Author: އަޙްމަދް އަޙްނަފް

ދިވެހި ފުލުހުންގެ ޚިދުމަތުން މައުލޫމާތު ދީފައިވާ ގޮތުގައި، މިދިޔަ ޖުލައި މަހުގެ ތެރޭގައި ވޭޕްއާ ގުޅުންހުރި 15 މައްސަލައެއް ބަލައި، އެ މައްސަލަތަކާ ގުޅިގެން ޖުމްލަ 127،000 ރުފިޔާއިން އެ މައްސަލަތަކުގައި ހިމެނޭ މީހުން ޖޫރިމަނާކޮށްފައިވެއެވެ.

Vape-Related Statistics | 1 – 31 July 2025
During the month of July, a total of 15 vape-related incidents were recorded. Out of these, 22 individuals were fined for violating vape-related regulations.
1/2 pic.twitter.com/FgcU8EPPKH

— Maldives Police (@PoliceMv) August 5, 2025

ފުލުހުން ހާމަކުރި ތަފާސްހިސާބުތަކަށް ބަލާއިރު، ޖުލައި މަހުގެ ތެރޭގައި ބަލައިފައިވާ 15 ވޭޕް މައްސަލައިގެ ތެރޭގައި، ވޭޕް ވިއްކައި ވިޔަފާރި ކުރުމުގެ އެއް މައްސަލަ ހިމެނެއެވެ. މީގެ އިތުރުން، ވޭޕް ޑިވައިސް ގެންގުޅުމުގެ 8 މައްސަލައާއި، ވޭޕް ބޭނުން ކުރުމުގެ 6 މައްސަލަ ފުލުހުން ވަނީ ތަހުގީގުކޮށްފައެވެ.

މި މައްސަލަތަކާ ގުޅިގެން ފިޔަވަޅު އަޅާފައިވާ މީހުންނާ ބެހޭ އިތުރު ތަފްސީލެއް ފުލުހުން ހާމަކޮށްފައެއް ނުވެއެވެ. ދިވެހިރާއްޖޭގައި ވޭޕް ބޭނުންކުރުމާއި ވިއްކުމަކީ ގާނޫނީ ގޮތުން މަނާ ކަމެކެވެ. ފުލުހުން މިފަދަ މައްސަލަތައް ބަލައި ތަންފީޒު ކުރަމުންދަނީ ގާނޫނާއި ގަވާއިދާ އެއްގޮތަށް ވޭޕްގެ ބޭނުން ކުރުން ހުއްޓުވުމަށްޓަކައެވެ.

ޅ. ނައިފަރުން ކުޑަ ކުއްޖަކު ގެއްލިގެން ހޯދުމުގެ މަސައްކަތް ކުރަމުންދާ ކަމަށް ފުލުހުން ހާމަކޮށްފިއެވެ.

ފުލުހުން މިއަދު ބުނީ ގެއްލިގެން ހޯދަމުންދަނީ ނައިފަރު ސީނިޔާގެ، ހަދީޖަތު މައިސަރާ އަބޫބަކުރު ފައިސަލް (15އ) ކަމަށެވެ.

އެގޮތުން މައިސަރާ، ނައިފަރުގައި ދިރިއުޅޭ ގެއިން ނުކުމެގެން ގޮސްފައިވަނީ މި އޮގަސްޓު މަހުގެ 2 ވަނަ ދުވަހުގެ 10:25 ހާއިރު ކަމަށާއި އޭގެ ފަހުން ހަބަރެއް ނުވާ ކަމަށް ފުލުހުން މައުލޫމާތު ދީފައިވެއެވެ.

އަދި އޭރު މައިސަރާ ލައިގެންހުރީ، އަތްކުރު ވިލު ނޫކުލައިގެ ޓީޝާޓަކާއި ފެހިކުލައިގެ (ސައިޑްޕޮކެޓް ޓްރެކް ބޮޓަމް) ހަރުވާޅެއް ކަމަށް އާއިލާ އާއި ހަވާލާދީ ފުލުހުން ބުނެފައިވެއެވެ.

އެހެންކަމުން ހަދީޖަތު މައިސަރާ އަބޫބަކުރު ފައިސަލްއާ ބެހޭ އެއްވެސް މައުލޫމާތެއް ލިބިފައިވާނަމަ ނުވަތަ ފެނިއްޖެނަމަ ނައިފަރު ޕޮލިސް ސްޓޭޝަން ނަންބަރު 9792187 ނުވަތަ ފުލުހުންގެ ހޮޓްލައިން ނަންބަރު 3322111 އަށް ގުޅުއްވައި މައުލޫމާތު ހިއްސާކުރުމަށް ފުލުހުން ވަނީ އެދިފައެވެ.

އަލް އަގްސާ މިސްކިތަށް އިޒްރޭލްގެ ގައުމީ ސަލާމަތާބެހޭ ވަޒީރު ވަދެ، އެ މިސްކިތުގެ ހުރުމަތް ކަނޑާލި މައްސަލަ ދިވެހި ސަރުކާރުން ކުށްވެރިކޮށްފިއެވެ.

މިރޭ ފޮރިން މިނިސްޓްރީން ނެރުނު ބަޔާނުގައި ބުނެފައިވަނީ، މުސްލިމުންގެ ތިންވަނަ އަށް އެންމެ މުގައްދަސް ބިނާކަމުގައިވާ މަސްޖިދުލް އަގްސާގެ އިމުގެ ތެރެއަށް އިޒްރޭލުގެ ގައުމީ ސަލާމަތާބެހޭ ވަޒީރު އީޓަމަރް ބެން ގްވީރް، ވަދެ އެ މިސްކިތުގެ ހުރުމަތް ކަނޑާލި ކަނޑާލުން ކުށްވެރިކުރާ ކަމަށެވެ.

އެ މިނިސްޓްރީން ބުނީ، އެ އަމަލަކީ ބައިނަލްއަގްވާމީ ގާނޫނާއި އިސްލާމީ މުގައްދަސް ބިނާތަކުގެ ހުރުމަތް ކަނޑާލުމުގެ އިތުރުން އެފަދަ ތަންތަނުގެ ދީނީ އަދި ތާރީހީ ހައިސިއްޔަތު ބަދަލުކުރުމަށް ތަކުރާރުކޮށް އިޒްރޭލުން ކުރަމުންގެންދާ ނޭދެވޭ އަމަލެއް ކަމަށެވެ.

އިޒްރޭލުން ކުރަމުން ގެންދާ ގައިރު ގާނޫނީ އަމަލުތަކާއި އިސްލާމީ މުގައްދަސް ތަންތަނުގެ ހުރުމަތް ކަނޑާލުމަށް ހިންގާ އެންމެހާ އަމަލުތައް ވަގުތުން ހުއްޓާލުމަށް އިޒްރޭލަށް މަޖުބޫރުކުރުވުމަށް އަޅަންޖެހޭ ފިޔަވަޅުތައް އެޅުން އަވަސް ކުރުމަށް ބައިނަލްއަގްވާމީ މުޖުތަމައަށް ސަރުކާރުން ވަނީ ގޮވާލައިފަ އެވެ.

ފަލަސްތީނުގެ ރައްޔިތުން މިނިވަން، މުސްތަގިއްލު ދައުލަތެއް އުފެއްދުމަށް ކުރަމުންދާ މަސައްކަތްތަކަށް ރާއްޖޭން އަބަދުވެސް ތާއީދު ކުރާނެ ކަމަށް ވެސް އެ ބަޔާނުގައި ބުނެފައިވެ އެވެ.

ފަލަސްތީނުގައި ހިންގަމުންދާ ލާއިންސާނީ އަމަލުތައް، ވޭތުވެދިޔަ 60 އަހަރުގެ ތެރޭގައި ވެސް ނުދާހާ ގޯސް ދަރަޖަކަށް ގޮސްފައިވާ ކަމަށް ދާދިފަހުން އދ. އިން ވެސް ބުނެފައިވެ އެވެ.

އައްޒާއަށް އިޒްރޭލުން ހަމަލާދޭތާ 21 މަސް ދުވަސްވެފައި ވާއިރު މިހާރު ވަނީ ހަމަލާތަކުގައި ޝަހީދުވި މީހުންގެ އަދަދު 60،000 އަށް އަރައިފަ އެވެ. އަދި އައްޒާއިން ކާބޯތަކެތި ހުސްވެ ބަނޑަށް ޖެހިގެން މަރުވާ ކުޑަކުދިންނާއި މީހުން އެއް ދުވަހުން އަނެއް ދުވަހަށް ދަނީ އިތުރުވަމުންނެވެ.

މޫސުމާއި ބެހޭ ގައުމީ އިދާރާ (މެޓް އޮފީސް) އިން ހއ. އަތޮޅުން ފެށިގެން ތ. އަތޮޅަށް ކަނޑުތައް ވަރަށް ގަދަވެ، ވިލާގަނޑުގައި ގަދަ ވަޔާ އެކު ވާރޭ ވެހޭނެ ކަމަށް ލަފާކޮށް، ދަތުރުފަތުރު ކުރުމުގައި އާއްމުންނާއި، ހާއްސަކޮށް ކަނޑު ދަތުރުކުރާ ފަރާތްތަކުން ސަމާލުވުމަށް އިލްތިމާސްކޮށްފިއެވެ.

މެޓް އޮފީހުން މައުލޫމާތު ދޭ ގޮތުގައި، މި އަތޮޅުތަކަށް ވަނީ ހުދު ވައިޓް އެލާޓެއް ނެރެފަ އެވެ. މި އެލާޓް ނެރެފައިވަނީ މިރޭ މެންދަމު 1:30އާ ހަމައަށެވެ.

މި އެލާޓްގެ ވަގުތުތަކުގައި ގަޑިއަކު 19 މޭލާއި 24 މޭލާއި ދެމެދުގެ ބާރުމިނުގައި ވައި ޖެހޭނެ ކަމަށް ލަފާކޮށްފައި ވެއެވެ. އަދި ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށް ވެސް މެޓް އޮފީހުން ވަނީ ބުނެފަ އެވެ. ވައިގަދަވުމުގެ ސަބަބުން ކަނޑުތައް ވަރަށް ގަދަވެ، ދަތުރުކުރުމަށް ދަތިތަކާ ކުރިމަތިވެދާނެ ކަމަށް ލަފާކޮށް، ކޮންމެހެން ކުރަން ޖެހޭ ދަތުރެއް ނޫނީ މި ވަގުތުތަކުގައި ނުކުރުމަށް މެޓް އޮފީހުން ވަނީ އިލްތިމާސްކޮށްފަ އެވެ.

މި ދުވަސްވަރަކީ ރާއްޖެއަށް ހުޅަނގު މޫސުމުގެ ގަދަ ވިއްސާރަ ކުރަމުންދާ ދުވަސްވަރެކެވެ. އެހެންކަމުން، މޫސުމަށް ހާއްސަ ސަމާލުކަމެއް ދީގެން ދަތުރުފަތުރުގެ ކަންކަން ރޭވުމަށް މެޓް އޮފީހުން އިލްތިމާސްކުރެއެވެ.

1. ގެދޮރުވެރިޔާ ސްކީމުގެ ދަށުން ދޫކުރާ ފުލެޓުތަކަށް ދައްކަންޖެހޭ ޑިޕޮސިޓް ފައިސާ، ޕެންޝަން ފަންޑު މެދުވެރިކޮށް ދެއްކޭ ގޮތް ހަދަން މަސައްކަތްކުރަމުން އަންނަ ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން ބުނެފިއެވެ. މިއީ، ފުލެޓުތަކުގެ އަގުތަކާއެކު ޑިޕޮސިޓް ފައިސާގެ ބޮޑުކަމުން ގިނަ ބަޔަކަށް ދިމާވެފައިވާ ދަތިކަން ހައްލުކުރުމަށް ކުރާ މަސައްކަތެކެވެ.

ކުރީ ސަރުކާރުން ގެދޮރުވެރިޔާ ސްކީމުގެ ފުލެޓުތަކުގެ އަގުތައް އާންމުކުރި އިރުވެސް، އެންމެ ބޮޑު ކަންބޮޑުވުމަކަށް ވެފައިވަނީ ޑިޕޮސިޓް ފައިސާ އާއި ކުލީގެ ގޮތުގައި ދައްކަން ޖެހޭ އަދަދުތައް ބޮޑުވުމެވެ. އެގޮތުން، ދެ ކޮޓަރީގެ ފުލެޓުތަކަށް ޑިޕޮސިޓުގެ ގޮތުގައި 15,000 ރުފިޔާ ދައްކަން ޖެހޭއިރު، ތިން ކޮޓަރީގެ ފުލެޓުތަކަށް 25,000 ރުފިޔާގެ ޑިޕޮސިޓް ދައްކަން ޖެހެއެވެ.

އެސްއެސްޓީވީގެ ޕްރޮގްރާމެއްގައި ވާހަކަދައްކަވަމުން، އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ، ޕެންޝަން އެޑްމިނިސްޓްރޭޝަންއާ ބައްދަލުވުމެއް ވަރަށް އަވަހަށް ޝެޑިއުލްކޮށްފައިވާ ކަމަށާއި، މި ބައްދަލުވުމުގައި ޕެންޝަން ފަންޑު މެދުވެރިކޮށް ޑިޕޮސިޓް ދެއްކޭނެ ގޮތެއް މަގުފަހިކުރުމާ ގުޅޭގޮތުން މަޝްވަރާކުރެވޭނެ ކަމަށެވެ.

އޭނާ އިތުރަށް ވިދާޅުވީ، ޑިޕޮސިޓް ފައިސާ ދައްކަން ވަކި މުއްދަތެއް ކަނޑައެޅިފައި ނުވާނެ ކަމަށާއި، ފުލެޓުގެ ތަޅުދަނޑި ހަވާލުކުރެވޭނީ ޑިޕޮސިޓް ފައިސާ ދައްކައި ނިމުމުން ކަމަށެވެ.

ހަމްދާން ޝަކީލް ފާހަގަކުރެއްވި ގޮތުގައި، ޑިޕޮސިޓް ފައިސާ މިހާރުވެސް ދެއްކޭނެ އިންތިޒާމު ހަމަޖެހިފައިވީ ނަމަވެސް، ފުލެޓުތަކުގެ ފިނިޝިން މަސައްކަތްތައް ނިމި، ދިރިއުޅުމުގެ ހުއްދަ ދެވޭނީ އަންނަ ސެޕްޓެމްބަރު މަހުގައެވެ.

އިސްކަންދަރު ސްކޫލްގެ އޭ ބްލޮކްގައި ހުރި ދެ ބުރީގެ އިމާރާތް ތަޅާލުމަށްފަހު އެތަނުގައި އާ އިމާރާތެއް އަޅަން އެޑިޔުކޭޝަން މިނިސްޓްރީން ނިންމައިފި އެވެ.

އިސްކަންދަރު ސްކޫލުގެ ބާ އިމާރަތް ބޭނުންކުރުން ރައްކާތެރި ނޫން ކަމަށް ކަމާބެހޭ ފަރާތްތަކާއި މާހިރުން ސާވޭ އެއް ހެދުމަށްފަހު، މިދިޔަ އަށް އަހަރުގެ ތެރޭގައި ދެ ފަހަރުގެ މަތިން އެންގި ކަމަށްވެ އެވެ. އެހެންކަމުން އެ އިމާރާތުގެ ފުރަތަމަ ބުރި ބޭނުން ކުރަމުން އައީ ގުދަނެއްގެ ގޮތުގަ އެވެ.

އެހެންކަމުން ނުވަ އަހަރަށްފަހު މީގެ 64 އަހަރު ކުރިން އިމާރަތްކުރި އިސްކަންދަރު ސްކޫލުގެ އޭ ބްލޮކްގައި ހުރި އިމާރަތް ތަޅާލާފައި ވަނީ ނިމިދިޔަ ޖޫން މަހުގެ ތެރޭގަ އެވެ. އެޑިއުކޭޝަން މިނިސްޓްރީން ބުނެފައިވާ ގޮތުގައި އިސްކަންދަރު ސްކޫލުގެ އާ އިމާރާތުގެ ސަބަބުން ކްލާސްރޫމްތައް މަދުވެ، މެނޭޖު ކުރުމުގައި ހުރި ދަތިތަކަށް ބޮޑު ލުޔެއް ލިބިގެންދާނެ އެވެ.

އިސްކަންދަރު ސްކޫލުގައި ދެ ހާހަށް ވުރެ ގިނަ ދަރިވަރުން ތައުލީމު ހާސިލުކުރަމުން އަންނަކަން ފާހަގަކޮށްލަންޖެހެ އެވެ. އޭ ބްލޮކްގައި ހުރި އިމާރަތް ތަޅާލުމުން މިހާރު ކިޔަވާދެމުން އަންނަނީ ބީ ބްލޮކާއި ސީ ބްލޮކްގަ އެވެ. އެހެންނަމަވެސް އެ ދެ ބްލޮކްގެ އިމާރާތްތަކުގެ ބައެއް ތަންތަނުގައި ރެނދުލާފައިވާ ކަމުގެ ކަންބޮޑުވުން ވެސް ބެލެނިވެރިން މީގެ ކުރިން ފާޅުކޮށްފައިވެ އެވެ.

އިސްކަންދަރު ސްކޫލުގެ ކުރީގެ އިމާރާތުގައި ހަތް ކްލާސް ރޫމް ހުރިނަމަވެސް އެޑިއުކޭޝަން މިނިސްޓްރީން ނިންމާފައި ވަނީ އާ އިމާރާތުގައި ޖުމުލަ 21 ކުލާސްރޫމް ހިމެނުމަށެވެ.

ލ.އިސްދޫ ކައުންސިލާއި، މިނިސްޓްރީ އޮފް އިސްލާމިކް އެފެއާޒު އަދި ކީރިތި ޤުރުއާނާއި ބެހޭ ޤައުމީ މަރުކަޒު ގުޅިގެން ކުރިއަށްގެންދިޔަ “ޖަމާޢަތްތެރިން ތަމްރީން ކުރުމުގެ ޕްރޮގްރާމް” ފުރިހަމަކުރި ބައިވެރިންނަށް ސަނަދު ހަވާލުކުރުމުގެ ރަސްމިއްޔާތެއް އެރަށުގައި ބާއްވައިފިއެވެ.

މި ޕްރޮގްރާމަކީ އިސްދޫގެ ޖަމާޢަތްތެރިންނަށް ދީނީ އިލްމާއި، ހުނަރު އިތުރުކޮށް، މުޖުތަމަޢުއަށް އިތުރަށް ޚިދުމަތް ކުރުމަށް ބާރު އެޅުމުގެ ގޮތުން ކުރިއަށް ގެންދިޔަ ޕްރޮގްރާމެކެވެ. ޕްރޮގްރާމްގައި ޖުމްލަ 28 ބައިވެރިއަކު ބައިވެރިވެ، ކާމިޔާބުކަމާއެކު ފުރިހަމަކޮށް ސަނަދު ހާސިލްކުރިއެވެ.

މި ޕްރޮގްރާމްގައި ކިޔަވައި ދެއްވީ މިނިސްޓްރީ އޮފް އިސްލާމިކް އެފެއާޒުގެ ދާޢީ އައްޝައިޚް ޢާޒިމް ޚާލިދެވެ. ޝައިޚް ޢާޒިމް ޚާލިދު ވަނީ ޖަމާޢަތްތެރިންނަށް ބޭނުންވާ މުހިންމު ދީނީ މައުލޫމާތުތަކާއި، މިސްކިތްތަކާއި މުޖުތަމަޢުގައި އަދާކުރަންޖެހޭ ދައުރުތަކާއި ގުޅޭގޮތުން ހެދުންތެރި އިރުޝާދުތަކެއް ދެއްވާފައެވެ.

މިފަދަ ޕްރޮގްރާމްތަކުގެ ސަބަބުން ރަށްރަށުގެ ދީނީ ހަރަކާތްތަކަށް އިތުރު ކުރިއެރުމެއް ލިބި، ރައްޔިތުންގެ މެދުގައި ދީނީ ހޭލުންތެރިކަން އިތުރުވުމަށް ބޮޑު އެހީތެރިކަމެއް ލިބިގެންދާނެ ކަމަށް ޕްރޮގްރާމްގެ އިންތިޒާމުކުރި ފަރާތްތަކުން ފާހަގަކުރެއެވެ.

ރާއްޖޭގެ މޫސުން މިއަދުވެސް ގޯސް ކަމަށާއި ހުރިހާ ފަރާތްތަކުން، ހާއްސަކޮށް ކަނޑުދަތުރު ކުރައްވާ ފަރާތްތަކުން އެކަމަށް ސަމާލުވުމަށް މޫސުމާބެހޭ ގައުމީ އިދާރާ (މެޓް) އިން އިލްތިމާސް ކޮށްފިއެވެ.

މެޓުން މިހެން ބުނެފައިވަނީ މިއަދުގެ މޫސުން ލަފާކުރައްވާ އެ އިދާރާއިގެ ވައިބަރ ގްރޫޕަށް ހިއްސާކުރި ޕޯސްޓެއްގައެވެ.

އެ ޕޯސްޓްގައި މެޓުން އިތުރަށް ބުނެފައިވަނީ ރާއްޖޭގެ އެކި ހިސާބަށް ވިއްސާރަ ކުރުމާއެކު ގުގުރާނެ ކަމަށް

 

މީގެއިތުރުން ހުޅަނގާއި ހުޅަނގު އުތުރުން، އުތުރާއި މެދުރާއްޖެ ތެރޭގެ އަތޮޅުތަކަށް ގަޑިއަކު 13 މޭލާއި 23 މޭލާއި ދެމެދު ބާރުމިނުގައި ވައިޖެހޭނެ ކަމަަށާއި ދެކުނުގެ އަތޮޅުތަކަށް ގަޑިއަކު 08 މޭލާއި 18 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގާތްގަނޑަކަށް 45 މޭލު ބާރުމިނަށް ވައި ގަދަވުން އެކަށީގެންވާ ކަމަށްވެސް މޫސުމާބެހޭ ގައުމީ އިދާރާއިން ލަފާކޮށްފައިވެއެވެ.

އަދި އުތުރާއި މެދުރާއްޖެތެރޭ އަތޮޅުތަކުގެ ކަނޑުތައް ގަދަވާނެ ކަމަށާއި، ދެކުނުގެ އަތޮޅުތަކުގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށްވެސް މެޓުން ބުންޏެވެ.

ދެކުނުގެ ކަނޑުތަކުގެ ރާޅު އުސްމިން ހުންނާނީ 3 ފޫޓާއި 6 ދެމެދުގައި ކަމަށާއި. އަދި އުތުރާއި މެދުރާއްޖެތެރޭގެ ރާޅުގެ އުސްމިން ހުންނާނީ 5 ފޫޓާއި 7 ފޫޓާ ދެމެދުގައެވެ.

ލާމަރުކަޒީ ގާނޫނަށް ސަރުކާރުން މިހާރު ގެންނަން އުޅޭ އިސްލާޙާ ދެކޮޅަށް ރާއްޖޭގެ ހުރިހާ ކަންކޮޅު ތަކަކުން އެ އިސްލާޙާ ދެކޮޅުކަން އެންގުމުގެ ގޮތުން ކައުންސިލް ތަކުން އަޑު އުފުލުމަށް އެމްޑީޕީގެ ރައީސް އަބްދުﷲ ޝާހިދު މިއަދު ގޮވާލައްވައިފިއެވެ.

ކައުންސިލްތަކުގެ މާލީ ބާރުތަކާއި ގުޅޭގޮތުން ސަރުކާރުން ގެންނަން އުޅޭ ބަދަލުތަކާއިމެދު ކަންބޮޑުވުން ފާޅުކުރައްވައި ޝާހިދު މިއަދު ވިދާޅުވީ، ލާމަރުކަޒީ ނިޒާމު އެމްޑީޕީން ވުޖޫދުކުރީ ޚިދުމަތްތައް ފޯރުކޮށްދިނުމުގެ ނަމުގައި މައި ސަރުކާރު ތަކުން ޒަމާނުއްސުރެ, ރައްޔިތުން އަޅުވެތި ކުރަމުން އައި އައުން ނިމުމަކަށް ގެނައުމަށް ކަމަށެވެ. އަދި ރައްޔިތުންގެ މާލީ ފުދުންތެރިކަމާއި, ޚިދުމަތްތަކާއި ވަސީލަތްތައް މަރުކަޒުކޮށް, ރައްޔިތުންގެ މައްޗަށް ނުޙައްޤު ބާރާއި ނުފޫޒު ފޯރުވުމުގެ ފުރުސަތު ޤައުމުގެ ވެރިންނަށް ލިބުނަ ނުދިނުމަށް ކަމަށެވެ.

ނަމަވެސް, ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް މި ސަރުކާރުން ހުށަހަޅާފައިވާ އިސްލާހަކީ ކައުންސިލް ތަކުގެ މާލީ ތަނަވަސްކަމާއި ވަސީލަތްތައް އަލުން މަރުކަޒުކޮށް, ރައްޔިތުން އަޅުވެތިކު ކުރުމަށް ފަރުމާކޮށްފައި އޮތް އިސްލާޙެއް ކަމަށް ޝާހިދު ވިދާޅުވިއެވެ.

“މި އިސްލާޙުގެ ސަބަބުން ފާއިތުވެ ދިޔަ މުއްދަތުގައި ކައުންސިލްތަކަށް ލިބިފައިވާ މާލީ މިނިވަންކަން ގެއްލި, ލާމަރުކަޒީ ނިޒާމު ބޮޑުތަނުން ފަހަތަށް ސޮއްސާލާނެ.” ޝާހިދު ވިދާޅުވިއެވެ.

އިސްލާޙުތަކާމެދު ވަރަށް ބޮޑަށް ކަންބޮޑުވުން ފާޅު ކުރައްވައި ޝާހިދު ވިދާޅުވީ، ސަރުކާރުން ގެންނަން އުޅޭ އިސްލާޙުތަކާމެދު މުޅިރާއްޖެ ދެކޮޅުކަން މިވަގުތު ދައްކައިދޭން ޖެހޭ ކަމަށެވެ.

“ރާއްޖޭގެ ހުރިހާ ކަންކޮޅުތަކުން މި އިސްލާޙާއި ދެކޮޅުކަން ސަރުކާރަށް އެންގުމަށް، ކައުންސިލްތަކުން އަޑު އުފުލުމަށް ގޮވާލަން.” ކައުންސިލްތަކަށް ޝާހިދު ގޮވާލެއްވިއެވެ.

ސަރުކާރުން މިހާރު ލާމަރުކަޒީ ގާނޫނަށް ހުށަހަޅާފައިވާ އިސްލާޙަކީ، ރައްޔިތުންނަށް ފޯރުކޮށްދޭ އަސާސީ ޚިދުމަތްތައް ދިނުމުގެ ބޭނުމަށް އެކި ފަރާތްތަކަށް ކައުންސިލް ތަކުން ދޫކޮށްފައިވާ ތަންތަނުން، ކައުންސިލް ތަކަށް ކުލި ނުނެގޭ ގޮތް ހަދަން ގާނޫނު ހުށަހަޅާފައި އޮތް އިސްލާހެކެވެ.

ލާމަރުކަސީ ގާނޫނުގެ 75 ވަނަ މާއްދާގައި ބުނަނީ އެހެން ގާނޫނެއްގައި އެހެން ގޮތަކަށް ބަޔާން ކޮށްފައިވީ ނަމަވެސް، ކައުންސިލް ތަކުން ދޭ ހިދުމަތްތަކަށް ބޭނުންވާ ފައިސާ ހޯދުމަށް ފީ ނުވަތަ ކުލި ކަނޑައަޅައި، އެ ފީ ނުވަތަ ކުލި ނެގުމުގެ ބާރު ކައުންސިލް ތަކަށް ލިބިގެންވާ ކަމަށެވެ. އެގޮތުން ނަގާ ފީ ނުވަތަ ކުލި ކަނޑައަޅަން ވާނީ އެ ކައުންސިލް ނިސްބަތްވާ ރަށް ނުވަތަ ސިޓީގެ ރައްޔިތުންނާ މަޝްވަރާ ކުރުމަށްފަހު ދިވެހިރާއްޖޭގެ ޤާނޫނުތަކާ ހިލާފުނުވާ ގޮތުގެމަތިން ކަމަށްވެސް ބުނެފައިވެއެވެ.

އެގޮތަށް ކައުންސިލް ތަކަށް ފީއާއި ކުލި ނެގޭނެ ދާއިރާތައް ވެސް ގާނޫނުގައި ވަނީ ކަނޑަައަޅައިފައެވެ.

އޭގެ ތެރޭގައި ހިމެނެނީ:

• ކަރަންޓުގެ ޚިދުމަތަކީ ކައުންސިލުން ފޯރުކޮށްދޭ ޚިދުމަތެއްނަމަ، ނަގަންޖެހޭ މަހު ފީ
• ފެނާއި ނަރުދަމާގެ ޚިދުމަތަކީ ކައުންސިލުން ފޯރުކޮށްދޭ ޚިދުމަތެއްނަމަ ނަގަންޖެހޭ މަހު ފީ
• މުވާޞަލާތީ ޚިދުމަތަކީ ކައުންސިލުން ފޯރުކޮށްދޭ ޚިދުމަތެއްނަމަ ނަގަންޖެހޭ މަހު ފީ
• ކުނި ޖަމާކޮށް ރައްކާތެރި ގޮތުގައި ނައްތާލުމަކީ ކައުންސިލުން ފޯރުކޮށްދޭ ޚިދުމަތެއްނަމަ ނަގަންޖެހޭ މަހު ފީ
• ރަށުގައި ރަޖިސްޓަރީކޮށްފައިވާ އެއްގަމާއި ކަނޑުގެ އުޅަނދުފަހަރުގެ އަހަރީ ފީ
• އުޅަނދުފަހަރު ދުއްވުމުގެ ލައިސަންސް ފީ
• ކައުންސިލްގެ ސަރަޙައްދުގައި އެއްޗެހި އުފައްދައި ވިއްކުމާއި ވިޔަފާރިއާއި ފިހާރައާއި މާރުކޭޓް ގޮޅީގެ އަހަރީ ފީ
• ޑައިވް ކުރުމަށް ކަނޑައަޅާފައިވާ ސަރަޙައްދު ތަކުގައި ޑައިވް ކުރުމުގެ ފީ
• ކުއްޔަށް ދޫކުރެވިފައިވާ ބިމާއި ފަޅާއި ފަރުގެ ސަރަޙައްދު ތަކުގެ ކުލި
• ކައުންސިލްގެ ބެލުމުގެ ދަށުގައިވާ ފަޅު ރަށްރަށާއި ފިނޮޅާއި ހާހަލާއި ގިރީގެ ކުލި
• ގޮއިފާލައްބަ އާއި ހިންނަ ފަދަ ތަން ތަނުގެ ކުލި
• ކައުންސިލްގެ ޢިމާރާތްތަކާއި މުދަލުގެ ކުލި
• ކަނޑަށް ޖައްސާ ބޯޓު ފަހަރަށް ކަނޑައެޅިފައިވާ ޕްލެޓްފޯމަށާއި ސަރަޙައްދަށް ނެގޭ ކުލި
• ބަނދަރު ބޭނުން ކުރުމަށް (ފައްތިއާ، މުދާ އަރުވައި ބޭލުން) ނަގާ ކުލި
• ނޭޗަރ ޕާކުން ލިބޭ ކުލި

މި މާއްދާގައި ބަޔާން ކޮށްފައިވާ ފީގެ އިތުރުންވެސް ކައުންސިލުން ދޭ ޚިދުމަތަކާ ގުޅިގެން އެ ކައުންސިލުން ކަނޑައަޅާ ފީ މަރުކަޒީ ގާނޫނަށް އިސްލާހު ގެނައުމަށް ސަރުކާރުން ރައްޔިތުންގެ މަޖިލީހަށް މިހާރު ފޮނުވާފައިވާ ބިލުގައި ވަނީ މި މާއްދާއަށް އަށް އަކުރެއް އިތުރު ކުރަން ހުށަހަޅައިފައެވެ.

އެ އަކުރުގައި ބުނެފައި ވަނީ ރަށު ކައުންސިލް ތަކުން ކުއްޔަށް ދޫކޮށްފައިވާ ބިމާއި ފަޅާއި ފަރުގެ ސަރަޙައްދުތަކާއި، ކައުންސިލް އިމާރާތްތަކާއި މުދަލުގެ ކުލީގެ ވާހަކަ ގާނޫނުގައި އޮތް ނަމަވެސް ސަރުކާރުން ރައްޔިތުންނަށް ފޯރުކޮށްދޭ އަސާސީ ހިދުމަތްތައް ފޯރުކޮށް ދިނުމުގެ ބޭނުމަށް އެކި ފަރާތްތަކަށް ދޫކޮށްފައިވާ ބިން ނުވަތަ އިމާރާތް ތަކުން ކުއްޔެއް ނުނެގޭނެކަމަށެވެ.

މި މާއްދާގެ (ހ) ގެ (1) ވަނަ ނަންބަރުގައި އެހެން ބަޔާންކޮށްފައި ވީނަމަވެސް، އެ މާއްދާގައި ބަޔާންކުރާ އާމްދަނީ ކައުންސިލް ތަކަށް ދޫކުރަން ވާނީ އެއްވެސް ޤާނޫނެއްގެ ދަށުން ދައުލަތަށް ދައްކަންޖެހޭ އެއްވެސް ޓެކުހެއްވާނަމަ، އެ ޓެކުހަކަށްވާ ފައިސާ އުނި ކުރުމަށްފަހު ބާކީވާ ޢަދަދެކެވެ.

މީގެ އިތުރުން ސަރުކާރުން ކައުންސިލްތަކަށް ހިލޭ އެހީގެ ގޮތުގުއި ދޭންޖެހޭނެ ކަމަށް ގާނޫނުގެ 79 ވަނަ މާއްދާގައި ކަނޑައަޅާފައިވާ ފައިސާ ދޭ އުސޫލަށް ބަދަލު ގެނައުމަށްވެސް ބިލްގައި ހިމަނާފައި ވެއެވެ. ގާނޫނުގެ 79 ވަނަ މާއްދާގައި ބުނަނީ، ސަރުކާރުން ކޮންމެ އަހަރަކު ދައުލަތުގެ ބަޖެޓުގައި ފައިސާ ހިމަނައި، ބަޖެޓު ފާސްވުމުން، ފާސްވި ބަޖެޓާ އެއްގޮތަށް ދައުލަތުގެ އެ އަހަރެއްގެ އާމްދަނީގެ ގޮތުގައި އަންދާޒާކުރާ މިންވަރުގެ މަދުވެގެން %5 އާ އެއްވަރުގެ އަދަދެއްގެ ފައިސާ ކައުންސިލް ތަކަށް ދޭންޖެހޭނެ ކަމަށެވެ. އަދި ކައުންސިލްތަކުގެ އިހްތިސާސްގެ ތެރޭގައި ނުހިމެނޭ ބިމާއި ފަޅާއި ފަރުގެ ސަރަޙައްދުތަކުގެ ކުލީގެ ގޮތުގައި ދައުލަތަށް ލިބޭ އާމްދަނީގެ %40 އަށްވާ ފައިސާ ދޭންޖެހޭނެ ކަމަށްވެސް ބުނެފައިވެއެވެ.

ނަމަވެސް މި މާއްދާއަށް ގެންނަ އިސްލާހުގެ ގޮތުގައި ބިލްގައި ހިމަނާފައިވަނީ، އެ އާމްދަނީ ކައުންސިލްތަކަށް ދޫކުރަންވާނީ އެއްވެސް ގާނޫނެއްގެ ދަށުން ދައުލަތަށް ދައްކަންޖެހޭ އެއްވެސް ޓެކްސްއެއް ވާނަމަ، އެ ޓެކުހަށްވާ ފައިސާ އާއި ކަރަންޓްގެ ހިދުމަތާއި ފެނުގެ ހިދުމަތާއި ފާހާނާއާއ ނަރުދަމާގެ ހިދުމަތަކަށް ކައުންސިލްތަކުން ދައްކަންޖެހޭ ފައިސާއެއް ނުދައްކާތާ ހަ މަސް ދުވަހަށްވުރެ ގިނަދުވަސް ވެފައިވާނަމަ، އެ ފައިސާއެއް އުނި ކުރުމަށްފަހު ބާކީވާ ފައިސާ ކަމަށެވެ.

ކުށްމަދު އަމާން ވެއްޓެއް ގާއިމުކޮށް ރައްޔިތުންނަކީ ހޭލުންތެރި ބަޔަކަށް ހެދުމަށް ފުލުހުން ކުރަމުންދާ މަސައްކަތްތަކުގެ ތެރެއިން ފ. ނިލަންދޫ، ދަރަނބޫދޫ، މަގޫދޫ، ބިލެތްދޫ އަދި ފީއަލީ ރައްޔިތުންނާ ބައްދަލުކޮށް ހިޔާލު ބަދަލުކުރުމުގެ އިތުރުން ހޭލުންތެރިކުރުވުމަށް ވޯކް އެންޑް ޓޯކް ހަރަކާތެއް ކުރިއަށް ގެންގޮސްފިއެވެ.

ޖުލައި 31 ވަނަ ދުވަހު ކުރިއަށް ގެންދިޔަ މި ހަރަކާތުގައި، ރަށްރަށުގެ އެކި ސަރަހައްދުތަކުން ކުދިބޮޑު ރައްޔިތުންނާ ބައްދަލުކޮށް ފުލުހުންނާ މެދު ރައްޔިތުން ދެކޭގޮތާއި، މުސްތަގުބަލުގައި ފުލުހުންގެ ފަރާތުން ދެކެން ބޭނުންވާ ނުވަތަ ފެންނަން ބޭނުންވާ މަންޒަރު އެނގޭނޭހެން މުހިންމު ކަންކަމާ ގުޅޭގޮތުން ހިޔާލު ބަދަލުކޮށް މަޝްވަރާކޮށްފައިވެއެވެ.

މީގެ އިތުރުން، ތަފާތު ކުށްތަކުން ރައްކާތެރިވުމަށް އަބަދުވެސް ހޭލުންތެރިވެ ތިބުމަށާއި އާންމުކޮށް ރަށްރަށުގައި ހިނގާ ކުށްތަކުގެ މައުލޫމާތު ހިއްސާކޮށް ރައްކާތެރިވުމަށް ކުރެވިދާނެ ކަންކަން ކިޔައިދީ އޮޅުންފިލުވައިދީފައިވެއެވެ.

އެގޮތުން މަގުމަތީގެ ސަލާމަތާއި ރައްކާތެރިކަން ކަށަވަރުކުރުމާއި، ތަފާތު ސްކޭމްތަކުގެ މައްސަލަތަކުން ރައްކާތެރިވާނެ ގޮތްތަކާއި، ރައްޔިތުންގެ ގެދޮރާއި މުދާ ރައްކާތެރިކޮށް ބެލެހެއްޓުމުގައި ސަމާލުކަންދިނުމާ ގުޅޭގޮތުން މަޢުލޫމާތު ދީވިފައިވެއެވެ.

މި ހަރަކާތަކީ ފުލުހުންނާއި ރައްޔިތުންނާއި ދެމެދު އޮތް ގުޅުން އިތުރަށް ބަދަހިކޮށް މުޖުތަމައުގެ ރައްކާތެރިކަން އިތުރުކުރުމަށާއި ރައްޔިތުންނާއި އެންމެ ގާތުގައި ފުލުހުން ތިބިކަން ހާމަކޮށްދިނުމުގެ ގޮތުން ކުރިއަށް ގެންދިޔަ ހަރަކާތެކެވެ.