ދިވެހިރާއްޖޭގެ ސިޔާސީ މަސްރަހަކީ އަބަދުވެސް ހައިރާންކުރުވަނިވި ބަދަލުތަކެއް އަންނަމުންދާ މައިދާނެކެވެ. އެގޮތުން، މިދިޔަ އާދިއްތަ ދުވަހު ބޭއްވި “ބޮޑު ބަދަލު” ނޫސްވެރިންގެ ބައްދަލުވުމުގައި ކުރީގެ ރައީސް މުހައްމަދު ނަޝީދު ދެއްވި އިއުލާނަކީ ގިނަ ބަޔަކު ސިއްސުވާލި ކަމެކެވެ. 2028 ވަނަ އަހަރުގެ ރިޔާސީ އިންތިހާބުގައި އެމްޑީޕީގެ ރިޔާސީ ކެންޑިޑޭޓަކަށް އެ ޕާޓީގެ ކުރީގެ ޗެއަރޕާސަން ފައްޔާޒް އިސްމާއިލަށް ތާއީދުކުރައްވާނެ ކަމަށް ނަޝީދު އިއުލާން ކުރެއްވުމާއި، ހަމައެއާއެކު އެމްޑީޕީގެ ޗެއަރޕާސަންގެ މަގާމަށް ނަޝީދު ވާދަކުރައްވާނެކަން ހާމަކުރެއްވުމަކީ ދިވެހި ސިޔާސީ ޗާޓަށް އައި ބޮޑު ލޮޅުމެކެވެ.
މި އައު “ޕާޓްނާޝިޕް” އާއެކު ދެ ބޭފުޅުން ވަނީ ރާއްޖޭގެ ވެރިކަމުގެ ނިޒާމަށް ގެންނަން ބޭނުންވާ ބޮޑެތި ބަދަލުތަކެއްވެސް ހުށަހަޅުއްވާފައެވެ. އޭގެ ތެރޭގައި އެންމެ ފާހަގަކޮށްލެވެނީ ދައުލަތުގެ އެންމެ މަތީ ވެރިޔާ (Head of State) އަދި ސަރުކާރުގެ އެންމެ މަތީ ވެރިޔާ (Head of Government) އަކީ ތަފާތު ދެ މަގާމެއްގެ ގޮތުގައި ކަނޑައެޅުމެވެ. މި ހުށަހެޅުމުގައިވާ ގޮތުން ރައީސުލްޖުމްހޫރިއްޔާ ހޮވާނީ އިންތިހާބީ މަގާމުތަކުގައި ތިބި މީހުންގެ އަޣުލަބިއްޔަތުންނެވެ. ނަމަވެސް ސަރުކާރު ހިންގާ ވެރިޔާ ހޮވާނީ ރައްޔިތުންގެ ސީދާ ވޯޓަކުންނެވެ. މިއީ ރާއްޖޭގެ ވެރިކަމުގެ އޮނިގަނޑަށް ހުށަހެޅިގެންދިޔަ ތަފާތު އަދި ބޮޑު އިސްލާހެކެވެ.
ނަމަވެސް، މި ހުރިހާ އިއުލާންތަކަކާއެކު އުފެދޭ އެންމެ ބޮޑު ސުވާލަކީ “ނަޝީދާއި ފައްޔާޒުގެ މި ގުޅުން ހަގީގަތުގައިވެސް މަސައްކަތް ކުރާނެބާ؟” މިއެވެ. މި ސުވާލު އުފެދެންޖެހޭ ސަބަބުތަކެއް އެބަހުއްޓެވެ. މީގެ ކުރީގެ ތާރީޚަށް ބަލާއިރު، ނިމިދިޔަ އެމްޑީޕީގެ ސަރުކާރުގައި ނަޝީދާއި ފައްޔާޒާ ދެމެދު އޮތީ ނުތަނަވަސް ގުޅުމެކެވެ. ސޯޝަލް މީޑިއާގައާއި ސިޔާސީ މައިދާނުގައި އޭރު ދެކެވުނު ވާހަކަތަކަށް ބަލާއިރު، ނަޝީދު އެމްޑީޕީން އެކަހެރިކުރުމަށް އެންމެ ބޮޑަށް މަސައްކަތް ކުރެއްވި އެއް ބޭފުޅަކީ ފައްޔާޒު ކަމަށް ގިނަ ބަޔަކު ގަބޫލުކުރެއެވެ. ފައްޔާޒާއި ނަޝީދާ ދެމެދު އޮތް ފިކުރީ އަދި ސިޔާސީ ތަފާތުތަކަކީ މިއަދު ފޮރުވޭނެ ހަގީގަތްތަކެއް ނޫނެވެ.
މި އިއްތިހާދާ މެދު ސިޔާސީ ދާއިރާގެ ބައެއް ބޭފުޅުން ދެކޭގޮތުގައި، މިއީ ހަމައެކަނި ސިޔާސީ “އެއްބަސްވުމެއް” (Marriage of Convenience) އެކެވެ. ނަޝީދު ބޭނުންފުޅުވަނީ އެމްޑީޕީގެ ކޮންޓްރޯލް އަލުން ހޯއްދަވާށެވެ. ފައްޔާޒު ބޭނުންފުޅުވަނީ 2028 ގެ ރިޔާސީ ޓިކެޓް ކަށަވަރުކުރާށެވެ. އެހެންކަމުން، މި ދެ ބޭފުޅުންގެ މަސްލަހަތު މިވަގުތު އެއް އަމާޒަކަށް ހުރި ނަމަވެސް، ކުރީގެ ހިތްނުތަނަވަސްކަމާއި އިތުބާރު ނެތުމުގެ މައްސަލަތަކުގެ ސަބަބުން މި ޕާޓްނާޝިޕް ދެމިއޮންނާނެކަމާމެދު ގިނަ ބަޔަކު ޝައްކު އުފައްދައެވެ.
ކޮންމެއަކަސް، ނަޝީދާއި ފައްޔާޒުގެ މި ގުޅުމަކީ އެމްޑީޕީގެ އެތެރޭގެ މަސްރަހާއި ރާއްޖޭގެ ސިޔާސީ ކުރިމަގަށް އަންނާނެ ބޮޑު ބަދަލެއްގެ ފެށުމެވެ. މި ޕާޓްނާޝިޕް ކާމިޔާބުވާނީ ދެ ބޭފުޅުންގެ މެދުގައި އޮތް ކުރީގެ ޚިލާފުތައް އެއްފަރާތްކޮށް، އެކަކު އަނެކަކަށް އިތުބާރުކޮށްގެން ކުރިއަށް ދެވިގެންނެވެ. އެހެން ނޫންނަމަ، މިއީވެސް ރާއްޖޭގެ ސިޔާސީ ތާރީޚުގައި ފެނިގެންދިޔަ ފަދަ، ވަގުތީ ފައިދާއަކަށް އުފެދިގެންދިޔަ ބަލިކަށި ކޯލިޝަނަކަށް ވުމުގެ ފުރުސަތު ބޮޑެވެ.ނަޝީދުއާއި ފައްޔާޒުގެ ޕާޓްނާޝިޕް ހަމަ ވޯކްކޮއްފާނެބާ؟ މި ސުވާލުގެ ޖަވާބު ލިބޭނީ ކުރިއަށް އޮތް ދުވަސްތަކުގައި އެމްޑީޕީގެ ތެރެއިން ފެންނަ ހަރަކާތްތަކުންނެވެ.
ކިޔުންތެރިންގެ ހިޔާލު