ސައުދީ އަރަބިއާގެ ޖިއްދާގައި ކުރިއަށްދިޔަ ސްޕެނިޝް ސުޕަ ކަޕްގެ ފައިނަލުގައި ރެއާލް މެޑްރިޑް ބަލިކޮށް، ބާސެލޯނާއިން ޖެހިޖެހިގެން ދެވަނަ ފަހަރަށް ތަށި އުފުލާލައިފިއެވެ.
މިދިޔަ އަހަރު ފައިނަލުގައިވެސް ބާސާއިން ރެއާލް ބަލިކޮށްފައިވާ އިރު، މިއީ ބާސާއިން ސުޕަ ކަޕް ކާމިޔާބުކުރި 16 ވަނަ ފަހަރެވެ. ރޭ ފޯރިގަދަކޮށް ފެނިގެން ދިޔަ މެޗުގައި ބާސާއިން ރެއާލް ބަލިކުރީ 3-2 ގެ ނަތީޖާއަކުންނެވެ.
އަވަސް، ހަމަލާތައް ގިނަ ކުޅުމެއް ފެނިގެން ދިޔަ އެލް ކްލެސިކޯގައި ފުރަތަމަ މިނެޓުން ފެށިގެންވެސް ޕްރެޝަރު ފެނިގެން ދިޔައެވެ. ރެއާލްގެ ވިނީޝިއަސް ޖޫނިއާގެ ބާރު ދުވެލި ހުއްޓުވަން ބާސާއަށް އުނދަގޫތައް ކުރިމަތިވެފައިވާ އިރު، އަނިޔާއިން އެނބުރި އައި ކިލިއަން އެމްބާޕޭ ފުރަތަމަ 11 ގައި ފެނިގެން ނުދެއެވެ.
އެމްބާޕޭ ކުޅެން ނުކުތީ ދެވަނަ ހާފުގައެވެ.
މެޗުގެ ފުރަތަމަ ހާފު ނިމެން ދަނިކޮށް، ކުއްލިއަކަށް ގޯލްތައް ފެންނަން ފެށިއެވެ. 36 ވަނަ މިނެޓުގައި ރަފީނިއާ، ގޯލްގެ ކަނަށް އަމާޒުކޮށްލި ބޯޅައާއެކު ބާސާއިން ލީޑު ނެގި ނަމަވެސް، ރެއާލުން ފުލުފުލުގައި ގޯލްތައް ޖަހައި މެޗު އަނބުރާލިއެވެ. އެ ދެގޯލްވެސް ފެނުނީ ފުރަތަމަ ހާފުގެ އިތުރު ވަގުތުގެ ތެރޭގައެވެ.
ރެއާލްގެ ފުރަތަމަ ގޯލް، ޖޫލްސް ކޫންޑޭ ކައިރިން ނައްޓާލައިފައި ވިނީޝިއަސް ޖަހައިދިން އިރު، އަނެއް ގޯލް ޖެހީ ގޮންޒާލޯ ގާސިއާއެވެ. މެޗުގައި ވިނީޝިއަސް ޖެހި ގޯލަކީ 17 މެޗަށްފަހު އޭނާ ޖަހައިދިން ފުރަތަމަ ގޯލެވެ.
ދެވަނަ ހާފު ފެށިގެން މާގިނައިރެއް ނުވެ ބާސާއިން މެޗު އެއްވަރުކުރިއެވެ. އެ ގޯލް ޖަހައިދިނީ ރޮބާޓް ލެވަންޑޯސްކީއެވެ.
އެ ގޯލަށްފަހު ބާސާއިން އުންމީދުގައި ކުޅެމުން ގޮސް، ރަފީނިއާގެ ދެވަނަ ގޯލަކާއެކު މެޗު އަނބުރާލިއެވެ. ފަހުކޮޅުގައި ކިލިއަން އެމްބާޕޭގެ ފަޔަށް ކުރި ޓެކުލަކަށް ބާސާގެ ފްރެންކީ ޑި ޔޯންގަށް ރަތް ކާޑު ދައްކާފައިވާ އިރު، ފަހު މިނެޓުގައި ދެކޮޅަށްވެސް ފުރުސަތައް ލިބުނެވެ.
ކިޔުންތެރިންގެ ހިޔާލު