އުއްތަރު ޕްރަދޭޝްގެ އާގްރާގައި އުޅޭ އަންހެނަކު، އޭނާގެ ފިރިމީހާ ގަވާއިދުން ފެންނުވަރާތީ ވަރިއަށް އެދިއްޖެއެވެ.
އޭނާ ވަރިއަށް އެދިފައިވަނީ ކައިވެނިކުރިތާ އެންމެ މަހެއްހާ ދުވަސް ވެފައިވަނިކޮށް ކަމަށް އިންޑިއާ ޓުޑޭގެ ރިޕޯޓެއްގައި ބުނެފައިވެއެވެ.
ރިޕޯޓުގައި ބުނެފައިވާ ގޮތުގައި، އެ ފިރިހެން މީހާ ފެންވަރަނީ މަހަކު އެއް ފަހަރު ނުވަތަ ދެ ފަހަރު އެކަނި ކަމަށާއި، އޭގެ ސަބަބުން އޭނާގެ ހަށިގަނޑުން ނުބައި ވަސް ދުވާ ކަމަށެވެ. އަދި އެކަން އޭނާގެ އަނބިމީހާއަށް ތަހައްމަލު ނުކުރެވޭ ކަމަށް ބުނެފައިވެއެވެ.
އެހެންވެ ކައިވެނިކޮށްގެން 40 ދުވަސް ވުމަށްފަހު، އަންހެން މީހާ ވަނީ ވަރިވުމަށް ނިންމާފައެވެ.
ސުވާލު އުފެދިފައިވާ ފިރިހެން މީހާ ކަމަށްވާ ރާޖޭޝް، ހަފުތާއަކު އެއްފަހަރު އިންޑިޔާ މީހުން މާތްކަމަށް ދެކޭ ކޯރެއް ކަމަށްވާ ގަންގާ ކޯރުން ފެންވަރައެވެ. ނަމަވެސް، ކައިވެނިކުރުމަށްފަހު، އޭނާގެ އަނބިމީހާގެ އެދުމުގެ މަތިން މަތިން 40 ދުވަހުގެ ތެރޭގައި 6 ފަހަރު ފެންވަރާފައިވާ ކަމަށް ރިޕޯޓުގައި ބުނެފައިވެއެވެ.
އަންހެން މީހާގެ އާއިލާއިން ފުލުހުންނަށް “ކާވެނީގެ ރަން” ހޯދުމުގެ ފުރައްސާރައިގެ ޝަކުވާއެއް ހުށަހަޅައި، ވަރިވުމަށް އެދިފައިވާ ކަމަށް ބުނެފައެވެ. އޭރު އަންހެން މީހާ ވަނީ، ފިރިމީހާއާ ދެބަސްވުމަށްފަހު، އޭނާގެ މައިންބަފައިންގެ ގެއަށް އެނބުރި ގޮސްފައެވެ. އަދި ފިރިމީހާ ވަނީ އެންމެ ފަހުން އަމިއްލަ ސާފުތާހިރުކަން ރަނގަޅުކުރުމަށް އެއްބަސްވެފައެވެ.
ނަމަވެސް، އަންހެން މީހާ ދެވަނަ ފަހަރަށް އޭނާއާއެކު ދިރިއުޅުމަށް ބޭނުން ނުވާކަމަށް ބުނެފައިވެއެވެ.
ކިޔުންތެރިންގެ ހިޔާލު