ގޯލްޑަން ފުޓްސަލް ޗެލެންޖް 2026 ގައި މިރޭ ކުޅުނު ފޯރިގަދަ މެޗުގައި ލ. ދަނބިދޫ އާއި ލ. ގަން ބައްދަލުކޮށް، 2-0 ގެ ނަތީޖާއަކުން ގަން މޮޅުވެއްޖެއެވެ.
މި މެޗު ފެށިގެން މާގިނަ އިރުތަކެއް ނުވަނީސް ގަމުން ވަނީ މެޗުގެ ކޮންޓްރޯލް ހޯދާފައެވެ. އެގޮތުން، މެޗު ފެށިގެން އެންމެ 17 ސިކުންތުގެ ތެރޭގައި ގަމަށް ލީޑު ނަގައިދިނީ އެ ޓީމުގެ ކެޕްޓަން އަހްމަދު ހަލީމްއެވެ. މިއީ މިއަހަރުގެ މުބާރާތުގައި މިހާތަނަށް ފެނުނު އެންމެ އަވަސް ލަނޑުތަކުގެ ތެރޭގައި ހިމެނޭ ލަނޑެކެވެ.
ގަމުން މެޗުގެ ލީޑު ފުޅާކުރީ ދަނބިދޫ ޓީމުގެ މުހައްމަދު ޝާމިލް އަތުން ބައިކޮޅަށް ވަން ލަނޑަކުންނެވެ. މި ލަނޑަކީ ގަމު ޓީމުގެ ސާމިސް ކުރިއަށް ފޮނުވާލި ވަރަށް ބާރު ހަމަލާއެއް، ދަނބިދޫގެ ޝާމިލްގެ ފައިގައި ޖެހިފައި ގޯލުގެ ތެރެއަށް ވަން ލަނޑެކެވެ.
މުޅި މެޗުގައިވެސް މޮޅު ކުޅުމެއް ދެއްކި ގަމު ޓީމުގެ ކެޕްޓަން އަހްމަދު ހަލީމް އީސާ ވަނީ މި މެޗުގެ މޭން އޮފް ދަ މެޗުގެ މަގާމު ހޯދާފައެވެ.
މި މުބާރާތަކީ ރާއްޖޭގެ ރަށްތަކުގެ މެދުގައި ކުޅިވަރުގެ ރޫހު އާލާކުރުމަށާއި، ފުޓްސަލްގެ ހުނަރުވެރިން އިތުރުކުރުމަށް ބާއްވާ އެންމެ ބޮޑު އެއް މުބާރާތެވެ. މިރޭގެ މެޗުން ލިބުނު މޮޅާއެކު ގަމަށް ވަނީ މުބާރާތުގައި ކުރިއަށް ދިއުމަށް މުހިންމު ފުރުސަތެއް ތަނަވަސްވެފައެވެ.
ކިޔުންތެރިންގެ ހިޔާލު