ލޯކަލް ކައުންސިލްތަކާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއި، ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބާއްވަން ފެނޭތޯ މިއަދު ނެގި ހިޔާލު ހޯދުމުގެ ވޯޓާ ބެހޭގޮތުން 40 އަކަށް ޝަކުވާ އިލެކްޝަންސް ކޮމިޝަން (އީސީ) އަށް ހުށަހަޅާފައިވާ ކަމަށް އެ ކޮމިޝަނުން ބުނެފިއެވެ.
އީސީގެ މެންބަރު ހަސަން ޒަކަރިއްޔާ ދެންމެ ވިދާޅުވީ، މި ވޯޓުތަކާ ބެހޭގޮތުން ހުށަހަޅާފައިވާ ޝަކުވާތަކުގެ ތެރޭގައި ގިނައީ އިދާރީގޮތުން ހުރި ކަންކަން ފާހަގަކޮށް ހުށަހަޅާފައިވާ ޝަކުވާ ކަމަށެވެ. އޭގެ ތެރޭގައި ހިމެނެނީ، އިންތިހާބީ ދާއިރާ ނޫން ދާއިރާގެ ކަރުދާސް ވޯޓުލާ މަރުކަޒުތަކުން ދޫކުރުމާއި ރީ ރެޖިސްޓްރީ ނުކުރުމުގެ ސަބަބުން ވޯޓާސް ލިސްޓުގައި ނަން ނެތުމާއި، ވޯޓުލުމަށްފަހު ކެނޑިޑޭޓުން ވޯޓުލާ މަރުކަޒު ކައިރީގައި މަޑުކޮށް ތިބުމުގެ މައްސަލައިގެ އިތުރުން އޮފިޝަލުންގެ މައްސަަލަތައް ކަަމަށް އޭނާ ވިދާޅުވިއެވެ.
އޮފިޝަލުންގެ މައްސަލަތަކުގެ ގޮތުގައި އިންތިޒާމުތަކާ ގުޅިގެން ބައެއް މަރުކަޒުރަކަށް ވޯޓުލާން އައި މީހުންނާއި އޮފިޝަލުންނާ ދެމެދު، ހިތްހަމަޖުނެހިގެން ހަރުކަށިކޮށް ވާހަކަދެކެވުނު މައްސަލަތައް ހުށަހަޅާފައިވާ ކަމަށްވެސް މެންބަރު ވިދާޅުވިއެވެ.
ޒަކަރިއްޔާ ވިދާޅުވީ، އިންތިހާބީ ނަތިޖާއަށް ބަދަލެއް އަތުވެދާނެ ޝަކުވާއެއް ހުށަހެޅިފައިވާކަން އަދި ފާހަގަކުރެވިފައިނުވާ ކަމަށެވެ. އެކަން އެނގޭނީ ވޯޓު ގުނުން ކުރިއަށްގެންގޮސް ނަތީޖާއާ ހަމައަށް ދިއުމުން ކަމަށްވެސް ވިދާޅުވިއެވެ.
މިއަދު ހެނދުނު 8:00 އިން ފެށިގެން 4:00 އަށް ވޯޓުލުން ކުރިއަށް ގެންދަން އޮތް ނަމަވެސް، ހޫނު ގަދަކަމުން ވޯޓުލާން މީހުން ނުނިކުމެ، ފިނި ޖެހުމުން ހަވީރު ގަޑީގައި ގިނަ ބަޔަކު ވޯޓުލާން ނިކުމެ ވޯޓު ފޮށިތައް ކައިރީގައި ކިޔު ދިގުވުމުން ގިނަ ބަޔަކަށް ވޯޓުލާން ފުރުސަތު ދިނުމުގެ ގޮތުން ވޯޓުލުމުގެ މުއްދަތު 5:00 އަށް ވަނީ އިތުރުކޮށްފައެވެ.
މިހާރު ވޯޓު ފޮށިތައް ބަންދުކޮށް، ވޯޓު ގުނުމުގެ މަސައްކަތް ވަނީ ފަށައިފައެވެ.
މި އިންތިހާބުގައި 294،876 މީހުންނަށް ވޯޓުލުމުގެ ހައްގު ލިބެއެވެ. އެއީ 150،370 ފިރިހެނުންނާއި 144،506 އަންހެނުންނެވެ.
ކިޔުންތެރިންގެ ހިޔާލު