މިނިވަން ޗެމްޕިއަންޝިޕް ފުޓްބޯޅަ މުބާރާތުގެ ޒޯން 1 (ހާ އަލިފް އަދި ހާ ދާލު) ގެ މެޗުތަކުގައި ކޮމެންޓްރީ ދިން ކޮމެންޓޭޓަރު، އަސްލު ޓިން ޓިންގެ ބަސްމަގު ހުރިގޮތާ މެދު ގިނަ އާއްމު ރައްޔިތުންތަކެއް ހިތްހަމަނުޖެހުން ފާޅުކޮށް، އޭނާއާ މެދު އެކަށީގެންވާ ފިޔަވަޅު އެޅުމަށް ފުޓްބޯޅަ އެސޯސިއޭޝަން އޮފް މޯލްޑިވްސް (އެފް.އޭ.އެމް) އަށް ގޮވާލައިފިއެވެ.
މި މައްސަލައިގައި ކުޅިވަރުގެ ރޫޙާ ހިލާފަށް ކުޅުންތެރިންނަށް މަލާމަތް ރައްދުކޮށް، ބުލީކުރުމުގެ ބީދައިން ބަސްމަގު ބޭނުންކޮށްފައިވާތީ އެކަމުގެ ކަންބޮޑުވުން ވަނީ ފާޅުކޮށްފައެވެ. ވަކިވަކި ކުޅުންތެރިންނަށް ނިސްބަތްކޮށް އިހާނެތިކޮށް ހިތުމަކީ ބަލައިގަނެވޭނެ ކަމެއް ނޫން ކަމަށާއި، މިއީ ފުޓްބޯޅައިގެ ތެރޭގައި އޮންނަންޖެހޭ އިހުތިރާމް ކުޑަކަން ހާމަވާ ކަމެއް ކަމަށް ބައެއް ފަރާތްތަކުން ހިއްސާކޮށްފައިވެއެވެ. އަދި ޓީމް ހަނިމާދޫ ޕޭޖުގެ އޮފިސަލް ސްޓޭޓްމެންޓުގައިވެސް މިކަން ހާމަކޮށްފައިވެއެވެ
މި އަމަލަކީ ދުނިޔޭގެ ފުޓްބޯޅައިގެ މައި އިދާރާ، ފީފާ (FIFA) އިން ކަނޑައަޅާފައިވާ ފެއާޕްލޭ ނުވަތަ އިންސާފުވެރި ކުޅުމުގެ އަސާސްތަކާ ކަނޑައެޅިގެން ހިލާފު ކަމެކެވެ. ފީފާގެ ކޯޑް އޮފް ކޮންޑަކްޓްގެ 3 ވަނަ މާއްދާގައިވާ ގޮތުން، ފުޓްބޯޅަ ބިނާވެގެންވަނީ އިހުތިރާމާއި، ތެދުވެރިކަމާއި، އިންސާފުވެރި ކުޅުމުގެ މައްޗަށެވެ. މީގެ ތެރޭގައި އިދިކޮޅު ޓީމަށާއި، ކުޅުންތެރިންނަށާއި، އޮފިޝަލުންނަށް އިހުތިރާމްކުރުމާއި، އިހާނެތި ބަސް ބުނުމުން ދުރުހެލިވުން ހިމެނެއެވެ.
މީގެ އިތުރުން، ދަނޑުމަތީގައާއި ދަނޑުން ބޭރުގައިވެސް ކުޅިވަރުގެ ގަދަރާއި ހަމަހަމަކަން ދެމެހެއްޓުމަކީ ފީފާގެ އުސޫލުތައް ލާޒިމުކުރާ ކަމެކެވެ. ކޮމެންޓޭޓަރުންނަކީ އާންމުންގެ މެދުގައި ނުފޫޒު ފޯރުވޭ ފަދަ މަގާމުތަކެއްގައި ތިބޭ ބަޔަކަށް ވީހިނދު، ކޮންމެ ވަގުތެއްގައިވެސް ޕްރޮފެޝަނަލް މިންގަނޑުތައް ހިފަހައްޓަންޖެހޭނެ ކަމަށް މި މައްސަލައިގައި ވަނީ ބުނެފައެވެ.
މިފަދަ ހާދިސާތަކުގެ ސަބަބުން ކުޅިވަރުގެ ރޫޙަށް ނޭދެވޭ އަސަރުކުރާނެތީ، އެފް.އޭ.އެމް އިން މިކަން ސީރިއަސް މައްސަލައެއްގެ ގޮތުގައި ބަލައި، އަސްލު ޓިން ޓިންއާ މެދު ހަރުކަށި ފިޔަވަޅު އެޅުމަށް ގިނަ ފަރާތްތަކަކުން އަންނަނީ ބާރުއަޅަމުންނެވެ.
ދިއްދޫ އާއި ހަނިމާދޫ ބައްދަލުކުރި ފުޓްބޯޅަ މެޗުގައި ހިނގާދިޔަ ބައެއް ހާދިސާތަކަކީ ކުޅިވަރުގެ ރޫހާ މުޅިން ޚިލާފު، އަދި ކުޅުންތެރިންގެ ސަލާމަތަށް ނުރައްކާވާ ފަދަ ކަންތައްތަކެއް ކަމަށް ބުނެ ހަނިމާދޫ ޓީމުގެ ފަރާތުން ކަންބޮޑުވުން ފާޅުކޮށްފިއެވެ.
މި މައްސަލައާ ގުޅިގެން ހަނިމާދޫ ޓީމުންނާއި އާއްމުންގެ ގިނަ ބަޔަކު ފާހަގަކޮށްފައިވާ އެންމެ ބޮޑު އެއް ޝަކުވާއަކީ މެޗުގެ ކޮމެންޓޭޓަރުންގެ އަމަލުތައް ހުރި ގޮތެވެ. އެގޮތުން ގްރޫޕް ސްޓޭޖުގެ މެޗުތަކުގައި ދިއްދޫ ޓީމުން ގޯލެއް ޖެހުމުން، ރެފްރީންގެ ނިންމުމަށް ބެލުމެއް ނެތި ކޮމެންޓޭޓަރުން އުފާފާޅުކުރުމަކީ ރެފްރީންގެ ނިންމުންތަކަށް އިހުތިރާމް ކުޑަކުރުން ކަމަށް އެ ޓީމުން ސިފަކުރެއެވެ.
މީގެ އިތުރުން، މެޗުގެ ދެވަނަ ހާފުގެ 58 ވަނަ މިނެޓުގައި ހިނގި ނުރައްކާތެރި ހާދިސާއެއްގެ ކަންބޮޑުވުން ވެސް އެ ޓީމުން ވަނީ ހިއްސާކޮށްފައެވެ. އެ ވަގުތަކީ ދިއްދޫގެ ކުޅުންތެރިން ފައުލްއެއް ކޮށްފައިވަނިކޮށް، އެއީ ފައުލްއެއް ކަމަށް ނުނިންމައި ގޯލެއް ކަމަށް ކަނޑައެޅި ވަގުތެކެވެ. އެ ވަގުތު ހަނިމާދޫ ޓީމުގެ ޖޯޒީ ނަންބަރު 19، ހުޒާމް ޢަބްދުއް ރަޙީމް ބިމަށް ވެއްޓިފައި އޮއްވައި، ދިއްދޫ ޓީމުގެ ޖޯޒީ ނަންބަރު 16، މުހައްމަދު ރަޝީދު ގަސްދުގައި އޭނާގެ ގައިގައި ފައިން ޖަހާފައިވާ ކަމަށް ގިނަ ބަޔަކު ތުހުމަތު ކުރެއެވެ.
ހަނިމާދޫ ޓީމުން މި އަމަލު ސިފަކޮށްފައިވަނީ “ލާއިންސާނީ، އިހާނެތި އަދި ފިނޑި” އަމަލެއްގެ ގޮތުގައެވެ. އަދި މިއީ ކުޅުންތެރިޔާގެ ސަލާމަތަށް އޮތް ބޮޑު ނުރައްކަލެއް ކަމަށް ސޯސަލް މީޑިއާގައި ދަުއުރުކުރާ ވީޑިއޯ ތަކުގައި މީހުން ސުއޫރު ފާޅުކޮށްފައިވެއެވެ.
މިމައްސަލަ އެފް.އޭ.އެމް އަށް ހުށަހަޅާނެކަމަށް ބެލެވެއެވެ.
ކިޔުންތެރިންގެ ހިޔާލު