އިސްލާމީ މަރުކަޒުގެ ފުރާޅުން ފެން ލީކުވާތީ، އެ މައްސަލަ ހައްލުކުރުމުގެ މަސައްކަތް ފަށައިފިއެވެ.
އިސްލާމީ މަރުކަޒުގެ ޓިނު ބަދަލުކުރުމުގެ މަސައްކަތުގެ ތެރެއިން މިދިޔަ އަހަރު އެ މަސައްކަތްކޮށްފައިވަނީ އެމްޓީސީސީންނެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު، މީޑިއާތަކަށް މިރޭ ފޮނުއްވި މެސެޖެއްގައި ވިދާޅުވީ އިސްލާމީ މަރުކަޒުގައި ޖަހާފައިވަނީ އެސްޓީއޯ އިން ވިއްކާ ޓިނު ކަމަށާއި މިރޭ މަރުކަޒަށް ވާރޭ ވެހުމާ ގުޅިގެން ހުރި ކަންބޮޑުވުންތައް ބަލައިގަންނަ ކަމަށެވެ.
“މައްސަލަ ހައްލުކުރަން ކަމާގުޅޭ ޓީމުތައް މަސައްކަތްކުރަމުންދޭ. އޭގެ ކުރިން ހުރި ޓިނު ބަދަލުކުރީ ވެސް އެތެރެއަށް ވާރޭ ވެހޭތީވެ، 40 އަހަރު ވެފައިވާ ގައުމީ މި ބިނާ ދިމާވެފައިވާ މި މައްސަލަ ހައްލުކުރަން މިނިސްޓްރީން އެންމެ މަތީ ދަރަޖައިގައި މަސައްކަތްކުރާނެކަމުގެ ފުރިހަމަ ޔަގީންކަން އަރުވަން،” މިނިސްޓަރު ވިދާޅުވިއެވެ.
މިއަދު މެންދުރުފަހުން ފެށިގެން މާލެ އާއި ރާއްޖޭގެ އެކި ސަރަހައްދުތަކަށް ދަނީ ވިއްސާރަކުރަމުންނެވެ. ކުރިއަށްއޮތް ދެ ދުވަހު ވެސް ވައިގަދަވެ، ވިއްސާރަކުރާނެ ކަމަށް މޫސުމާ ބެހޭ ގައުމީ އިދާރާ، މެޓް އޮފީހުން ލަފާކުރެއެވެ.
ކިޔުންތެރިންގެ ހިޔާލު