ތާރުއެޅުމުގެ މަސައްކަތް ކުރުމަށްޓަކައި ބޮޑުތަކުރުފާނުމަގު އުތުރުފަރާތް ތަރައްޤީކުރަމުންދާ ސަރަހައްދު ބަންދުކުރުމަށް ނިންމައިފިއެވެ.
ފުލުހުން މިއަދު ބުނީ ތާރުއަޅާތީވެ، މާދަމައިން ފެށިގެން އެ ސަރަހައްދަށް ނުވަދެވޭނޭކަމަށެވެ. އެގޮތުން މިރޭ 12 އިން ފެށިގެން އެ މަސައްކަތް ނިމެންދެން އެ ސަރަހައްދު ބަންދުކުރުމަށް ނިންމާފައިވާކަމަށް ފުލުހުން ބުންޏެވެ.
ބޮޑުތަކުރުފާނުމަގު މިހާރު ހަދަމުންދާ ސަރަހައްދު ތާރުއެޅުމާ ހަމަޔަށް އައިސްފައިވާއިރު، އެ ސަރަހައްދުގެ އެހެނިހެން މަސައްކަތްތަކުގެ ބޮޑު ބައެއް މިހާރު ވަނީ މުޅިންހެން ނިމިފައެވެ. އޭގެ ތެރޭގައި ކޭބަލް ޖަންގްޝަނާއި، ދުވާރާއި ފެންހޮޅު އެޅުމުގެ މަސައްކަތް ހިމެނެއެވެ.
މާލޭގެ އުތުރު ފަރާތު ބޮޑުތަކުރުފާނުމަގުގައި ތާރުއެޅުމުގެ މަސައްކަތަށް 2026 ޖޫން 7 ވަނަ ދުވަހުގެ 00:00 އިން ފެށިގެން ޗާޓުގައި ފާހަގަކޮށްފައިވާ ސަރަހައްދުގެ މަގުތައް ބަންދުކުރެވޭނެ ވާހަކަ ދަންނަވަމަވެ. pic.twitter.com/AcRIcYDoW3
— Maldives Police (@PoliceMv) June 6, 2026
ބޮޑުތަކުރުފާނުމަގު މިހާރު ތަރައްޤީ ކުރަމުންދާ ސަރަހައްދު ނިމުމުން އެ މަގުގެ ޖާގަ ބޮޑުވެގެންދާއިރު، އެ ސަރަހައްދު ތޮއްޖެހުމުގެ މައްސަލައަށް ބޮޑު ހައްލެއް ލިބިގެންދާނޭކަމަށް ސަރުކާރުން ބުނެއެވެ.
މި މަޝްރޫއަކީ ދިވެހި ދައުލަތުގެ ބަޖެޓުން ހަރަދުކޮށްގެން، މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާއިން، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީއާ ހަވާލުކޮށްފައިވާ މަޝްރޫއު އެކެވެ. އެ ކުންފުންޏަށް މި މަސައްކަތް ހަވާލުކޮށްފައި ވަނީ 144,509,024.16 ރުފިޔާ އަށެވެ.
ބޮޑުތަކުރުފާނުމަގު ތަރައްގީކުރުމުގެ މަޝްރޫޢުގެ ދަށުން މާލޭ ވިޔަފާރި ބަނދަރާ ހިސާބުން ފެށިގެން އެމްއެމްއޭ އާ ހިސާބަށް ތަރައްްޤީ ކުރުމުގެ މަސައްކަތް ވަނީ ނިމިފައެވެ.
ކިޔުންތެރިންގެ ހިޔާލު