ސަރުކާރުން އާންމު ވިޔަފާރިވެރިން ކުރަމުންދާ ކުދި ވިޔަފާރިތަކުގެ ތެރެއަށް ވަންނަމުންދާތީ، އެކަމަށް ފާޑުވިދާޅުވަމުން އެމްޑީޕީގެ ޑެޕިއުޓީ ޗެއާޕާސަން އަހްމަދު އަބްދުﷲ ވަރުގަދަ ބަހުގެ ހަމަލާތަކެއް ސަރުކާރަށް އަމާޒުކުރައްވައިފިއެވެ.
ސޯޝަލް މީޑިއާ ޕްލެޓްފޯމް ‘އެކްސް’ ގައި ކުރެއްވި ޕޯސްޓެއްގައި އަހްމަދު އަބްދުﷲ ވިދާޅުވީ، މިހާރުގެ ސަރުކާރުން ކަންކަން ކުރަމުންދާ ގޮތަށް ބަލާއިރު، ސަރުކާރުން ކުރަން އެންމެ ރަނގަޅު އެއް ކަމަކީ ހެދި ބިލެތާއި ކިއްލި ވިއްކުން ކަމަށެވެ. އޭނާ ފާހަގަކުރެއްވި ގޮތުގައި، ރައްޔިތުންނަށް ފައިދާހުރި އެއްވެސް ކަމެއް މި ސަރުކާރަށް ކުރެވޭނެ ކަމުގެ އުންމީދެއް ނެތެވެ.
Sarukaarun mihaaru kuran enme rangalhu ekkamakee hedhi bilethaa killi vikkun. Rayyithakah faidhaahuri evves kameh misarukaarakah nukureveyne.
— Ahmed Abdulla (@ahmedabdulla2a) February 6, 2026
އަހްމަދު އަބްދުﷲ މިފަދައިން ވިދާޅުވެފައިވަނީ، އާންމު ރައްޔިތުންނާއި ކުދި ވިޔަފާރިވެރިން އާމްދަނީ ހޯދުމަށް ކުރަމުންދާ މަސައްކަތްތަކުގެ ތެރެއަށް ސަރުކާރުގެ ކުންފުނިތަކުން ވަންނަމުންދާ ދަނޑިވަޅެއްގައެވެ. މިކަމުގެ ސަބަބުން އާންމު ވިޔަފާރިވެރިންނަށް ލިބޭ ފުރުސަތުތައް ހަނިވެ، އިގްތިސާދީ ގޮތުން ދަތިތަކާ ކުރިމަތިވަމުންދާ ކަމަށް އިދިކޮޅު ފަރާތްތަކުން އަންނަނީ ބުނަމުންނެވެ.
ރައީސް ޑރ. މުހައްމަދު މުއިއްޒުގެ ސަރުކާރުގެ ސިޔާސަތުތަކަށް ފާޑުވިދާޅުވަމުން އަހްމަދު އިތުރަށް ވިދާޅުވީ، ސަރުކާރުގެ މިސްރާބު ހުރީ ރައްޔިތުންގެ ޖީބަށް ފައިދާވާނެ ގޮތަކަށް ނޫން ކަމަށާއި، މިއީ ގައުމުގެ އިގްތިސާދަށް އޮތް ބޮޑު ނުރައްކަލެއް ކަމަށެވެ.
ކިޔުންތެރިންގެ ހިޔާލު