Author: މަރިޔަމް ނާޖިލާ އިމްރާން

ސަރުކާރުގެ ޓެކްސީ ލައިންގެ ޚިދުމަތް ފެށޭނެ ކަމަށް ބުނެ މިނިސްޓަރު އަމީން އެންމެ ފުރަތަމަ ދެއްވި ތާރީޚަކީ ނިމިދިޔަ އަހަރުގެ ޖުލައި މަހުގެ ފުރަތަމަ ހަފުތާއެވެ. އެއަށްފަހު މިނިސްޓަރު ވަނީ އެ އަހަރުގެ ޖޫން މަހު، ޓެކްސީ ލައިންގެ ޚިދުމަތް ފެށޭނީ އޮގަސްޓް މަހު ކަމަށް ވިދާޅުވެފައެވެ.

ނަމަވެސް މިނިސްޓަރު ދެއްވި ދެ މުއްދަތުގައި ވެސް ޓެކްސީ ލައިންގެ ޚިދުމަތް ފެށިފައެއް ނުވެއެވެ.

ޓްރާންސްޕޯޓް މިނިސްޓްރީއިން މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަމީން ވިދާޅުވީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން ޓެކްސީ ލައިންގެ ކަންކަން ކުރިއަށް ގެންދިއުމަށް ނިންމާފައި ވަނީ ދެ ބެޗަކަށް ބަހާލައިގެން ކަމަށެވެ.

މިނިސްޓަރު ވަނީ ޓެކްސީ ލައިންގެ ދެ ބެޗުގެ ޓެކްސީތައް ވެސް ނިމި، މިހާރު ރާއްޖެ ގެނައުމުގެ މަސައްކަތް ކުރާކަމަށް ވިދާޅުވެފައެވެ. އޭގެ ތެރެއިން އެއް ބެޗު މިއަދު ސްރީ ލަންކާގެ ޕޯޓަށް ވަންނާނެ ކަމަށާއި މިމަހުގެ 11 ވަނަ ދުވަހު އެއް ބެޗް ރާއްޖެ އަންނާނެ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ޓެކްސީ ލައިންގެ ދެވަނަ ބެޗު ގެންނަނީ ޗައިނާއިން ކަމަށެވެ. އަދި ޓެކްސީތަކުގައި ތިން މޮޑެލްއެއް ހިމެނޭކަން ފާހަގަކުރައްވައި އަމީން ވިދާޅުވީ، އެއް މޮޑެލްއެއް ގެންނަނީ ތައިލެންޑުން ކަމަށާއި އަނެއް ދެ މޮޑެލް ގެންނަނީ ޗައިނާއިން ކަމަށެވެ.

ޗައިނާއިން އަންނަ ދެ މޮޑެލްވެސް މިހާރު އުޅެނީ ރާއްޖެ ގެނައުމުގެ މަގުމަތީގައި ކަމަށާއި އަންނަ ހުކުރު ދުވަހު، ދެވަނަ ބެޗު ރާއްޖެއަށް ލިބޭނެ ތާރީޚު އެނގޭނެ ކަމަށް މިނިސްޓަރު ވަނީ ވިދާޅުވެފައެވެ. އަދި ޕްލޭންކޮށްފައި ވަނީ ފުރަތަމަ ދެ ބެޗުގައި 150 ކާރު ގެނައުމަށް ކަމަށް އަމީން ވަނީ ވިދާޅުވެފައެވެ.

ފުރަތަމަ ބެޗުގެ އެރައިވަލް ޑޭޓަކީ މިމަހުގެ 11. އަޅުގަނޑުމެން މަސައްކަތް ކުރަމުން މި ދަނީ. ޓެކްސީ ލައިން އަކީ “ޑަންލާފައި” އެދުވަހުން އެދުވަހަށް އޮޕަރޭޝަނަކަށް ނެރެވޭނެ ކަންކަމެއް ނޫން،ޓްރާންސްޕޯޓް މިނިސްޓަރު މުޙައްމަދު އަމީން

މިނިސްޓަރު އަމީން ވިދާޅުވީ، އެމްޓީސީސީއިން މަސައްކަތްކުރަނީ މިމަހުގެ 18ގައި ޓެކްސީ ލައިންގެ މަސައްކަތް ނިންމައި އީދަށް، ޓެކްސީ ލައިންގެ ޚިދުމަތް ރައްޔިތުންނަށް ދިނުމަށް ކަމަށެވެ.

ޓެކްސީ ލައިންގެ ޚިދުމަތް ފަށާއިރު އެކި ސައިޒުތަކުގެ ކާރު ހިމެނޭނެ ކަމަށާއި އޭގެ ތެރޭގައި މާލޭގެ ކުދިކުދި މަގުތަކަށް ވަދެވޭ ސައިޒުގެ ކާރުތައް ވެސް ހިމެނޭނެ ކަމަށް ވިދާޅުވެފައެވެ. ޓެކްސީ ޑްރައިވަރުން ބޭނުންވާ ވަގުތުތަކުގެ ބަދަލުގައި އާންމުން އެންމެ ބޭނުންވާ ވަގުތުތަކުގައި އެ ޚިދުމަތް ލިބޭނެ ކަމަށްވެސް ވިދާޅުވިއެވެ.

މާލޭ ސަރަހައްދުގައި ސަރުކާރުން ޓެކްސީ ޚިދުމަތް ފަށަން އެމްޓީސީސީއާއި ޓްރާންސްޕޯޓު މިނިސްޓްރީއާއެކު އެމްޔޫއޯއެއްގައި ސޮއިކުރީ މިދިޔަ ފެބްރުއަރީ މަހުގެ 15ގައެވެ.

ޓެކްސީ ލައިންގެ ޚިދުމަތަށް 407 ޑްރައިވަރުން ހޯދުމަށް ހޯދުމަށް އެމްޓީސީސީއިން ވަނީ ނިމިދިޔަ އަހަރުގެ ނޮވެމްބަރު މަހުގެ 19 ވަނަ ދުވަހުގައެވެ. އޭގެތެރޭގައި ފުލް ޓައިމް ޑްރައިވަރުންގެ ގޮތުގައި 285 މީހުން ހޯދުމަށް އޭރު އެމްޓީސީސީއިން އިއުލާނުކުރިއެވެ. އެއީ، ހަފުތާއަކު ހަ ދުވަހު، ދުވާލަކު އަށް ގަޑިއިރަށް މަސައްކަތް ކުރާ ގޮތަށެވެ.

އޭގެފަހުން އެމްޓީސީސީއިން ވަނީ ނިމިދިޔަ ޖެނުވަރީ މަހުގެ 17 ވަނަ ދުވަހު ޕާޓްޓައިމް ޑްރައިވަރުން ހޯދަން ވޯކްއިން އިންޓަވިއުއެއްވެސް ބާއްވާފައެވެ.

އެމްޓީސީސީއިން ބުނީ ސަރުކާރުން ތައާރަފްކުރާ މި ޚިދުމަތުގައި ބޭނުންކުރާނީ ތިމާވެއްޓާއި ރައްޓެހި، ސައްތައިން ސައްތަ އިލެކްޓްރިކް ވެހިކަލް ހިމެނޭ ޓެކްސީތައް ކަމަށެވެ. އެގޮތުން ސައުވީސްގަޑިއިރު ޚިދުމަތް ދޭ ގޮތަށް ތާރަފްކުރެވޭ މި ޓެކްސީ ޚިދުމަތް ދިނުމަށް އެކަމަށް ޚާއްސަ އެޕްލިކޭޝަނެއް އޮންނާނެ ކަމަށާއި އެ އެޕް މެދުވެރިކޮށް ޓެކްސީގެ ޚިދުމަތް ހޯދާ ފަރާތުގެ ލޮކޭޝަނާއި އެންމެ ގާތުގައިވާ ޓެކްސީ އެނގޭނެ ކަމަށް އެމްޓީސީސީއިން ވަނީ ބުނެފައެވެ.

ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީއަށް މިދިޔަ ޑިސެމްބަރުގައި ވަނީ، ކުޑަކުދިންނަށް ކުރާ އަނިޔާގެ 85 މައްސަލަ ހުށަހަޅާފައެވެ. އެ އަދަދު މިދިޔަ ޖަނަވަރީގައި ހުރީ، 64އަށް ދަށްވެފައެވެ. އެއީ، ޑިސެމްބަރު މަހަށްވުރެ، 21 މައްސަލަ ދަށް އަދަދެކެވެ.

މިނިސްޓްރީން ބުނި ގޮތުގައި، ކުޑަކުދިންގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ އިހުމާލުވުމުގެ މައްސަލަތަކެވެ. މިގޮތުން، އެފަދަ 30 މައްސަލައެއް ހުށަހަޅާފައިވާއިރު، ޖިންސީ ހާނިއްކައިގެ 13 މައްސަލައެއް މިދިޔަ ޖަނަވަރީގައި އެ މިނިސްޓްރީއަށް ހުށަހެޅިއެވެ.

އޭގެއިތުރަށް، ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ އަށް މައްސަލައާއި ނަފްސާނީ ހާނިއްކައިގެ ހަތް މައްސަލައާއި ޖިސްމާނީ ހާނިއްކައިގެ 04 މައްސަލަ މިދިޔަ ޖަނަވަރީގައި ހުށަހަޅާފައިވެއެވެ.

އެ މިނިސްޓްރީން ބުނި ގޮތުގައި، މިދިޔަ ޖަނަވަރީގެ ނިޔަލަށް ދައުލަތުގެ ބެލުމުގެ ދަށުގައި ތިބީ 151 ކުދިންނެވެ. އެއީ، 83 ފިރިހެން ކުދިންނާއި 68 އަންހެން ކުދިންނެވެ.

އެއާއެކު، މިދިޔަ ޖަނަވަރީގައި މިނިސްޓްރީއަށް ވަނީ، 2،200އަށްވުރެ ކޯލުތައް ލިބިފައެވެ. މިގޮތުން، އެ މިނިސްޓްރީގެ ޗައިލް ހެލްޕްލައިން 1412 އަށް ޖުމްލަ 1964 ކޯލު ވަނީ ލިބިފައެވެ. އޭގެ ތެރެއިން، 97 ކޯލަކީ ކުޑަކުދިންގެ ފަރާތުން ލިބިފައިވާ ކޯލުތައް ކަމަށް މިނިސްޓްރީން ވަނީ ބުނެގައެވެ.

އެއްހާސް ހަ ސަތޭކައަށް ވުރެ ގިނަ ކޯލު ބޮޑެތިމީހުންގެ ފަރާތުން ލިބިފައިވާއިރު، ކާކުކަން ނޭނގޭ ގޮތަށް 216 ކޯލު މިދިޔަ ޖަނަވަރީގެ ނިޔަލަށް މިނިސްޓްރީއަށް ލިބުނެވެ.

އާބާދީގެ ގޮތުން އެންމެ ކުޑަ އެއް ރަށް ކަމަށްވާ ރަކީދޫގައި ކައުންސިލުގެ އިދާރީ މުވައްޒަފުންނާއި ދެ ކައުންސިލް މެންބަރަކު އިސްތިއުފާ ދިނުމުން، ރައްޔިތުންނަށް ދޭންޖެހޭ ޚިދުމަތްތައް ނުލިބޭތީ، ރައްޔިތުން ނިކުމެ މިއަދު ވަނީ އެ ރަށުގެ ކައުންސިލް އިދާރާ ބަންދުކޮށްފައެވެ.

އެ މައްސަލައަށް އިޝާރާތް ކުރައްވައި އާދަމް ޝަރީފް އެކްސްގައި ކުރެއްވި ޕޯސްޓެއްގައި ވަނީ، ފަތުރުވެރިކަމާއި އެނޫންވެސް އިގުތިޞާދީ ފުރުޞަތުތައް ފަހިވެފައިވާ ކުދިކުދި އާބާދީތަކުގެ ކައުންސިލް އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ އިތުރުވަމުން އަންނަ ކަމަށެވެ.

އޭނާ ވިދާޅުވީ އެ މައްސަލަ ހައްލު ކުރުމަށް، ގުޅުންހުރި މުއައްސަސާތަކާއެކު މިހާރު މަސައްކަތް ކުރަމުން އަންނަ ކަމަށެވެ.

ހާފިޒުން ދަސްވެނިވުން ފާހަގަކުރުމަށް އިސްލާމީ މަރުކަޒުގައި ބޭއްވި ޖަލްސާގައި އިސްލާމިކް މިނިސްޓްރީން ވަނީ، މިއީ އެއް ފަހަރާ އެހާ ގިނަ ހާފިޒުން ދަސްވެނިވި އަހަރު ކަމަށެވެ.

މި އަހަރު ދަސްވެނިވެފައިވަނީ، އަންހެން 19 ހާފިޒުންނާއި، ފިރިހެން 12 ހާފިޒުންނެވެ. އެއީ 12 އަހަރާއި 21 އަހަރާ ދެމެދުގެ 23 ހާފިޒުންނާއި، 21 އަހަރުން މަތީގެ އަށް ހާފިޒުންނެވެ.

މި ރަސްމިއްޔާތު ޝަރަފުވެރި ކޮށްދެއްވީ ރައީސް ޑރ. މުހައްމަދު މުޢިއްޒެވެ. އެ މަނިކުފާނު ވަނީ ހާފިޒުންނަށް ހާފިޒު ކަމުގެ ސަނަދާއި، ރައީސުލްޖުމްހޫރިއްޔާ ދެއްވާ އިނާމާއި މެޑަލް ހަވާލުކޮށްދެއްވާފައެވެ.

 

މި ރަސްމިއްޔާތުގައި އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު ވިދާޅުވީ، ރާއްޖޭގައި ހާފިޒުންގެ އަދަދު މިހާރު 301އަށް އަރައިފައިވާ ކަމަށެވެ. އެއީ 139 އަންހެން ހާފިޒުންނާއި، 162 ފިރިހެން ހާފިޒުން ކަމަށް އޭނާ ވިދާޅުވިއެވެ.

މިނިސްޓަރު ވިދާޅުވީ އަމާޒަކީ މި ފަސް އަހަރުގެ ތެރޭގައި މި އަދަދު 500އަށް އެރުވުން ކަމަށެވެ. މީގެ އިތުރުން އިސްލާމީ ދުނިޔޭގައި އެ ގައުމެއްގެ ރައްޔިތުންގެ ނިސްބަތުން އެންމެ ގިނަ ހާފިޒުން ތިބި ގައުމަކަށް ރާއްޖެ ހެދުމަކީ އަމާޒެއްކަމަށް ވެސް ޝަހީމް ވިދާޅުވިއެވެ.

އޭނާ ފާހަގަ ކުރެއްވި ގޮތުގައި ސަރުކާރުގެ ސިޔާސަތަކީ ކޮންމެ ރަށެއްގައި ޤުރުއާނާ ބެހޭ ގޮތްޕެއް ގާއިމްކުރުމެވެ. އެގޮތުން ކުރެވޭ މަސައްކަތުގެ ތެރެއިން މި އަހަރު 50 ގޮފި ހަދާނެ ކަމަށާއި މިހާތަނަށް ހަ ގޮފި ރަޖިސްޓަކޮށްފައިވާ ކަމަށް އޭނާ ވިދާޅުވިއެވެ.

މީގެ އިތުރުން ރާއްޖޭގައި މިވަގުތުވެސް ގުރުއާން ހިތުދަސްކުރާ ކުދިންގެ އަދަދު 1800އަށް އަރާފައިވާކަން ޝަހީމް ފާހަގަކުރެއްވިއެވެ.

އެމެރިކާއާއި އިސްރާއީލުން އިއްޔެއިން ފެށިގެން އީރާނަށް ހަމަލާ ދެމުން އަންނައިރު، އީރާނުން ދަނީ މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށް ހަމަލާ ދެމުންނެވެ. އޭގެ ސަބަބުން އެ ސަރަހައްދުގެ ގައުމުތަކުގެ ވައިގެ ސަރަހައްދު ބަންދުކޮށްފައިވާއިރު، ރާއްޖެއަށް އަންނަ އެންމެ ގިނަ ފަތުރުވެރިން ދަތުރުކުރާ އެއާލައިންތައް ވަނީ ހުއްޓުމަކަށް އައިސްފައެވެ.

ވެލާނާ އެއާޕޯޓުގެ ފްލައިޓު ޝެޑިއުލްތަކުން އެނގޭ ގޮތުގައި، މާދަމާއަށް ތާވަލުކޮށްފައިވާ 17 ފްލައިޓެއް މިހާރު ވަނީ ކެންސަލްކޮށްފައެވެ. މިގޮތުން، ކެންސަލްކުރި ފްލައިޓުތައް ނިސްބަތްވާ އެއާލައިންތަކުގެ ތެރޭގައި، ގަލްފް އެއާ، އެއާ އަރަބިއާ، ފްލައިދުބާއީ އެއާވޭސް، ގަތަރު އެއާވޭސް އަދި އެމިރޭޓްސް ހިމެނެއެވެ.

ވީއައިއޭ ހިންގާ މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)އިން ބުނި ގޮތުގައި، މިއަދު ވެސް 19 ފްލައިޓެއް ކެންސަލްވެ، 3،530 ފަސިންޖަރުންނަށް ދަތިތަކާ ކުރިމަތިވިއެވެ.

ފާހަގަކުރެވޭ ގޮތުގައި، ހަނގުރާމައާ ގުޅިގެން އިއްޔެ ފްލައިޓުތައް ކެންސަލްވެ، އެއާޕޯޓު އޮތީ ތޮއްޖެހިފައެވެ. މިގޮތުން، ނުފުރި އެއާޕޯޓުގައި ތާށިވި ފަސިންޖަރުންނަށް އެމްއޭސީއެލްއިން ވަނީ، ކުރީގެ ޑޮމެސްޓިކް ޓާމިނަލުގެ ތެރޭ ތިބެވޭނެ އިންޒިތާމު ހަމަޖައްސަދީފައެވެ.

އެމްއޭސީއެލްއިން ބުނި ގޮތުގައި، ރޭގެ ނިޔަލަށް ނުފުރި ތިބި 130 ފަސިންޖަރުންނަށް ވަނީ ޒަރޫރީ ތަކެތި ފޯރުކޮށްދީފައެވެ.

ޓޫރިޒަމް މިނިސްޓަރު ތޯރިގު އިބްރާހީމް ވަނީ، ރާއްޖެއަށް ދުވާލަކު އަންނަ ފަތުރުވެރިންގެ ތެރެއިން 35 އިންސައްތަ ފަތުރުވެރިންނަކީ މެދުއިރުމަތީގެ ފަތުރުވެރިން ކަމަށް ވާއިރު، ހަނގުރާމައިގެ ސަބަބުން ދެން އެ އަދަދު ވެސް ދަށްވާނެ ކަމަށާއި އޭގެ އަސަރު ވަރަށް ބޮޑަށް އާމްދަނީއަށް ކުރާނެ ކަމަށް ވިދާޅުވެފައެވެ.

ފާހަގަކުރެވޭ ގޮތުގައި، އިސްރާއީލާއި އެމެރިކާއިން އަދިވެސް އީރާނަށް ހަމަލާ ދެމުން އަންނައިރު، އީރާނުން ވެސް އަންނަނީ ރައްދު ހަމަލާތައް ދެމުންނެވެ.

އެމެރިކާއާއި އިސްރާއީލުން އީރާނަށް ދޭ ހަމަލާތަކާ ގުޅިގެން، އީރާނުން އަންނަނީ، މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށް ހަމަލާ ދެމުންނެވެ. އޭގެ ތެރޭގައި ޔޫއޭއީ، ކުވޭތު، ބަހްރެއިން، ސައުދީ އަރަބިއާ އަދި ގަތަރު ހިމެނެއެވެ.

އޭގެ ސަބަބުން އެ ސަރަހައްދުގެ ވައިގެ ސަރަހައްދު ބަންދުކުރުމުން، ރާއްޖެއަށް އެންމެ ގިނަ ފަތުރުވެރިން އަންނަ މަގަށް ވަނީ ހުރަސްއެޅިފައެވެ.

މީގެ އިތުރުން، ދުނިޔޭގެ ހަކަތައިގެ މައި މަގު ކަމުގައިވާ ހޮރްމޫޒް ކަނޑުއޮޅި ހުރަސްކޮށް ކުރާ ދަތުރުތައް ބޮޑެތި ޝިޕިން ކުންފުނިތަކުން ވަނީ މެދުކަނޑާލައިފައެވެ.

ދުނިޔޭގެ ބާޒާރަށް ނެރޭ ތެލުގެ ގާތްގަނޑަކަށް 20 އިންސައްތަ ދަތުރުކުރަނީ، އީރާނާ ކައިރީ އޮންނަ މި ކަނޑުއޮޅި ހުރަސްކޮށެވެ. މި މަގު ބަންދުވެއްޖެނަމަ، ތެލުގެ އަގު އިންތިހާއަށް އުފުލިގެންދާނެއެވެ.

އެ ހަނގުރާމައަށް އިޝާރާތްކުރައްވައި، ތަޖުރިބާކާރެއް އެކްސްގައި ކުރެއްވި ޕޯސްޓެއްގައި ވިދާޅުވީ، ހަނގުރާމަ ދެމިގެންދާނަމަ، ކޮވިޑް-19ގެ ތެރޭގައި ރާއްޖެއަށް އިގުތިސާދީ ގޮތުން ލިބުނު ގެއްލުމަށް ވުރެ ބޮޑު ގެއްލުމެއް ލިބުން އެކަށީގެންވާ ކަމަށެވެ.

ރާއްޖޭގެ ކޮންމެ ސިނާއަތެއް ވެސް، ފަތުރުވެރިކަމާއި އިމްޕޯޓަށް ބަރޯސާވެފައި އޮތްކަން ފާހަގަކުރައްވައި އޭނާ ވިދާޅުވީ، މި ހަނގުރާމައިގެ ސަބަބުން، ސަޕްލައި ޗެއިންނާއި ލޮޖިސްޓިކްސްގެ އިތުރުން، ކަމާ ގުޅުންހުރި މުހިންމު އިންފްރާސްޓްރަކްޗާ ނުވަތަ ބިނާރަށް ގެއްލުންވުމުގެ ނުރައްކާ އޮތް ކަމަށެވެ.

އިތުރު ޕޯސްޓެއްގައި ވަނީ، ދުނިޔޭގެ ބާޒާރުގައި ތެލުގެ އަގަށް އަންނަ ބަދަލު ވަރަށް ގާތުން ބަލަން ޖެހޭކަން ފާހަގަކުރައްވައިފައެވެ.

ކޮވިޑް-19ގެ ބަލިމަޑުކަމުގައި ރާއްޖެ ފުރަބަންދުކުރަން ޖެހި، ފަތުރުވެރިކަން ހުއްޓުމަކަށް އައިސް، ވިޔަފާރިތަކަށް ބޮޑެތި ގެއްލުންތައްވިއެވެ. އެގޮތުން ބަލި ފެތުރުނު ފުރަތަމަ އަހަރު ކަމަށްވާ 2020ގައި ގައުމަށް އާމްދަނީ އާއި ހިލޭ އެހީ ލިބުނު މިންވަރު ގާތްގަނޑަކަށް 50 ޕަސެންޓް ދަށްވިއެވެ.

މުސްލިމުން ރޯދަމަހުގެ ދުވަސްތައް ގުނަމުންދާއިރު، މި ދުވަސްވަރަކީ އާންމުކޮށް ރާއްޖޭގެ ބާޒާރުގައި ކާބޯތަކެތީގެ އަގުތައް އުފުލޭ ދުވަސްވަރެކެވެ.

މީގެ އިތުރުން، މިދިޔަ އަހަރަކީ ރާއްޖޭގައި ފާއިތުވި 13 އަހަރުތެރޭ ތަކެތީގެ އަގު އެންމެ ބޮޑަށް އުފުލުނު އަހަރުކަން ވެސް ފާހަގަކުރެވެއެވެ. އެއީ، ކޮވިޑްގެ އަހަރުތަކުގައި ވެސް ނުއުފުލޭ މިންވަރަކަށެވެ.

ތަކެތީގެ އަގުތައް އުފުލުމަށް މެދުވެރިވި ސަބަބުތަކުގެ ތެރޭގައި ޑޮލަރުގެ އަގު ނުހިފެހެއްޓުން ހިމެނުނުއިރު، މި އަހަރު ވެސް ރާއްޖޭން ބޭރަށް ބޮޑު ދަރަނިތައް ދައްކަން ޖެހުމުން، ޑޮލަރުގެ އަގު އުފުލުގެ ކަންބޮޑުވުން ވަރަށް ބޮޑަށް އެބައޮތެވެ.