ކަކުލަށް ލިބުނު އަނިޔާއާއެކުވެސް މެޗުތައް ކުޅެ، ސަންޓޯސް ސަލާމަތް ކޮށްދިނުމަށްފަހު ނޭމާ ސާޖަރީ ހަދައިފިއެވެ.
އުމުރުން 33 އަހަރު ނޭމާ ކާމިޔާބުކަމާއެކު ސާޖަރީ ހަދާފައި ވަނީ އިއްޔެގެ ވަގުތެއްގައެވެ. އެ ސާޖަރީ ހެދީ ބްރެޒިލްގެ ގައުމީ ޓީމުގެ ޑޮކްޓަރު ރޮޑްރީގޯ ލާސްމާއެވެ.
ސަންޓޯސްއިން ނެރުނު ބަޔާނުގައި ބުނީ މެނިސްކަސްއަށް ލިބުނު ގެއްލުން އިޔާދަކުރުމަށް އާތްރޮސްކޯޕީ އެއް ފުރިހަމަ ކޮށްފައިވާ ކަމަށެވެ. ނޭމާގެ ސާޖަރީއަށްފަހު އޭނާ އެނބުރި ކުޅުމަށް ނުކުންނާނެ ވަކި ތާރީހެއް ސަންޓޯސްއިން އިއުލާނު ކޮށްފައެއް ނުވެއެވެ.
ނޫސްބަޔާންތަކުން ދައްކާގޮތުގައި ނޭމާ އަނބުރާ ކުޅުމަށް ނުކުންނަން ގާތް ގަނޑަކަށް މަހެއްހާ ދުވަސް ބޭނުންވާނެ ކަމަށެވެ.
ނޭމާގެ ފުރަތަމަ ކްލަބު ސަންޓޯއާ އޭނާ ގުޅުނީ މިއަހަރު ފެބްރުއަރީ އެއްވަނަ ދުވަހުއެވެ. ނޭމާ ސަންޓޯސްއާ ގުޅިފައިި ވަނީ ސައުދީ އަރަބިއާގެ އަލް ހިލާލާއެކު އޭނާ ހަދާފައިވާ އެއްބަސްވުން އުވާލުމަށްފަހުއެވެ.
އޭގެފަހުންވެސް ނޭމާއަށް އަނިޔާގެ ގިނަ މައްސަލައް ކުރިމަތިވެފައިވާ އިރު، ސަންޓޯސްއަށްވެސް މިއީ އުނދަގޫ ސީޒަނެކެވެ. ސީޒަނުގެ އެންމެފަހު ހަތަރު މެޗަށް ދިޔައިރުވެސް ސަންޓޯސް ރެލިގޭޝަން ޒޯނުގައި އޮތް އިރު، އެ ތިން މެޗަށް ދިޔަތަނާ ނޭމާއަށް ވަނީ އަނިޔާވެސް ވެފައެވެ.
އެ އަނިޔާގެ ސަބަބުން ޑޮކްޓަރު ނޭމާއަށް ލަފާ ދިނީ ވަގުތުން ސާޖަރީއަކަށް ދިޔުމަށެވެ. އެހެން ނަމަވެސް، އެ ސާޖަރީ ހަދަން ދެކޮޅު ހަދައި، ނޭމާ ވަނީ ފަހު ހަތަރު މެޗުވެސް ކުޅެފައެވެ.
އެ ހަތަރު މެޗުގައި ފަސް ގޯލް ޖަހައި، ނޭމާ ތަފާތު ދައްކާފައިވެސް ވެއެވެ.
ބްރެޒިލް ގައުމީ ޓީމަށް ނޭމާ ވަނީ ރެކޯޑު 79 ގޯލް ޖަހައިދީފައެވެ. އެހެން ނަމަވެސް، 2023 ވަނަ އަހަރަށްފަހު އެކިއެކި އަނިޔާތަކުގެ ސަބަބުން ނޭމާ ގައުމީ ޓީމަށް ކުޅެފައެއް ނުވެއެވެ.
ނޭމާ ސާޖަރީގެ ކުރިންވެސް ބުނީ އޭނާގެ ޓާގެޓަކީ ވޯލްޑް ކަޕް ކުޅުން ކަމަށާއި، އެކަމަށްޓަކައި ކުރަން ޖެހުނު ހުރިހާ މަސައްކަތެއް ކުރާނެކަމުގެ ޔަގީންކަން ދޭނެ ކަމަށެވެ.
ކިޔުންތެރިންގެ ހިޔާލު