ބީއެމްއެލް ނޯތު ރީޖަން ލީގުގެ ޒޯން 1 ގެ ޗެމްޕިއަން ހދ. ހަނިމާދޫ އަދި ރަނަރ އަޕް ހއ. ދިއްދޫ ބައްދަލުކުރާ ‘ރީމެޗު’ މިއަދު ހަވީރު ކުޅުމަށް ވަނީ ހަމަޖެހިފައެވެ.
ދިއްދޫގައި ކުޅޭ މި މެޗަށް ދެ ޓީމުން ނިކުންނައިރު ފާހަގަކޮށްލަން ޖެހޭ ކަމަކީ ކޮލިފައިއާސްގައި މި ދެ ޓީމު ބައްދަލުކޮށްފައިވާ ކަމެވެ. ކޮލިފައިއާސްގެ ފައިނަލުގައި ދެ ޓީމު ކުޅުނު ވާދަވެރި މެޗު 3-3 އިން އެއްވަރުވެގެން ނިމުނު ކަމުގައިވިޔަސް ޕެނަލްޓީ ޖަހައިގެން ޗެމްޕިއަންކަން ކާމިޔާބު ކޮށްފައިވަނީ ހަނިމާދޫއެވެ.
ރީޖަން ލީގުގައި ދެ ޓީމު ކުޅެފައިވާ މެޗުތަކަށް ބަލާލާއިރު ދެ ޓީމު ވެސް ވަނީ ފުރަތަމަ މެޗު ކާމިޔާބު ކޮށްފައެވެ. އެ ގޮތުން ހަނިމާދޫ 5-0 ގެ ތަފާތު ބޮޑު ނަތީޖާއިން ނ. މަނަދޫ މައްޗަށް ކުރި ހޯދާފައިވާއިރު ދިއްދޫ ވަނީ ބ. އޭދަފުށި ‘ބްރެޒިލް’ މައްޗަށް 2-1 ގެ ނަތީޖާއަކުން ކުރި ހޯދާފައެވެ.
ނޯތު ރީޖަންގެ އެއްވަނައިގައި އޮތް ދެ ޓީމު ބައްދަލުކުރާ ފޯރިގަދަ މެޗު ފެށުމަށް ހަމަޖެހިފައިވަނީ މިއަދު ހަވީރު 16:00 ގައެވެ. މިއަދުގެ މެޗަށް ދިއްދޫ ނިކުންނަނީ ހޯމް އެޑްވާންޓޭޖާ އެކީގައި ކަމުގައިވިޔަސް މުބާރާތުގެ ފޯމެޓުގެ ދަށުން އަދި ހަނިމާދޫގެ ދަނޑުގައި ވެސް ދެ ޓީމު ބައްދަލުކުރާނެއެވެ.
ކިޔުންތެރިންގެ ހިޔާލު