ޣައްޒާއަށް ބޯކޮށް ވާރޭވެހި މޫސުން ގޯސްވުމުގެ ސަބަބުން ހަ މީހަކު މަރުވެ، ގެދޮރު ގެއްލިފައިވާ އެތައް ހާސް ބައެއްގެ ޙާލަތު އިތުރަށް ގޯސްވެެއްޖެއެވެ. މަރުވި މީހުންގެ ތެރޭގައި ގަދަ ވަޔާއެކު ވެއްޓުނު އިމާރާތްތަކުގެ ދަށުވި މީހުންނާއި، ފިނިގަދަވުމުގެ ސަބަބުން މަރުވި ތުއްތު ކުއްޖަކު ހިމެނެއެވެ.
މޫސުން ގޯސްވުމުގެ ސަބަބުން ޣައްޒާގެ އެކި ސަރަޙައްދުތަކުގައި ޖަހާފައިވާ ފޭލިގެތަކުގައި ފެންބޮޑުވެ، ގިނަ އަދަދެއްގެ ފޭލިގެތައް ވަނީ ހަލާކުވެފައެވެ. މިކަމުގެ ސަބަބުން ރައްޔިތުން ވަނީ ފިނިމޫސުމުގެ ގަދަ ފިންޏާއި ވަޔަށް ހުށަހެޅިފައެވެ. އެހީތެރިކަން ފޯރުކޮށްދިނުމުގައި ތެޔޮ ލިބުމުގެ ދަތިކަމާއި ވަސީލަތްތައް މަދުވުމުގެ ސަބަބުން ކަމާބެހޭ އިދާރާތަކަށް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ.
ޙަމާސް ޖަމާޢަތުން ހާމަކުރި ގޮތުގައި ފިނި މޫސުން ފެށުނު ފަހުން މިހާތަނަށް 31 މީހުން މަރުވެފައިވާއިރު، ފާއިތުވި 48 ގަޑިއިރުގެ ތެރޭގައި އެކަނިވެސް 7،000 އެއްހާ ފޭލިގެ ވަނީ ސުންނާފަތިވެފައެވެ. އދ. އިން ވަނީ ޣައްޒާގެ ރައްޔިތުން ފެންބޮޑުވުމުގެ ނުރައްކަލަށް ހުށަހެޅިފައިވާކަން ފާހަގަކޮށް، މިވަގުތު އެންމެ މުހިންމީ ބޭނުންވާ މިންވަރަށް ފޭލިގެ ފޯރުކޮށްދިނުން ކަމަށް ބުނެފައެވެ.
ކިޔުންތެރިންގެ ހިޔާލު