Author: މަރިޔަމް ނާޖިލާ އިމްރާން

ށ. މިލަންދޫގައި އެއާޕޯޓު ގާއިމްކުރުމަށްޓަކައި ބޭނުންވާ ބިން ހިއްކުމުގެ މަސައްކަތް، މިއަދު އެއްކޮށް ނިންމާލާފައިވާކަމަށް ހައުސިން މިނިސްޓްރީން ބުނެފިއެވެ.

ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)ގެ ޗީފް އެގްޒެކެޓިވް އޮފިސަރު (ސީއީއޯ)ގެ މަގާމަށް، ސިއްހީ ދާއިރާގައި ގިނަ ދުވަސްތަކެއް ވަންދެން ޚިދުމަތްކުރައްވާފައިވާ އާމިނަތު ޝިރުނާ މިއަދު އައްޔަނުކުރައްވައިފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސްރީލަންކާއަށް ކުރައްވަމުންދާ ރަސްމީ ދަތުރުފުޅުގެ ތެރެއިން، ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރުމުގެ ގޮތުން މުހިންމު މަޝްވަރާތަކެއް ބާއްވައި، އެކި ދާއިރާތަކުން ގުޅުން ބަދަހިކުރުމުގެ އެއްބަސްވުންތަކެއްގައި މިއަދު ސޮއިކުރައްވައިފިއެވެ.

މޯލްޑިވިއަންގެ ފްލައިޓްތަކުގައި ފަސިންޖަރުންނަށް އަލްކޮހޯލް ސާވިސް ދޭން ފަށަން ރާވާފައިވާ ކަމަށް ބުނެ މީސްމީޑިއާގައި ދައުރުވަމުންދާ މައުލޫމާތު އެ ކުންފުނިން މިއަދު ދޮގުކޮށްފިއެވެ.

މޯލްޑިވިއަނުން ނެރުނު ނޫސްބަޔާނެއްގައި ބުނީ އެއީ ހަގީގަތާ ހިލާފު މައުލޫމާތެއް ކަމަށެވެ. އެ ކުންފުނިން ވަނީ ސައްހަކަން ކަށަވަރު ނުކުރެވޭ މިފަދަ މައުލޫމާތު ހިއްސާ ނުކުރުމަށް ހުރިހާ ފަރާތްތަކަށް އިލްތިމާސްކޮށްފައެވެ.

ކެޕިޓަލް މާކެޓް ޑިވެލޮޕްމެންޓް އޮތޯރިޓީ (ސީއެމްޑީއޭ) ވަގުތީ ގޮތުން ހިންގެވުމަށް، އެ އޮތޯރިޓީގެ ޑެޕިއުޓީ ޗީފް އެގްޒެކެޓިވް އޮފިސަރު ފާތިމަތު އަބްދުﷲ ކަމާލުއްދީންއާ ހަވާލު ކުރައްވައިފިއެވެ.

ސީއެމްޑީއޭގެ ސީއިއޯގެ މަގާމުގައި ހުންނެވި މުހައްމަދު ހުސައިން މަނިކް ވަނީ އޭޕްރިލް 30 ވަނަ ދުވަހު، މަގާމުން ރިޓަޔާ ކުރައްވަައިފައެވެ.

ސީއެމްޑީއޭ އިން މިއަދު ނެރުނު ބަޔާނެއްގައި ވިދާޅުވި، ހިރާއްޖޭގެ މާލީ ސެކިއުރިޓީސްއާބެހޭ ގާނޫނު ދަށުން އައު ސީއީއޯއެއް އައްޔަން ކުރެވެދެން ސީއެމްޑީއޭގެ ހިންގުން ވަގުތީ ގޮތުން ހިންގަވަމުން ގެންދަވާނީ ޑެޕިއުޓީ ސީއީއޯ ފާތިމަތު ކަމަށެވެ.

ފާތިމައަކީ އެ އޮތޯރިޓީގެ ޑެޕިއުޓީ ސީއީއޯގެ ހައިސިއްޔަތުން، އެ އޮތޯރިޓީގެ ސްޓްރެޓީޖިކް ޕްލޭން ތައްޔާކުރުމުގައި ސީއީއޯއަށށް އެހީތެރިވެދީ، ބޯޑުން ފާސްކޮށްފައިވާ ޕްލޭންތައް ތަންފީޒުކުރުމާއި މޮނީޓަރުކުރުމުގެ އިތުރުން ޕޮލިސީގެ ކަންކަމުގައި މަޝްވަރާކުރުން ކުރިއަށް ގެންދިއުމުގެ ގޮތުން ސްޓޭކްހޯލްޑަރުންނާއެކު (ދިވެހި ސަރުކާރުވެސް ހިމެނޭ ގޮތުން) ދާއިމީ ގޮތެއްގައި ބައްދަލުވުންތައް ވިލަރެސްކުރުމާއި، މި ބައްދަލުވުންތަކަށް ތައްޔާރުވުމުގެ ގޮތުން ދިރާސާތައް ކުރާ ފަރާތެވެ.

މީގެ އިތުރުން އޭނާއަކީ ސީއީއޯ ހަވާލުކުރައްވާ މަސައްކަތްތައް ކުރުމާއި، އެ ބޭފުޅާ ހާޒިރުވެ ނެތް ހާލަތުގައި އެ އޮތޯރިޓީގެ ހިންގުމުގެ ހުރިހާ ޒިންމާއެއް އަދާކުރައްވާ ބޭފުޅާވެސް މެއެވެ.

ފާތުމަތަކީ 2011 ވަނަ އަހަރުން ފެށިގެން ސީއެމްޑީއޭގައި މަސައްކަތް ކުރައްވަމުން ގެންދަވާ ފަރާތެކެވެ.

މި ސަރުކާރުގެ “ބޯހިޔާވަހިކަން އެންމެންނަށް” ސިޔާސަތުގެ ދަށުން ކުރިއަށްގެންދާ ބޯހިޔާވަހިކަމުގެ މަޝްރޫއުތަކަށް ކުރިމަތިލުމުގައި އަމަލުކުރަމުންދާ އުސޫލަށް ބަދަލުގެނެސް، މާލޭގައި ރަށްވެހިވިތާ އެއް އަހަރު ނުވާ ފަރާތްތަކަށް ވެސް ފުރުސަތު ހުޅުވާލައިފިއެވެ.

މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ އިން މިއަދު ހާމަކުރި ގޮތުގައި، މާލެއަށް ރަށްވެހިކަން ބަދަލުކުރި މީހުންގެ ތެރެއިން ކުރިން ގޯއްޗާއި ފުލެޓަށް އެދި ކުރިމަތިލެވެނީ މާލޭގައި ރަށްވެހިވިތާ އަހަރެއްވީ މީހުންނަށް އެކަނި ކަމަށް އޮތް އޮތުން މިހާރު ވަނީ ބަދަލުކޮށްފައެވެ. މި ބަދަލާއެކު، މާލޭގައި ރަށްވެހިވެފައިވާތާ އެއް އަހަރަށްވުރެ ކުރު މުއްދަތެއް ވެފައިވާ ފަރާތްތަކަށް ވެސް މިހާރު ފޯމު ހުށަހެޅޭނެއެވެ.

ނަމަވެސް، މި ފުރުސަތު ލިބިގެންދާނީ މާލޭގައި ދިރިއުޅޭތާ 15 އަހަރުވެފައިވާ މީހުންގެ ކެޓެގަރީއަށް ޝަރުތުހަމަވާ ފަރާތްތަކަށް ކަމަށް މިނިސްޓްރީން މައުލޫމާތު ދެއެވެ. މިނިސްޓްރީން އިތުރަށް ބުނެފައިވަނީ، މި ބަދަލާ ގުޅިގެން ބޯހިޔާވަހިކަމުގެ ޕްރޮގްރާމްތަކަށް އެޕްލައިކުރާ ފޯމަށް ވެސް މިހާރު ބަދަލު ގެނެވިފައިވާ ކަމަށެވެ.

މީގެ ބޭނުމަކީ މާލޭގައި ގިނަ ދުވަހު ދިރިއުޅެ، ނަމަވެސް ރަށްވެހިކަން ބަދަލުކުރިތާ ކުރު މުއްދަތެއް ވުމުގެ ސަބަބުން ބޯހިޔާވަހިކަމުގެ ފުރުސަތުން މަހުރޫމްވެފައިވާ ފަރާތްތަކަށް އިންސާފުވެރި ފުރުސަތެއް ހޯދައިދިނުމެވެ. ސަރުކާރުގެ އަމާޒަކީ މި ދައުރުގެ ތެރޭގައި އެއްވެސް ރައްޔިތަކު ބޯހިޔާވަހިކަމުން މަޙްރޫމް ނުކޮށް، އެންމެންނަށް އަމާން ބޯހިޔާވަހިކަމެއް ކަށަވަރުކޮށްދިނުން ކަމަށް ކޮންސްޓްރަކްޝަން މިނިސްޓްރީން ފާހަގަކުރެއެވެ.

މާލޭގައި ރަށްވެހިވިތާ އަހަރެއް ނުވިޔަސް ގޯއްޗާއި ފުލެޓަށް ލެވޭ ގޮތަށް ހެދިއިރު، ގޯއްޗާއި ފުލެޓަށް އެދި މި މަހުގެ ނިޔަލަށް ހުށަހެޅުމުގެ ފުރުސަތު ވަނީ ދީފައެވެ.

ސަރުކާރުގެ “ބޯހިޔާވަހިކަން އެންމެންނަށް” ސިޔާސަތުގެ ދަށުން 7،900 ފުލެޓާއި 15،000 ގޯތި ދޫކުރަން ސަރުކާރުން ވަނީ ނިންމާފައެވެ. ޖުމްލަ 7،900 ފުލެޓުގެ ތެރެއިން 4،000 ފްލެޓު ދިނުމަށް ހަމަޖެހިފައިވަނީ މާލޭގެ ރަށްވެހިންނަށެވެ. އަދި މާލޭގައި ރަށްވެހިވެފައިނުވާ މާލޭގައި ދިރިއުޅެމުން އަންނަ މީހުންނަށް 1،500 ފުލެޓު ދިނުމަށާއި، ބާކީ 2،400 ފުލެޓު ސަރުކާރުން ކަނޑައަޅާފައިވާ ހާއްސަ ކެޓަގަރީތަކަށް ދިނުމަށް ވަނީ ނިންމައިފައެވެ.

އެމަނިކުފާނަކީ ވެރިކަމުން މީހުން ބާލަން ދަންނަ ބޭފުޅެއް ކަމަށާ ހަޔާތުގައި މިހާތަނަށް ގިނަ ވެރިންތަކެއް ވެރިކަމުން ބާލާފައިވާނެ ކަމަށް، ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އެމްޑީޕީ ޗެއާޕާސަން ކެންޕެއިންގެ ތެރެއިން ދ.ކުޑަހުވަދޫގައި ރޭ ބޭއްވި ބައްދަލުވުމުގައި ޕާޓީގެ އާއްމު މެންބަރަކު ކުރި ސުވާލަށް ޖަވާބުދެއްވަމުންނެވެ.

އެގޮތުން، އެ މެންބަރު ވަނީ، އެ އިންތިޚާބު ކޮންމެ ގޮތަކަށް ނިމުނު ކަމުގައިވިޔަސް 2028 ވަނަ އަހަރުގެ ވެރިކަން އެމްޑީޕީއަށް ހޯދައިދެއްވަން ނަޝީދު މަސައްކަތް ކުރައްވާނަންތޯ ސުވާލުކޮށްފައެވެ. އަދި ކިހާ ވަރަކަށް މަސައްކަތއ ކުރައްވާނަންތޯ ވެސް ވަނީ އަހާފައެވެ.

އެ ސުވާލަށް ޖަވާބު ދެއްވަމުން އެމަނިކުފާނު ވަނީ 2028 ގެ ވެރިކަން އެމްޑީޕީއަށް ހޯއްދަވައިދެއްވަން 24 ގަޑިއިރު މަސައްކަތް ކުރައްވާނެ ކަމަށް ވިދާޅުވެފައެވެ.

”24 ގަޑިއިރު. އިރާދަކުރެއްވިއްޔާ އަޅުގަނޑުމެންނަށް އެކަން ކުރެވޭނެ. އަޅުގަނޑަށް ޙަޔާތުގައި ކުރަން އެނގޭ ކަމަކީ މީހުން ވެރިކަމުން ބޭލުން. ރައީސް މައުމޫން 30 އަހަރު ވެރިކަމުގައި އިންނެވި. އަޅުގަނޑުމެންނަށް އެކަންވެސް ކުރެވިއްޖެ. ރައީސް ޔާމީން ހުރިހާ ބާރުތަކަކާއެކުގައި އިންނެވި. އަޅުގަނޑުމެންނަށް އެކަންވެސް ކުރެވިއްޖެ. ދެން ތިބޭފުޅުން އެބަ އަޅުގަނޑުގެ މައްޗަށް ތުހުމަތުކުރޭ އަޅުގަނޑުމެންގެ އަމިއްލަ ވެރިކަމެއްވެސް ބަދަލުކުރި ކަމަށް. މިހާރު މިއޮތީ ރައީސް މުޢިއްޒުގެ ވެރިކަން. މިވެރިކަން އަޅުގަނޑުމެންނަށް ބަދަލުކުރެވެންޖެހޭނެ. އެ ބަދަލުކުރުމަށް އަޅުގަނޑާ އެއްވަރަށް މަސައްކަތްލުރާ އެކަކުވެސް ނުހުންނަ ވަރަށް އަޅުގަނޑު މަސައްކަތް ކުރާނަން.“

ނަޝީދު މިހެން ވިދާޅުވެފައުވާއިރު، ކުރީގެ ރައީސް މައުމޫން އަބްދުލްޤައްޔޫމްގެ 30އަހަރުގެ ވެރިކަން ނިމި އައީ ނަޝީދުގެ ވެރިކަމެވެ. އެ ވެރިކަމުގެ ދައުރު ހަމަވުމުގެ ކުރިން އެމަނިކުފާނުވަނީ އިސްތިއުފާ ދެއްވާފައެވެ.

އެފަހުން ރައީސް ޔާމީންގެ ވެރިކަމަށްފަހުވެސް އައީ އެމްޑީޕީގެ ރައީސް ޞާލިޙްގެ ވެރިކަމެކެވެ. އެ ވެރިކަން ނިމިގެން ދިޔައިރު އެމްޑީޕީ އޮތީ ބައިބައިވެފައެވެ. އެމްޑީޕީއަށް ދެވަނަ ދައުރެއް ނުލިބި، ރައީސް މުޢިއްޒަށް ވެރިކަން ލިބުނީ، ރައީސް ނަޝީދު އިދިކޮޅުގައި އިސްވެ ހުންނަވައި ކުރެއްވި ކުރެއްވި މަސައްކަތުން ކަމަށް އޭރު އެމްޑީޕީން ތުހުމަތު ކުރިއެވެ.

އެމްޓީސީސީގެ ޑެޕިއުޓީ މެނޭޖިންގ ޑިރެކްޓަރުގެ މަގާމަށް އަހުމަދު މުބީން އައްޔަނުކޮށްފިއެވެ.

މުބީން މި މަގާމަށް އައްޔަނުކޮށްފައިވަނީ މިއަދު އެވެ. އަދި އެމްޓީސީސީން މިކަން އިއުލާންކޮށްފައިވަނީ، އެ ކުންފުނީގެ ރަސްމީ އެކްސް އެކައުންޓްގައި ކުރި ޕޯސްޓަކުންނެވެ.

މުބީން އަކީ ކުރިން ރީޖަނަލް އެއާޕޯޓްސްގެ މެނޭޖިންގ ޑިރެކްޓަރުގެ މަގާމުގައި ހުންނެވި ބޭފުޅެކެވެ. ނަމަވެސް މިދިޔަ އަހަރު އޭނާ ވަނީ އެ މަގާމުން އިސްތިއުފާ ދެއްވާފައެވެ.

On behalf of our Board of Directors and TEAM MTCC we would like to extend a very warm welcome to our new Deputy Managing Director, Mr. Ahmed Mubeen.

We trust that your leadership and strategic vision will drive us to new heights of success. #RayyithungeKunfuni #TeamMTCC pic.twitter.com/DXIA3hHFTM

— MTCC Plc (@MTCCPlc) May 3, 2026

އެމްޓީސީސީގެ ޑީއެމްޑީގެ މަގާމު ކުރިން އަދާކުރައްވަމުން ގެންދިއައީ، އަހުމަދު ޝަރީފް އަބްދުލް ރަހްމާން ޔޫސުފް އެވެ. އޭނާ އެ މަގާމަށް އައްޔަނުކޮށްފައިވަނީ، މިދިޔަ އަހަރުގެ ޖަނަވަރީ މަހުގެ 26 ވަނަ ދުވަހުއެވެ.

އެ މަގާމުން އޭނާ އިސްތިއުފާ ދެއްވީ މިދިޔަ މަހުގެ 28 ވަނަ ދުވަހުއެވެ. އަދި އިސްތިއުފާ ދެއްވި ސަބަބެއް ހާމަކޮށްފައެއް ނުވެއެވެ.

މިދިޔަ މަހު ސަރުކާރުން ހިންގާ ކުންފުނިތަކުގެ ލީޑަރޝިޕަށް ބޮޑެތި ބަދަލުތަކެއް ގެނެސްފާވާއިރު، ވަޒީރުންގެ މަޖިލީހުން 10 ވަޒީރަކު ވެސް އިސްތިއުފާ ދީފާވެއެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު، ސްރީލަންކާއަށް ކުރައްވާ ފުރަމާނަ ދަތުރުފުޅެއްގައި މިއަދު މެންދުރު ފަހު ފުރާވަޑައިގެންފި އެވެ.

ރައީސުލްޖުމްހޫރިއްޔާގެ ދެކަނބަލުން މިހިނގާ މޭ މަހުގެ 3 އިން 6 އަށް ކުރައްވާ މި ދަތުރުފުޅަކީ ސްރީލަންކާގެ ރައީސް އަނޫރާ ކުމާރާ ޑިސަނާޔަކެގެ ދަޢުވަތަކަށް، އެ ޤައުމަށް ކުރައްވާ ފުރަމާނަ ދަތުރުފުޅެކެވެ.

މި ދަތުރުފުޅުގެ ތެރެއިން ރައީސުލްޖުމްހޫރިއްޔާ ސްރީލަންކާގެ އިސްވެރިންނާ ބައްދަލުކުރައްވައި، ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރެއްވުމާ ގުޅޭގޮތުން މަޝްވަރާކުރައްވާނެއެވެ. މީގެ އިތުރުން، ތައުލީމާއި، ފަންނީ ތަމްރީނާއި، އިގްތިސާދީ އެއްބާރުލުމާއި، ހިންގުމުގެ ދާއިރާގެ އިތުރުން ތަރިކަ އަދި ބައިނަލްއަގުވާމީ މައިދާންތަކުގައި އެކުގައި މަސައްކަތްކުރެވޭނެ އައު މަގުތައް ހޯދުމާ ގުޅޭގޮތުން ވެސް ދެ ގައުމުގެ އިސްވެރިންނާއި އެކު މަޝްވަރާކުރެއްވުމަށް ވަނީ ހަމަޖެހިފައެވެ. އަދި ދެ ގައުމުގެ ރައީސުންގެ ހާޒިރުގައި، ތަފާތު އެކި ދާއިރާތަކުން ގުޅުން ބަދަހިކުރުމުގެ ފަހުމުނާމާތަކުގައި ސޮއިކުރެއްވުމަށް ވެސް ވަނީ ހަމަޖެހިފައެވެ.

މިދަތުރުފުޅުގައި ރައީސުލްޖުމްހުރިއްޔާ މޯލްޑިވްސް-ސްރީލަންކާ ބިޒްނަސް ފޯރަމް ގައި ބައިވެރިވެވަޑައިގަތުމަށް ވަނީ ހަމަޖެހިފައެވެ. އަދި ސްރީލަންކާގައި ދިރިއުޅޭ ދިވެހި ރައްޔިތުންނާވެސް އެމަނިކުފާނު ބައްދަލުކުރައްވާނެއެވެ.

މި ދަތުރުފުޅުގެ ސަބަބުން ދެ ގައުމުން އިސްކަންދޭ އެކި ދާއިރާތަކުގެ އިތުރުން ދިވެހިރާއްޖެއާއި ސްރީލަންކާއާ ދެމެދުގައި އޮތް ގާތް ގުޅުން އިތުރަށް ބަދަހިކުރުމާގުޅޭގޮތުން މަޝްވަރާކުރެވޭނެއެވެ. މި ދަތުރުފުޅަކީ 2025 ޖުލައި 28 އިން 30 އަށް ސްރީލަންކާގެ ރައީސް، އަނޫރާ ކުމާރާ ޑިސަނާޔަކެ ރާއްޖެއަށް ކުރެއްވި ފުރަމާނަ ދަތުރުފުޅަށް ފަހު ރައީސުލްޖުމްހޫރިއްޔާ ކުރައްވާ ދަތުރުފުޅެކެވެ. މިދަތުރުފުޅަކީ ދެ ގައުމުގެ ދެމެދުގައި ޚާރިޖީ ގުޅުން ގާއިމުކުރިތާ 60 އަހަރު ފުރުމުގެ މުނާސަބަތާ ގުޅިގެން ކުރެއްވި ދަތުރުފުޅެކެވެ.

ދިވެހިރާއްޖެއާއި ސްރީލަންކާއާ ދެމެދު ޚާރިޖީ ގުޅުން ގާއިމުކުރެވުނީ 1965 ޖުލައި 26 ގައެވެ.