ފަސާދައިގެ ދޮރުތައް ބަންދުކޮށް، ހަރުދަނާ އަޚުލާގީ ޖީލެއް ބިނާކުރުމަށް އެންމެން އަތުގުޅައިލުމަށް މިއަދުގެ ހުކުރު ޚުތުބާގައި ވަސިއްޔަތްކޮށްފިއެވެ.
މިއަދު ރާއްޖޭގެ އެކި ސަރަހައްދުތަކުގައި އިއްވި ޚުތުބާގައި އަލިއަޅުވާލީ، ހެޔޮ ކަންތަކަށް އަމުރުކުރުމާއި މުންކަރާތްތައް ނަހީކުރުމުގެ މައްޗަށެވެ.
ޚުތުބާގައި ބުނީ، މާތްﷲ އަށް އީމާންވުމާއި ހެޔޮ ކަންތަކަށް އަމުރު ކުރުމާއި މުންކަރާތްތައް ނަހީކުރުމަކީ ނުބައި ކަންކަމުން މުޖުތަމައު ސަލާމަތްކުރަން މަސައްކަތް ކުރުމަކީ އިސްލާމްދީނުގެ މައިގަނޑު އަސާސްތަކުގެ ތެރޭގައި ހިމެނޭ ކަންކަން ކަމަށެވެ.
މިގޮތުން، ހެޔޮ ކަންތަކަށް އަމުރުކުރުމާއި މުންކަރާތްތައް ނަހީކުރުމުގެ ޒިންމާއަކީ ﷲވެރިކަން ދެއްވި ބައެއްގެ އެންމެ އިސް ވާޖިބު ކަމަށް ޚުތުބާގައި ބުނެފައިވެއެވެ.
އަހަރެމެންނަކީ ގަރުނުތަކެއް ވަންދެން އިސްލާމްދީނުގެ ހިދާޔަތުގެ މަތީގައި ދެމިތިބި ބައެއް ކަމަށްވާއިރު، އަހަރެމެންގެ ތެރޭގައި އޮންނަ އެއްބައިވަންތަކަމާއި އަމާނަތްތެރިކަމުގެ ރިވެތި ސިފަތައް ދަމަހައްޓަން ޚުތުބާގައި ހަނދާންކޮށްދިނެވެ.
މީގެ އިތުރަށް، މިއަދުގެ ހާލަތަށް ބަލާއިރު ރަނގަޅު ކުރަން ޖެހޭ ކަންކަން އެބަހުރިކަން ޚުތުބާގައި ފާހަގަކުރިއެވެ.
“ޚާއްޞަކޮށް މާތް ﷲ ޙުރުމަތްތެރިކުރައްވައިފައިވާ މީސްތަކުންގެ ލެޔާއި މުދަލާއި އަބުރު ރައްކާތެރިކުރުމަށްޓަކައި މަސައްކަތްތަކެއްކުރާން ވަނީ ޖެހިފައެވެ. މިފަދަ ކަންކަން ރަނގަޅުކުރެވޭނީ ހެޔޮ ކަންތައްތަކަށް އަމުރުކޮށް ނުބައިކަންތައްތައް ނަހީކުރުމުގެ އިޖުތިމާޢީ މަސްއޫލިއްޔަތު ދަމަހައްޓައިގެންނެވެ،” ޚުތުބާގައި ބުނެފައިވެއެވެ.
ޚުތުބާގައި ބުނީ، ހެޔޮ ކަންތަކަށް އަމުރުކޮށް، ނުބައި ކަންކަން މަނާކުރަން މަސައްކަތްކުރާނެ ބަޔަކު އަބަދުވެސް މުޖުތަމައުގައި ތިބެން ޖެހޭނެ ކަމަށެވެ. އެ މީހުންނަކީ، ކާމިޔާބީގެ އަހުލުވެރީން ކަމަށް ﷲ ވަހީކުރެއްވި ބަސްފުޅަކާ ހަވާލާވީ ޚުތުބާގައި ފާހަގަކުރިއެވެ.
މުޖުތަމައު ރަނގަޅު ތަނަކަށް ނުވަތަ ނުބައި ތަނަކަށް ބަދަލުކުރަނީ އަހަރެމެން އަމިއްލައަށްކަން ފާހަގަކޮށް، ޚުތުބާގައި ހަނދާންކޮށްދިނީ މުޖުތަމައު އިސްލާހުކުރުމަށް މަސައްކަތްކުރާހާ ހިނދަކު، މާތް ﷲގެ މަދަދާއި އެހީތެރިކަން އެ ބަޔަކަށް ލިބޭނެ ކަމެވެ.
ރަށެއްގެ އަހުލުވެރީންނަކީ މާތް ﷲއަށް އީމާންވެ، އެކަލާނގެއަށް ކިޔަމަންތެރިވާ ބަޔަކަށްވެއްޖެ ނަމަ، އެކަލާނގެ އެ ބަޔަކަށް ތަނަވަސްކަމާއި ފުދުންތެރިކަން ދެއްވާނެކަން ޚުތުބާގައި ހަނދާންކޮށްދިނެވެ. ޚުތުބާގައި ވަނީ މިއަދުގެ ހާލަތާ ގުޅޭ އެތައް ވަސިއްޔަތެއް ކޮށްފައެވެ. މިގޮތުން، ދުނިޔަވީ އެދުންތަކާއި ފަސާދައިގެ މަގުތައް ބަންދުކޮށް، ފިތުނައިގެ މަގުތަކަށް ތަބާވާ މީހަކަށް ނުވުމަށް ގޮވާލިއެވެ.
މާތްﷲ ގެ ހަޒުރަތުން ވާގި އެދޭ ހަރުދަނާ، އަޚުލާގީ ޖީލެއް ބިނާކުރުމަށް އެންމެން އަތުގުޅާލުމަށް ވެސް މިއަދުގެ ޚުތުބާގައި ވަސިޔަތްކޮށްފައިވެއެވެ.
“މުޖުތަމަޢުގައި ހުރި، ފަސާދައިގެ ދޮރުތައް ބަންދުކޮށް، މި މުޖުތަމަޢަކީ އަމާން މުޖުތަމަޢެއް ކަމުގައި ހެދުމަށް މަސައްކަތްކުރާށެވެ. މި ކަން ކުރެވޭނީ ކޮންމެ މީހަކުވެސް އެ މީހެއްގެ ފަރުދީ ޒިންމާ ފުރިހަމަގޮތުގައި އަދާކޮށްގެންނެވެ” ޚުތުބާގައި ފާހަގަކުރިއެވެ.
ޚުތުބާ ނިންމާލީ މުޖުތަމައުއަކީ ރައްކާތެރި ތަހުޒީބު މުޖުތަމައުއަކަށް ހެދުމަށް މަސައްކަތް ކުރުމުގެ ތައުފީގު ދެއްވުން އެދި ދުއާކުރަމުންނެވެ.
