މިއީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރީނދޫ ލަސްކަރުގެ ސަފުތައް އަލުން ރުކުރުވާލައި، އެންމެން އެކުގައި ނުކުމެ މިހާރު އޮތް ރައީސް ޑރ. މުހައްމަދު މުއިއްޒުގެ ސަރުކާރު ބަލިކުރުމަށްފަހު، ދިވެހި ރައްޔިތުން ބޭނުންވާ ފަދަ އެމްޑީޕީގެ ވެރިކަމެއް ހޯދައިދިނުމުގެ މަސައްކަތް ފަށަންވީ ވަގުތު ކަމަށް އެ ޕާޓީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު މިފަދައިން ވިދާޅުވީ އެމްޑީޕީގެ ހުސްވެފައިވާ ޗެއާޕާސަންގެ މަގާމަށް ބޭފުޅަކު ހޮވުމަށް މިއަދު ބޭއްވި އިންތިޚާބު، ކުރީގެ ރައީސް މުޙައްމަދު ނަޝީދު ބޮޑު ތަފާތަކުން ކާމިޔާބުކުރެއްވުމާ ގުޅިގެން ފޭސްބުކްގައި ކުރެއްވި ޕޯސްޓެއްގައެވެ.
މި އިންތިޚާބުން ރައީސް ނަޝީދު ހޯއްދެވި ބޮޑު ކާމިޔާބީއަށް މަރުޙަބާ ދަންނަވަމުން ޝާހިދު ކުރެއްވި ޕޯސްޓުގައި ވިދާޅުވީ، މިއީ ރާއްޖޭގެ ސިޔާސީ ޕާޓީއަކުން މިފަހުން ބޭއްވި އެންމެ ބޮޑު އެތެރޭގެ ސިޔާސީ ޙަރަކާތް ކަމަށެވެ. އަދި ޕާޓީގެ ޑިމޮކްރަސީގެ ރޫޙު ދައްކުވައިދިން ހުރިހާ މެންބަރުންނަށާއި، އިންތިޚާބުގެ ކަންކަން އަމާންކަމާއެކު ކުރިއަށް ގެންގޮސްދެއްވި ވޮލަންޓިއަރުންގެ އިތުރުން، ވާދަކުރެއްވި ކެންޑިޑޭޓުން ދެއްކެވި ޑިމޮކްރަސީގެ ރީތި ނަމޫނާއަށް ޝާހިދު ވަނީ ޝުކުރު އަދާކުރައްވާފައެވެ.
މި އިންތިޚާބުގައި ނަޝީދު ވާދަކުރެއްވީ ރައީސް އިބްރާހީމް މުޙައްމަދު ޞާލިޙުގެ ތާއީދާއެކު ނުކުމެވަޑައިގެންނެވި މަޖިލިސް މެންބަރު މީކާއީލް އަހުމަދު ނަސީމާއެވެ.
މި އިންތިޚާބަކީ ރައީސް ނަޝީދު އެމްޑީޕީން ވަކިވެވަޑައިގެން ‘ދަ ޑިމޮކްރެޓްސް’ އުފެއްދެވުމަށްފަހު، އަލުން ޕާޓީއާ ގުޅިވަޑައިގެން ކުރިމަތިލެއްވި ފުރަތަމަ ބޮޑު އެތެރޭގެ އިންތިޚާބެވެ.
އިންތިޚާބުގެ ފޯރިގަދަވެފައިވަނީ ޕާޓީގެ ތެރޭގައި އޮތް ދެ ފެކްޝަނުގެ މެދުގައި އޮތް ވާދަވެރިކަމުގެ ސަބަބުން ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.
ކުރިން މި މަގާމުގައި ހުންނެވި ފައްޔާޒު އިސްމާޢީލް އިސްތިއުފާ ދެއްވުމާ ގުޅިގެން ބޭއްވި މި އިންތިޚާބުގައި ފައްޔާޒު ތާއީދުކުރެއްވީ ރައީސް ނަޝީދަށެވެ.
ނަޝީދު ކެމްޕޭން ކުރެއްވީ އެމްޑީޕީގެ “ރީނދޫ ލަޝްކަރު” އަލުން ރުކުރުވާލައި ޕާޓީއަށް ބޮޑެތި ބަދަލުތަކެއް ގެނައުމުގެ ވައުދާއެކުގައެވެ. އަނެއްކޮޅުން މީކާއިލްގެ ކެމްޕޭން ބިނާކުރެއްވީ “އިތުބާރު” މި ޝިއާރުގެ ދަށުން ޕާޓީގެ އެތެރޭގެ ބައިބައިވުންތައް ނައްތާލުމުގެ މައްޗަށެވެ.
މި އިންތިޚާބަކީ ޕާޓީ އިތުރަށް ވަރުގަދަކޮށް، ކުރިއަށް އޮތް ރިޔާސީ އިންތިޚާބަށް ތައްޔާރުވުމަށް އެޅުނު މުހިންމު ފިޔަވަޅެއްގެ ގޮތުގައި އެމްޑީޕީން ސިފަކުރެއެވެ.
ޝާހިދު ވިދާޅުވި ގޮތުގައި މިހާރު އޮތް އަމާޒަކީ އެންމެން އެކުގައި ނުކުމެ ސަރުކާރު ޖަވާބުދާރީކުރުވައި، އެމްޑީޕީގެ ވެރިކަމެއް އަނބުރާ ހޯދުމެވެ.
ޝާހިދުގެ އިތުރުން ކުރީގެ އިކޮނިމިކް މިނސްޓަރު ފައްޔާޒް އިސްމާއީލް ވެސް ވަނީ ނަޝީދު ހޯއްދެވި ކާމިޔާބީ ފާހަގަކުރައްވައި ޕޯސްޓެއް ކުރައްވާފައިއެވެ. ފައްޔާޒް ވެސް ވިދާޅުވީ މި ވޯޓުން ރައްޔިތުން ބޮޑު ބަދަލަކަށް ބޭނުންވެފައިވާކަން ވަރަށް ރަނގަޅަށް ހާމަވެގެން ހިނގައްޖެކަމަށެވެ.
ކިޔުންތެރިންގެ ހިޔާލު