އޮސްޓްރޭލިއާގެ ސިޑްނީ ހާބަރު ބްރިޖް މައްޗަށް ގިނަ އަދަދެއްގެ މީހުން އެއްވެ، ހަނގުރާމައިން ހާލުގައި ޖެހިފައިވާ ޣައްޒާއަށް އެހީތެރިކަން ފޯރުކޮށްދިނުމަށް ގޮވާލައިފިއެވެ. އިޒްރޭލުގެ ހިސާރުގެ ސަބަބުން ފަލަސްތީނުގައި ބަނޑުހައިހޫނުކަން ދަނީ ވޭތުވެދިޔަ ދުވަސްތަކުގައި އިތުރަށް ގޯސްވަމުންނެވެ.
ފަލަސްތީނަށް ތާއީދުކުރާ މުޒާހަރާގެ ބައިވެރިން އާދިއްތަ ދުވަހު ގަދަ ވަޔާއި ވާރެއަށް ނުބަލައި ބްރިޖް މަތިން ހިނގާފައި ދިޔައީ “ސީޒްފަޔަރ ނައު” (މަޑުޖައްސާލާ) އަދި “ފްރީ ފަލަސްތީން” (ފަލަސްތީން މިނިވަންކުރޭ) މިފަދަ ޝިއާރުތައް ގޮވަމުންނެވެ. މި މުޒާހަރާގެ އިންތިޒާމުކުރި ފަރާތްތަކުން މި މުޒާހަރާއަށް ދީފައިވާ ނަމަކީ “މާޗް ފޯ ހިއުމެނިޓީ” (އިންސާނިއްޔަތަށްޓަކައި ހިނގުން) އެވެ. ބައެއް މުޒާހަރާގެ ބައިވެރިން ޣައްޒާގައި ބަނޑުހައިހޫނުކަމުގެ ސަބަބުން ކުރިމަތިވެފައިވާ ހާލަތުގެ ރަމްޒެއްގެ ގޮތުން ތެލިތަކާއި ތަށިތައް ހިފައިގެން ދިޔައެވެ.
މި މުޒާހަރާ ކުރިއަށްދިޔައީ އޮސްޓްރޭލިއާއާއި އެނޫންވެސް އެތައް ގައުމަކުން ގުޅިގެން ނެރެފައިވާ ބަޔާނެއްގެ ހަފްތާއެއް ނުވަނީސް އެވެ. އެ ބަޔާނުގައިވަނީ “ފަލަސްތީން ދައުލަތް ބަލައިގަތުމަށް ގޮވާލައިފައެވެ.
ޣައްޒާގައި ބަނޑުހައިހޫނުކަމުގެ ހާލަތު ގޯސްވަމުންދާތީ، ފްރާންސާއި، ބްރިޓަން އަދި ކެނެޑާ ފަދަ ގައުމުތަކުންވެސް ވަނީ ފަލަސްތީނުގެ ދައުލަތެއް ޑިޕްލޮމެޓިކް ގޮތުން ބަލައިގަތުމަށް ބޭނުންވާކަން ބުނެފައެވެ.
ޣައްޒާގެ ސިއްހަތާބެހޭ ވުޒާރާގެ އެންމެ ފަހުގެ ހިސާބުތައް ދައްކާ ގޮތުގައި، 2023 ވަނަ އަހަރުގެ އޮކްޓޫބަރު މަހު ހަމާސް ޖަމާއަތުން އިޒްރޭލަށް ހަމަލާތައް ދިނުމަށްފަހު އިޒްރޭލުން ޣައްޒާގައި ހަނގުރާމަ ފެށިފަހުން، ބަނޑުހައިހޫނުކަމުގެ ސަބަބުން މަދުވެގެން 93 ކުދިންނާއެކު 379 މީހުން ވަނީ މަރުވެފައެވެ.
ކިޔުންތެރިންގެ ހިޔާލު