Author: އަޙްމަދް އަޙްނަފް

ދުންފަތް ވިއްކަން 200 އަށްވުރެ ގިނަ ލައިސެންސް އަށް އެދެފިއެވެ.

އެޗްޕީއޭއިން ބުނީ ދުންފަތުގެ ބާވަތްތައް ވިއްކުމަށް ލައިސެންސް ނަގަން ހުށައަޅަން ދިން މުއްދަތުގެ ތެރޭގައި 767 ފަރާތަކުން ހުށައެޅި ކަމަށެވެ. އޭގެތެރޭގައި ކެފޭ ރެސްޓޯރަންޓްވެސް ހިމެނޭކަމަށް އެޗްޕީއޭއިން ބުނެއެވެ.

ލައިސެންސަށް އެދި ހުށައެޅި ފަރާތަކުން 652 ފޯމުގެ ވެރިފިކޭޝަން ނިންމާފައިވާކަމަށާއި އެކި ސަބަބުތަކާއި ހުރެ މިވަގުތު ހުއްދަ ދީފައިވަނީ 209 ފަރާތަކަށްކަމަށް އެޗްޕީއޭއިން ބުނެއެވެ. އެގޮތުން ޝަރުތު ފުރިހަމަނުވާތީ 244 ފޯމު ކެންސަލްކޮށްފައިވާކަމަށާއި އިސްލާހުކުރަން ޖެހޭ ކަންކަން ހުރުމުން 177 ފަރާތެއްގެ ފޯމު މަޑުޖައްސާލާފައިވާކަމަށް އެޗްޕީއޭއިން ބުނެއެވެ.

ދުންފަތް ވިއްކަން ލައިސެންސްއަށް އެދި ހުށައެޅި އަދަދުތައް

• ސިނގިރޭޓު ވިއްކަން އެދި 608 ފަރާތަކުން
• ޓޮބޭކޯގެ އާ އުފެއްދުން ވިއްކަން އެދި 15 ފަރާތަކުން
• ޓޮބޭކޯ އެތެރެކުރިމަށް އެދި 28 ފަރާތަކުން
• ޓޮބޭކޯ ރޯ-އެކްސްޕޯޓު ލައިސެންސަށް އެއް ފަރާތަކުން

ދުންފަތް ކޮންޓްރޯލްކުރުމާ ބެހޭ ގާނޫނަށް އިސްލާހަށް މިދިޔަ އަހަރުގެ ނޮވެމްބަރު މަހު އަމަލުކުރަން ފެށުމުން، ދުންފަތުގެ ބާވަތްތައް ވިއްކޭނީ އެކަމަށް ހާއްސަ ހުއްދައެއް ނަގައިގެންނެވެ. އަދި ލައިސެންސް ދޫކުރާނީ، އެކަމަށް ކަނޑައަޅާފައިވާ ފީއެއް ދެއްކުމުން ފަސް އަހަރުގެ މުއްދަތަށެވެ.

ފީ ނަގާގޮތް

• ދުންފަތް ވަކިން ނުވަތަ ގަނޑުކޮށް ވިއްކުމަށް 5،000 ރުފިޔާ
• ދުންފަތް އިމްޕޯޓުކުރުމާއި ރީއެކްސްޕޯޓު ކުރުމަށް 10،000 ރުފިޔާ
• ކެފޭ/ރެސްޓޯރެންޓު ފަދަ ތަންތަނުގައި ދުންފަތުގެ އިސްތިއުމާލުކުރަން 10،000 ރުފިޔާ.

މީ ކޮންމެ ލައިސަންސް ލިބިމަށްފަހު އާ ކުރަން ބޭނުންވާނަމަ މުއްދަތު ހަމަވުމުގެ 60 ދުވަހުގެ ކުރިން ހުށަހަޅަންޖެހެއެވެ.

ރައީސް ޑރ. މުހައްމަދު މުއިއްޒަށް މަރުގެ އިންޒާރުދިން މައްސަލައެއް ފުލުހުން ތަހުގީގުކުރަން ފަށައިފިއެވެ.

ފުލުހުންގެ މީޑިއާ އޮފިޝަލް ވިދާޅުވީ ސޯޝަލް މީޑިއާ މެދުވެރިކޮށް ރައީސް މުއިއްޒަށް މަރުގެ އިންޒާރުދިން މައްސަލައެއް ތަހުގީގު ކުރަމުން އަންނަ ކަމަށެވެ.

ރައީސް މުއިއްޒަށް މީހަކު މަރުގެ އިންޒާރުދިނީ މަސްތުވާތަކެތި ރާއްޖެ އެތެރެކުރާ މީހުންނާއި އެތަކެތީގެ ވިޔަފާރި ކުރާ މީހުންނަށް މަރުގެ އަދަބު ދިނުމަށް ގާނޫނަށް އިސްލާހު ހުށަހަޅުއްވާނެކަން އެމަނިކުފާނު އިއުލާންކުރެއްވުމުންނެވެ.

އޮންލައިން ނޫހަކު ލިޔެފައިވާ އެ ޚަބަރު ޝެއާކޮށް މަސީހު މޫސާ ނަކަމަށް ކިޔާ މީހަކު ފޭސްބުކުގައި ލިޔެފައި ވަނީ “ފުރަތަމަ މަރާލަންވީ” ރައީސް މުއިއްޒު ކަމަށެވެ.

މަސްތުވާތަކެއްޗާ ބެހޭ ގާނޫނަށް ގެންނަ އިސްލާހު ގެނައުމުގެ ކަންކަން ކުރަންވީގޮތުގެ އިރުޝާދު ރައީސް ވަނީ ކަމާބެހޭ އިދާރާތަކަށް ދެއްވާފައެވެ.

ރާއްޖޭގެ ހަތަރު އަތޮޅެއްގެ ހަ ރަށެއްގެ ސިއްހީ މަރުކަޒުތައް އަޕްގްރޭޑްކުރުމުގެ މަސައްކަތް ސަރުކާރުން އަމިއްލަ ކުންފުނިތަކަކާ ހަވާލުކޮށްފިއެވެ.

ހެލްތު މިނިސްޓްރީގައި ބޭއްވި ރަސްމިއްޔާތުގައި އެއްބަސްވުންތަކުގައި މިނިސްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ނައިބު އިސްމާއިލް ޒާހިރެވެ.

އެގޮތުން ހއ. ވަށަފަރާއި ހއ. ތުރާކުނު ސިއްހީ މަރުކަޒުތައް އަޕްގްރޭޑްކުރުމުގެ މަސައްކަތް ހަވާލުކުރީ “ޕާފެކްޓް މަލަފެހި މޯލްޑިވްސް ޕްރައިވެޓް ލިމިޓެޑް” އާއެވެ.

ވަށަފަރު ސިއްހީ މަރުކަޒުގެ މަސައްކަތަށް 4.8 މިލިއަން ރުފިޔާ ހަރަދުވާނެ ކަމަށް ލަފާކުރެވޭއިރު، ތުރާކުނު ސިއްހީ މަރުކަޒުގެ މަސައްކަތަށް 3.4 މިލިއަން ރުފިޔާ ހަރަދުވާނެ ކަމަށް މިނިސްޓްރީން ވަނީ ލަފާކޮށްފައެވެ.

ށ. ޅައިމަގު ސިއްހީމަރުކަޒު އަޕްގްރޭޑްކުރުމުގެ މަސައްކަތް ހަވާލުކޮށްފައިވަނީ “އީކޮން މޯލްޑިވްސް ޕްރައިވެޓް ލިމިޓެޑް” އާއެވެ. މިނިސްޓްރީން ބުނީ މި މަސައްކަތަށް 4.8 މިލިއަން ރުފިޔާ ހަރަދުވާނެ ކަމަށެވެ.

ނ. މަގޫދޫ، ފ. ބިލެއްދޫ އަދި ފ. ދަރަނބޫދޫ ސިއްހީ މަރުކަޒުތައް އަޕްގްރޭޑްކުރުމުގެ މަސައްކަތް ހަވާލުކުރީ “ސަމާލު ކޮންސްޓްރަކްޝަން ޕްރައިވެޓް ލިމިޓެޑް” އާ އެވެ. މި ތިން ރަށުގެ މަސައްކަތަށް ޖުމްލަ 13.9 މިލިއަން ރުފިޔާ ހަރަދުވާނެ ކަމަށް މިނިސްޓްރީން ވަނީ ބުނެފައެވެ.

މި މަޝްރޫއުގެ ދަށުން ހުރިހާ ސިއްހީ މަރުކަޒުތަކެއްގައިވެސް އައު ވޯޑުތަކާއި، ލެބޯޓްރީތަކާއި، ނާސް ސްޓޭޝަންތަކާއި، ޕްރޮސީޖާ ރޫމްތަކާއި، ސްޓޯ ރޫމްތައް ޤާއިމްކުރެވިގެންދާނެއެވެ.

ވަޅިން ބިރު ދައްކައިގެން ފިހާރައަކުން ފައިސާތަކެއް ފޭރުނު މީހަކު 10 މަހާއި 24 ދުވަހުގެ މުއްދަތަށް ޖަލަށްލާން ކުރިމިނަލް ކޯޓުން ހުކުމްކޮށްފިއެވެ.

މި މައްސަލައިގައި ޖަލަށްލާން ހުކުމް ކުރީ ހ. ރެދަން، ފަވާޒް ކަޅުތުއްތުގެ މައްޗަށެވެ.

ފަވާޒް ވަނީ މިދިޔަ މެއި މަހުގެ އެއްވަނަ ދުވަހުގެ ހަވީރު އިސްކަންދަރު މަގުގައި ހުންނަ ފަރާއޯ ފިހާރައަށް ވަދެ، އެތަނުގެ މީހުންނަށް ވަޅިން ބިރު ދައްކައިގެން ފައިސާ ފޭރިފައެވެ.

މި މައްސަލައިގައި ފަވާޒްގެ މައްޗަށް 2 ދައުވާއެއް ދައުލަތުން ވަނީ ކޮށްފައެވެ. އޭގެ ތެރޭގައި ހިމެނެނީ މަގުބޫލު ސަބަބެއްނެތި އާންމު ތަނެއްގައި ތޫނު އެއްޗެއް ގެންގުޅުމުގެ ކުށުގެ ދައުވާ އާއި ފޭރުމުގެ ދައުވާއެވެ.

ކްރިމިނަލް ކޯޓުގެ ހުކުމުގައި ބުނީ މަގުބޫލު ސަބަބެއް ނެތި އާންމު ތަނެއްގައި ތޫނު އެއްޗެއް ގެންގުޅުމުގެ ކުށުން އޭނާ ކުށްވެރިވާ ކަމަށް ކަނޑައަޅައި، ހަމަސްދުވަހުގެ މުއްދަތަށް ޖަލަށްލުމަށް އޭނާގެ މައްޗަށް ހުކުމްކުރީ، އެ ފިހާރައަށް ވަދެ އެ ފިހާރައިގެ ކޭޝް ޑްރޯވާ ހުޅުވަން އުޅުމުން، ފިހާރައިގައި މަސައްކަތްކުރާ ނޭޕާލް މީހަކު ހުރަސް އެޅުމުން އޭނާއާ ދިމާލަށް ވަޅި ދިއްކުރުމުން ކަމަށެވެ. އެ އަމަލު ހިންގިކަމަށް ފަވާޒް ކަޅުތުއްތު ވަނީ ކޯޓުގައި އިއުތިރާފުވެފައެވެ.

މި ދައުވާއާ ގުޅިގެން އޭނާ ހަ މަހަށް ޖަލަށް ލާން ހުކުމްކޮށްފައިވާއިރު، އޭނާ ބަންދުގައި ހޭދަކުރި މުއްދަތު ޖަލު އަދަބުން އުނިކުރުމުން ތަންފީޒު ކުރަން ޖެހޭ އަދަބަކީ ތިންމަހާއި 12 ދުވަހުގެ ޖަލު އަދަބެއް ކަމަށް ކޯޓުން ވަނީ ހުކުމްކޮށްފައެވެ.

އަދި ފޭރުމުގެ ދައުވާ އޭނާގެ މައްޗަށް ކޮށްފައިވަނީ، ފިހާރައިގެ ކޭޝް ޑްރޯވާ ހުޅުވަން އުޅުމުން ހުރަސްއެޅި ނޭޕާލް މީހާއާ ދިމާލަށް ވަޅި ދިއްކުރުމުން އެކަމުގެ ބިރަށް އެ ފިހާރައިގައި މަސައްކަތްކުރަން ތިބި ނޭޕާލްގެ ދެމީހުން ފިހާރައިން ނުކުތުމުން ކޭޝް ޑްރޯވާ ހުޅުވައި އޭގައިއޮތް 700 ރުފިޔާ ނަގައިގެންގޮސްފައިވާތީއެވެ. މިކަމަށްވެސް އޭނާ ވަނީ ކޯޓުގައި އިއުތިރާފްވެފައެވެ.

އެހެންކަމުން ފޭރުމުގެ ކުށުން އޭނާ ކުށްވެރިވާކަމަށް ކަނޑައަޅައި އަދަބެއްގެ ގޮތުން ހަތަރު މަހާއި 24 ދުވަހަކަށް ޖަލަށްލުމަށް ވަނީ ހުކުމްކޮށްފައެވެ.

ގއ. ވިލިނގިލީގެ ދެ ރޯހައުސަކަށް ކުރިމަތިލި މީހުންގެ ލިސްޓު ބާތިލުކޮށް، އަލުން އިއުލާނުކުރުމުން އެކަމާ ހިތްހަމަނުޖެހުން ފާޅުކޮށް، އަންހެނަކު އެރަށު ކައުންސިލް ކުރިމަތީ އޮށޯވެ އޮވެގެން އިހުތިޖާޖު ކުރަން ފަށައިފިއެވެ.

ކައުންސިލް ކުރިމަތީ ތަންމަތި އަޅައިގެން އޮތް އެ އަންހެން މީހާ މިއަދު ހެނދުނު ކައުންސިލް ހުޅުވިއިރު ވެސް އޮތީ އެތާ ދޮރުމަތީގައެވެ.

އޭނާ ކައުންސިލް ކުރިމަތީގައި އިހުތިޖާޖު ކުރާއިރު، ފުލުހުން ވެސް އަންނަނީ ހަރަކާތްތެރިވަމުންނެވެ.

އިހުތިޖާޖު ކުރަމުންދާ އަންހެން މީހާއަކީ ހާއްސަ އެހީއަށް ބޭނުންވާ ދަރިން ހުރި މީހެކެވެ.

ވިލިގިލީގައި ހުރި ރޯ ހައުސްތަކުގެ ލިސްޓު އޭސީސީގެ އެންގުމަށް ބާތިލުކޮށް އަލުން މިހާރު ވަނީ ކުރިމަތިލާން ހުޅުވާލައިފައެވެ.

މީގެ ކުރިން ވެސް އެންޓިކޮރަޕްޝަން ކޮމިޝަނަށް (އޭސީސީ) މައްސަލައެއް ހުށަހެޅިގެން ރޯހައުސް ދޫކުރުންވަނީ ހުއްޓައިލައިފައެވެ.

ޢުމްރާއަށްދިޔަ ދިވެއްސަކު ނިޔާވެއްޖެއެވެ.

ނިޔާވެފައިވަނީ މޯލްޑިވްސް ޙައްޖު ކޯޕަރޭޝަންގެ ހަވާލުގައި މި ޖުލައިމަހު ޢުމްރާއަށްދިޔަ ފަރާތެއްކަމަށްވާ ރ. ފައިނު އުޑުވިލާގެ މަރިޔަމް ސިޔާމާއެވެ.

މަޢުލޫމާތު ލިބިފައިވާގޮތުގައި އުމުރުން 42 އަހަރުގެ މަރިޔަމް ސިޔާމާ ނިޔާވީ ފުރަތަމަ ޢުމްރާ ނިންމައި، މަދީނާއަށް ގޮސް އެނބުރި އައި މަގުމަތީގައި ގުބާ މިސްކިތުގައި ދެ ރަކުއަތުގެ ނަމާދެއް ކުރިތާ އިރުކޮޅެއް ފަހުންނެވެ. އެއީ ރާއްޖޭގެ ގަޑިން މިއަދުގެ މެންދުރު އެކެއް ޖަހާކަށްހާއިރުކަމަށްވެސް މަޢުލޫމާތު ލިބިފައިވެއެވެ.

ސިޔާމާ ނިޔާވުމާ ގުޅިގެން ޙައްޖު ކޯޕަރޭޝަނުން ވަނީ އެކުންފުނީގެ މެނޭޖިންގ ޑިރެކްޓަރ އަދި އެންމެހާ މުވައްޒަފުންގެ ނަމުގައި ސިޔާމާގެ އާއިލާށް ތައުޒިޔާ ދަންނަވާފައެވެ.