Author: މަރިޔަމް ނާޖިލާ އިމްރާން

ފުވައްމުލައް ސިޓީގެ މޭޔަރު ކަމުގެ މަގާމަށް މިހާރުގެ މޭޔަރު، އިސްމާއީލް ރަފީގު ކާމިޔާބު ކުރައްވައިފިއެވެ.

އިތުރު ތަފްސީލް އަންނަނީ….

މިއަދު ކުރިއަށްދިޔަ ލޯކަލް ކައުންސިލް އިންތިޚާބުގައި މާލޭ ސިޓީގެ މޭޔަރުކަމަށް ވާދަކުރެއްވި އެމްޑީޕީގެ ކެނޑިޑޭޓް އާދަމް އާޒިމް ބޮޑު ތަފާތަކުން ކުރިހޯއްދަވައި، ގޮނޑި ދިފާއުކުރައްވައިފިއެވެ.

މިހާތަނަށް ގުނާ ނިމިފައިވާ ވޯޓު ފޮށިތަކުގެ ވަގުތީ ނަތީޖާ ދައްކާގޮތުން، ވޯޓުލީ މީހުންގެ 43 އިންސައްތައަށްވުރެ ގިނަ ވޯޓު އާޒިމް ވަނީ ކާމިޔާބުކުރައްވާފައެވެ.

މި އިންތިޚާބުގައި އާޒިމާ އެންމެ ގާތުން ވާދަކުރެއްވީ ވެރިކަންކުރާ ޕީއެންސީގެ ކެންޑިޑޭޓް މޫސާ އަލީ ޖަލީލެވެ. ވަގުތީ ނަތީޖާއިން ދައްކާގޮތުގައި މޫސާ އަލީ ޖަލީލަށް ލިބިވަޑައިގެންފައިވަނީ ވޯޓުގެ 28 އިންސައްތައެވެ.

މީގެ އިތުރުން، އަމިއްލަ ގޮތުން މި އިންތިޚާބުގައި ވާދަކުރެއްވި ކެންޑިޑޭޓް އިސްމާއިލް ޒަރިޔަންދު ވަނީ ތިންވަނައަށް އެންމެ ގިނަ ވޯޓު ހޯއްދަވާފައެވެ. ނަތީޖާތަކުން ދައްކާގޮތުގައި ޒަރިޔަންދަށް ލިބިވަޑައިގަތީ ވޯޓުގެ 23 އިންސައްތައެވެ.

މިއަދު ބޭއްވުނު މި އިންތިޚާބުގެ ވަގުތީ ނަތީޖާތައް އަދިވެސް އަންނަނީ ލިބެމުންނެވެ. ނަމަވެސް މިހާތަނަށް ލިބިފައިވާ ނަތީޖާތަކަށް ބަލާއިރު، އާޒިމް ވަނީ އިންތިޚާބު ކާމިޔާބު ކުރައްވާނެކަން ކަށަވަރު ކުރައްވާފައެވެ.

ހދ. ކުޅުދުއްފުށި ސިޓީގެ މޭޔަރުކަމުގެ މަގާމު، މިހާރުވެސް އެ މަގާމުގައި ހުންނެވި މުހައްމަދު އާތިފް ދިފާއުކުރައްވައިފިކަމަށް މިހާތަނަށް ގުނުނު ވޯޓުގެ ނަތީޖާއިން ދައްކައިފިއެވެ.

މިއަދު ކުރިއަށްދިޔަ ލޯކަލް ކައުންސިލް އިންތިޚާބުގެ ވޯޓު ގުނައި ނަތީޖާ އެއްކޮށް އަދި ސާފުވެފައި ނުވި ނަމަވެސް، މިހާތަނަށް ލިބިފައިވާ ވަގުތީ ނަތީޖާތަކަށް ބަލާއިރު އާތިފް ވަނީ ބޮޑު ތަފާތަކުން ކުރި ހޯއްދަވާފައެވެ.

އާތިފް މި މަގާމުގެ ދެވަނަ ދައުރެއް ކާމިޔާބުކުރެއްވީ އެމްޑީޕީގެ ޓިކެޓުގައެވެ.

އައްޑޫ ސިޓީގެ މޭޔަރުކަމުގެ ދެވަނަ ދައުރަކަށް އަލީ ނިޒާރު އިންތިޚާބުވެވަޑައިގެންފިކަމަށް މިހާތަނަށް ގުނުނު ވޯޓުގެ ނަތީޖާއިން ދައްކައިފިއެވެ.

މިއަދު ބޭއްވި ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ ނަތީޖާ ދައްކާގޮތުން، ނިޒާރު ވަނީ އައްޑޫ ސިޓީގެ މޭޔަރުކަން އަނެއްކާވެސް ކާމިޔާބު ކުރައްވާފައެވެ.

މޭޔަރުކަމުގެ އިތުރުން، އައްޑޫ ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސާގެ މަގާމަށް އިންތިޚާބުވެވަޑައިގަތީ ފާތިމަތު ހިޖްރާ (ހިޖޫ) އެވެ.

ތަފްސީލު އަންނަނީ..

މިއަދު ބޭއްވުނު ލޯކަލް ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު، އަދި ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާ މެދު ރައްޔިތުންގެ ޚިޔާލު ހޯދުމަށް ނެގި ފެންނަ ނުފެންނަ ވޯޓުގެ ވަގުތީ ނަތީޖާ ދައްކާގޮތުން ރާއްޖޭގެ ބޮޑެތި ސިޓީތަކުގެ މޭޔަރުކަން އިދިކޮޅު އެމްޑީޕީން ކާމިޔާބުކޮށްފިއެވެ.އަދި ފެންނަ ނުފެންނަ ވޯޓުން ނުފެންނަ ކަމައް ވަގުތީ ނަތީޖާ އިން ދައްކައެވެ.

މި އިންތިޚާބުތަކުގައި ވޯޓުލުމުގެ ޙައްޤު ޖުމްލަ 294,937 މީހުންނަށް ލިބިފައިވާއިރު، މިއަދު ހަވީރު 5:00 ޖެހުމާ ހަމައަށް ވޯޓުލުން ވަނީ ކުރިއަށް ގޮސްފައެވެ. އިލެކްޝަންސް ކޮމިޝަނުން ހާމަކޮށްފައިވާ ގޮތުގައި ޖުމްލަ 588 ވޯޓު ފޮށި ބެހެއްޓުނު އިރު، ބައެއް ސަރަޙައްދުތަކުގައި ކިއޫ ބޮޑުވުމުގެ ސަބަބުން ފޮށިތައް ބަންދުކުރުން ލަސްވެފައިވެއެވެ. ނަމަވެސް، މިހާރު ގިނަ ފޮށިތަކުގެ ނަތީޖާ ވަނީ ލިބެން ފަށާފައެވެ.

ސިޓީތަކުގެ މޭޔަރުންގެ ނަތީޖާ:މިހާތަނަށް ލިބިފައިވާ ވަގުތީ ނަތީޖާތަކަށް ބަލާއިރު، މާލެ ސިޓީގެ މޭޔަރުކަން ކާމިޔާބު ކުރައްވާފައިވަނީ އެމްޑީޕީގެ ކެންޑިޑޭޓް އާދަމް އާޒިމްއެވެ. އޭނާ ވަނީ ގުނި ގިނަ ފޮށިތަކުން ބޮޑު ތަފާތަކުން ކުރި ހޯއްދަވާފައެވެ. އައްޑޫ ސިޓީގެ މޭޔަރުކަމުގެ ރޭހުގައި ކުރީގައި އުޅުއްވަނީ މިހާރުވެސް އެ މަޤާމުގައި ހުންނެވި އެމްޑީޕީގެ އަލީ ނިޒާރުއެވެ. އަދި ފުވައްމުލަކު ސިޓީގެ މޭޔަރުކަމުގެ ގޮނޑިވެސް މިހާރުގެ މޭޔަރު އިސްމާއިލް ރަފީގު ވަނީ ދިފާޢުކުރައްވާފައެވެ.

ފެންނަ ނުފެންނަ ވޯޓު:ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމާ މެދު ރައްޔިތުންގެ ޚިޔާލު ހޯދުމަށް ނެގި ވޯޓުގެ ނަތީޖާ ދައްކާގޮތުން، ގިނަ ރައްޔިތުން ވަނީ އެ ދެ އިންތިޚާބު އެއްކޮށްލަން ނުފެންނަކަމަށް ނިންމާފައެވެ. ވަގުތީ ނަތީޖާ ދައްކާގޮތުން 67 އިންސައްތަ މީހުން ވޯޓު ދީފައިވަނީ ދެ އިންތިޚާބު އެއްކޮށްލަން ނުފެންނަ ކަމަށެވެ. މާލޭގެ އެކި ދާއިރާތަކުން ލިބުނު ނަތީޖާތަކުންވެސް މިކަން ވަނީ ސާފުވެފައެވެ.

މިއަދު ކުރިއަށްދާ ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބާއި، ރައްޔިތުންގެ ޚިޔާލު ހޯދުމުގެ ޢާންމު ވޯޓުލުމަށް ކަނޑައެޅި ވަގުތު ހަމަވެ، ގިނަ މަރުކަޒުތަކެއްގައި ވޯޓުލުން ބަންދުކޮށްފިއެވެ.

އިލެކްޝަންސް ކޮމިޝަނުން ކުރިން ނިންމާފައި އޮތީ މިއަދު ހަވީރު 4:00 އަށް ވޯޓުލުން ނިންމާލުމަށެވެ.އެހެން ނަމަވެސް، މިއަދު ހެނދުނުން ފެށިގެން ވޯޓުލާ މަރުކަޒުތަކުގައި ކިއުތައް ވަރަށް ބޮޑަށް ދިގުވެ، ގިނަ ބަޔަކަށް ވޯޓުލުމުގައި ދަތިތަކަކާ ކުރިމަތިލާން ޖެހުމާ ގުޅިގެން، ވޯޓުލުމުގެ ވަގުތު މިއަދު ހަވީރު 5:00 އާ ހަމައަށް އިލެކްޝަންސް ކޮމިޝަނުން އިތުރުކުރިއެވެ.

މިގޮތަށް ވަގުތު އިތުރުކުރަން ނިންމީ ކިއޫތައް ދިގުވުމުގެ އިތުރުން، ހޫނުގަދަވުމުގެ ސަބަބުން ބައެއް މީހުން ހޭނެތިގެން ވެއްޓުމުގެ ހާދިސާތަކެއް ވެސް ހިނގާފައިވާތީ ކަމަށް އިލެކްޝަނުން މައުލޫމާތުދެއެވެ.

މި އިންތިޚާބުގައި ޖުމްލަ 294,876 މީހުންނަށް ވޯޓުލުމުގެ ހައްގު ލިބިގެންވެއެވެ. އިލެކްޝަންސް ކޮމިޝަނުން މައުލޫމާތު ދޭ ގޮތުގައި، މިހާރު ގިނަ މަރުކަޒުތަކެއްގައި ވޯޓުލުން ވަނީ ބަންދުކުރެވިފައެވެ. ވޯޓުލުން ބަންދުކުރި ނަމަވެސް، ވަގުތު ހަމަވިއިރު ކިއޫގައި ތިބި މީހުންނަށް ވޯޓުލުމުގެ ފުރުސަތު ދޭނެއެވެ.

ވޯޓު ގުނުމުގެ މަސައްކަތާ ގުޅޭގޮތުން އިލެކްޝަންސް ކޮމިޝަނުން ބުނީ، ހަވީރު 5:00 ޖެހިއިރު ކިއޫގައި މީހުން ނެތް މަރުކަޒުތަކުގައި 30 މިނެޓުގެ ހުސް ވަގުތެއް ދިނުމަށްފަހު ވޯޓު ގުނަން ފަށާނެ ކަމަށެވެ. އަދި ކިއޫގައި މީހުން ތިބި ނަމަ، ވޯޓު ގުނަން ފަށާނީ ކިއޫގައި ތިބި އެންމެން ވޯޓުލައި ނިމުމުން ކަމަށްވެސް އެ ކޮމިޝަނުން ބުނެފައިވެއެވެ.