Author: އަޙްމަދް އަޙްނަފް

ކީރިތި ޤުރުއާން ކިޔެވުމުގެ 37 ވަނަ ޤައުމީ މުބާރާތުގައި ރަޖިސްޓްރީވުމުގެ ފުރުސަތު ހުޅުވާލައިފިއެވެ.

އިސްލާމިކް މިނިސްޓްރީން ބުނީ މި މުބާރާތުގައި ބައިވެރިން ރަޖިސްޓްރީ ކުރުމުގެ ފުރުސަތު ހުޅުވާލާފައި ވަނީ 13 ޖުލައި 2025 އިން 17 އޮގަސްޓު 2025 ގެ ނިޔަލަށް ކަމަށެވެ.

ބައިވެރިން ރަޖިސްޓްރީ ކުރާ ލިންކު: https://one.gov.mv/entities/CHQ

މި އަހަރުގެ ޤައުމީ ޤުރުއާން މުބާރާތް ފެށުމަށް ހަމަޖެހިފައި ވަނީ ސެޕްޓެމްބަރު މަހުގެ 18 ވަނަ ދުވަހުއެވެ.

މިދިޔަ އަހަރުން ފެށިގެން ކީރިތި ޤުރުއާން ކިޔެވުމުގެ ޤައުމީ މުބާރާތުގެ ފެންވަރު ރަނގަޅުކޮށް ބައިވެރިންނަށް ރަނގަޅު އިނާމުތަކެއް ލިބޭނެ މުބާރާތަކަށް ހެދުމަށް ސަރުކާރުން ވަނީ ނިންމާފައެވެ.

ރޭ ހިނގި ނުރައްކާތެރި އެކްސިޑެންޓްގައި ސައިކަލު ދުއްވީ ނިޔާވި ޔޫސުފް އަލްސަން މުހައްމަދު ކަމަށް ފުލުހުން ބުނެފިއެވެ.

އަލްސަން ދުއްވި ސައިކަލުގެ ފަހަތުގައި ވެސް އިނީ އުމުރުން 18 އަހަރު ނުފުރޭ ކުއްޖެކެވެ.

ފުލުހުން ބުނީ ސައިކަލުގެ ފަހަތުގައި އިނީ 16 އަހަރުގެ ކުއްޖެއް ކަމަށެވެ. އޭނާގެ ހާލު ވެސް ވަރަށް ސީރިއަސް ކަމަށް ފުލުހުން ބުނެ އެވެ.

އަލްސަން އަކީ މަޝްހޫރު ލަވަކިޔުންތެރިން ކަމަށްވާ މުހައްމަދު އަބްދުލްގަނީ އާއި މަރިޔަމް އަޝްފާގެ ދަރިފުޅެވެ. މީ އެ ދެމަފިރިންގެ ހަމައެކަނި ހުރި ދަރިފުޅެވެ.

އަލްސަންގެ ކަށު ނަމާދު އޮންނާނީ މިއަދުގެ އަސުރު ނަމާދަށްފަހު އާސަހަރާ މިސްކިތުގައެވެ.

ވެރިކަން ކުރާ ޕީއެންސީގައި އާންމު މީހަކަށް އިންސާފުވެރި ގޮތެއް ނެތްކަމަށް ބުނެ ޕީއެންސީގެ އިސް ސަފުގައި މަސައްކަތް ކުރި ޝަނީޒް އެ ޕާޓީން ވަކިވެއްޖެއެވެ.

Today, I have decided to step-away from PNC @pnc_secretariat, as I don’t believe this party creates a fair space for a common man. I will not go against my values and what I stand for, to appease people in power.

— Shanyz Hashim (Shanko) (@ShankoHashim) July 13, 2025

ޝަނީޒް ހާޝިމް އަކީ ޕީއެންސީގެ އިސް ސަފުގައި މަސައްކަތް ކުރެއްވި އަދި ޕީއެންސީގެ ޓިކެޓުގައި ހުޅުމާލެ ދެކުނު ދާއިރާއަށް މަޖިލިސް އިންތިހާބުގައި ވާދަކުރެއްވި ކެންޑިޑޭޓެކެވެ.އޭނާގެ އެކްސް އެކައުންޓުގައި މި މަހުގެ 5 ވަނަ ދުވަހުން ފެށިގެން ވަނީ ހިތްހަމަނުޖެހުމުގެ ޕޯސްޓްތަކެއް ޖަހާފައެވެ. އެގޮތުން ކުރިއަށް އޮތް ދުވަސްތަކުގައި އުއްމީދުކުރި ގޮތް އަންނާނެ ކަމަށާއި، އެއާއެކު އެއްވެސް ރިގްރެޓެއް ނެތި ކުރިއަށްދެވޭނެ ކަމަށެވެ. މީގެ އިތުރުން ވެލާނާ އެއަރޕޯޓުގެ އައު ޓާމިނަލްގެ ބަހުސް ކުރެވެމުން ދަނިކޮށް މި މަހުގެ 8 ވަނަ ދުވަހު ކުރި ޕޯސްޓެއްގައި ބުނެފައިވަނި ސަރުކާރަކުން ޕްރޮޖެކްޓެއް ފަށާފާނެ ކަމަށާއި، އެހެހެން ސަރުކާރަކުން އެކަން ނިންމަފާނެ ކަމަށެވެ. އެއީ އާންމުކަމެއް ކަމަށާއި، އެއްވެސް ބަޔަކަށް ކްރެޑިޓެއްދީ އަދި ހޯދަން ނުޖެހޭ ކަމަށެވެ. އަދި ސަރުކާރު އަންނަނީ ރައްޔިތުންނަށް ހިދުމަތް ކުރުމަށް ކަމަށެވެ.

އަދި އެފަހުން އާދީއްތަ ދުވަހުގެރޭ އެކްސްގައި ކުރި ޕޯސްޓެއްގައި ޝަނީޒް ވިދާޅުވީ މިއަދު އޭނާ ޕީއެންސީއާ ދުރަށް ދާން ނިންމީ، އެ ޕާޓީއަކީ އާންމު މީހަކަށް އިންސާފުވެރި ޖާގައެއް އުފައްދާ ޕާޓީއެއް ކަމަށް ގަބޫލު ނުކުރެވޭތީ ކަމަށެެވެ. އަދި އޭނާ ގަބޫލުކުރާ ހަމަތަކާއި އުސޫލުތަކާއި ޚިލާފަށް، ވެރިކަމުގައި ތިބި މީހުން ހިތްހަމަޖައްސައިދޭން ނުދާނެ ކަމަށެވެ.

ޕީއެންސީއިން ވަކިވެވަޑައިގަތީ ސަރުކާރާއި އަދި ސަރުކާރުގެ އިސްވެރިންނާއި މެދު އޮތް ހިތްހަމަނުޖެހުމެއްގެ ތެރެއިން ކަމަށްވިޔަސް ސީދާ ކޮން ސަބަބަކާއި ހުރެކަމެއް އޭނާ ވިދާޅުވެފައި ނުވެއެވެ.

މާލެ ސިޓީ ކައުންސިލްގެ ބެލުމުގެ ދަށުގައިވާ މިސްކިތްތައް ރީތިކުރުމަށް ކުރަމުން އަންނަ މަސައްކަތްތަކުގެ ތެރެއިން، ބަންޑާރަ މިސްކިތުގައި ކުރަން ހުރި މަސައްކަތުގެ 98 އިންސައްތަ މަސައްކަތް ނިމިއްޖެއެވެ.

ބަންޑާރަ މިސްކިތުގައި ކޮށްފައިވާ މަސައްކަތް ތަކުގެ ތެރެއިން މިހާރު އެއްކޮށް ނިންމާލާފައިވާ މަސައްކަތް ތަކުގެ ތެރޭގައި ހިމެނެނީ، ފާޙާނަބަރިއާއި ވުޟޫކުރާތަން ރީތިކުރުމާއި ޚާއްޞައެހީއަށް ބޭނުންވާ ފަރާތްތަކަށް މިސްކިތަށް ފަސޭހައިން ވަދެ ނިކުމެ އުޅެވޭހެން ސްލޯޕެއް ލުމާއި މިސްކިތުގެ ދިޔަ ދޮވި ބަދަލިކޮށް ރީތި ކުރުމެވެ.

މިސްކިތުގެ މަސައްކަތް މާދަމާއަށް އެއްކޮށް ނިންމާލުމަށް ހަމަޖެހިފައިވާއިރު، މިހާރު މިސްކިތުގައި ކުރަމުން އަންނަނީ ފިނިޝިންގެ މަސައްކަތްތަކުގެ ތެރެއިން، މިސްކިތުގެ ބައެއް ހޮޅިތަކުގައި ދަވާދު ލުމާއި ކުލަލުމެވެ.

މޭޔަރ އާދަމް ޢާޒިމް ވިދާޅުވީ، މާލެ ސިޓީގެ މިސްކިތްތައް ބޭނުންކުރާ، ލޮބުވެތި ރައްޔިތުން ހިތްހަމަޖެހޭ ތަންތަނަށް އެ ތަންތަން ހެދުމަކީ ކައުންސިލްގެ އަމާޒެއް ކަމަށެވެ. އަދި މާލެ ސިޓީ ކައުންސިލްގެ ބެލުމުގެ ދަށުގައިވާ މިސްކިތްތައް ރީތިކޮށް ބޭއްވުމަށް، ރައްޔިތުންގެ އެއްބާރުލުން ނުހަނު ބޮޑަށް ބޭނުންވާ ކަމަށާއި، މިހާރު ވެސް މި ފަދަ ކަންކަމުގައި ރައްޔިތުންގެ ފަރާތުން، ކައުންސިލަށް ލިބެމުންއަންނަ ފުރިހަމަ އެއްބާރުލުމަށް، މާލެ ސިޓީގެ ކައުންސިލްގެ ނަމުގައި ޚާއްޞަ ޝުކުރެއް ދަންނަވާކަމަށް ވެސް މޭޔަރ ޢާޒިމް ވިދާޅުވިއެވެ.

ބަންޑާރަ މިސްކިތަކީ، މާލޭގެ އެންމެ ކާރޫބާރު ބޮޑު ސަރަޙައްދުގައި ހުންނަ މިސްކިތެކެވެ. އެހެންވުމުން، ހުރިހައި ނަމާދު ވަގުތަކަށް މި މިސްކިތަށް ވަރަށް ގިނަ ބަޔަކު ނަމާދުކުރަން ދާކަން ފާހަގަ ކުރެވެއެވެ. މިހާރު ފެށިފައިވާ މި މަސައްކަތް ނިމުމުން، މި މިސްކިތަށްދާ ހުރިހައި ފަރާތްތަކަށް ވެސް ހިތްހަމަޖެހުމާއި ފަސޭހަތައް ލިބިގެންދާނެއެވެ.

ފ. މަގޫދޫގައި ހަދަމުން އަންނަ އެއާޕޯޓަށް ބަޔަކު ބޮޑެތި ގެއްލުންތަކެއް ދީފިއެވެ.

މަގޫދޫ ކައުންސިލް ރައީސް އަބްދުﷲ ވަހީދު “ހަވާސާ” އަށް މިއަދު ވިދާޅުވީ، ރޭ ބަޔަކު ގެއްލުން ދީފައި ވަނީ އެ ރަށުގެ އެއާޕޯޓުގެ ފަޔަ ސްޓޭޝަންގެ ގޮތުގައި ބޭނުންކުރަން ހަދާފައި ހުރި އިމާރާތަށް ކަމަށެވެ. އެ އިމާރާތަކީ މިހާރު ނިމެން ކައިރިވެފައި ހުރި އިމާރާތެކެވެ.

ވަހީދު ވިދާޅުވީ، އެ އިމާރާތުގެ ކުޑަދޮރުތަކުގައި ޖަހާފައި ހުރި ބިއްލޫރިތައް ތަޅާލައިފައިވާ ކަމަށާއި ސީލިންގުވެސް ފަޅާލައިފައިވާ ކަމަށެވެ. އަދި އެ ތަނުގައި ހުރި ގޮނޑިތަކެއް ރޯކޮށްލާފައިވާ ކަމަށް ވިދާޅުވިއެވެ.

“އަޅުގަނޑުގެ ހިތެއް ނުބުނޭ މިއީ މި ރަށުގެ މީހަކު ކޮށްގެން އުޅޭ ކަމެކޭ. މި ވަރުގެ ގެއްލުމެއް ދޭން ޖެހޭ ސަބަބެއް ނެތް. ބޮޑަށް ލަފާކުރެވެނީ އެއާޕޯޓުގެ މަސައްކަތަށް ހުރަސް އަޅަން ކުރި ކަމެއް ކަމަށް. އެ ތަނަށް ވަދެފައި އެ ހުރީ ވައްކަމެއް ކުރާކަށްވެސް ނޫން” ވަހީދު ވިދާޅުވިއެވެ.

ވަހީދު ވިދާޅުވީ، އެއާޕޯޓް ސަރަހައްދުގައި އެއްވެސް ސީސީޓީވީ ކެމެރާއެއް ނުހުންނަ ކަމަށާއި ސެކިއުރިޓީވެސް ދަށް ކަމަށެވެ. އަދި އެތަނަކީ އެންމެންނަށްވެސް ވަދެ ނުކުމެ ވެވޭ ގޮތަށް އޮތް ތަނެއްކަމަށް ވިދާޅުވިއެވެ.

މަގޫދޫ އެއާޕޯޓަށް ގެއްލުންދިން މައްސަލަ ފުލުހުންވެސް މިހާރު އަންނަނީ ބަލަމުންނެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި އެމްޓީސީސީއާ ހަވާލުކޮށްގެން ހަދަމުން އަންނަ މަގޫދޫ އެއާޕޯޓުގެ މަސައްކަތް މަޑުޖެހިފައި އޮންނަތާ ދުވަސްތަކެއް ވެއްޖެ އެވެ.

ޖުމުލަ 252 މިލިއަން ރުފިޔާ ހަރަދުކޮށްގެން ހަދާ މަގޫދޫ އެއާޕޯޓަކީ މިހާތަނަށް ހަދާ އެންމެ އަގުބޮޑު އެއް ޑޮމެސްޓިކް އެއާޕޯޓެވެ. އެ އެއާޕޯޓުގެ ބޮޑުބައެއް ނިމިފައިވާއިރު، ރަންވޭގެ މަސައްކަތާއި ޓަވަރާއި ފަޔާ ސްޓޭޝަންގެ މަސައްކަތުން ވެސް ބޮޑު ބައެއް ހުރީ ނިމިފައެވެ.

ޕްރައިވެޓް ޖެޓްތައް ޖެއްސޭގޮތަށް 1،800 މީޓަރުގެ ދިގު ރަންވޭއަކާއެކު ހަދާ އެ އެއާޕޯޓުގައި ޖެޓުތައް ޕާކުކުރެވޭނެ ޕާކިން ސަރަހައްދަކާއި ޖެޓް ފިއުލް ފާމެއްވެސް ހަދައެވެ. އަދި ޖެޓުތަކުގައި އަންނަ ފަޅުވެރީންނަށް މަޑުކުރެވޭނެ ހޮޓަލެއް ހަދަންވެސް ވަނީ ނިންމައިފައެވެ.

ސައްހަ ނޫން ޓްރާންސްފަރ ސްލިޕް ފޮނުވައިގެން އެކި ފިހާރަތަކުން ވިޔަފާރިކުރި މައްސަލަތަކުގައި ގެއްލުންވި 80،000 އަށްވުރެ ގިނަ ރުފިޔާ އަނބުރައި އޭގެ ވެރިފަރާތަށް ހޯދައި ދިނުމަށް ތަހުގީގުގެ ތެރެއިން ކުރި މަސައްކަތުން އެ ފައިސާ އެ ފަރާތްތަކަށް ހޯދައިދީފިއެވެ.

މި ފައިސާއަކީ އެކި ފިހާރަތަކަށް ސައްހަ ނޫން ސްލިޕް ފޮނުވައިގެން އެ ފިހާރަތަކުން ނަގާފައިވާ މުދަލަށްވާ ފައިސާއެވެ.

މައްސަލައަކީ މި އަހަރުގެ މެއި މަހުގެ އެކި ދުވަސް މަތިން، ހުޅުމާލޭގައި ހުންނަ ފިހާރައަކުން ސައްހަ ނޫން ސްލިޕްތަކެއް ފޮނުވައިގެން މުދާ ގަނެފައިވާކަމަށް، މެއި 16 ވަނަ ދުވަހު ފުލުހުންނަށް ހުށަހަޅާފައިވާ މައްސަލައެވެ.

މި މައްސަލައިގެ ތަހުގީގުގައި، އިތުރަށް ބެލިބެލުމުން މާލެއާއި ހުޅުމާލެ ހިމެނޭގޮތަށް އެކި ފިހާރަތަކުށް، ބޭންކު ޓްރާންސްފަރ ސައްހަ ނޫން ސްލިޕް ފޮނުވައިގެން މަކަރާއި ހީލަތުން މުދާ ހޯދާފައިވާކަން ތަހުގީގަށް އެނގިފައިވެއެވެ. އަދި މައްސަލައިގައި ތުހުމަތުކުރެވޭ ޒައިދާން މުޙައްމަދު ހާޝިމް ކުއްޔަށް ހިފާފައިވާ ހިޔާ ފްލެޓްގެ ދެ އެޕާޓްމަންޓަކަށް، ސައްހަ ނޫން ސްލިޕް ފޮނުވައިގެން ގަނެފައިވާކަމަށް ބެލެވޭ މުދާތައް ވައްދާ މަންޒަރު ސީސީޓީވީ ފުޓޭޖުން ފެނިފައިވެއެވެ. އަދި އެ އެޕާޓްމަންޓުތައް ބަލައި ފާސްކުރި އިރު، މައްސަލައިގެ ތަހުގީގާ ގުޅުންހުރި މި ތަކެތި ފެނިފައިވެއެވެ.

މި މައްސަލައާ ގުޅިގެން ހައްޔަރުކޮށްފައި ވަނީ ގ. ސިނަމާލެ 1 05-13، ޒައިދާން މުޙައްމަދު ހާޝިމް (28އ) އާއި އަފްރިން އަކްތަރު، ބަންގްލަދޭޝް (30އ) އެވެ. ކޯޓު އަމުރެއްގެ ދަށުން ޖޫން މަހުގެ 17 ވަނަ ދުވަހު މި ދެ މީހުން ހައްޔަރުކޮށް ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޒައިދާން މުޙައްމަދު ހާޝިމް 15 ދުވަހަށް ބަންދުކުރުމަށް އަދި އަފްރިން އަކްތަރު ފަސް ދުވަހަށް ބަންދުކުރުމަށް އަމުރުކޮށްފައިވެއެވެ. މައްސަލައިގެ ތަހުގީގަށް މި ދެ މީހުން އިތުރަށް ބަންދުގައި ބޭތިއްބުމަށް ނުފެންނާތީ ދެ މީހުން ވެސް ވަނީ ފުލުހުންގެ ބަންދުން ދޫކޮށްލާފައެވެ.

މި މައްސަލަތައް ފުލުހުން ދަނީ ތަހުގީގުކުރަމުންނެވެ.