Author: މަރިޔަމް ނާޖިލާ އިމްރާން

ފަޅަށް އޮތް ގ. ހިޔާ ރޯދީގައި މިދިޔަ ހަފުތާގައި އަލިފާން ރޯކޮށްލުމުގެ ތުހުމަތު ކުރެވެނީ، ލ. މާބައިދޫ، ސަބުނަމްހައުސް، ހުސައިން ޝަހްބާން، 29އ، އެވެ. އެގޭގައި ރޯވުމުގެ ކުޑައިރުކޮޅެއް ކުރިން, އެ ގެއަށް ވަތް ކަމަށް އޭނާގެ މައްޗަށް ތުހުމަތު ކުރެވެއެވެ.

ހިޔާ ރޯދިގޭގައި އަލިފާން ރޯވުމުގެ ކުޑައިރުކޮޅެއް ކުރިން، އެ ގެއަށް މީހަކު ވަންނަ މަންޒަރު ފެންނަ ސީސީޓީވީ ފުޓޭޖްވަނީ ސޯޝަލް މީޑިއާގައި އާންމުވެފައެވެ. އާންމުވެފައިވާ ވީޑިއޯއިން ފެންނަނީ ސައިކަލެއްގައި އައި މީހަކު ސައިކަލު ޕާކު ކުރުމަށްފަހު އެ ގެއަށް ވަންނަ މަންޒަރެވެ.

އޭނާ ހުރީ ކަޅު އަވި އައިނެއް އަޅައިގެން، ހުދާއި ކަޅު ކުލައިގެ ގަމީހެއް ލައިގެންނެވެ. އެ ވީޑިއޯއިން ފެންނަ ގޮތުގައި އެ ގޭގައި އަލިފާން ރޯވީ އެގެއިން އެ މީހާ ނުކުމެގެންދާތާ ކުޑަ އިރުކޮޅެއްގެ ތެރޭގައެވެ. އެ ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ. އެ މީހަކީ ހުސައިން ޝަހްބާން ކަމަށް ތުހުމަތު އޮތީ ކުރެވިފައެވެ.

އެ މީހާ ހައްޔަރުކޮށް ކޯޓަށް ހާޒިރުކުރުމުން އޭނާގެ ބަންދަށް ފުރަތަމަ ޖެހީ ފަސް ދުވަހެވެ. އެ މުއްދަތު ހަމަ ވެގެން، މިއަދު އަލުން ކޯޓަށް ހާޒިރު ކުރުމުން ބަންދު މުއްދަތު 30 ދުވަހަށްވަނީ އިތުރުކޮށްފައެވެ. އޭނާގެ ބަންދުގެ ރިޕޯޓުގައި ވަނީ، އެ މީހާ އެ ގެއަށް ވަދެ ނުކުމެގެންދާ މަންޒަރު ފެންނަ ސީސީޓީވީ ފުޓޭޖާއި އޭގެ ޓައިމްލައިން ލިބިފައިވާ ކަމަށް ފުލުހުންނާ ހަވާލާދީ ބުނެފައެވެ.

ތަންތަނުގައި ނުވަތަ މުދަލުގައި ގަސްތުގައި އަލިފާން ރޯކުރުމަކީ ދިވެހިރާއްޖޭގެ ގާނޫނުލްއުގޫބާތުގެ ދަށުން ކުށެކެވެ. މިއީ މުދަލަށް ގެއްލުންދިނުމުގެ ސީރިއަސް ކުށެއްގެ ގޮތުގައި ބެލެވޭ ކަމެކެވެ.

ދިވެހިރާއްޖޭގެ ގާނޫނުލްއުގޫބާތުގެ 220 ވަނަ މާއްދާގައި ބަޔާންކުރަނީ މުދަލުގައި އަލިފާން ރޯކުރުމުގެ ކުށެއް ކަމަށެވެ. މީހަކު ގަސްތުގައި އެހެން މީހެއްގެ މުދަލެއްގައި، ނުވަތަ އުޅަނދެއްގައި، ނުވަތަ އިމާރާތެއްގައި އަލިފާން ރޯކޮށްފިނަމަ އެއީ ކުށެކެވެ.

މި ކުށުގެ އަދަބު ކަނޑައެޅޭނީ އެކަމުގެ ސަބަބުން ލިބުނު ގެއްލުމުގެ ކުޑަބޮޑުމިނަށާއި، މީހެއްގެ ފުރާނައަށް ނުރައްކާވި މިންވަރަށް ބަލާފައެވެ.

އަލިފާން ރޯކުރި ތަނަކީ މީހުން ދިރިއުޅޭ ތަނެއް ނަމަ، ނުވަތަ އެކަމުގެ ސަބަބުން މީހެއްގެ ފުރާނައަށް ނުރައްކާވެދާނެ ފަދަ ހާލަތެއް އޮތް ނަމަ، މިއީ ޖިނާޔަތުގެ ދެވަނަ ދަރަޖައިގެ ކުށެކެވެ. އެހެން ހާލަތްތަކުގައި، ލިބޭ ގެއްލުމުގެ ކުޑަބޮޑުމިނަށް ބަލައި ޖިނާޔަތުގެ ތިންވަނަ ދަރަޖަ ނުވަތަ ހަތަރު ވަނަ ދަރަޖައިގެ ކުށެއްގެ ގޮތުގައި ބެލެވިދާނެއެވެ.

އަލިފާން ރޯކުރި ތަނަކީ މީހުން ދިރިއުޅޭ ތަނެއް ނަމަ، ނުވަތަ އެކަމުގެ ސަބަބުން މީހެއްގެ ފުރާނައަށް ނުރައްކާވާ ފަދަ ހާލަތެއް މެދުވެރިވެއްޖެނަމަ، ކުށުގެ ދަރަޖަ މަތިވެ، އަދަބު ވެސް ބޮޑުވެއެވެ. މި ކުށް ސާބިތުވުމަށްޓަކައި، އެ މީހަކު އެކަން ކުރީ ގަސްތުގައިކަން ނުވަތަ އެހެން މީހެއްގެ މުދަލަށް ގެއްލުން ދިނުމުގެ ނިޔަތް އޮތްކަން ސާބިތުވާންޖެހެއެވެ.

ކަސްޓަމްސްއިން ވަޒީފާއަށް ހުޅުވާލައި ކުރި އިއުލާނުގައިވާ ގޮތުން، އެ ޚިދުމަތުން ހުޅުވައިލައިފައިވަނީ އެސިސްޓެންޓް 48 ކަސްޓަމްސް އޮފިސަރު ޓްރެއިނީގެ މަގާމަށެވެ.

އަސާސީ މުސާރައިގެ ގޮތުގައި 5،000 ރުފިޔާދޭއިރު، މަގާމުގެ އިނާޔަތުގެ ގޮތުގައި 4،660 ރުފިޔާ ދެއެވެ. އަދި ހާޒިރުވާ ކޮންމެ ދުވަހަކަށް 75 ރުފިޔާ އިނާޔަތުގެ ގޮތުގައި ދެއެވެ. އޭގެ އިތުރުން ދައުލަތުގެ ޕޭ ފްރޭމްވޯކުގައިވާ ގޮތަށް، ކޮއްތު ފައިސާއާއި އިތުރުގަޑީގެ ފައިސާއާއި އެހެން އިނާޔަތްތައްވެސް ދޭނެއެވެ.

އެއިރަށް 12،000 ރުފިޔާއަށް ވުރެ ގިނައިން ކޮންމެ މުވައްޒަފަކަށް މުސާރައިގެ ގޮތުގައި ލިބޭނެއެވެ.

މި މަގާމުގެ ޝަރުތުތަކުގެ ތެރޭ ހިމެނެނީ އޯލެވެލް ނުވަތަ އެއާ އެއް ފެންވަރުގެ އިމްތިހާނަކުން ދެ މާއްދާއިން ދަށްވެގެން ‘ޑީ’ ފާހެއް ލިބުމާއެކު، ދިވެހިން ‘ސީ’އެއް ލިބިފައިވުން، ނުވަތަ ކަސްޓަމްސްގެ މަަސައްކަތާ ގުޅުންހުރި ދާއިރާއަކުން ސެޓްފިކެޓު ތިނެއް، ނުވަތަ އެއަށްވުރެ މަތިން މަތީ ސަނަދެއް ހާސިލުކޮށް އޯލެވެލް ދިވެހިން ދަށްވެގެން ‘ސީ’ ފާހެއް ލިބިފައިވުން، ނުވަތަ ގައުމީ ޚިދުމަތުގެ ޕްރޮގްރާމް ފުރިހަމަކޮށް ސެޓްފިކެޓެއް ހާސިލްކޮށްފައިވުމެވެ.

ކަސްޓަމްސްއިން ވަނީ، މި މަގާމަށް ކުރިމަތިލާން ޝައުގުވެރިވާ ފަރާތްތަކުން ކަސްޓަމްސްގެ ވަޒީފާގެ ފޯމާއި ވަނަވަރާއި އެކްރެޑިޓްކޮށްފައިވާ ތައުލީމީ ސެޓްފިކެޓުތަކުގެ ކޮޕީ ހިމެނޭހެން މުހިންމު ލިޔެކިއުންތައް، މި ފެށޭ އޭޕްރިލް މަހުގެ ފުރަތަމަ ދުވަހުގެރޭ 11 ޖެހުމުގެ ކުރިން އީމެއިލްކުރުމަށް އެދިފައެވެ.

މި މަގާމަށް ކުރިމަތިލެވޭނީ މީލާދީގޮތުން 18 އަހަރާއި 30 އަހަރާ ދެމެދުގެ މީހުންނަށް ކަމަށް، އިއުލާނުގައިވެއެވެ.

ފާހަގަކުރެވޭ ގޮތުގައި އިންތިޚާބު ގާތްވެފައި އޮއްވައި ސަރުކާރު ހިއްސާވާ ބައެއް ކުންފުނިތަކުން ވަނީ މުވައްޒަފުން ހޯދަން އިއުލާނުކޮށްފައެވެ. އެގޮތުން ގެއްލުމުގައި ހިންގަމުން އަންނަ، މަގުތައް ހަދާ ސަރުކާރު ކުންފުނި އާރުޑީސީން 150 މުވައްޒަފުން ހޯދަން ވަނީ، މީގެ ދެ ހަފުތާ ކުރިން އިއުލާނުކޮށްފައެވެ.

އާރުޑީސީން މުވައްޒަފުން ހޯދަން އިއުލާނުކޮށްފައިވަނިކޮށް، އެ ކުންފުނިން ހަމައެއް ލަމައެއް ނެތި މުވައްޒަފުންނަށް ޕްރޮމޯޝަން ދޭ ކަމަށް ބުނެ، އެކަން ބެލުމަށްވެސް ވަނީ މަޖިލީހަށް ހުށަހަޅައިފައެވެ.

އިންތިޚާބުތަކާ ދިމާކޮށް ސަރުކާރުގެ ހިއްސާ އޮންނަ ބޮޑެތި ކުންފުނިތަކުން ވަޒީފާތައް “ބެހުން” ވެފައިވަނީ ސަރުކާރުތަކުން ވަރަށް އާންމުކޮށް ކުރާ ކަމަކަށެވެ. ކޮރަޕްޝަނަށް މަގުފަހިވާހެން ސަރުކާރުގެ މިފަދަ ވަސީލަތްތައް ބޭނުންކުރާކަމަށް މީގެ ކުރިން އާންމުކޮށްފައިވާ މިނިވަން މުއައްސަސާތަކުގެ ރިޕޯޓުތަކުން ވެސް ހާމަވެއެވެ.

މިގޮތަށް ވަޒީފާ ދިނުން އެންމެ އާންމު ކުންފުނިތަކުގެ ތެރޭ ގެއްލުމުގައި ހިންގާ ފެނަކައާއި، ހިންގުން ދަށްވަމުން އަންނަ އެންމެ ބޮޑު އެއް ކުންފުނި އެމްއޭސީއެލް، ސްޓެލްކޯ، އަދި އާރުޑީސީ ފަދަ ކުދިކުދި ކުންފުނިތައް ވެސް ހިމެނެއެވެ.