަމަލާތައް ވަރުގަދަ ކުރަމުން ގޮސް، އެންމެ ފަހުން ހަމަލާތައް މެދުކަނޑާލަން އެއްބަސްވެފައިވަނީ މިމަހުގެ 8 ގައެވެ. ދެ ހަފްތާއަށް ހަނގުރާމަ މެދުކަނޑާލަން އެއްބަސްވެފައިވީއިރު، މި މުއްދަތު ހަމަވާނީ އަންނަ ބުދަ ދުވަހުގެ ނިޔަލަށެވެ. އަދި ހަނގުރާމަ ހުއްޓާލުމުގެ މުއްދަތު އިތުރު ކުރުމާއި ގުޅޭ މަޝްވަރާތައް އަދިވެސް ދަނީ ކުރިއަށެވެ.
ކިޔުންތެރިންގެ ހިޔާލު