Author: މަރިޔަމް ނާޖިލާ އިމްރާން

ނިމިދިޔަ ސަރުކާރުން ނަގާފައިވާ ސުކޫކު އަނބުރާ ދެއްކުމުން، ރާއްޖޭގެ ދަރަނީގެ ހާލަތަށް ލިބިފައިވާ ލުޔަށް ބަލައި، ދުނިޔޭގެ އެންމެ ބޮޑު އެއް ކްރެޑިޓް ރޭޓިން އެޖެންސީ ފިޗް ރޭޓިންސް އިން ރާއްޖެ އަށް ދީފައި އޮތް ރޭޓިން އެއް ދަރަޖަ މަތިކޮށްފިއެވެ.

ފިޗުން މިއަދު ނެރުނު ރިޕޯޓުގައި ވަނީ ރާއްޖޭގެ ‘ލޯންގް-ޓާމް ފޮރިން-ކަރަންސީ އިޝުއާ ޑިފޯލްޓް ރޭޓިން’ ‘ސީސީ’ އިން ‘ސީސީސީ-‘ އަށް ބަދަލުކޮށްފައެވެ.

މިދިޔަ އަހަރުގެ ޖޫން މަހުން ފެށިގެން ރާއްޖޭގެ ރޭޓިން ‘ސީސީ’ ގައި ހުރި ނަމަވެސް، މި ބަދަލު ގެނައުމަށް ނިންމީ މިދިޔަ އޭޕްރިލް މަހު ދައްކަންޖެހޭ 500 މިލިއަން ޑޮލަރުގެ ސޮވެރިން ސުކޫކް ރާއްޖޭން ކާމިޔާބުކަމާ އެކު ދެއްކުމާ ގުޅިގެންނެވެ. ފިޗުން ފާހަގަކުރި ގޮތުގައި، މި ދަރަނި ދައްކައި ނިންމުމުން ދަރަނި ނުދެއްކިދާނެ ކަމުގެ ނުރައްކާ މިހާރު ވަނީ ވަރަށް ބޮޑަށް ކުޑަވެފައެވެ.

މިކަމާ ގުޅިގެން ފިނޭންސް މިނިސްޓްރީން ބުނީ، “މި ރޭޓިން އަކީ ދުނިޔޭގެ އިގްތިސާދީ ނުތަނަވަސްކަމުގެ ތެރޭގައިވެސް، ދައުލަތުގެ މާލީ ހާލަތު ހަމަޖެއްސުމަށާއި ދަރަނި އަދާކުރުމަށް ސަރުކާރުން ކުރަމުންދާ މުހިންމު މަސައްކަތްތަކަށް އޮތް އިތުބާރު ބޮޑުވަމުންދާކަމުގެ ހެއްކެއް” ކަމަށެވެ.

ރޭޓިން މަތިކުރި ނަމަވެސް، ރާއްޖެއަށް ކުރިމަތިވެފައިވާ ފިސްކަލް ގޮންޖެހުންތައް އަދިވެސް ބޮޑުކަން ފިޗްގެ ރިޕޯޓުގައި ފާހަގަކޮށްފައިވެއެވެ. އެގޮތުން މެދުއިރުމަތީގެ ހަނގުރާމައާ ގުޅިގެން ޓޫރިޒަމް އާމްދަނީއަށް ހީނަރުކަން އައުމާއި، ރާއްޖޭގެ ގްރޮސް ރިޒާވްގައި އެންމެ މަހެއްގެ އިމްޕޯޓަށް ދައްކަންޖެހޭ ފައިސާވެސް ނެތް ކަމަށް އެ އެޖެންސީން ލަފާކުރެއެވެ.

މީގެ އިތުރުން، ކަރަންޓު އެކައުންޓު ޑެފިސިޓް ޖީޑީޕީގެ ނިސްބަތުން މިދިޔަ އަހަރު ހުރި 8.4 ޕަސެންޓުން މި އަހަރު 17.5 ޕަސެންޓަށް އިތުރުވާނެ ކަމަށް ލަފާކޮށްފައިވެއެވެ. އަދި ބާޒާރުގައި ދިވެހި ރުފިޔާ އިތުރުވުމުގެ ސަބަބުން ޑޮލަރުގެ ތާށިކަން އިތުރަށް ގޯސްވެ، އެކްސްޗޭންޖް ރޭޓް ހިފެހެއްޓުމަށް ސަރުކާރަށް ދަތިތަކެއް ކުރިމަތިވާނެ ކަމަށްވެސް ފިޗުން ބުނެއެވެ.

ފިޗްގެ ރިޕޯޓުގައި އިތުރަށް ބުނެފައިވަނީ، ރާއްޖޭގެ ފިސްކަލް ޑެފިސިޓް މި އަހަރުގެ ތެރޭގައި 14.6 ޕަސެންޓަށް އިތުރުވާނެ ކަމަށެވެ. މިއީ ސަރުކާރުން މި އަހަރަށް ކަނޑައެޅި 7.1 ޕަސެންޓުގެ އަމާޒަށްވުރެ ދެ ގުނަ ބޮޑު އަދަދެކެވެ. އެހެންކަމުން، ދަރަނި ދެއްކުމުގެ ގާބިލުކަން އިތުރުވި ނަމަވެސް، މާލީ އިސްލާހީ ފިޔަވަޅުތައް ވަރުގަދަކުރަން ޖެހޭކަން އެ އެޖެންސީން ވަނީ ހަނދާންކޮށްދީފައެވެ.

މިއަހަރުގެ ފުރަތަމަ ތިން މަސްދުވަހުގެ ތެރޭގައި ރާއްޖެއަށް ތެލުގެ ބާވަތްތައް އިމްޕޯޓު ކުރުމަށް 240 މިލިއަން ޑޮލަރު (3.7 ބިލިއަން ރުފިޔާ) ދަޢުލަތުން ހޭދަކޮށްފި އެވެ.

މިއީ މިދިޔަ އަހަރުގެ މި މުއްދަތާ އަޅާބަލާއިރު 160 އިންސައްތައިގެ ބޮޑު އިތުރުވުމެކެވެ. މިދިޔަ އަހަރުގެ ފުރަތަމަ ތިން މަހު ތެޔޮ އެތެރެކުރުމަށް ހޭދަކޮށްފައިވަނީ 161 މިލިއަން ޑޮލަރު (ދެ ބިލިއަން ރުފިޔާ) އެވެ. ތެލުގެ ބާވަތްތައް އިމްޕޯޓު ކުރުމަށް ކުރި ހޭދަ މިހާ ބޮޑަށް އުފުލިގެންދިޔައީ މެދުއިރުމަތީގައި ހިނގަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެންނެވެ

ތެލުގެ ބާވަތްތަކުގެ ތެރެއިން އެންމެ ބޮޑު ހޭދައެއް ކޮށްފައިވަނީ ޑީސަލް އިމްޕޯޓު ކުރުމަށެވެ. އެގޮތުން ޑީސަލަށް 171 މިލިއަން ޑޮލަރު ހޭދަވެފައިވާއިރު، މިއީ މިދިޔަ އަހަރަށްވުރެ 47 އިންސައްތަ އިތުރު އަދަދެކެވެ. މިދިޔަ އަހަރުގެ މި މުއްދަތުގައި ޑީސަލަށް ހޭދަވީ 116 މިލިއަން ޑޮލަރެވެ.

ޕެޓްރޯލް އިމްޕޯޓަށް 48 މިލިއަން ޑޮލަރު ހޭދަކޮށްފައިވާއިރު، މިއީ މިދިޔަ އަހަރުގެ 22 މިލިއަން ޑޮލަރާ އަޅާބަލާއިރު 118 އިންސައްތައިގެ އިތުރުވުމެކެވެ. ޖެޓް ފިއުލް އެތެރެކުރުމަށް ހޭދަވީ 12 މިލިއަން ޑޮލަރެވެ. މިއީ މިދިޔަ އަހަރާ ގާތްގަނޑަކަށް އެއްވަރުގެ އަދަދެކެވެ.

ރާއްޖެއަށް އެންމެ ގިނައިން ތެޔޮ އެތެރެކުރަނީ ސަރުކާރުގެ ކުންފުނި އެސްޓީއޯ މެދުވެރިކޮށެވެ. މީގެ އިތުރުން ވިލާ އަދި ހޯކްސް ފަދަ އަމިއްލަ ކުންފުނިތަކުންވެސް ރާއްޖެއަށް ތެޔޮ އެތެރެކުރެއެވެ.

މެދުއިރުމަތީގެ ހަނގުރާމައިގެ ސަބަބުން ރާއްޖޭގެ ބާޒާރުގައި ތެލުގެ އަގު ވަނީ 25 ރުފިޔާ އާއި 30 ރުފިޔާއާއި ދެމެދުގެ މިންވަރަކަށް އުފުލިފައެވެ.

ރައްޔިތުންނަށް ފޯރުކޮށްދޭން ޖެހޭ އާސަންދައިގެ ޚިދުމަތް ލަސްވާ މައިގަނޑު ސަބަބަކީ މެނުއަލްކޮށް ކުރަންޖެހޭ މަސައްކަތް ގިނަވުން ކަމަށާއި، ނަމަވެސް އާސަންދައިގެ ޚިދުމަތްތައް ޑިޖިޓަލައިޒްވެގެން ދިޔުމާއެކު މިހާރަށްވުރެ އަވަސް ޚިދުމަތެއް ލިބިގެންދާނެކަމަށް އާސަންދައިގެ މެނޭޖިން ޑިރެކްޓަރު އާމިނަތު ޒީނިޔާ ވިދާޅުވެއްޖެއެވެ.

މޯލްޑިވްސް ކަސްޓަމްސް ސާވިސްގެ އޮފިސަރުންނަށް ދެވޭ ޝަރަފުގެ ނިޝާން (މެޑަލް) އާއި އެ މެޑަލްތައް ލުމަށް ބޭނުންވާ ފޮށި ތައްޔާރުކޮށް ސަޕްލައިކޮށްދޭނެ ފަރާތެއް ހޯދުމަށް އެ އިދާރާއިން އިޢުލާންކޮށްފިއެވެ.

ދިވެހި ފުލުހުންގެ ހިދުމަތް ފޯރުކޮށްދޭ އިމާރާތްތަކަކީ، ފުލުހުންގެ އަމިއްލަ އިމާރާތްތަކަކަށް ހެދުމަށް ސަރުކާރުން ކުރަމުންއަންނަ މަސައްކަތުގެ ދަށުން، ބ. މާޅޮހުގައި އިމާރާތްކުރި ފުލުހުންގެ މަރުކަޒު ހުޅުވައިފިއެވެ.

ފުލުހުންގެ މަރުކަޒު ރަސްމީކޮށް ހުޅުވުމަށް މިއަދު ބޭއްވި ރަސްމިއްޔާތު ޝަރަފުވެރިކޮށްދެއްވައި، ހުޅުވައިދެއްވީ ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިހުސާންއާއި، ކޮމިޝަނަރ އޮފް ޕޮލިސް އަޙުމަދު މުޙައްމަދުއެވެ. މި ރަސްމިއްޔާތުގައި، ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީއާއި، މާޅޮހު ކައުންސިލުގެ ރައީސް މުޙައްމަދު ޠާރިޤް ޢަބްދުއްރައްޒާގުއާއި، ފުލުހުންގެ އެގްޒެކެޓިވް ބައެއް އޮފިސަރުންނާއި މާޅޮހު ކައުންސިލު މެމްބަރުންނާއި ރައްޔިތުން ބައިވެރިވިއެވެ.

މި ރަސްމިއްޔާތުގައި ފުލުހުންގެ މަރުކަޒުގެ ދިދަ ނަންގަވައި ދެއްވީ މިނިސްޓަރ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޮލޮޖީ އަލީ އިޙްސާންއެވެ. އަދި ފުލުހުންގެ ދިދަ ނަންގަވައި ދެއްވީ ކޮމިޝަނަރ އޮފް ޕޮލިސް އަޙުމަދު މުޙައްމަދުއެވެ.

މި ރަސްމިއްޔާތުގައި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީއާއި ބ. މާޅޮހު ކައުންސިލުން ދެއްވާފައިވާ އެހީތެރިކަމާއި އެއްބާރުލުން ފާހަގަކޮށް އަގުވަޒަންކުރުމުގެ ގޮތުން ހަނދާނީ ލިޔުންދީފައިވެއެވެ. މި ލިޔުން ހަވާލުކޮށްދެއްވީ ވަޒީރު އަލީ އިޙްސާންއެވެ.

މާޅޮހު ފުލުހުންގެ މަރުކަޒުގެ ބިންގާއަޅައި މަސައްކަތް ފަށާފައިވަނީ 2025 އޮގަސްޓް 14 ވަނަ ދުވަހުއެވެ. މި އިމާރާތްކުރުމުގެ މަސައްކަތް ހަވާލުކޮށްފައިވަނީ މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީއާއެވެ. މި އިމާރާތުގައި އިދާރީބަޔަކާއި، މުވައްޒަފުންގެ އެކޮމޮޑޭޝަން ބްލޮކެއް ގާއިމުކޮށްފައިވެއެވެ.

މާޅޮހުގައި ފުލުހުންގެ މަރުކަޒެއް ގާއިމްކުރެވިގެން ދިއުމުން، އެ ރަށުގައި ކުށް މަދުކުރެވި، ރަށުގެ އިގުތިމާއީ ތަރައްގީއަށް ރަނގަޅު އަސަރުތަކެއް ކުރާނެއެވެ. މީގެ އިތުރުން އެ ރަށުގައި އަމާން ވެއްޓެއް ކަށަވަރުކުރުމުގެ މަގު ފަހިވެގެންދާނެއެވެ.

ފުލުހުންގެ މަރުކަޒު ހުޅުވުމުގެ ރަސްމިއްޔާތަށް ފަހު، މަރުކަޒުގެ ގޯތިތެރޭގައި ގަސްއިންދުމުގެ ހަރަކާތެއް ކުރިއަށް ގެންގޮސްފައިވެއެވެ.

މާޅޮހުގައި ފުލުހުން ގާއިމުވެ ހިދުމަތް ދޭން ފަށާފައިވަނީ 2024 ޖަނަވަރީ 27 ވަނަ ދުވަހުއެވެ.

ޤައުމީ އެއާލައިން، މޯލްޑިވިއަންގެ ވައިޑް-ބޮޑީ މަތިންދާބޯޓުގެ އޮޕަރޭޝަންތައް ފެށި ފަހުން މިހާތަނަށް 80،000 އަށްވުރެ ގިނަ ފަސެންޖަރުން އުފުލާފައިވާ ކަމަށް އައިލެންޑް އޭވިއޭޝަން ސާވިސަސްގެ މެނޭޖިންގ ޑިރެކްޓަރ އިބްރާހީމް އިޔާސް ވިދާޅުވެއްޖެއެވެ.

“މިހާތަނަށް ކުރި ޖުމުލަ މި ހުރިހާ ދަތުރުތައް އެއްކޮށްލައިގެން ގާތްގަނޑަކަށް 80،000 އަށްވުރެ ގިނަ ފަސެންޖަރުން މި ވަނީ ހަމަ މި ވައިޑް ބޮޑީ އެއަރކްރާފްޓުން ޚިދުމަތް ހޯދާފަ. އަދި އޭގެ އިތުރަށް 1،8،00 އަށްވުރެ ގިނަ ޓަނުގެ މުދާ އަޅުގަނޑުމެން މި ވަނީ މަތިންދާ ބޮޑު އުފުލާފަ.” އިޔާސް

އިޔާސް މިހެން ވިދާޅުވީ، ކުންފުނިތަކުން ކުރަމުންދާ މަސައްކަތްތައް ހިއްސާކުރުމަށް ޕީއެސްއެމް ނިއުސްއިން ގެނެސްދޭ ޚާއްސަ ޕްރޮގްރާމެއްގައި ވާހަކަ ދައްކަވަމުންނެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވަޢުދުފުޅާ އެއްގޮތަށް، މޯލްޑިވިއަންގެ ފްލީޓަށް ވައިޑް-ބޮޑީ މަތިންދާބޯޓެއް ގެނައީ މިދިޔަ އަހަރުގެ ޖަނަވަރީ މަހުގެ 6ވަނަ ދުވަހުއެވެ. އެއީ އެއަރބަސް އޭ330-200 މަރުކާގެ މަތިންދާ ބޯޓެކެވެ. މި ބޯޓުގެ އޮޕަރޭޝަންތަކާ ގުޅޭގޮތުން ވާހަކަ ދައްކަވަމުން އިޔާސް ވިދާޅުވީ، އެންމެ ފުރަތަމަ އަމާޒުކުރި މަންޒިލަކީ ޗައިނާ ކަމަށާއި، އެގޮތުން ޗައިނާގެ ތިން މަންޒިލަކަށް ދަތުރުތައް ފެށި ކަމަށެވެ.

އިޔާސް ފާހަގަކުރެއްވި ގޮތުގައި ޗައިނާއަށް ކުރި ދަތުރުތަކުގައި އެކަނިވެސް 40،000 އަށްވުރެ ގިނަ ފަތުރުވެރިން ވަނީ އުފުލާފައެވެ. މީގެ ތެރެއިން 20،000 އަށްވުރެ ގިނަ ފަތުރުވެރިންނަކީ އަލަށް ރާއްޖެއަށް ޒިޔާރަތްކުރި ޗައިނާ ފަތުރުވެރިންނެވެ. ޗައިނާގެ އިތުރުން، ޑިމާންޑަށް ބަލައި އިންޑިއާ، ބަންގްލަދޭޝް، މެލޭޝިއާ އަދި ސައޫދީ އަރަބިއްޔާއަށްވެސް މި ބޯޓުން ގިނަ ދަތުރުތަކެއް ކޮށްފައިވާ ކަމަށް އިޔާސް ވިދާޅުވިއެވެ.

އިޔާސް ވިދާޅުވީ، އެންމެ މަތިންދާބޯޓަކުން ވޭތިވެދިޔަ އެއް އަހަރު ދުވަހުގެ ތެރޭގައި މިހާ ބޮޑު ކުރިއެރުމެއް ހޯދުމަކީ ރާއްޖޭގެ އިގްތިޞާދަށާއި ވިޔަފާރިއަށް ލިބުނު ވަރަށް ބޮޑު ކުރިއެރުމެއް ކަމަށެވެ. އަދި މިއީ ގައުމީ އެއާލައިންގެ ޚިދުމަތް ފުޅާކުރުމަށް ކުރަމުންދާ މަސައްކަތުގެ ތެރެއިން ލިބުނު މުހިންމު ކާމިޔާބީއެއްގެ ގޮތުގައި އިޔާސް ސިފަކުރެއްވިއެވެ.

މޯލްޑިވިއަންގެ 264 މީހުންގެ ޖާގައިގެ ވައިޑް-ބޮޑީ މަތިންދާ ބޯޓުގައި ޝެޑިއުލްޑް އަދި ޗާޓާރޑް ދަތުރުތައް މިހާރު ގިނަ ގައުމުތަކަށް ދަނީ ކުރަމުންނެވެ. މީގެ ތެރޭގައި ޙައްޖާޖީން އަދި ޢުމްރާވެރިން މައްކާއަށް ގެންދިއުމަށްޓަކައި ކުރާ ދަތުރުތަކާއި، ޗައިނާގެ މަޝްހޫރު ސިޓީތަކަށް ކުރާ ދަތުރުތަކާއި، އިންޑިއާ އަދި ބަންގްލަދޭޝަށް ކުރާ ދަތުރުތަކުގެ އިތުރުން ދާދި ފަހުން އޮސްޓްރޭލިއާއަށް ފެށި ސީދާ ދަތުރުތައްވެސް ހިމެނެއެވެ.

މޯލްޑިވިއަންގެ ޚިދުމަތް ފުޅާކޮށް ބައިނަލްއަޤްވާމީ ގިނަ މަންޒިލްތަކަކަށް ދަތުރުތައް ފެށުމަކީ، ސަރުކާރުގެ އަމާޒެކެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދާއި އެއްގޮތަށް ޤައުމީ އެއަރލައިނަށް އިތުރު ވައިޑް ބޮޑީ އެއަރ ކްރާފްޓެއް ގެނައުމަށް ސަރުކާރުން ދަނީ، މަސައްކަތްތަކެއް ކުރަމުންނެވެ. މި ބޯޓު މިއަހަރުގެ ފަހުކޮޅު ރާއްޖެއަށް ގެނައުމަށް އައިލެންޑް އޭވިއޭޝަނުން މިހާރު އަންނަނީ މަސައްކަތް ކުރަމުންނެވެ.

މިމަހުގެ 11 ގައި ފީފާ ވޯލްޑް ކަޕާ ދިމާކޮށް، ޓީވީތަކާއި ޕްރޮޖެކްޓަރުތަކުން 28 އިންސައްތައާ ހަމައަށް ޑިސްކައުންޓް ލިބޭ “އެސްޓީއޯ ވޯލްޑް ކަޕް ފޯރި” ޕްރޮމޯޝަނެއް އެސްޓީއޯ ޖެނެރަލް ޓްރޭޑިންގް އިން ފަށައިފިއެވެ.

މި ޕްރޮމޯޝަންގައި ފިލިޕްސް ބްރޭންޑުގެ ޓީވީ، އެލްޖީ ބްރޭންޑުގެ ޓީވީ އަދި އިންފޯކަސް ބޮކްސްލައިޓް ޕްރޮޖެކްޓަރު ހިމެނެއެވެ. ރީޓެއިލް ކަސްޓަމަރުންނަށް 500 ރުފިޔާއިން މަތީގެ ވިޔަފާރިކޮށްގެން ބައިވެރިވެވޭ މި ޕްރޮމޯޝަނުގައި ބައިވެރިވާ ފަރާތްތަކުގެ ތެރެއިން ހޮވޭ ނަސީބުވެރި އެއް ފަރާތަކަށް، ދެ މީހަކަށް ފަސް ދުވަހުގެ މެލޭޝިއާ ދަތުރެއް ލިބޭނެއެވެ.

ހޯލްސޭލް ކަސްޓަމަރުންނަށް ވެސް މި ޕްރޮމޯޝަނުން ހާއްސަ އިނާމުތަކެއް ލިބޭނެ ކަމަށް އެސްޓީއޯއިން ބުންޏެވެ. ހޯލްސޭލް ކަސްޓަމަރުންނަށް 3،000 ރުފިޔާއިން މަތީގެ ކޮންމެ އިންވޮއިސްއަކަށް ކޫޕަނެއް ލިބޭނެއެވެ. ހޯލްސޭލް ކަސްޓަމަރުންގެ ތެރެއިން އެއް ވަނައަށް ހޮވޭ ފަރާތަށް 30،000 ރުފިޔާގެ ޕްރޮޑަކްޓް، ދެ ވަނައަށް 20،000 ރުފިޔާގެ ޕްރޮޑަކްޓް، އަދި ތިން ވަނައަށް 10،000 ރުފިޔާގެ ޕްރޮޑަކްޓް ލިބޭނެއެވެ. މީގެ އިތުރުން ކޮންމެ ހަފުތާއަކު ވޯލްޑް ކަޕާ ގުޅޭ ހަރަކާތްތައް މެދުވެރިކޮށް ތަފާތު އިނާމު ހޯދުމުގެ ފުރުސަތު ވެސް ކަސްޓަމަރުންނަށް ލިބޭނެއެވެ.

މި ޕްރޮމޯޝަންގެ މައިގަނޑު މަގުސަދަކީ އާއިލާއާ އެކު ހިތްހަމަޖެހިލައިގެން ވޯލްޑް ކަޕް ބެލުމުގެ ފުރުސަތު ހޯދައިދިނުން ކަމަށް އެސްޓީއޯއިން ބުންޏެވެ. މި ޕްރޮމޯޝަން 12 ޖުލައި 2026 ގެ ނިޔަލަށް ކުރިއަށްގެންދާނެ ކަމަށާއި، އެސްޓީއޯ ޕީޕަލްސް ޗޮއިސް މާލެ، ހުޅުމާލެ އަދި ރީޖަނަލް އައުޓްލެޓްތަކުން ވެސް މި ޕްރޮމޯޝަންގައި ބައިވެރިވެވޭނެ ކަމަށް އެ ކުންފުނިން ބުންޏެވެ.

ށ. މިލަންދޫގެ ފައިބަރު މަސައްކަތްކުރާ ސަރަހައްދުގައި ރޭ ރޯވި އަލިފާންގަނޑު ނިއްވައިލެވުނީ ދެ ގަޑިއިރު ފަހުން ކަމަށާއި، އޭރު އެ ސަރަހައްދުގައި އަޅާފައި އޮތް ތިން ޑިންގީއަކަށް ގެއްލުން ލިބުނު ކަމަށް ފުލުހުން ބުނެފި އެވެ.

ފުލުހުން މީޑިއާތަކާ ހިއްސާ ކުރި މެސެޖެއްގައި ބުނީ މިލަންދޫގައި ފައިބަރު މަސައްކަތް ކުރާ ތަނެއްގައި އަލިފާން ރޯވެފައިވާ މައްސަލަ ރޭ 11:09 ކަން ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ. އަދި އާންމުންނާއި ފުލުހުން ގުޅިގެން ކުރި މަސައްކަތުން އަލިފާން ނިއްވާލެވިފައި ވަނީ ރޭ ދަންވަރު 01:00 ކަން ހާއިރު ކަމަށް ފުލުހުން ބުންޏެވެ.

މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށް ފުލުހުން ބުންޏެވެ. ނަމަވެސް ތިން ޑިންގީ އަކާއި، ޑިންގީ އެޅުމަށް ބޭނުންކުރާ ތައްގަނޑު ތަކެއްގެ އިތުރުން ފައިބަރު މަސައްކަތުގައި ބޭނުންކުރާ ތަކެއްޗަށާއި ތަނަށް ގެއްލުން ވެފައިވާ ކަމަށް ފުލުހުން ބުންޏެވެ.

މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.