ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ގައުމީ މަޖިލީހުން ފާސްކޮށްފައިވާ “ބޮޑު ބަދަލު” އޮފީސް އެ ޕާޓީގެ ޤައުމީ ސެކްރެޓޭރިއަޓުގައި ޤާއިމުކޮށް، އެ އޮފީހުގެ ޑައިރެކްޓާ ޖެނެރަލްގެ މަގާމަށް އަލްއުސްތާޒް ޙަސަން ލަތީފު މިއަދު ހަމަޖައްސައިފިއެވެ.
މިކަން ހާމަކޮށްފައިވަނީ އެމްޑީޕީން މިއަދު އާންމުކުރި ރަސްމީ އިޢުލާނެއްގައެވެ.
އެމްޑީޕީން ބުނި ގޮތުގައި މި އޮފީހަކީ 2026 ވަނަ އަހަރުގެ 4 ވަނަ ދައުރުގެ 35 ވަނަ ގައުމީ މަޖިލީހުގެ ޖަލްސާގައި ރިޔާސަތުން އިއްވަވައި، މެންބަރުންގެ އަޣުލަބިއްޔަތުން ފާސްކޮށްފައިވާ ނިންމުމަކާ ގުޅިގެން އުފެއްދި އޮފީހެކެވެ.
މި އޮފީހުގެ ޑިރެކްޓަރު ޖެނެރަލްގެ މަގާމަށް އައްޔަންކުރެއްވި ޙަސަން ލަތީފަކީ މީގެ ކުރިން ރައްޔިތުންގެ މަޖިލީހުގެ މެމްބަރުކަން ކުރައްވާފައިވާ އަދި ސިޔާސީ ދާއިރާގައި ތަޖުރިބާކާރު ބޭފުޅެކެވެ.
ހަސަން ލަތީފަކީ 2023 ވަނަ އަހަރުގެ ރިޔާސީ އިންތީޚާބާ ދިމާކޮށް އެމްޑީޕީގެ ތެރޭގައި އުފެދުނު ޚިޔާލުތަފާވުންތަކާ ގުޅިގެން އުފެއްދި “ދަ ޑިމޮކްރެޓްސް” ޕާޓީ އުފެއްދުމުގައި އިސްކޮށް އުޅުއްވައި، އެ ޕާޓީގެ ރައީސްކަން ވެސް ކުރައްވާފައިވާ ބޭފުޅެކެވެ. ނަމަވެސް މިހާރު އޭނާ ވަނީ އަލުން އެމްޑީޕީއާ ގުޅިވަޑައިގެން ޕާޓީގެ އިސް މަގާމަކާ ހަވާލުވެވަޑައިގެންފައެވެ.
“ބޮޑު ބަދަލު” އަކީ ކުރީގެ ރައީސް އަދި މިހާރު އެމްޑީޕީގެ ޗެއާޕާސަން މުޙައްމަދު ނަޝީދާއި ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް އިސްވެ ތިއްބަވައިގެން އެކުލަވާލާފައިވާ މެނިފެސްޓޯއެކެވެ. މި މެނިފެސްޓޯގެ މައިގަނޑު ބޭނުމަކީ ރައީސް ޑރ. މުހައްމަދު މުއިއްޒުގެ ސަރުކާރުގެ ކަންކަން އިސްލާހުކޮށް، ސަރުކާރު ޖަވާބުދާރީ ކުރުވުމެވެ.
މި އައު އޮފީސް ގާއިމުކުރުމާއެކު އެމްޑީޕީގެ ސިޔާސީ ހަރަކާތްތަކާއި އިދާރީ ހިންގުން އިތުރަށް ހަރުދަނާވެގެންދާނެ ކަމަށް ބެލެވެއެވެ. އެ އޮފީހުން ބުނާ ގޮތުގައި “ބޮޑު ބަދަލު” ގެ ދަށުން ކުރިއަށްގެންދާ ހުރިހާ މަސައްކަތްތަކެއް ތަންފީޒު ކުރަމުންދާނީ މި އޮފީހުގެ ބެލުމުގެ ދަށުންނެވެ.
މި މަހުގެ 12 ވަނަ ދުވަހު ބޭއްވި އެމްޑީޕީގެ ޗެއާޕާސަން އިންތިޚާބު ކުރީގެ ރައީސް ނަޝީދު ކާމިޔާބު ކުރެއްވީ ވެސް މި “ބޮޑު ބަދަލު” ގެ ދަށުން ކުރިއަށްގެންދިޔަ ވަރުގަދަ ކެމްޕެއިންތަކަށް ފަހުގައެވެ. މި ނިންމުމަކީ ޕާޓީގެ ކުރިމަގަށް އެޅުނު މުހިންމު ފިޔަވަޅެއްގެ ގޮތުގައި ޕާޓީގެ މެންބަރުން ދަނީ ސިފަކުރަމުންނެވެ.
ކިޔުންތެރިންގެ ހިޔާލު