ކުރިއަށް އޮތް ލޯކަލް ކައުންސިލްގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ ކެމްޕޭނާ ދިމާކޮށް އެމްޑިޕީގެ ރައީސް އަބްދުﷲ ޝާހިދު ރާއްޖޭގެ އެކި ކަންކޮޅުތަކަށް ކުރައްވަމުންގެންދަވާ ދަތުރުފުޅާއެކު އެންމެ ބޮޑު ސަމާލުކަމެއް ހުއްޓިފައިވަނީ އާންމު ދިވެހި ރައްޔިތުންނާއެކު ހޭދަކުރާ ވަގުތުތަކާއި އެމްޑީޕީގެ ސިޔާސަތުތަކާއެކު ސަރުކާރު ޒިންމާދާރުކުރަން ކުރައްވާ މަސައްކަތްޕުޅެވެ.
އެމްޑީޕީގެ ރައީސްކަމުގެ އިތުރުން ޝާހިދަކީ މިހާރު އެ ޕާޓީގެ ބޮޑެތި ބޮޑެތި ޒިންމާތަކެއް އަދާކުރައްވަމުން އަންނަ ހަރުދަނާ ލީޑަރެކެވެ. އެކަން މިހާރު ކުރިއަށްގެންދަވާ ދަތުރުފުޅުތަކުގެ ތެރެއިން ވަރަށް ބޮޑަށް ފާހަގަވެއެވެ.
އެންމެ ބޮޑަށް ފާހަގަކޮށްލެވެނީ ޑޯޓުޑޯ ހަރަކާތެވެ. މި ސަރުކާރުގެ ފޫނުބެދޭ ސިޔާސަތުތަކާއި އިހުމާލުތަކުގެ ވާހަކަތައް އަޑުއެހުމަށް ޝާހިދުގެ ލީޑަޝިޕާއެކު އެމްޑީޕީގެ ބައެއް އާންމު މެންބަރުންނާއި، ރައްޔިތުންގެ މަޖިލީހުގެ ބައެއް މެންބަރުން ހިމެނޭ ޓީމުން ރާއްޖޭގެ އެކި ކަންކޮޅުތަކުގައި މިހާރު ކުރިއަށްގެންދަވާ ޑޯޓުޑޯ ހަރަކާތް ވަރަށްވެސް ކާމިޔާބެވެ.
“އެންމެ ބޮޑަށް ފާހަގަވާ ކަމަކީ އެމްޑީޕީން މިހާތަނަށް ގެންގުޅުނު ސިޔާސަތުތަކާއެކު އޭގެ ސަބަބުން އާންމު ދިވެހި ރައްޔިތުންނަށް ލިބެމުންދިޔަ ފައިދާ، މި ސަރުކާރުން ލާމަރުކަޒީ ނިޒާމަށް ވަމުންދާ އިހުމާލުތަކާއެކު އެންމެ ބޮޑު ގެއްލުމެއް ލިބެނީ އާންމު ދިވެހި ރައްޔިތުންނަށް، ޑޯޓުޑޯ ހަރަކާތުން އެންމެ ބޮޑަށް އަޑުއިވެނީ އެ ރައްޔިތުންނަށް މި ސަރުކާރުން ވަމުންދާ އިހުމާލު، އަދި އެމްޑީޕީގެ ކާމިޔާބު ލާމަރުކަޒީ އުސޫލުގެ މުހިންމުކަން” މި ދަތުރުގައި ހަރަކާތްތެރިވި އެމްޑީޕީގެ އިސްވެރިން “ހަވާސާ” އާއި ވާހަކަދައްކަވަމުން ވިދާޅުވިއެވެ.
ރާއްޖޭގެ އެކި ކަންކޮޅުތަކަށް ކުރައްވަމުންގެންދަވާ ދަތުރުފުޅުގެ ތެރެއިން މިހާރު ވަނީ އައްޑޫ ސިޓީގެ އިތުރުން ފުވައްމުލަކު ސިޓީ ގައިވެސް ކެމްޕެއިންގެ ހަރަކާތްތައް ފަށާފައެވެ.
އެމްޑީޕީގެ ރައީސް އަބްދުﷲ ޝާހިދު ބައިވެރިވެވަޑައިގަންނަވާ މިދަތުރުފުޅުގައި ޒިޔާރަތްކުރައްވާ ދެ ސިޓީގެ ވެސް ދޮރުން ދޮރަށް ކެމްޕެއިން ހަރަކާތުގެ އިތުރުން ޖަގަހަ ހުޅުވުމުގެ ހަރަކާތްތައްވެސް ކުރިއަށް ގެންދިއުމަށް ވަނީ ހަމަޖެހިފައެވެ.
ކުރިއަށް އޮތް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގެ ކެމްޕެއިން މިމަހުގެ 12 ވަނަ ދުވަހުގެ ރޭ ލޯންޗުކުރުމަށް ފަހު އެމްޑީޕީން އަންނަނީ އަތޮޅުތެރޭގެ އެކި ރާށްރަށަށް ޒިޔާރަތް ކުރައްވަމުންނެވެ. އޭގެ އިތުރުން ކެނޑިޑޭޓުންނާއި ބައްދަލުކުރައްވާ މުހިންމު މަޝްވަރާތަކެއް ކުރައްވާނެއެވެ.
ކިޔުންތެރިންގެ ހިޔާލު