ދިވެހިންނަށް މުހިންމު އެތަކައް ހުނަރުތަކާއި، ރީތި އާދަކާދަތައް ސްކައުޓުން ވަނީ އުންގަނައިދީފައިކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ފާހަގަކުރާ ގައުމީ ސްކައުޓުންގެ ދުވަހުގެ މުނާސަބަތުގައި ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގައި ސްކައުޓް ހިދުމަށް ފެށުމަށްޓަކައި އިސްނެގި ލީޑަރުންނާއި، މިދިޔަ 70 އަހަރުގެ ތެރޭގައި ސްކައުޓް ހަރަކާތް ދެމެހެއްޓުމުގައި ބައިވެރިވި ހުރިހާ ފަރާތްތަކަށް ދުވަހުގެ މަރުހަބާ ދަންނަވާ ކަމަށެވެ.
“ދިވެހީންނަށް މުހިންމު އެތައް ހުނަރަކާއި، ރީތި އާދަތަކެއް ސްކައުޓް ހަރަކާތުންވަނީ އުންގަނައިދީފައި. ހަރުދަނާ ދަރިންތަކެއް ގައުމަށް ވަނީ ބިނާކޮށްދީފައި. ރާއްޖޭގެ ރަށްތަކުގެ ގުޅުން ބަދަހިކޮށްދިނުމުގެ އިތުރުން ދުނިޔޭގެ ގައުމުތަކާ ރާއްޖެއާ އޮތް ގުޅުން ވަރުގަދަކޮށްދޭ ބާރަކަށްވެސް ސްކައުޓް ވަނީ ވެފައި” ރައީސް ވިދާޅުވިއެވެ.
ރައީސް ވިދާޅުވީ ސްކައުޓް ހަރަކާތަކީ ރައްޔިތުންގެ އިތުބާރާއި އިހުތިރާމް ލިބިފައިވާ އަދި ގައުމު ފަހުރުވެރިވާ ހިދުމަތެއް ކަމަށެވެ. ރާއްޖޭގައި އޮތް އެންމެ ޒަމާންވީ، މުޅި ރާއްޖެއަށް އެންމެ ފުޅާކޮށް ފެތުރިފައިވާ އެންމެ ބޮޑު ވޮލަންޓިއަރީ ހަރަކާތަކީވެސް ސްކައުޓްކަމަށް އެ މަނިކުފާނު ވިދާޅުވިއެވެ.
ރާއްޖެ ހޯދަމުންދާ ކުރިއެރުންތަކާއި އަންނަމުންދާ ތަރައްގީއާއެކު ކުރިމަގުގައި ސްކައުޓް ހަރަކާތް އިތުރަށް ފުޅާކޮށް، ސްކައުޓުން އިތުރުކޮށް، ގައުމީ ހިދުމަތުގައި ސްކައުޓުގެ ދައުރު ފުޅާކުރާނެކަމަށް އެ މަނިކުފާނު ވިދާޅުވިއެވެ.
ކިޔުންތެރިންގެ ހިޔާލު