ގޯލްޑަން ފުޓްސަލް ޗެލެންޖް 2026 ގައި މިރޭ ކުޅުނު ފޯރިގަދަ މެޗުގައި ލ. ފޮނަދޫގެ މައްޗަށް 3-0 ގެ ނަތީޖާއަކުން ކުރިހޯދައި، ލ. އިސްދޫ އިން މޮޅެއް ހޯދައިފިއެވެ.
މި މެޗު ފެށުނީއްސުރެ އިސްދޫ ޓީމުން ދިޔައީ ފޮނަދޫގެ ގޯލަށް ނުރައްކާކޮށް، ގިނަ ހަމަލާތަކެއް އުފައްދަމުންނެވެ. އެގޮތުން މެޗުގެ ފުރަތަމަ ލަނޑު ޖަހައި އިސްދޫއަށް ލީޑު ނަގައިދިނީ އެ ޓީމުގެ ލޫތް އަހުމަދު ފަތުހީއެވެ. ފުރަތަމަ ހާފު އިސްދޫ ކުރީގައި އޮވެގެން ނިމުނުއިރު، ދެވަނަ ހާފު ފެށިގެން މާގިނަ އިރުތަކެއް ނުވަނީސް އިސްދޫގެ ކެޕްޓަން އަލީ މީސާގު އީސާ ވަނީ ވަރުގަދަ ހަމަލާއަކުން އެ ޓީމުގެ ދެވަނަ ލަނޑު ކާމިޔާބުކޮށްދީފައެވެ.
އިސްދޫގެ ތިންވަނަ ލަނޑު ފެނިގެންދިޔައީ މެޗުގެ ފަހުކޮޅު ލިބުނު ހުސް ފުރުސަތެއްގައި އަލީ އަސްހަމް ފޮނުވާލި ހަމަލާއަކުންނެވެ. މި ލަނޑާއެކު އިސްދޫ އިން ވަނީ މެޗުގެ ކާމިޔާބު ކޮށްފައެވެ.
މުޅި މެޗަށް ބަލާއިރު އިސްދޫ ޓީމުން ފެނިގެންދިޔައީ ވަރަށް ބޮޑަށް އެޓޭކަށް އިސްކަންދީގެން ކުޅުނު ތަނެވެ. އޭގެ ބަދަލުގައި ފޮނަދޫ ޓީމުން ބޮޑަށް މަސައްކަތް ކުރީ ޑިފެންސް ވަރުގަދަކޮށް އިސްދޫގެ ހަމަލާތައް ހުއްޓުވުމަށެވެ. ނަމަވެސް އިސްދޫގެ ހަލުވި ކުޅުން ހުއްޓުވުމުގައި ފޮނަދޫއަށް ވަނީ ބޮޑެތި ގޮންޖެހުންތަކަކާ ކުރިމަތިލާން ޖެހިފައެވެ.
މި މެޗުގެ މޭން އޮފް ދަ މެޗުގެ މަގާމު ހޯދީ އިސްދޫ ޓީމަށް ދެވަނަ ލަނޑު ކާމިޔާބުކޮށްދީ، މޮޅު ކުޅުމެއް ދެއްކި އެ ޓީމުގެ ކެޕްޓަން އަލީ މީސާގު އީސާއެވެ. މި މޮޅާއެކު އިސްދޫ އިން ވަނީ މުބާރާތުގެ ގްރޫޕްގައި ލީޑް ހޯދާފައެވެ.
ކިޔުންތެރިންގެ ހިޔާލު