އިންޑިއާ ކަނޑުގައި ހަރަކާތްތެރިވާ އެމެރިކާގެ މަނަވަރުތަކަށް އީރާނުން ހަމަލާދީފިއެވެ.
އީރާނުގެ ވެރިރަށް، ތެހެރާނުގައި ހުރި “އަލްޖަޒީރާ”ގެ ނޫސްވެރިއަކު އެކަން ހާމަކޮށްފައިވަނީ އީރާނުން ނެރުނު ބަޔާނަކާއި ހަވާލާދީއެވެ.
އެގޮތުން އީރާންގެ އަސްކަރިއްޔާ އިން ނެރުނު ބަޔާނެއްގައި މީގެ ކުޑައިރުކޮޅެއް ކުރިން، އެކި ހިސާބުތަކަށް 15 ކްރޫޒް މިސައިލް ފޮނުވާލާފައިވާ ކަމަށް ބުނެފައިވާ ކަމަށް އެ ނޫސްވެރިޔާ ވަނީ ބުނެފައެވެ.
އެ މިސައިލްތައް ފޮނުވާލާފައިވަނީ ކުވައިތުގައި ހުންނަ އެމެރިކާގެ އަސްކަރީ މަރުކަޒަށާއި އިންޑިއާ ކަނޑުގައި ހަރަކާތްތެރިވަމުން އަންނަ އެމެރިކާގެ އަސްކަރީ އުޅަނދުތަކަށް އަމާޒުކޮށް ކަމަށް ވެސް ބަޔާނާއި ހަވާލާދީ ނޫސްވެރިޔާ ބުންޏެވެ.
އީރާނުން އެ ހަމަލާތައް ފޮނުވާޅި ނަމަވެސް މިހަމަލާތައް އެމެރިކާގެ ކަނޑު އުޅަނދުތަކަށް އެރި ކަމެއް ނުވަތަ ނޫން ކަމެއް އަދި ސާފުވެފައެއް ނުވެއެވެ.
އީރާނުން އިސްރާއީލާއި އެމެރިކާއާއި ގުޅުން އޮންނަ އަސްކަރީ މަރުކަޒުތަކަށް ދެމުން އަންނަ ހަމަލާތަކަކީ މިދިޔަ މަހުގެ 28 ވަނަ ދުވަހު އެމެރިކާއާއި ގުޅިގެން އިސްރާއީލުން އީރާނަށް ދިން ހަމަލާތަކުގެ ބަދަލުހިފުމުގެ ގޮތުން ދެމުން އަންނަ ހަމަލާތަކެވެ. އެގޮތުން އެ ހަމަލާގެ ބަދަލު ހިފުމުގެ ގޮތުން އިސްރާއީލަށް ސީދާ ހަމަލާތަކެއް ފޮނުވާލާފައިވާއިރު، އީރާނުން ދަނީ މެދުއިރުމަތީގެ ގައުމުތަކުގެ ތެރެއިން އެމެރިކާގެ އަސްކަރީ މަރުކަޒުތައް ގާއިމުކޮށްފައިވާ އަރަބި ގައުމުތަކުގައި ހުންނަ އެ މަރުކަޒުތަކަށް ހަމަލާތައް އަމާޒު ކުރަމުންނެވެ.
ކިޔުންތެރިންގެ ހިޔާލު