ކުރިއަށް އޮތް ކައުންސިލް އިންތިޚާބުގެ ކެމްޕެއިނަށް އެމްޑީޕީގެ ރައީސް ޢަބްދުﷲ ޝާހިދާއި އެ ޕާޓީގެ ލީޑަރޝިޕްގެ އިސް ބޭފުޅުން ރާއްޖޭގެ އެކި ހިސާބުތަކަށް ކުރައްވަމުންދާ ދަތުރުފުޅުގެ ތެރެއިން، ގދ. ތިނަދޫ ސިޓީއަށް ވަޑައިގަތުމުން އެ ރަށުގެ ރައްޔިތުންގެ ފަރާތުން ހޫނު މަރުހަބާއެއް ދަންނަވައިފިއެވެ.
މިއަދު ތިނަދޫ ސިޓީއަށް އެމްޑީޕީގެ ޓީމު ކުރި ޒިޔާރަތުގައި، އެ ސިޓީގެ ބަނދަރު ސަރަހައްދަށް ގިނަ އަދަދެއްގެ ރައްޔިތުން ވަނީ އެ ބޭފުޅުންނަށް މަރުހަބާ ދެންނެވުމަށް އެއްވެފައެވެ. އޭގެ ތެރޭގައި ކައުންސިލް އިންތިޚާބުގައި އެ ސިޓީއަށް ވާދަކުރާ ކެނޑިޑޭޓުންނާއި، ރަށުގެ ކުދިބޮޑު ގިނަ އަދަދެއްގެ ރައްޔިތުން ހިމެނެއެވެ.
މި ދަތުރުފުޅުގެ ތެރެއިން އެމްޑީޕީގެ ރައީސް އަދި ލީޑަރޝިޕްގެ ބޭފުޅުން ވަނީ ކައުންސިލް އިންތިޚާބަށާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ކުރިމަތިލާފައިވާ ކެނޑިޑޭޓުންނާ ބައްދަލުކުރައްވައި، އިންތިޚާބުގެ ކަންކަމާ ގުޅޭގޮތުން މަޝްވަރާކުރައްވާފައެވެ.
މީގެ އިތުރުން، މި ކެމްޕެއިން ދަތުރުގެ ތެރެއިން މިރޭ ތިނަދޫ ސިޓީގައި ޚާއްޞަ ޖަލްސާއެއް ބޭއްވުމަށް ވަނީ ހަމަޖެހިފައެވެ. މި ޖަލްސާގައި އެމްޑީޕީގެ އިސް ބޭފުޅުން ބައިވެރިވެވަޑައިގެން، ޕާޓީގެ ސިޔާސަތުތަކާއި އިންތިޚާބާ ގުޅޭ މުހިންމު މަޢުލޫމާތުތައް ރައްޔިތުންނާ ހިއްސާކުރައްވާނެއެވެ.
މި ދަތުރުފުޅަކީ ކުރިއަށް އޮތް އިންތިޚާބުތަކަށް ޕާޓީގެ ސަޕޯޓަރުން ހޭލުންތެރިކުރުވައި، ކެމްޕެއިން ވަރުގަދަކުރުމުގެ މަޤްޞަދުގައި ކުރިއަށްގެންދާ ސިލްސިލާ ދަތުރުތަކުގެ ތެރެއިން ދަތުރެކެވެ.
ކިޔުންތެރިންގެ ހިޔާލު