Author: މަރިޔަމް ނާޖިލާ އިމްރާން

ށ. ފޯކައިދޫގައި ރޭ އެމްޑީޕީން ބޭއްވި ޖަލްސާގައި ވާހަކަދައްކަވަމުން އަޙްމަދު ޒަކީ (އުސްތާޒް ޒަކީ) ވިދާޅުވީ، ފޯކައިދޫގެ ޓީމާ ވާދަކުރެވޭނެ އެހެން ޓީމެއް ނެތް ކަމަށާއި، ކުރިއަށް އޮތް ލޯކަލް ކައުންސިލް އިންތިޚާބުގައި އެ ރަށުން ޕީއެންސީ 10-0 އިން ބަލިކުރާނެ ކަމަށެވެ.

ޒަކީގެ ވާހަކައިގައި، ވޯޓުލުމުގެ ހައްގަކީ ވަރަށް އަމާނާތްތެރިކަމާއެކު އަދާކުރަންޖެހޭ ހައްގެއްކަން ފާހަގަކުރައްވައި، އެ ހައްގު އަދާކުރާ ގޮތާމެދު މަޙްޝަރު ދުވަހުން ސުވާލު ކުރެވޭނެ ކަމަށް ވިދާޅުވިއެވެ. އޭނާ ތުހުމަތު ކުރެއްވި ގޮތުގައި، ވެރިކަން ކުރާ ޕީއެންސީން ގާނޫނުއަސާސީއަށް އިސްލާހެއް ގެންނަން އުޅެނީ ރިޔާސީ އިންތިޚާބުގައި އެންމެ ގިނަ ވޯޓު ލިބޭ މީހަކަށް ރައީސްކަން ލިބޭ ގޮތަށް ހެދުމަށެވެ. ޒަކީ ވިދާޅުވީ އެ ނޫން ގޮތަކަށް ރައީސް ޑރ. މުޙައްމަދު މުއިއްޒަށް ދެން ވެރިކަން ނުލިބޭނެ ކަމަށެވެ.

“ޕީއެންސީން ކުރަން އެ އުޅޭ ކަމަކީ ވަރަށް ބިރުވެރި ކަމެއް. މިއީ ރައްޔިތުން ވަރަށް ބޮޑަށް ހުށިޔާރުވާންޖެހޭ ކަމެއް،” ޒަކީ ވިދާޅުވިއެވެ.

ސަރުކާރުގެ ސިޔާސަތުތަކަށް ފާޑުވިދާޅުވަމުން ޒަކީ ވިދާޅުވީ، މިހާރު ފެންނަމުންދަނީ ބާރުތައް މާލެއަށް ޖަމާކޮށް، ރައްޔިތުންނަށް ލިބިފައިވާ ބާރުތައް ދަމައިގަންނަމުންދާ މަންޒަރު ކަމަށެވެ. އަދި ސަރުކާރުން ކަންކަން ކުރަމުންދާ ގޮތް ސިފަކުރައްވަމުން އޭނާ ވަނީ، “މި މޮޑޭ މަސްހުނިގަނޑު މި މޮޑެނީ ހިތިފަތް ލައިގެން ބާ؟” އޭ ވިދާޅުވެ ސަރުކާރަށް ސުވާލެއް އަމާޒުކުރައްވާފައެވެ.

ޒަކީ ވިދާޅުވީ މި އިންތިޚާބުގައި ޕީއެންސީއަށް ބޮޑުތަނުން “ނޫނެކޭ” ބުނަންޖެހޭ ކަމަށެވެ. އަދި އެމްޑީޕީން މިހާރު ނިކުމެ ތިބީ ކުޅިވަރު ކުޅެން ނުވަތަ ސަމާސާ ކުރަން ނޫން ކަމަށާއި، އަމާޒަކީ ސަރުކާރު ޒިންމާދާރުވުންކަމަށް ވިދާޅުވިއެވެ

އެމްޑީޕީން ރާއްޖޭގެ ރަށްރަށަށް ކުރަމުންދާ ކެމްޕޭން ދަތުރުތަކުގެ ތެރެއިން، އެ ޕާޓީގެ ރައީސް އަބްދުﷲ ޝާހިދު ށ. ފޯކައިދޫއަށް ވަޑައިގެން ރޭ ބޭއްވި ޚާއްސަ ޖަލްސާގައި ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.

ފޯކައިދޫ ރައްޔިތުންގެ ފަރާތުން ލިބުނު ހޫނު މަރުހަބާއަށް ފަށްފަށުން ޝުކުރު އަދާކުރައްވަމުން ޝާހިދު ވިދާޅުވީ، އެ ރަށަށް ދިއުމަކީ އަބަދުވެސް އޭނާއަށް ލިބިވަޑައިގަންނަވާ ވަރަށް ބޮޑު އުފަލެއް ކަމަށެވެ.

ކުރިއަށް އޮތް ލޯކަލް ކައުންސިލް އިންތިހާބާ ގުޅޭގޮތުން ވާހަކަދައްކަވަމުން ޝާހިދު ވިދާޅުވީ، މި އިންތިހާބާ މެދު މިހާ ބޮޑަށް ހުށުޔާރުވާން ޖެހޭ ސަބަބަކީ ގައުމުގެ މިހާރުގެ ހާލަތު ކަމަށެވެ. އޭނާ ސިފަކުރެއްވި ގޮތުގައި މިހާރު ގައުމު މިދަނީ ސުންނާފަތިވެ، ރޫޅި، ހަލާކުވަމުންނެވެ. އަދި މިއީ ސަރުކާރުން ގަސްތުގައި ކުރަމުންދާ ކަމެއްގެ ގޮތުގައި ޝާހިދު ތުހުމަތު ކުރެއްވިއެވެ.

ޝާހިދު އިތުރަށް ވިދާޅުވީ، މިއީ ދޫކޮށްލެވޭނެ ވަރުގެ އިންތިހާބެއް ނޫން ކަމަށާއި، އެންމެން އަތުގުޅާލައިގެން ނިކުމެ ވެރިކަން ކުރާ ޕާޓީ “ބޮޑުތަނުން” ބަލިކުރާނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.

މި ޖަލްސާގައި ވާހަކަދައްކަވަމުން ޝާހިދު ވަނީ ޚިދުމަތްތެރިންގެ އަގު ވަޒަންކުރުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އެގޮތުން ފޯކައިދޫގައި ކޮށްފައިވާ ޚިދުމަތްތަކުގެ ޒިކުރާ އައުކުރެވެމުންދާކަން ފާހަގަކުރެއްވިއެވެ. އަދި އެމްޑީޕީން މި އިންތިހާބަށް ނެރެފައިވާ ކެނޑިޑޭޓުންނަކީ “ފަސްގަނޑު ހާވާލައިގެން” ނެރެފައި ތިބި ބައެއް ނޫން ކަމަށާއި، އެއީ ގާބިލުކަމަށް އިސްކަންދީގެން ނެރެފައިވާ ބައެއް ކަމަށް ވިދާޅުވިއެވެ.

ސަރުކާރުގެ ހިންގުމަށް ފާޑުވިދާޅުވަމުން ޝާހިދު ވިދާޅުވީ، މި ސަރުކާރުގެ “ގޮތެއް ފޮތެއް ނެތް” ކަމަށެވެ. “ހަދާނެ ގޮތް ހުސްވެގެން މިހާރު މަސައްކަތް ކުރަނީ ބިރު ދެއްކުމާއި، އިންޒާރު ދިނުމުގެ އިތުރުން ރިސްވަތުގެ ހުތުރު ފައިސާ މި މުޖުތަމައު ތެރޭ ފެތުރުން،” ޝާހިދު ވިދާޅުވިއެވެ.

ވާހަކަ ނިންމަވާލައްވަމުން ޝާހިދު ވަނީ ސަރުކާރުން ކުރަމުންދާ މިފަދަ އަމަލުތައް މިހާރުން މިހާރަށް ހުއްޓާލުމަށް ގޮވާލައްވާފައެވެ.

އެތައް ބިލިއަން ރުފިޔާއެއްގެ ބަޖެޓު ހުސްވެގެން ދިޔައިރު ރަށްރަށުގައި ތަރައްގީގެ މަޝްރޫއުތައް ކުރިއަށް ނުގެންދެވުމުން ރާއްޖޭގެ ރަށްރަށް ދަނީ ފަޅުވަމުން ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

އެމްޑީޕީން ރާއްޖޭގެ ރަށްރަށަށް ކުރަމުން ގެންދާ ކެމްޕޭން ދަތުރުތަކުގެ ތެރެއިން އެމްޑީޕީގެ ރައީސް އަބްދޫﷲ ޝާހިދު ބޮޑުތިލަދުންމައްޗަށް ކުރައްވަމުންގެންދަވާ ދަތުރުފުޅުގައި ހދ މަކުނުދޫ އަށް ޒިޔާރަތްކުރައްވާ ހަވާސާ އަށް ދެއްވި އިންޓަވިއުއެއެއްގައި ޥާހަކަ ދައްކަވަމުން ޝާހިދު ވިދާޅުވީ، ރަށްރަށުގައި އެމްޑީޕީގެ ސަރުކާރުން ފަށާފައިހުރި މަޝްރޫއުތައް މިސަރުކާރުން އައިސް ހުއްޓާލާފައިވާ ކަމަށާއި، މިދިޔަ ދެ އަހަރު ދުވަހުގެ ތެރޭގައި ރަށްރަށުގައި އެއްވެސް ތަރައްގީގެ މަޝްރޫއުއެއް ހިނގަމުންދާތަން ނުފެންނަ ކަމަށެވެ.

އަދި އެކަމުގެ ސަބަބުން ރަށްރަށުގެ މީހުން މާލެ އަށް ހިޖުރަކޮށް އެރަށްރަށް ފަޅުވަމުންދާކަން ފާހަގަކުރައްވައި ޝާހިދު ވިދާޅުވީ، އެކަންކަން އެގޮތަށް ދިމާވަނީ ރަށްރަށުގައި އެކަށީގެންވާ މަޝްރޫއުތަކެއް ނުހިންގުމުގެ ސަބަބުން ކަމަށެވެ.

މި ބޮޑުތިލަދުންމައްޗަށް އެމްޑީޕީން އޮތް ބޮޑު ތަސައްވަރުގަ އިމާރާތްކުރި ހަނިމާދޫ އިންޓަނޭޝަނަލް އެއަރޕޯޓުގެ އެއްވެސް ހަގީގީ ފައިދާއެއް މިސަރުކާރުން ރައްޔިތުންނާ ހަމައަށް ގެނެސްދީފަ ނުވާތަން. ރައްޔިތުން އަޑު ހަރުކޮށް މިއަދު ބުނަމުން އެގެންދަނީ މިސަރުކާރުން ތިމަންނަމެންނަކަށް އަޅައެއް ނުކައޭ، އަޅުގަނޑު ކައިރީގަ އެތައް އެތައް ރައްޔިތުންނެއް ބުނި، މިދިޔަ އަހަރު ރާއްޖޭގެ ފާސްކޮށް ހަރަދުކުރި 56 ބިލިއަންގެ ބޮޑު ބަޖެޓުން ތިމަންނަމެންގެ ރަށަށް، ނެއްލައިދޫ އަށް ނައިވާދޫ އަށް ވައިކަރަދޫއަށް ކުމުންދޫއަށް ނުވަތަ މަކުނުދޫ އަށް އަދިވެސް އެނޫން ރަށްރަށަށް ލިބުނީ ކޯންޗެއްހޭ.

އަބްދުﷲ ޝާހިދު

މީގެއިތުރުން ޝާހިދު ވިދާޅުވީ، އިންތިހާބުތައް މަދުކުރުމަށް ވެސް ރައްޔިތުން ނޭދޭ ކަމަށާއި ހދ ގެ ރައްޔިތުންވެސް އެ ސުވާލަށް ދޭނެ ޖަވާބަކީ އިންތިހާބުތައް އެއްކޮށްލަން ނޫނެކޭ ބުނުން ކަމަށް ޝާހިދު ވިދާޅުވި އެވެ. އަދި އިންތިހާބުތައް އެކޮށްލުމުގެ ސަބަބުން ރައްޔިތުންގެ އަޑު އަހަން އައުމުގެ ފުރުސަތު ގެއްލޭކަން ފާހަގަކުރައްވައި ޝާހިދު ވިދާޅުވީ، އެރައްޔިތުން ބޭނުންވަނީ ވެރިން ރައްޔިތުންގާތަށް އައިސް ބައްދަލުކޮށް ރައްޔިތުންނަށް ހިދުމަތްކޮށްދިނުމަށް ކަމަށެވެ.

ޝާހިދު ވިދާޅުވީ، ހާއްސަކޮށް ހދ ގެ ރައްޔިތުން ބޭނުންވަނީ ރައްޔިތުންގެ ފުރުސަތު ގެއްލުވާނުލައި އެ އޮތް ގޮތަށް ބާއްވަން ކަމަށާއި މުޅި އަތޮޅުންނާއި މުޅި ރާއްޖެއިން ވެސް ބުނަމުންގެންދަނީ ދެ އިންތިހާބު އެއްކޮށްލަން ނޫނެކޭ ކަމަށެވެ.