ދާދި ދެންމެއަކު، ދިވެހިރާއްޖޭގެ ކުރީގެ ރައީސް މުޙައްމަދު ނަޝީދާއި، ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ރައީސް ޢަބްދުﷲ ޝާހިދު ބައްދަލުކުރައްވައިފިއެވެ. މި ބައްދަލުވުމުގައި 2028 ވަނަ އަހަރު ބާއްވާ ރިޔާސީ އިންތިޚާބާ ގުޅޭގޮތުން މުހިންމު މަޝްވަރާތަކެއް ކުރެވިފައިވާ ކަމަށް މަޢުލޫމާތު ލިބެއެވެ.
ރައީސް ނަޝީދުގެ ވަރަށް އަރިސް ބޭފުޅަކު “ހަވާސާ” ނޫހަށް މަޢުލޫމާތު ދެއްވަމުން ވިދާޅުވީ، 2028 ވަނަ އަހަރުގެ ރިޔާސީ އިންތިޚާބުގައި އެމްޑީޕީގެ ރައީސް ޢަބްދުﷲ ޝާހިދުއަށް ރައީސް ނަޝީދު ތާއީދުކުރައްވަން ނިންމަވާފައިވާ ކަމަށެވެ. މި ނިންމެވުމަކީ އެމްޑީޕީގެ ތެރޭގައި އެއްބައިވަންތަކަން އިތުރުކުރުމަށް އެޅުނު މުހިންމު ފިޔަވަޅެއްގެ ގޮތުގައި އޭނާ ސިފަކުރެއެވެ.
މި ބައްދަލުވުމުގައި އެމްޑީޕީ ވަރުގަދަ ކުރުމާއި ގުޅޭގޮތުންވެސް ވަނީ ފުޅާ ދާއިރާއެއްގައި މަޝްވަރާކުރެވިފައެވެ. މީގެ އިތުރުން، ދެ ބޭފުޅުން ވަނީ ސަރުކާރު ޒިއްމާދާރު ކުރުވުމާ ގުޅޭގޮތުން ވެސް ޚިޔާލު ބަދަލުކުރައްވާފައެވެ. މި މުހިއްމު ބައްދަލުވުން ކުރިއަށް ގެންދެވިފައިވަނީ އެމްޑީޕީގެ ރައީސް ޢަބްދުﷲ ޝާހިދު ދިރިއުޅުއްވާ ގޭގައެވެ.
ކިޔުންތެރިންގެ ހިޔާލު