ބ. ދޮންފަނު ބިން ހިއްކުމުގެ މަޝްރޫޢު ކުރިއަށް ނުގެންދަން ނިންމުމުން އެ ރަށުގެ ރައްޔިތުން މުޒާހަރާ ކުރަމުންދާ ކަމަށް ދޮންފަނު ކައުންސިލްގެ ރައީސް އަޙުމަދު އިރުޝާދު ވިދާޅުވެއްޖެއެވެ.
ދޮންފަނުގެ ބިން ހިއްކުން ކުރިއަށް ނުގެންދަން ނިންމަވާފައިވާ ކަމަށް ރައީސް ޑރ. މުޢިއްޒު ވިދާޅުވީ މިއަދު އެމަނިކުފާނު އެކްސްގައި ކުރެއްވި ޕޯސްޓެއްގައެވެ.
ދޮންފަނުގެ ބިން ހިއްކުމާއި ދެކޮޅަށް ގިނަ ބަޔަކު ސޯޝަލްމީޑިއާގައި އަޑުއުފުލަމުންދާ މި ދަނޑިވަޅުގައި ރައީސް ކުރެއްވި ޕޯސްޓްގައި އެމަނިކުފާނު ވިދާޅުވީ ރަށްރަށުގައި ކުރާނެ ކަންކަމާބެހޭ ވަޢުދު ވަނީ އެ ރަށެއްގެ ރައްޔިތުންގެ ފަރާތުން އެދިގެން ކަމަށާ އެކަމަކަށާ ރަށެއްގެ ރައްޔިތުން ބޭނުން ނުވާ ކަމެއް އެ ރަށެއްގައި އެމަނިކުފާނުގެ ސަރުކާރުން ނުކުރާނެ ކަމަށެވެ.
ދޮންފަނުގެ ބިން ހިއްކުން ކުރިއަށް ނުގެންދަވަން ރައީސުލްޖުމްހޫރިއްޔާ ނިންމެވުމާއި ގުޅިގެން ބިން ހިއްކުން ކުރިއަށް ނުގެންދިޔަ ނަމަވެސް ބަނދަރުގެ މައްސަލަ ޙައްލުކުރުމާއި، ގޮޑުދޮށް ޙިމާޔަތްކުރުން ސަރުކާރުން ކުރިއަށް ގެންދާނެ ކަމަށް ގެދޮރުވެރިކަމާބެހޭ ވަޒީރު ޢަބްދުﷲ މުއްޠަލިބު މިއަދު ވަނީ ވިދާޅުވެފައެވެ.
ބިން ހިއްކުން ކުރިއަށް ނުގެންދަވަން ރައީސުލްޖުމްހޫރިއްޔާ ނިންމެވުމާއި ގުޅިގެން ބިން ހިއްކުން ކުރިއަށް ނުގެންދިޔަ ނަމަވެސް ބަނދަރުގެ މައްސަލަ ޙައްލުކުރުމާއި، ގޮޑުދޮށް ޙިމާޔަތްކުރުން ސަރުކާރުން ކުރިއަށް ގެންދާނެއެވެ. https://t.co/YpF5yvIe7y
— Abdulla Muththalib (@muththo) September 9, 2025
ދޮންފަނުގެ ބިން ހިއްކުމާއި ދެކޮޅަށް އަޑު އުފުލަމުން ދަނީ އެރަށުގެ ކައިރީގައި އޮންނަ ހަނިފަޅުބޭއަށް ގެއްލުންވާނެ ކަމަށް ބުނެއެވެ. ހިމާޔަތްކޮށްފައިވާ ހަނިފަޅުބޭއަކީ ގިނަ އަދަދަކަށް މަޑި އާލާވާ ސަރަހައްދެއްކަން ފާހަގަ ކުރެވެއެވެ. އަދި އެ ސަރަހައްދަކީ ދުނިޔޭގައި ވެސް އެންމެ ގިނަ އަދަދަކަށް އެންމަޑި އުޅޭ ސަރަހައްދު ކަމަށް ވެސް އަޑުއުފުލާ ފަރާތްތަކުން ދަނީ ބުނަމުންނެވެ.
ކިޔުންތެރިންގެ ހިޔާލު