Author: އަޙްމަދް އަޙްނަފް

އިސްރާއީލުގެ ބެއިތު ޝެމޭޝް ސަރަހައްދަށް ދިން ވަރުގަދަ ހައިޕާ ސޮނިކް މިސައިލް ހަމަލާއެއްގައި، ބަންކަރެއްގެ ތެރޭގައި ތިބި ގިނަ އަދަދެއްގެ ބަޔަކު މަރުވެއްޖެއެވެ. މި ހަމަލާއަކީ ފަހުގެ ތާރީޚެއްގައި އެ ސަރަހައްދަށް އަމާޒުވި އެންމެ ނުރައްކާތެރި އެއް ހަމަލާގެ ގޮތުގައި ވަނީ ފާހަގަކުރެވިފައެވެ.

މި ހާދިސާއާ ގުޅިގެން އިސްރާއީލުގެ ކަމާބެހޭ އިމަޖެންސީ ރެސްޕޮންސް ޓީމުތަކުން މިހާރު ދަނީ އެ ސަރަހައްދުގައި ހަރަކާތްތެރިވަމުންނެވެ. ރިޕޯޓްތައް ބުނާ ގޮތުގައި، ހަމަލާ އަމާޒުވި ބަންކަރަށް ބޮޑެތި ގެއްލުންތަކެއް ލިބިފައިވާއިރު، މީހުން ސަލާމަތްކުރުމުގެ މަސައްކަތް ދަނީ މެދުކަނޑުމެއް ނެތި ކުރިއަށެވެ.

ހައިޕާ ސޮނިކް މިސައިލަކީ އާދަޔާ ހިލާފަށް ބާރު މިނުގައި ދަތުރުކުރާ އަދި ދިފާއީ ނިޒާމުތަކަށް އަތުލައިގަންނަން އުނދަގޫ ހަތިޔާރަކަށް ވުމުން، މި ހަމަލާގެ ސަބަބުން ލިބުނު ގެއްލުންތައް ވަނީ އިތުރަށް ބޮޑުވެފައެވެ. އިސްރާއީލުގެ ސަލާމަތީ ބާރުތަކުން މިހާރު ދަނީ މި ހަމަލާ ދިން ގޮތާއި އޭގެ ފަހަތުގައިވާ ފަރާތްތައް ދެނެގަތުމަށް ތަހުގީގުތައް ކުރިއަށް ގެންދަމުންނެވެ.

މި ހަމަލާއާ ގުޅިގެން މަރުވި މީހުންގެ ސީދާ އަދަދު އަދި ކަށަވަރުވެފައި ނުވި ނަމަވެސް، މިއީ ވަރަށް ގިނަ ބައެއްގެ ފުރާނަ ގެއްލިގެންދިޔަ ހަމަލާއެއް ކަމަށް މަސްދަރުތަކުން ބުނެއެވެ. ބެއިތު ޝެމޭޝްގެ ހާލަތު މިހާރު އޮތީ ވަރަށް ނުތަނަވަސްކޮށެވެ.

މީސް މީޑިއާގެ އެކި މަންސަތަކުގައި އިސްލާމް ދީނަށް ހަޖޫ ޖަހަމުންދާ އަޙްމަދު ޢާމިރު ހޯދުމަށް ދިވެހި ފުލުހުންގެ ޚިދުމަތުން އިޢުލާނުކޮށްފި އެވެ.

މި މީހާއަކީ މީސް މީޑިއާގައި އިސްލާމް ދީނަށް ތައުހީނުކޮށް، ދިވެހި ރައްޔިތުންގެ ދީނީ އެއްބައިވަންތަކަމަށް ބުރޫއަރާފަދަ ވާހަކަ ދައްކަމުންދާ މީހެކެވެ.

މިކަމާއި ގުޅިގެން ފުލުހުން ވިދާޅުވީ، އިސްލާމް ދީނަށް ހަޖޫޖަހާ، އިސްލާމީ ކަންތައްތަކާ ބެހޭ ވުޒާރާ ނައްތާލުމަށް ގޮވާލައި ވާހަކަ ދައްކާފައިވާ މައްސަލައާ ގުޅިގެން ފުލުހުން ތަޙުޤީގު ކުރަމުންދާ މައްސަލައެއްގެ ތަޙުޤީގަށް މީނާ ހާޒިރުކުރަން ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަޙުޤީގަށް ހާޒިރުވުމަށް ޗިޓު ރައްދުކުރެވިފައި ނުވާތީ، ޖިނާޢީ މައްސަލަތައް ތަޙުޤީގުކުރުމުގައި ފުލުހުން ޢަމަލުކުރާނެ އިޖުރާއަތުގެ ޤަވާއިދުގެ 27 ވަނަ މާއްދާގައިވާ ގޮތުގެމަތިން ތަޙުޤީގަށް ހާޒިރުވުމަށް އަންގައި އިޢުލާނުކުރާ ކަމަށެވެ.

ފުލުހުން އިތުރަށް ވަނީ، އަޙްމަދު ޢާމިރު (51އ)، ހ. ފިލިކުރިގެ / މާލެ، އަންނަ މާރިޗު 10 ވަނަ ދުވަހުގެ 16:00 އަށް ސާޖަންޓް އާދަމް ޙަލީމް ކުރިމިނަލް އިންވެސްޓިގޭޝަން ބިލްޑިންގ އަށް ހާޒިރުވުމަށް އަންގާފައެވެ.

ރަމަޟާން މަހު މޯލްޑިވްސް އިމިގްރޭޝަނުން މާލެއާ ރަށްރަށުގައި ޚިދުމަތްދޭ ގަޑިތައް އެއިދާރާއިން ހާމަކޮށްފިއެވެެ.

މޯލްޑިވްސް އިމިގްރޭޝަނުން ވިދާޅުވީ އާންމު ދުވަސްތަކެކޭ ވެސް އެފަދައިން ރަމަޟާން މަހުގެ ކޮންމެ ވަގުތެއްގައިވެސް އިމުގާ މެދުވެރިކޮށް ޕާސްޕޯޓަށް އެދެވޭނެކަމަށެވެ. މާލެ ސަރަހައްދުގައި ޕާސްޕޯޓާ ހަވާލުވުމަށް އާދީއްތަ ދުވަހުން ފެށިގެން ބުރާސްފަތި ދުވަހާ ހަމައަށް ކިއުބީ މެދުވެރިކޮށް ނަންބަރު ދޫކުރާނީ ކޮންމެ ދުވަހެއްގެ ހެނދުނު 09:15 އިން 13:00 އަށް ކަަމަށާއި، ހުކުރު ދުވަހު ނަންބަރު ދޫކުރާނީ 09:15 އިން 11:00 އާ ހަމައަށްކަމަށް އިމިގްރޭޝަނުން ވިދާޅުވިއެވެ.

ރަށްރަށުގައި ހުންނަ އޮފީސްތަކުން ޕާސްޕޯޓާ ހަވާލުވުމަށް ނަންބަރު ދޫކުރާނީ 09:15 އިން ފެށިގެން 12:00އަށް ކަމަށް އިމިގްރޭޝަނުން ވަނީ ވިދާޅުވެފައެވެ. އަދި މެޑިކަލް އިމަރޖެންސީގައި ޕާސްޕޯޓުގެ ޚިދުމަތް ބޭނުންވާ ފަރާތްތަކުން 9555333 ގުޅުއްވައިގެން ކުރިއަށްގެންދިއުމަށް އެއިދާރާއިން ވަނީ އެދިލައްވާފައެވެ.

އިމިގްރޭޝަނުން ދޭ ވިސާގެ ޚިދުމަތް ރަމަޟާން މަހު ދޭނެ ގަޑިތައްވެސް އިމިގްރޭޝަނުން ވަނީ އާންމުކުރައްވާފައެވެ. އެގޮތުން އީ-ވިސާއަށް އެދި އިމުގާ ޕޯޓަލް މެދުވެރިކޮށް 24 ގައިއިރު ހުށަހެޅޭނެކަމަށާއި، ވިސާގެ ޚިދުމަތް ސްޓަރ ކްލައުޑްސް ބިލްޑިންގުގެ 8 ވަނަ ފަންގިފިލާއިން ހެނދުނު 09:00 އިން 13:00 އަށް ލިބޭނެކަމަށް އެއިދާރާއިން ވިދާޅުވިއެވެ.

އިމިގްރޭޝަންގެ އެންފޯސްމަންޓު އެންޑް ކޮމްޕްލަޔަންސް ޑިވިޜަނުން ފޯރުކޯށްދޭ ރިޕެޓްރިއޭޝަންއާ ގުޅުންހުރި ޚިދުމަތްތައް ހެނދުނު 09:00 އިން މެންދުރު ފަހު 14:00 އަށް ލިބޭނެކަން އެއިދާރާއިން ފާހަގަކުރައްވައެވެ.

ސީޕޯޓުގެ ޚިދުމަތްތަކަށް ބަލާއިރު، ހުކުރު ދުވަސް ނޫން އެހެން ކޮންމެ ދުވަހެއްގެވެސް ފަތިހު 05:20 އިން މެންދުރު 12:00 އަށް އަދި 13:00 އިން 17:30އަށް ޚިދުމަތްދޭއިރު، ރޭނގަނޑު 20:00 އިން ފަތިހު 04:00 އާހަމައަށް ސީޕޯޓުގެ ޚިދުމަތްދިނުމަށް ވަނީ ހަމަޖެހިފައެވެ.

ހުކުރު ދުވަހު ސޫޕޯޓުގެ ޚިދުމަތްދޭނީ މެންދުރު ފަހު 14:30 އިން ހަވީރު 17:30އަށް އަދި ރޭނގަނޑު 20:00 އިން ފަތިހު 04:00 އާހަމައަށެވެ. މީގެ އިތުރުން ފަތިހު 05:30 އިންހެނދުނު 08:00 އަށްވެސް ހުކުރު ދުވަހު ސީޕޯޓުގެ ޚިދުމަތްދިނުމަށް ވަނީ ހަމަޖެހިފައެވެ.

ކުޅުދުއްފުއްޓާއި، އުލިގަން އަަދި ހިތަދޫ ސީޕޯޓުގެ އޮފީސް ހުޅުވިފައި ހުންނާނީ ހެނދުނު 09:00 އިން މެންދުރު 13:00އަށް ކަމަށް އިމްގްރޭޝަނުން ވަނީ ވިދާޅުވެފައެވެ.

ނ. މަނަދޫގައި ހުރި 7 ބޮނޑި ދަގަނޑު ހޮޅިތަކެއއ ވަގަށް ނަގައިގެން އެ ރަށު ތެރޭގައި މައްސަލަ ވަރަށް ބޮޑަށް ހޫނުވެއްޖެއެވެ.

“ހަވާސާ” ނޫހަށް މައުލޫމާތު ދިން މަނަދޫ މީހަކު ބުނި ގޮތުގައި، މި ވައްކަން ކޮށްފައިވަނީ އެ ރަށުގެ އެމްޓީސީސީ (MTCC) ސައިޓުގައި މަސައްކަތް ކުރާ ބަޔަކެވެ. އަދި އެ މީހުން ވަނީ ވަގަށް ނެގި ކޭބަލް ރޯލްތައް އެމްޓީސީސީ ސައިޓް ތެރޭގައި ވަޅުލާފައެވެ. މި ތަކެތި ވަޅުލަން ތިއްބާ އެ ރަށު މީހަކު ވަނީ އެ މީހުންގެ ފޮޓޯވެސް ނަގާފައެވެ. މި ފޮޓޯ ވަނީ ހަވާސާ ނޫހަށް ލިބިފައެވެ.

މައުލޫމާތު ލިބިފައިވާ ގޮތުގައި، ފުލުހުންނަށް މި މައްސަލަ ރިޕޯޓު ކުރުމާ ގުޅިގެން، ފުލުހުން ވަނީ އެ ސަރަހައްދަށް ގޮސް ވަޅުލާފައި ހުރި ތަކެތި ހޯދާފައެވެ.

މި މައްސަލައާ ގުޅިގެން “ހަވާސާ” ނޫހުން މަނަދޫ ފުލުހުންނާ ސުވާލު ކުރުމުން ބުނެފައިވަނީ، މިއީ މިހާރު ތަހުގީގު ކުރަމުންދާ މައްސަލައަކަށް ވާތީ، މައްސަލައާ ގުޅޭ އިތުރު ތަފްސީލެއް މިވަގުތު ދެވެން ނެތް ކަމަށެވެ.

މި ހާދިސާއާ ގުޅިގެން ރަށުގެ ރައްޔިތުންގެ މެދުގައި ބޮޑެތި ކަންބޮޑުވުންތަކެއް އުފެދިފައިވާއިރު، މައްސަލައިގެ ތަހުގީގު ކުރިއަށްދާ ކަމަށް ފުލުހުން މައުލޫމާތު ދެއެވެ.

ދިވެހި ފުލުހުންގެ ޚިދުމަތުގެ ކޮމިޝަނަރު އޮފް ޕޮލިސްގެ މަގާމުގައި ހުންނެވި އިސްމާއީލް ނަވީން ރިޓަޔަކުރެއްވުމާ ގުޅިގެން، އެ މުއައްސަސާ ވަގުތީ ގޮތުން ހިންގުން ޑެޕިއުޓީ ކޮމިޝަނަރު އޮފް ޕޮލިސް ފަރުހާދު ފިކުރީއާ ހަވާލުކޮށްފިއެވެ.

ފުލުހުންގެ ޚިދުމަތުގައި 31 އަހަރުގެ ދިގު މުއްދަތަކަށް ޚިދުމަތް ކުރެއްވުމަށްފަހު ނަވީން ރިޓަޔަކުރެއްވީ އިއްޔެއެވެ. ނަވީން ރިޓަޔަކުރެއްވުމާ ގުޅިގެން، ފުލުހުންގެ އިދާރާ ހިންގުމުގެ ޒިންމާ ފަރުހާދު ފިކުރީއާ ހަވާލުކުރެއްވުމަށް ނިންމަވާފައިވަނީ މިނިސްޓާ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހްސާނެވެ.

އިސްމާއީލް ނަވީން ސީޕީގެ މަގާމަށް އައްޔަންކުރެއްވީ މިދިޔަ އަހަރުގެ ޖޫން މަހުގެ 10 ވަނަ ދުވަހުއެވެ. އޭނާ އެ މަގާމަށް އައްޔަންކުރެވުނީ، އޭގެ ކުރިން އެ މަގާމުގައި ހުންނެވި އަލީ ޝުޖާއު މިދިޔަ އަހަރުގެ އޭޕްރީލް 26 ގައި ކުއްލި ގޮތަކަށް އިސްތިއުފާ ދެއްވައި ރިޓަޔާ ކުރެއްވުމާ ގުޅިގެންނެވެ.

އަލީ ޝުޖާއު މަގާމުން ވަކިވުމާ ގުޅިގެން ސީޕީގެ މަގާމަށް ކުރިމަތިލުމަށް ހުޅުވައިލި ފުރުސަތުގައި، ނަވީންގެ އިތުރުން މިހާރު އިދާރާ ހިންގުމާ ހަވާލުވެވަޑައިގަތް ފަރުހާދު ފިކުރީއާއި ސައުތު ޕޮލިސް ކޮމާންޑަރު އެސިސްޓެންޓް ކޮމިޝަނަރު އަހްމަދު ޝަމީމް ވެސް ކުރިމަތިލެއްވިކަން ފާހަގަކޮށްލެވެއެވެ.

ދިވެހި ފުލުހުންގެ ޚިދުމަތަކީ ގައުމުގެ އަމަންއަމާންކަން ބެލެހެއްޓުމުގެ އެންމެ އިސް ޒިންމާ އުފުލާ މުއައްސަސާ ކަމަށްވާއިރު، މި ބަދަލާއެކު މުއައްސަސާގެ ހިންގުމުގެ ދުވެލި މެދުނުކެނޑި ކުރިއަށްދާނެ ކަމަށް ހޯމް މިނިސްޓްރީން ބުނެއެވެ.

މާލޭ ބާޒާރުމަތީ މަގުހެދުމަށް މިހާރު ކުރިއަށްގެންދާ ފިޔަވަހީގެ ދަށުން މި ފެށޭ ހަފްތާގައި ތާރުއެޅުމުގެ މަސައްކަތް ފަށާނޭކަމަށް އެމްޓީސީސީން ބުނެފިއެވެ.

ބާޒާރުމަތީ ސަރަހައްދުގެ މަސައްކަތް ކުރިއަށްދާގޮތާ ބެހޭގޮތުން އެމްޓިސީސީން މިއަދު ބުނީ، މަޝްރޫޢުގެ ދެވަނަ ފިޔަވަހީގެ ދަށުން މިހާރު ކުރިއަށްދަނީ ސަބްބޭސް އެއްވަރުކޮށް ނިންމުމުގެ މަސައްކަތްކަމަށެވެ. އެމްޓީސީސީން ބުނީ ސަބްބޭސްގެ މަސައްކަތް ނިންމައި މި ފެށޭ ހަފްތާގެ ތެރޭގައި ތާރުއެޅުމުގެ މަސައްކަތް ކުރިއަށްގެންދިއުމަށް ތާވަލް ކޮށްފައިވާކަމަށެވެ.

މި މަސައްކަތްތަކާއެކު ބަނދަރު ސަރަހައްދުގެ ކާނު ހެދުމާއި، މަގުބައްތިތަކާއި މަގުމަތީގެ ނިޝާންތަކާއި އެނޫންވެސް ކަންކަން ކުރުމުގެ މަސައްކަތްތައް ބާރު ސްޕީޑްގައި ކުރިއަށްދާނޭކަމަށް އެމްޓިސީސީން ބުންޏެވެ. ބާޒާރުމަތީ މަގުގެ މަސައްކަތްތައް ނިމުމުން އެ ސަރަހައްދަށް އެކި ބޭނުންތަކުގައި ދާ މީހުންނަށް ބޮޑު ފަސޭހަކަމެއް ލިބިގެންދާނެއެވެ.

ބާޒާރުމަތީ މަގުހެދުމުގެ މަޝްރޫޢުގެ ދަށުން މަގު 4 ލޭނަށް ފުޅާކޮށް ތާރުއެޅުމަށް ވަނީ ހަމަޖެހިފައެވެ. ބޮޑުތަކުރުފާނުމަގު ތަރައްޤީކުރުން ނޯތް ހާބަރު ސަރަހައްދާ ހަމަޔަށް ކުރިއަށް ގެންދިއުމަށް ވަނީ ނިންމާފައެވެ. އެމްޓީސީސީން ވަނީ ނޯތް ހާބަރު ސަރަހއްދުގެ މަސައްކަތްވެސް ފަށާފައެވެ.

މި މަޝްރޫޢުގެ ދަށުން މާލޭގެ ލޯކަލް މާރުކޭޓް ސަރަޙައްދުން ފެށިގެން ނޯތު ހާބަރާ ހަމައަށް 250 މީޓަރުގެ ސަރަޙައްދެއްގައި ތާރު އަޅައިގެން ތަރައްޤީ ކުރުމަށް ހަމަޖެހިފައިވެއެވެ. އަދި އެއްގަމު ތޮށި 6 މީޓަރަށް ބޭރަށް ޖައްސައި، މަގު ފުޅާކުރުމަށް ހަމަޖެހިފައިވެއެވެ. އެގޮތުން އެ މަގުތަކަކީ ދެކޮޅަށް ދުއްވޭ، ހިނގާ މީހުންނަށް އަމާން އަދި ފެންބޮޑުވުމުގެ މައްސަލައަށް ހައްލެއް ލިބިފައިވާ ޒަމާނީ މަގުތަކަކަށް ވެގެންދާނެ ކަމަށް އެމްޓީސީސީން ބުނެއެވެ.

އެމްޓީސީސީގެ އަމާޒަކީ ރޯދަ މަހުގެ ކުރިން މަގު ހެދުމުގެ ދެވަނަ ފިޔަވަހީގެ މަސައްކަތްތައް ނިންމައި އާންމުންނަށް ހުޅުވާލުމެވެ.